កម្មករ រោងចក្រ នៅខេត្ត តាកែវ ជាង១ពាន់នាក់ ធ្វើកូដកម្ម
ដោយ ម៉ម មុនីរតន៍ / RFA | 12 May 2014
តំណាងកម្មករអះអាងថា បើភាគីខាងរោងចក្រនៅមិនព្រមចេញមុខដោះស្រាយទេ ពួកគេនឹងបន្តធ្វើកូដកម្មមិនឈប់ឡើយ ប្រឆាំងការគេចវេះក្នុងការទទួលយកការចរចាពីតំណាងកម្មករ ហើយជាពិសេសនោះ បានគំរាមបញ្ឈប់កម្មករបន្ថែមទៀត ដែលជាគំនាបជំរុញឲ្យស្ថានការណ៍កាន់តែអាក្រក់ជាងមុននៅពេលនេះ។
មូលហេតុដែលផ្ទុះកូដកម្មនេះឡើង គឺនៅបន្ទាប់ពីតំណាងកម្មករលោក ចេវ ចាន់ថុល ព្យាយាមបង្កើតសហជីពសេរីកម្មករខ្មែរនៅក្នុងរោងចក្រ ដើម្បីការពារអត្ថប្រយោជន៍សម្រាប់កម្មករ។ ប៉ុន្តែបញ្ហានេះ ត្រូវបានភាគីរោងចក្រជំទាស់ ហើយបញ្ឈប់ពីការងារតែម្ដង។
ក្នុងរយៈពេលនៃការតវ៉ា ចាប់ពីថ្ងៃទី២៩ មេសា មករហូតមកដល់ពេលនេះ មានកម្មករចំនួន ១៤នាក់បន្ថែមទៀត ត្រូវរោងចក្រគ្រោងនឹងបញ្ឈប់ក្នុងពេលឆាប់ៗនេះ។
តំណាងកម្មករដែលមានឈ្មោះ ត្រូវភាគីរោងចក្រគ្រោងបណ្ដេញចេញបន្ថែមទៀត លោកស្រី សុខ ដានី ឲ្យដឹងនៅថ្ងៃទី១២ ឧសភា ថា កម្មករធ្វើកូដកម្មនៅពេលនេះ គឺចង់ឲ្យខាងភាគីរោងចក្រគោរពតាមច្បាប់ការងារស្ដីពីមាតុភាព ក្រោយពេលស្ត្រីសម្រាលកូនរួចហើយ អាចសម្រាកឲ្យបានយូរថ្ងៃ ដែលចំណុចនេះភាគីរោងចក្រពុំបានអនុវត្តទេ ក្នុងពេលកន្លងទៅ ជាពិសេសនោះ កម្មករស្នើឲ្យរោងចក្រផ្ដល់គោលការណ៍មួយចំនួន ដូចជាត្រូវអនុញ្ញាតឲ្យតំណាងកម្មករដែលត្រូវភាគីរោងចក្របញ្ឈប់ហើយ បានវិលចូលធ្វើការឡើងវិញ។
លើសពីនេះ ប្រាក់អត្ថប្រយោជន៍ផ្សេងៗ ដូចជាលុយថ្ងៃបាយ ២ពាន់រៀល និងលុយថ្លៃធ្វើដំណើរចំនួន ១៥ដុល្លារបន្ថែមពីលើប្រាក់ខែគោលរបស់ពួកគេ៖ «ពួកកម្មករហ្នឹង ណា សូមលុយបាយគាត់តែមួយថ្ងៃ ២ពាន់រៀល ក៏គាត់មិនឲ្យ។ លុយបាយថ្ងៃត្រង់។ គាត់និយាយថា ឡើងថា រោងចក្ររបស់គាត់ទើបតែនឹងបើក គាត់គ្មានសមត្ថភាពឲ្យកម្មករ។ ត្រង់ដែលគាត់ជួលប៉ូលិស ជួលអីមកគាត់មានលុយ។ គាត់ជួលមេស្អីៗណាមក និយាយរួមផ្នែកខាងគាត់ហ្នឹងគាត់ជួលមកគាត់មានលុយឲ្យគេ ដល់ពេលពួកកម្មករសុំ គាត់ឥតឲ្យ។»
តំណាងភាគីរោងចក្រ ជេ.អេស.ឌី ថេកស្ដាយ ទទួលបន្ទុកផ្នែករដ្ឋបាលលោក ពិសិដ្ឋ បដិសេធមិនផ្ដល់អត្ថាធិប្បាយជុំវិញបញ្ហានេះទេ ដោយអះអាងថាជាប់រវល់ មុនដាក់ទូរស័ព្ទចុះ។
ការធ្វើកូដកម្មរបស់កម្មករជាង ១ពាន់នាក់ដែលប្រើពេល២សប្តាហ៍មកនេះ ភាគីខាងរោងចក្របានទទួលយល់ព្រមគោលការណ៍ពីរចំណុចក្នុងចំណោមការ ទាមទារទាំងបីចំណុចរបស់កម្មករ គឺអនុញ្ញាតឲ្យតំណាងកម្មករលោក ចេវ ចាន់ថុល បានចូលធ្វើការឡើងវិញ និងព្រមទទួលយកលក្ខខណ្ឌ ដូចដែលមានចែងក្នុងច្បាប់ គឺអនុញ្ញាតឲ្យស្ត្រីសម្រាកបាន ៣ខែ ក្រោយសម្រាលកូនរួច។ ក្រៅពីនេះ ប្រាក់ថ្លៃបាយ ២ពាន់រៀល និងលុយថ្លៃធ្វើដំណើរ ១៥ដុល្លារ ក្នុងមួយខែ ភាគីរោងចក្រមិនឯកភាពទេ៕
No comments:
Post a Comment