ក្រុម Hacker ប្រកាសវាយលុក លើគេហទំព័រ មួយចំនួន ដើម្បីកោះហៅ Hackers ទូទាំងពិភពលោក ចូលរួមប្រតិបត្តិការ ដើម្បី សេរីភាពកម្ពុជា
ដោយ៖ ពេជ្រ សុធារី / វីអូឌី | ថ្ងៃព្រហស្បតិ៍ ទី1 ខែឧសភា ឆ្នាំ2014
ក្រុមបក្ខពួក Hackers ដែលចាប់ខ្លួន បានប្រកាសពីប្រតិបត្តិការ វាយប្រហារ ទៅលើ គេហទំព័រចំនួន ១២៥ នៅជុំវិញពិភពលោក ដើម្បីកោះហៅ Hackers ទាំងអស់ ចូលរួម សេចក្តីប្រកាសព័ត៌មាន "ប្រតិបត្ដិការដើម្បីសេរីភាពកម្ពុជា"។
ក្រុម Hackers បានបង្ហោះនៅក្នុងទំព័រហ្វេសប៊ុករបស់ខ្លួននៅថ្ងៃទី០១ ខែឧសភានេះថា ប្រតិបតិ្តការវាយប្រហារទៅគេហទំព័រចំនួន ១២៥ ទូទាំងពិភពលោក នឹងចាប់នៅថ្ងៃនេះ ដើម្បីកោះហៅ Hackers ជុំវិញពិភពលោកមកចូលរួមសេចក្តីប្រកាសព័ត៌មាន ស្តីពី "ប្រតិបត្ដិការដើម្បីសេរីភាពកម្ពុជា" ហើយនិងវាយប្រហារទៅលើរដ្ឋាភិបាលកម្ពុជា។ ក្រុម Hackers បន្តថា ដោយសារច្រើនគេហទំព័រច្រើនពេក នោះពួកគេមានតែវាយប្រហារ ដោយការ Upload Script (កូដ) ចូលទៅក្នុងគេហទំព័រទាំងនោះ។
ក្រុមអានាមិក Anonymous ធ្លាប់បានសរសេរសារផ្ញើទៅកាន់រដ្ឋាភិបាល នៅក្នុងគេហទំព័ររបស់ខ្លួនដែរថា «បើគ្មានដំណោះស្រាយជាមួយនឹងសមាជិក Anonymous ឲ្យបានត្រឹមត្រូវទេ ពួកគេនឹងធ្វើការ Hack ចូល System របស់ក្រសួងនានា ក្រុមហ៊ុន Internet និងបណ្ណាធនាគារទាំងអស់ រួចបំផ្លាញទិន្ន័យទាំងអស់»។ ពួកគេបន្តថា ការធ្វើបែបនេះ គឺដើម្បីទាមទារភាពត្រឹមត្រូវរបស់ពួកគេមកវិញ។
ក្រុម Hackers បានចាប់ផ្តើមវាយលុកទៅលើគេហទំព័ររដ្ឋ និងឯកជនមួយចំនួន កាលពីចុងខែមេសា បន្ទាប់ពីអាជ្ញាធរកម្ពុជា បានចាប់ខ្លួនក្រុម Hackers កម្ពុជា២នាក់ កាលពីថ្ងៃទី០៧ ខែមេសា ដែលជាការឆ្លើយតបទៅនឹងការព្រមានរបស់ពួកគេទៅកាន់រដ្ឋាភិបាលកម្ពុជា ក្នុងការទាមទារឲ្យដោះលែងសមាជិកក្រុមរបស់ពួកគេទាំងពីរនាក់។
បើតាមគេហទំព័ររបស់អគ្គស្នងការដ្ឋាននគរបាលជាតិនៃក្រសួងមហាផ្ទៃ ក្រុម Hackers កម្ពុជា២នាក់នោះ មានឈ្មោះ ប៊ុន ឃីងមង្គលបញ្ញា ហៅ Sexmachine ឬ Blackcyber ភេទប្រុស អាយុ២១ឆ្នាំ និងម្នាក់ទៀត ឈ្មោះ ជូ សុងហេង ហៅ Zoro ភេទប្រុសអាយុ២១ឆ្នាំ ជានិស្សិតឆ្នាំទី០៣ នៅសាកលវិទ្យាល័យ SETEC។ ពួកគេបានធ្វើសកម្មភាពវាយប្រហារធ្វើឲ្យរអាក់រអួល មិនដំណើរការគេហទំព័រ(DDos) ជ្រៀតចូលបណ្តាញព័ត៌មានវិទ្យាដោយខុសច្បាប់ លួចទិន្នន័យសម្ងាត់ជាតិពីប្រព័ន្ធព័ត៌មាន និងការកែទំព័រដើមនៃគេហទំព័រ ទៅលើស្ថានប័នជាតិសំខាន់ៗ ប្រមាណ៣០ និងស្ថាប័នឯកជនមួយចំនួនទៀត ចាប់តាំងពីមុនការបោះឆ្នោតជាតិជ្រើសរើសតំណាងរាស្ត្រឆ្នាំ២០១៣ ក្នុងនោះមានដូចជា គេហទំព័រគណៈកម្មាធិការជាតិរៀបចំការបោះឆ្នោត អង្គភាពប្រឆាំងអំពើពុករលួយ ក្រសួងការបរទេស ក្រសួងការពារជាតិ និងសាលារាជធានីភ្នំពេញ ជាដើម៕
No comments:
Post a Comment