ពលករខ្មែរ កើនឡើង ជាង១ម៉ឺននាក់ ដែលត្រូវ អាជ្ញាធរ ថៃ ដឹកជញ្ជូន មកទម្លាក់ នៅប៉ោយប៉ែត
ដោយ សួន សុផលមុន្នី / RFA | ១២ មិថុនា ២០១៤
សកម្មភាព ប្រជាពលរដ្ឋ ខ្មែរ ដែលអាជ្ញាធរ ថៃ
ចាប់បញ្ជូន មកដាក់ ចំណុចរង្វង់មូល ខាងមុខច្រកទ្វារ អន្តរជាតិ
ប៉ោយប៉ែត ខេត្ត បន្ទាយមានជ័យ នៅថ្ងៃ ទី១២ ខែមិថុនា ឆ្នាំ២០១៤។ RFA/Soun Sophalmony
ចំនួន ពលរដ្ឋខ្មែរ ដែលអាជ្ញាធរ ថៃ ចាប់បញ្ជូន មកប្រគល់ ឲ្យអាជ្ញាធរ កម្ពុជា វិញមាន ចំនួន កើនឡើង ជាង១ម៉ឺននាក់ នៅក្នុងរយៈពេល តែ ប៉ុន្មានថ្ងៃប៉ុណ្ណោះ។ ជនចំណាកស្រុក កម្ពុជា ទាំងនោះ ត្រូវ បានភាគីថៃ ដឹកជញ្ជូន តាមរថយន្ត តូច ធំ ជាច្រើនគ្រឿង យកមកទម្លាក់ចុះ នៅចំណុចរង្វង់មូល ខាងមុខច្រកទ្វារ អន្តរជាតិ ប៉ោយប៉ែត បណ្ដាល ឲ្យមាន ការកកស្ទះ ចរាចរណ៍។
ទន្ទឹមគ្នានេះ ក្រុមអាជ្ញាធរ មូលដ្ឋាន និងអង្គការ ក្រៅរដ្ឋាភិបាល កំពុងធ្វើ សកម្មភាព ជួយដល់ជនរងគ្រោះ ទាំងនោះ តាមរយៈការផ្ដល់មធ្យោបាយធ្វើដំណើរ និងជំនួយមនុស្សធម៌ផ្សេងៗ។
រថយន្តតូចធំរបស់ភាគីថៃ នៅបន្តកន្ទុយគ្នាដឹកជញ្ជូនពលករខ្មែរក្មេងចាស់ ប្រុសស្រី ជាច្រើន ពាន់នាក់ មកប្រគល់ ឲ្យអាជ្ញាធរ កម្ពុជា តាមច្រកទ្វារ អន្តរជាតិ ប៉ោយប៉ែត ក្នុងខេត្តបន្ទាយមានជ័យ។ នេះជាវិធានការដ៏ធំសម្បើមមិនធ្លាប់មានពីមុនមករបស់រដ្ឋាភិបាលថៃ ដឹកនាំដោយរបបសឹកយោធាក្នុងការបោសសម្អាតទៅលើពលរដ្ឋខ្មែរខុស ច្បាប់ នៅក្នុងទឹកដីរបស់ខ្លួន។
ពលករខ្មែរដែលកំពុងសំចតផ្ដុំគ្នានៅចំណុចរង្វង់មូលប៉ោយប៉ែត នោះ អ្នកខ្លះមានសក់បាសកន្ទ្រើង សម្លៀកបំពាក់មិនសូវមានអនាម័យយូរថ្ងៃ។ អ្នកទាំងនោះត្រូវបានភាគីថៃ ចាប់ខ្លួន និងអ្នកខ្លះទៀតមានការភ័យខ្លាច ក៏នាំគ្នាប្រគល់ខ្លួនឲ្យអាជ្ញាធរថៃ ចាប់ខ្លួន ដើម្បីបានវិលត្រឡប់មកប្រទេសកម្ពុជា វិញ។
ក្នុងបទសម្ភាសន៍ជាមួយវិទ្យុអាស៊ីសេរី ពលរដ្ឋខ្មែរទាំងនោះថ្លែងថា នៅក្នុងប្រទេសថៃ ពួកគេបានធ្វើការនៅកន្លែងផ្សេងគ្នា ហើយមូលហេតុដែលពួកគាត់នាំគ្នាមកស្រុកវិញ គឺដោយសារមានការភ័យខ្លាចចំពោះព្រឹត្តិការណ៍ដែលបានកើតមាននៅក្នុង ប្រទេសថៃ៖ «គេ ថា កុំ នៅធ្វើការអី ព្រោះអី ស្រុកគេ ជ្រួលច្របល់ អ៊ីចឹង។ គេ ឲ្យទៅផ្ទះ, មានតម្រួត, មានអីចុះ ចាប់អ៊ីចឹង, មានទាហាន ចុះចាប់អ៊ីចឹង។ ពួកខ្ញុំ ថា មិនប៉ាច់នៅទេ; ស្រុកគេ ជ្រួលច្របល់; ទៅផ្ទះ ទៅអ៊ីចឹង នាំគ្នា ទៅផ្ទះ...។»
អ្នកខ្លះទៀតបញ្ជាក់ថា ក្នុងរយៈពេលកន្លងមកនេះ មានការផ្សព្វផ្សាយនៅក្នុងទូរទស្សន៍របស់ថៃ ដោយបានប្រាប់ឲ្យពលរដ្ឋខ្មែរនៅក្នុងប្រទេសថៃ ទាំងអស់ ត្រូវនាំគ្នាវិលត្រឡប់ទៅប្រទេសរបស់ខ្លួនវិញ បើពុំដូច្នេះ នៅពេលរដ្ឋអំណាចថៃ ចាប់ខ្លួនបាន នឹងមានការធ្វើទារុណកម្មដល់រាងកាយធ្ងន់ធ្ងរ៖ «ខ្ញុំ មកខ្លួនឯង; ខ្ញុំ ឮគេ ប្រកាស; មើលទូរទស្សន៍; ខ្ញុំមក។ គេ ប្រកាសថា ឲ្យខ្មែរ ឆាប់វិលមកវិញ ក្នុងរយៈពេលថ្ងៃ ទី២៥ នេះ ចេញ មិនអស់ទេ។ គេ ចាប់បានគេ នឹងធ្វើបាប ដល់រាងកាយ, ជិះឡានមេខ្យល់។ ខ្ញុំ ឲ្យម្នាក់អស់ ១.៨០០បាត, ហើយ មេខ្យល់ខ្មែរថៃ នឹងយកយើង មកដាក់ ដូចដាក់ នៅក្នុងគុកអ៊ីចឹង...។»
ពលរដ្ឋខ្មែរ ទាំងនោះ ភាគីច្រើន ត្រូវ គេចាប់ដាក់នៅក្នុងរថយន្តទ្រុងដែលមានសំណាញ់ដែក ហ៊ុមព័ទ្ធជុំវិញ និងពលរដ្ឋខ្មែរខ្លះទៀត ត្រូវបានភាគីថៃ ដឹកជញ្ជូនតាមរថយន្តក្រុង។ ចំណែកឯសម្ភារៈខោអាវ និងឥវ៉ាន់ផ្សេងៗដែលជារបស់របរពលរដ្ឋខ្មែរទាំងនោះ ត្រូវបានភាគីថៃ ដឹកជញ្ជូនផ្ដុំគ្នាតាមរថយន្តផ្សេង។
នៅជុំវិញបរិវេណរង្វង់មូលខាងមុខច្រកទ្វារអន្តរជាតិប៉ោយប៉ែត ពោរពេញទៅដោយបរិយាកាសអាប់អួកកស្ទះចរាចរណ៍ ដោយសារកំណើននៃការដឹកជញ្ជូនពលរដ្ឋខ្មែររបស់រថយន្តថៃ មានការកើនឡើងឥតឈប់ឈរ។ អ្នកខ្លះអង្គុយ អ្នកខ្លះឈរ និងអ្នកខ្លះទៀតដើរប្រសេចប្រសាចពេញផ្លូវ នៅពេលពួកគេរង់ចាំឡើងជិះរថយន្តទៅស្រុកកំណើតវិញ៖ «...សំឡេងប្រកាសទិសដៅឡើងឡាន...។»
ពលករខ្មែរដែលអាជ្ញាធរថៃ ចាប់បញ្ជូនមកវិញ ភាគច្រើនបាត់បង់សម្ភារៈប្រើប្រាស់ផ្ទាល់ខ្លួន និងពុំមាននៅសល់ថវិកាជាប់ខ្លួននោះទេ។ អ្នកខ្លះទៀតពុំមានលទ្ធភាពរកមធ្យោបាយធ្វើដំណើរទៅផ្ទះនោះឡើយ។ ក្នុងរយៈពេលប៉ុន្មានថ្ងៃនេះ ជនចំណាកស្រុកខ្មែរទាំងនោះ អ្នកខ្លះដេកសម្រាកនៅតាមចិញ្ចើមផ្លូវ និងអ្នកខ្លះទៀត ត្រូវបានអាជ្ញាធរជួយសម្រួលនាំចូលទៅដេកនៅតាមទីផ្សារនានាក្នុង ក្រុងប៉ោយប៉ែត។
ស្ថានភាពលំបាកនេះ គេសង្កេតឃើញថា នៅពុំទាន់បានធូរស្បើយនៅឡើយ។ នៅជុំវិញបរិវេណរង្វង់មូលច្រកទ្វារអន្តរជាតិប៉ោយប៉ែត សមត្ថកិច្ចប៉ូលិស និងអាជ្ញាធរមូលដ្ឋាន បានមមាញឹកក្នុងសម្រួលចរាចរណ៍ដែលកំពុងកកស្ទះតាំងពីព្រឹករហូតដល់ យប់។
ទន្ទឹមគ្នានេះ ពលរដ្ឋខ្មែរទាំងនោះក៏បានជួបប្រទះនូវការខ្វះស្បៀង នៅពេលពួកគេត្រូវបានអាជ្ញាធរថៃ បញ្ជូនដល់ទឹកដីកម្ពុជា វិញ។ ដោយមើលឃើញពីស្ថានភាពលំបាកនេះ ប្រជាពលរដ្ឋខ្មែររស់នៅក្រុងប៉ោយប៉ែត អ្នកខ្លះបានជួយឧបត្ថម្ភបាយទឹកដល់ជនរងគ្រោះទាំងនោះ តាមរយៈអាជ្ញាធរមូលដ្ឋាន។ ក្រៅពីនេះ គេក៏សង្កេតឃើញក្រុមយុវជនកាកបាទក្រហម បានចុះធ្វើសកម្មភាពមនុស្សធម៌ចែកបាយ និងទឹកដូចគ្នាដែរ។
អភិបាលក្រុងប៉ោយប៉ែត លោក ង៉ោ ម៉េងជ្រួញ មានប្រសាសន៍ថា នៅថ្ងៃទី៧ ខែមិថុនា ចំនួនពលករខ្មែរមានជាង ១ពាន់នាក់ ដែលគេចាប់បញ្ជូនមកពីប្រទេសថៃ។ ចំនួននេះ កើនឡើងខុសប្រក្រតី។ លោកថា ពលករខ្មែរទាំងនោះពុំមែនជាអ្នកជាប់ពន្ធនាគារទេ តែពួកគេសុទ្ធសឹងជាអ្នកកំពុងធ្វើការងារនៅក្នុងប្រទេសថៃ។
លោកអភិបាលក្រុងបញ្ជាក់ថា ពលរដ្ឋខ្មែរនៅប្រទេសថៃ មានការព្រួយបារម្ភ និងភ័យខ្លាចពីសុវត្ថិភាពផ្ទាល់ខ្លួន ដោយសារតែនៅតាមរោងចក្រដែលមានប្រជាពលរដ្ឋខ្មែរកំពុងធ្វើការនោះ គឺរដ្ឋអំណាចថៃ មានការចុះឆែកឆេររកមើលពលករស្របច្បាប់ និងមិនស្របច្បាប់៖ «អ៊ីចឹងហើយបានយើងដឹងព័ត៌មានជាបន្ទាន់...។»
ក្រុមអាជ្ញាធរទន្ទឹមគ្នានេះ ក៏បានសហការជាមួយអង្គការ អាយ.អូ.អិម (IOM) ដឹកជញ្ជូនពលករខ្មែរទាំងនោះទៅតាមបណ្ដាខេត្តនានា ដោយពុំមានយកថវិកានោះឡើយ។ រហូតមកដល់ថ្ងៃទី១២ ខែមិថុនា ក្រុមអាជ្ញាធរ និងកងកម្លាំងមានសមត្ថកិច្ច ដោយបានសហការគ្នាជាមួយអង្គការ អាយ.អូ.អិម បានត្រៀមរថយន្តរហូតដល់ជាង ២០គ្រឿង។ សម្រាប់ពលរដ្ឋខ្មែរដែលរស់នៅខេត្តស្វាយរៀង ខេត្តព្រៃវែង និងខេត្តឆ្ងាយផ្សេងទៀត អាជ្ញាធរបានត្រៀមដឹកជញ្ជូនអ្នកទាំងនោះដោយរថយន្តក្រុង។
ប្រធានអង្គការខារ៉ាមកម្ពុជា លោក យ៉ា ណាវុធ ថ្លែងថា កន្លងមកនេះ អង្គការលោកទទួលបានពាក្យបណ្ដឹងច្រើនពីប្រជាពលរដ្ឋខ្មែរ ដែលពួកគាត់សុំឲ្យជួយយកចេញពីប្រទេសថៃ។ ប្រជាពលរដ្ឋខ្មែរទាំងនោះមានការភ័យខ្លាចចំពោះស្ថានភាពក្នុងប្រទេស ថៃ ដែលកំពុងអនុវត្តច្បាប់អាជ្ញាសឹកគ្របគ្រងដោយរបបយោធា។ លោកថា ពលរដ្ឋខ្មែរទាំងនោះពិបាកក្នុងការធ្វើដំណើរខ្លាំងណាស់នៅក្នុង ប្រទេសថៃ៖ «គាត់ពិបាកក្នុងការដើរទៅកាន់កន្លែងណាមួយណាស់ ដោយសារតែមានការពង្រាយ និងកម្លាំងប្រដាប់អាវុធផ្សេងៗនៅក្នុងប្រទេសថៃ។ អ៊ីចឹងហើយសេរីភាពនៅក្នុងការដើរហើររបស់គាត់ហ្នឹង គឺត្រូវរឹតត្បិត ហើយមិនអាចធ្វើការជួបជុំគ្នានៅកន្លែងណាមួយបានទេ។»
អភិបាលខេត្តបន្ទាយមានជ័យ លោក គោ ស៊ុំសារឿត មានប្រសាសន៍ថា រដ្ឋាភិបាលកម្ពុជា ថ្មីៗនេះបានដាក់បញ្ជាឲ្យអាជ្ញាធរពាក់ព័ន្ធត្រូវជួយដល់ពលករខ្មែរ ដោយយកចិត្តទុកដាក់បំផុតទាំងមធ្យោបាយដឹកជញ្ជូន និងការហូបចុក។ ទន្ទឹមគ្នានេះ អាជ្ញាធរបានបញ្ជូនមន្ត្រីសុខាភិបាល និងគ្រូពេទ្យចុះប្រចាំការ ចាំជួយសង្គ្រោះដល់ពលករខ្មែរដែលគេដឹកបញ្ជូនមកពីប្រទេសថៃ មកកម្ពុជា។
មន្ត្រីនាំពាក្យក្រសួងការបរទេសកម្ពុជា លោក កុយ គួង បញ្ជាក់ថា មានកត្តាអកុសលមួយចំនួនដែលនាំឲ្យពលរដ្ឋខ្មែរភ័យខ្លាច និងនាំគ្នាវិលត្រឡប់មកប្រទេសកម្ពុជា វិញ។ កត្តាមួយទៀត គឺដោយសារអាជ្ញាធរថៃ ប្រកាសឲ្យរោងចក្រទាំងអស់នៅក្នុងប្រទេសថៃ ឈប់ប្រើពលករខុសច្បាប់។
អាជ្ញាធរខេត្តបន្ទាយមានជ័យ បញ្ជាក់ថា គិតពីថ្ងៃទី៧ រហូតដល់ថ្ងៃទី១២ ខែមិថុនា នេះ ចំនួនពលករខ្មែរដែលអាជ្ញាធរថៃ ចាប់បញ្ជូនមកវិញនេះមានចំនួនកើនឡើងរហូតដល់ជាង ១ម៉ឺននាក់៕
No comments:
Post a Comment