សហគមន៍ ៣ សូម ឲ្យលោក ស៊ូប៊ែឌី ជួយដោះស្រាយ រឿងទំនាស់ដី
វោហារ ជាតិ / វិទ្យុ អាស៊ី សេរី | ១៨ មិថុនា ២០១៤
ប្រជាពលរដ្ឋ សហគមន៍ មកពីបណ្តាខេត្ត
និងរាជធានី ដាក់ញត្តិ នៅស្នាក់ការ អង្គការ សហប្រជាជាតិ នៅថ្ងៃ ទី១៩
មិថុនា ឆ្នាំ២០១៤។ RFA/Leng Maly
ប្រជាពលរដ្ឋ បី សហគមន៍ មកពីខេត្ត ត្បូងឃ្មុំ, ខេត្ត ស្ទឹងត្រែង, រួមទាំង អតីត អ្នកភូមិ បឹងកក់ រាជធានីភ្នំពេញ, នឹងដាក់ញត្តិ នៅស្នាក់ការ អង្គការ សហប្រជាជាតិ នៅភ្នំពេញ នៅរសៀលថ្ងៃ ទី១៩ មិថុនា នេះ ឲ្យជួយដោះស្រាយ រឿងទំនាស់ដី របស់ ពួកគាត់។
អតីត អ្នកភូមិ បឹងកក់ អ្នកស្រី សយ កូឡាប បញ្ជាក់នៅថ្ងៃ ទី១៩ មិថុនា ថា, ការសម្រេច ដាក់ញត្តិ របស់ អ្នកភូមិបឹងកក់ និង ប្រជាពលរដ្ឋ ដែលមាន ទំនាស់ នៅឃុំឃ្សឹម ខេត្តក្រចេះនេះ ធ្វើឡើងបន្ទាប់ ពីប្រជាពលរដ្ឋ មកពីខេត្ត ត្បូងឃ្មុំ បានឡើងមក ភ្នំពេញ នៅថ្ងៃ ទី១៩ មិថុនា ដើម្បី សុំអន្តរាគមន៍ ពីតំណាង អង្គការ សហប្រជាជាតិ ឲ្យជួយដោះស្រាយ ជម្លោះដីដូចគ្នា។
តំណាង ប្រជាពលរដ្ឋម្នាក់ ក្នុងចំណោម អ្នកតំណាង ១៨នាក់, អ្នកស្រី ព្រំ ដាណែត ឲ្យដឹងថា ៖ «ពួកខ្ញុំ ឡើងមកនេះ គឺ ដើម្បី ដាក់ញត្តិ ជួនលោក សុរិយា ស៊ូប៊េឌី ឲ្យជួយ អន្តរាគមន៍ កុំ ឲ្យគេ បណ្ដេញចេញ ពួកខ្ញុំ ចេញពីភូមិ ដែលកំពុង រស់នៅ សព្វថ្ងៃ។ ក្រុមហ៊ុនចម្ការ កៅស៊ូ បានបណ្ដេញ ឲ្យទៅនៅកន្លែងថ្មី, តែ ពួកខ្ញុំ អត់ព្រម។»
អ្នកភូមិដែលឡើងមកតវ៉ានេះ មកពីភូមិខ្នងក្រពើកើត និងខ្នងក្រពើលិច ឃុំទ្រមូង ស្រុកមេមត់។
អ្នកស្រីបញ្ជាក់ថា ទំនាស់ដីនេះ កើតឡើងតាំងពីឆ្នាំ២០០៨ មក ដោយក្រុមហ៊ុនចម្ការកៅស៊ូ បានបណ្ដេញពួកគាត់ចេញឲ្យទៅនៅកន្លែងផ្សេង ដោយក្រុមហ៊ុននេះអះអាងថា ដីភូមិរបស់ពួកគាត់ដែលមានទំហំប្រហែល២០ ហិកតារ ត្រូវបានរដ្ឋាភិបាលលក់ទៅឲ្យក្រុមហ៊ុនអស់ហើយ។
ការតវ៉ានេះ ធ្វើឡើងចំពេលដែលអ្នករាយការណ៍ពិសេសរបស់អង្គការសហប្រជាជាតិទទួល បន្ទុកសិទ្ធិមនុស្ស ប្រចាំនៅកម្ពុជា លោក សុរិយា ស៊ូប៊ែឌី (Surya Subedi) កំពុងបំពេញបេសកកម្មនៅកម្ពុជា ដែលក្នុងនោះលោកបានចុះទៅតំបន់មួយចំនួនដូចជានៅខេត្តកោះកុង ជាដើម ដើម្បីពិនិត្យមើលស្ថានភាពរំលោភសិទ្ធិមនុស្ស ក្នុងការបណ្ដេញប្រជាពលរដ្ឋដោយសាររឿងទំនាស់ដី៕
No comments:
Post a Comment