បក្សធំ ទាំងពីរ គ្រោងជួប ចរចាគ្នា បន្ត ក្នុងសប្ដាហ៍នេះ
ដោយ ទីន ហ្សាការីយ៉ា / RFA | ៤ មិថុនា ២០១៤
រដ្ឋលេខាធិការ ក្រសួង មហាផ្ទៃ, មន្ត្រី គណបក្ស ប្រជាជនកម្ពុជា
លោក ព្រុំ សុខា (ឆ្វេង)
និយាយទៅរក ប្រធាន ក្រុមអ្នក តំណាងរាស្ត្រ បក្សសង្គ្រោះជាតិ លោក សុន
ឆ័យ ក្នុងសន្និសីទកាសែត ក្រោយជំនួប នាមន្ទីរ ព្រឹទ្ធសភា
កាលពីព្រឹកថ្ងៃ ទី១៨ កុម្ភៈ ឆ្នាំ២០១៤។ RFA/Tin Zakariya
មន្ត្រី គណបក្ស សង្គ្រោះជាតិ នៅថ្ងៃ ទី៤ មិថុនា ឲ្យដឹងថា, ក្រុមការងារ នៃគណបក្ស ប្រជាជនកម្ពុជា និងគណបក្ស សង្គ្រោះជាតិ គ្រោងនឹងជួប ចរចាគ្នាបន្ត នៅក្នុងសប្ដាហ៍នេះ។
មន្ត្រី ជាន់ខ្ពស់ គណបក្ស សង្គ្រោះជាតិ លោក គួយ ប៊ុនរឿន មានប្រសាសន៍ ថា, លោក បានជួប តំណាង គណបក្ស ប្រជាជន កម្ពុជា លោក ព្រុំ សុខា ក្រៅផ្លូវការ កាលពីល្ងាចថ្ងៃ ទី៣ មិថុនា និងបាន ជូនសេចក្ដីព្រាង នៃការចរចា ជូនតំណាង គណបក្ស ប្រជាជន កម្ពុជា។
លោក គួយ ប៊ុនរឿន អះអាងថា, លោក ព្រុំ សុខា ស្នើ ឲ្យក្រុមការងារ បក្សទាំងពីរ ជួបពិភាក្សាគ្នា ផ្លូវការ នៅថ្ងៃ ទី៥ មិថុនា, តែ លោក មិនទាន់ ឯកភាព ដោយសារ ចាំពិភាក្សា ជាមួយ ថ្នាក់ដឹកនាំ គណបក្ស សង្គ្រោះជាតិ ជាមុនសិន។
លោក គួយ ប៊ុនរឿន បញ្ជាក់ថា, ការជួបគ្នា ក្រៅផ្លូវការ ម្សិលមិញនោះ បានជជែក សំខាន់ អំពី ក្របខ័ណ្ឌ នៃការកែទម្រង់ ការបោះឆ្នោត។ លោក លើកឡើង ថា, គណបក្ស សង្គ្រោះជាតិ ក៏ស្នើ ឲ្យគណបក្ស ប្រជាជន កម្ពុជា ដាក់របៀបវារៈ មកគណបក្ស សង្គ្រោះជាតិដែរ ដើម្បី ពិភាក្សាគ្នា ថា, ចំណុចណាខ្លះ ត្រូវ យកមក ក្នុងកិច្ចចរចា និងចំណុចណាខ្លះ ដែលមិន យកមកដាក់ លើតុចរចា របស់ សំណើគណបក្ស ទាំងពីរ៕
No comments:
Post a Comment