ពលរដ្ឋ នៅកំពង់ធំ បារម្ភខ្លាច ក្រុមហ៊ុន ឈូសឆាយ ប៉ះពាល់ ដីចម្ការ
ដោយ សូត សុខប្រាថ្នា / RFA | ៤ មិថុនា ២០១៤
ប៉ុន្តែ អាជ្ញាធរ បញ្ជាក់ថា, ក្រុមហ៊ុន ឈូសឆាយ លើដី ក្រុមហ៊ុនប៉ុណ្ណោះ, ហើយ ចំពោះ ការឈូសឆាយណា ប៉ះពាល់ លើដី ប្រជាពលរដ្ឋ ខ្លះនោះ ក៏មាន ការព្រមព្រៀង ជាសំណង់ ឬមានការ ដោះដូរគ្នា ខ្លះដែរ។
ក្រុមហ៊ុន មេគង្គ បានយកគ្រឿងចក្រប្រមាណជា ១០គ្រឿងទៅឈូសឆាយដីដែលក្រុមហ៊ុនគ្រប់គ្រង និងក្បែរដីចម្ការរបស់ពលរដ្ឋទៀតផង។
ប្រជាពលរដ្ឋម្នាក់រស់នៅក្នុងភូមិសុជុល ឃុំផាន់ញើម ស្រុកប្រាសាទបល្ល័ង្គ អ្នកស្រី ឈាន ឡុង ឱ្យដឹងថា គាត់មានដីជាង ៥ហិកតារ ដែលកាន់កាប់តាំងពីឆ្នាំ២០០៨ មក ហើយឥឡូវនេះ ក្រុមហ៊ុនគ្រោងនឹងឈូសឆាយដីរបស់គាត់។ អ្នកស្រីមានក្តីបារម្ភជាខ្លាំងចំពោះបញ្ហានេះ ដោយសារគាត់មិនមានដីកន្លែងផ្សេង និងដីស្រែនោះទេ ប្រសិនបើបាត់បង់ដីនោះ នឹងធ្វើឱ្យជីវភាពគាត់កាន់តែលំបាកមិនខាន។
ប្រជាពលរដ្ឋម្នាក់ទៀតរស់នៅក្នុងឃុំផាន់ញើម សុំមិនបញ្ចេញឈ្មោះ ឱ្យដឹងថា សកម្មភាពដាក់គ្រឿងចក្រឈូសឆាយដីនោះមានជាច្រើនថ្ងៃមកហើយ។ លោកបន្តថា មានប្រជាពលរដ្ឋប្រមាណជិត ៣០០គ្រួសារ ក្នុងឃុំចំនួនបី រួមមាន ឃុំតួត្រឿ ឃុំផាន់ញើម និងឃុំក្រយារ ដែលកំពុងមានការព្រួយបារម្ភចំពោះការឈូសឆាយដីពីសំណាក់ក្រុមហ៊ុន នេះ៖ «ឃាត់គ្រឿងចក្រ ដែលគាត់ ឈូសឆាយ នៅដីចម្ការ របស់ ប្រជាជន គេ ឃាត់ទៅ។ ដល់ពេលឃាត់ទៅ គាត់ ស្តាប់ដែរ; គាត់ ថា គាត់ អត់ហ៊ាន ឈូសឆាយដែរ។ ប៉ុន្តែ ដោយមាន ខាងមេការ, គេ ចេះតែ មកគំរាម ប្រជាជន; ឃើញដាំដំឡូងទៅ, ចេះតែ មកគំរាមថា, មិនបាច់ដាំ មិនបាច់អីទេ។ មិនថា បស់ចាស់ បស់ថ្មីទេ។ គេ ឈូសទាំងអស់ហ្នឹង, ហើយ ប្រជាជន ចេះតែ ព្រួយបារម្ភ មិនដឹង ជាទៅរក អ្នកណាជួយ។»
ប្រភពដដែលបន្ថែមថា ប្រជាពលរដ្ឋដែលកំពុងព្រួយបារម្ភ និងរងផលប៉ះពាល់នោះ គឺមានដើមកំណើតនៅទីនោះតែម្តង ហើយប្រសិនបើក្រុមហ៊ុនឈូសឆាយលើដីរបស់ពួកគាត់ នោះការចំណាយដើមទុនដាំដំណាំទាំងប៉ុន្មាននាពេលកន្លងមក នឹងត្រូវបាត់បង់។ ហើយម្យ៉ាងទៀតនោះ ប្រសិនណាក្រុមហ៊ុនឈូសឆាយលើដីចម្ការចាស់របស់ពួកគាត់ នឹងធ្វើឱ្យកូនចៅរបស់ពួកគាត់មិនបានស្គាល់ដីកេរដំណែលរបស់ខ្លួន ឡើយ។
មេឃុំផាន់ញើម លោក យឹង ទឹប មានប្រសាសន៍ថា ក្រុមហ៊ុនបានយកគ្រឿងចក្រទៅឈូសឆាយនោះ គឺនៅលើដីរបស់ក្រុមហ៊ុនដែលប្រជាពលរដ្ឋបានកាន់កាប់កន្លងមក ប៉ុន្តែក៏មានការឈូសឆាយខ្លះប៉ះពាល់លើដីចម្ការចាស់របស់ ប្រជាពលរដ្ឋខ្លះដែរ។ លោកបន្តថា ការឈូសប៉ះពាល់លើដីប្រជាពលរដ្ឋ ទាំងអ្នកកាន់កាប់ចាស់ និងថ្មីនោះ គឺខាងក្រុមហ៊ុនបានចេញជាគោលការណ៍ដោះស្រាយ ដោយត្រូវចេញថ្លៃពលកម្មសម្រាប់អ្នកកាន់កាប់ថ្មី និងការទិញ ឬដោះដូរសម្រាប់ពលរដ្ឋដែលមានចម្ការចាស់ ជាដើម។
លោក យឹង ទឹប៖ «ដូចខ្ញុំថា អ្នក ដែលធ្វើ នៅប្លុក ក្រុមហ៊ុន ដែលត្រូវ តាមផែនទី ដែលគេ យកណា៎! អ្នក ដែលធ្វើ បស់ចាស់ ផ្លូវការហើយ, មានចុងសន្លឹកហើយ, មានបង្កាន់ដៃ កាន់កាប់ហើយ នៅក្នុងនោះដែរ ក៏គេ ចរចា ជាមួយ យើងដែរ បើ យើង លក់ក៏គេ ទិញតាមតម្លៃ, បើ យើង ដូរ ក៏គេ ដូរមកឱ្យ នៅម៉ាដុប ណាសុទ្ធ ប្រជាពលរដ្ឋណា គេ មានដីដូរ ឱ្យយើង។ បើ យើង មិនលក់ទេ យើង រក្សាទុក ក៏រក្សាទុក ជម្រើស បីហ្នឹងឯង។ អាណោះ អ្នក មានប្លង់ កាន់កាប់ហើយ។»
លោកបន្ថែមថា បញ្ហាដែលកំពុងតែកើតឡើងនោះ ភាគច្រើនកើតឡើងចំពោះតែប្រជាពលរដ្ឋដែលចូលទៅកាន់កាប់ក្រោយឆ្នាំ ២០១២ ប៉ុណ្ណោះ។
តំណាងខាងក្រុមហ៊ុនមេគង្គ លោក គង់ វាត់ មានប្រសាសន៍ថា ការឈូសឆាយនោះ គឺឈូសឆាយលើដីរបស់ប្រជាពលរដ្ឋ ដែលក្រុមហ៊ុនបានទទួលសិទ្ធិវិនិយោគពីរាជរដ្ឋាភិបាលជាយូរមកហើយ ប៉ុន្តែមានប្រជាពលរដ្ឋមួយចំនួនបានចូលកាន់កាប់ដោយខុសច្បាប់៖ «កាប់ នៅលើផ្ទៃដី ក្រុមហ៊ុន ព្រោះ យើង ដឹងថា, ដីហ្នឹង ជាដីក្រុមហ៊ុន ព្រោះ គេ បាញ់ថ្នាំ ក្រហម ក្នុងឆ្នាំ២០១០, ហ្នឹង ក្រុមហ៊ុន បានបាញ់ថ្នាំ ក្រហម ជុំវិញ អស់ហើយ នៅលើផ្ទៃដី វិនិយោគ។ ប៉ុន្តែ បងប្អូន យើងខ្លះ ហ្នឹងថា មកកាប់ហ្នឹង
សូម យកផលស្រូវទេ ដល់ក្រោយមក គាត់ ដាំជាដំឡូង, ដាំជាអី គាត់ មិនចង់ចេញ ពីកន្លែងហ្នឹងទេ ព្រោះ កន្លងមក ពួកបរិស្ថាន គេ បានទៅ ហាមឃាត់។»
លោកបន្តថា ផ្ទៃដីរបស់ក្រុមហ៊ុនដែលទទួលសិទ្ធិវិនិយោគពីរដ្ឋក្នុងការអភិវឌ្ឍ មានចំនួន ៨ពាន់ហិកតារ ហើយខាងក្រុមហ៊ុនបានប្រើប្រាស់ផ្ទៃដីអស់ចំនួនប្រមាណ ៦ពាន់ហិកតារហើយ។ លោកបន្ថែមថា ផ្ទៃដីដែលមានជម្លោះជាមួយប្រជាពលរដ្ឋ គឺមានជិត ២ពាន់ហិកតារ ហើយកន្លងមកខាងក្រុមហ៊ុនក៏បានធ្វើការដោះស្រាយជូនប្រជាពលរដ្ឋ ចំនួនជាង ៤០០ហិកតារហើយដែរ។ លោកបញ្ជាក់ថា សកម្មភាពឈូសឆាយនោះអាចបន្តចំពោះចំណុចណាដែលបានដោះស្រាយជាមួយ ប្រជាពលរដ្ឋរួច ប៉ុន្តែប្រសិនបើមិនទាន់ដោះស្រាយទេ សកម្មភាពឈូសឆាយមិនបន្តឡើយ។
យ៉ាងណាក៏ដោយ លោក យឹប យ៉ូត សមាជិកគណៈកម្មាធិការសម្របសម្រួលរឿងដីធ្លីរវាងប្រជាពលរដ្ឋ និងក្រុមហ៊ុនមេគង្គនោះមើលឃើញថា សកម្មភាពឈូសឆាយហាក់នៅតែបន្ត ប៉ុន្តែគឺឆ្វៀលព័ទ្ធដីប្រជាពលរដ្ឋនៅតំបន់នោះ។ លោកយល់ថា អាជ្ញាធរថ្នាក់លើ និងខាងក្រុមហ៊ុន គប្បីធ្វើការកាត់ផ្ទៃដីដែលប៉ះពាល់ជូនប្រជាពលរដ្ឋទាំងនោះ ដើម្បីរស់បានទាំងអស់គ្នា ពីព្រោះប្រជាពលរដ្ឋនៅតំបន់នោះមិនចង់លក់ដូរអ្វីឡើយ ក្រៅពីចង់បន្តធ្វើចម្ការលើដីរបស់ខ្លួនដដែល៖ «ក្រុមហ៊ុន គួរតែ បញ្ឈប់ទន្ទ្រាន មកទៀត ពីព្រោះ តាមខ្ញុំ មើលទៅ ដី ដែលប្រជាជន ប៉ះពាល់ ជាមួយ ក្រុមហ៊ុន បើ ប្រៀបធៀប ជាមួយ ក្រុមហ៊ុន ដីក្រុមហ៊ុន ធំណាស់។ គួរតែ រ
លោក បន្ថែមទៀត ថា, ប្រជាពលរដ្ឋ ដែលរងផលប៉ះពាល់នោះ មួយភាគធំ គឺពួកគាត់បានកាន់កាប់ដីតំបន់នោះមុនក្រុមហ៊ុនវិនិយោគពីរាជ រដ្ឋាភិបាល ហើយប្រសិនបើខាងក្រុមហ៊ុននៅតែបន្តឈូសឆាយទៀតនោះ វានឹងអាចធ្វើឱ្យមានបញ្ហាកាន់តែធំឡើង៕
No comments:
Post a Comment