ថ្នាក់ដឹកនាំ បក្សសង្គ្រោះជាតិ លុបចោល គម្រោង ទៅឧត្ដរមានជ័យ ដោយសារ មានការរារាំង
ដោយ ហង្ស សាវយុត / RFA | ៨ មិថុនា ២០១៤
កម្លាំងប៉ូលិស ដែលបញ្ជូនមក ពីខេត្ត ឧត្តរមានជ័យ
ប្រដាប់ ដោយខែល, ដំបង, និងកាំភ្លើង
រាយបណ្ដាក់ នៅតាមព្រៃ ជិតតំបន់ ព្រៃស្អាក
ដើម្បី ចាំរារាំងដំណើរ របស់ សកម្មជន គណបក្ស សង្គ្រោះជាតិ
មិនឱ្យចូល ទៅតំបន់ អន្លង់វែង នៅព្រឹកថ្ងៃ ៨ មិថុនា ឆ្នាំ២០១៤។ RFA/Hang Savyouth
មេដឹកនាំ គណបក្ស សង្គ្រោះជាតិ បានបង្ខំចិត្ត រំសាយចោល គម្រោង ចុះ សួរសុខទុក្ខ សកម្មជន របស់ខ្លួន ចំនួន ៣កន្លែង ក្នុងខេត្ត ឧត្តរមានជ័យ ដោយសារ តែ ក្រុមមនុស្ស សុទ្ធតែ ប្រុសៗ ច្រើនរយនាក់ បានរាយបណ្ដាក់ នៅតាមព្រៃ និងដងផ្លូវ សំខាន់ៗ ឆ្ពោះទៅកាន់ ទីរួមស្រុក អន្លង់វែង និងខេត្ត ឧត្តរមានជ័យ នៅស្ទាក់ចាំ រារាំង រំខាន។
ប្រធាន គណបក្ស សង្គ្រោះជាតិ ប្រចាំខេត្ត ឧត្តរមានជ័យ គឺ លោក ឆន សុវណ្ណ។ លោក មានប្រសាសន៍ កាលពីរសៀល ថ្ងៃអាទិត្យ ទី៨ ខែមិថុនា ថា, ចាប់តាំង តែ ពីម៉ោងជាង ១០ព្រឹក មេដឹកនាំ គណបក្ស សង្គ្រោះជាតិ បានសម្រេច លុបចោល ដំណើរ ទៅកាន់ខេត្ត ឧត្តរមានជ័យ៖ «រំសាយ ទូទាំងខេត្ត អស់ហើយ ពីព្រោះ នៅព្រៃស្អាត ពួកក្មេងស្ទាវ សុទ្ធតែ មានដំបង កាន់នៅ នឹងដៃ, ហើយ យាមតាមព្រៃ ៣-៤ គន្លាក់ ឯណោះ។ ផ្លូវ ទៅខាង សំរោង ក៏ដាក់ ៣-៤ កន្លែងដែរ។ យើង ខ្លាចមាន ប្រទូសរ៉ាយ ដល់ប្រជាជន ឬក៏សកម្មជន របស់យើង។»
លោក ឆន សុវណ្ណ បញ្ជាក់ថា, នៅថ្ងៃអាទិត្យ ទី៨ ខែមិថុនា លោក សម រង្ស៊ី ប្រធាន គណបក្ស សង្គ្រោះជាតិ និងលោក កឹម សុខា ជាអនុប្រធាន មានគម្រោង ចុះ សួរសុខទុក្ខ សកម្មជន ចំនួន ៣ កន្លែង នៅស្រុក អន្លង់វែង ដែលជាអតីត តំបន់ផ្ដាច់ខ្លួន ខ្មែរក្រហម នៅក្នុង ទីរួមខេត្ត ឧត្តរមានជ័យ និងនៅស្រុក បន្ទាយអំពិល, ក៏ប៉ុន្តែ ស្ថានការណ៍ មិនអំណោយផល សម្រាប់ ការជួបជុំទេ។
នៅឯ ទីរួមស្រុក អន្លង់វែង ចាប់តាំងតែ ពីតំបន់ ព្រៃស្អាក ជាប់ព្រំប្រទល់គ្នា នឹងស្រុក វ៉ារិន ខេត្ត សៀមរាប គឺ កម្លាំងប៉ូលិស ប្រដាប់ ដោយអាវុធ, ខែល, និងដំបង បានរាយបណ្ដាក់ ជាច្រើន នៅតាមដងផ្លូវ។ ចំណែក កងរាជអាវុធហត្ថវិញ មានដាក់ នៅកន្លែង ស្នាក់ការ សន្តិសុខ លេខ២០២ ចាំកាក់ រថយន្តខ្លះ ដើម្បី ត្រួតពិនិត្យ ក្នុងបំណង រឹតបន្តឹង ការធ្វើដំណើរ ចេញចូល, ហើយ នៅឆ្ងាយ ពីកន្លែងប៉ូលិស និងកងរាជអាវុធហត្ថ ប្រហែល ១គីឡូម៉ែត្រ។ គឺ មានមនុស្ស ជាច្រើន សុទ្ធតែ ប្រុសៗ ដោយមាន ដំបង, ទង់ជាតិ, និងមេក្រូ ចងដាក់ លើដំបូលឡានផង, ដាក់ពង្រាយ តាមមាត់ព្រៃ ជាប់ដងផ្លូវ ដើម្បី រង់ចាំ រារាំងដំណើរ សកម្មជន គណបក្ស សង្គ្រោះជាតិ។
ក្រុមមនុស្ស ទាំងនោះ បានកាក់ រថយន្ត ២គ្រឿង ដែលមាន បេក្ខជន តំណាងរាស្ត្រ នៃគណបក្ស សង្គ្រោះជាតិ ចំនួន ៥រូប និងមន្ត្រី គណបក្ស ចំនួន ៣នាក់ ជិះទៀតផង។ ជាមួយគ្នានោះ ក្រុមមនុស្ស ចាំរាំងផ្លូវ បានសំឡុត គំរាមបេក្ខជន តំណាងរាស្ត្រ គណបក្សប្រឆាំង ព្រមទាំង ឆែកឆេរ យកទ្រព្យសម្បត្តិរ បៀបអនាធិបតេយ្យ។
បេក្ខជន តំណាងរាស្ត្រ ជាប់ឆ្នោត របស់ គណបក្ស សង្គ្រោះជាតិ ប្រចាំមណ្ឌល តាកែវ គឺ លោក ប៉ុល ហំម មានប្រសាសន៍ ថា, នៅពេលរូបលោក និងបេក្ខជន តំណាងរាស្ត្រ ៤រូប ផ្សេងទៀត មកពីមណ្ឌល កំពង់ចាម, បាត់ដំបង, កំពត និងព្រៃវែង បានជិះរថយន្ត ទៅដល់តំបន់ ព្រៃស្អាក ស្រាប់តែ ក្រុមមនុស្ស ដែលប្រឆាំង នឹងគណបក្ស សង្គ្រោះជាតិ បានចេញមក រាំងផ្លូវ, ព្រមទាំង ឆែកឆេរ យកឧបករណ៍ អាយផេត (iPAD) ចំនួន ៥គ្រឿង និងទូរស័ព្ទដៃ ទំនើបៗ ដែលជារបស់ បេក្ខជន តំណាងរាស្ត្រ អស់ចំនួន ៨គ្រឿង។
លោក ប៉ុល ហំម៖ «មិនត្រឹមតែ មិនឱ្យទៅ ដាក់របាំង ការពារទេ គឺ យកឡាន ដឹកដី ១ មកដាក់ ពីមុខ, ហើយ និងដាក់ ពីក្រោយទៀត, រួចហើយ មកទះ កញ្ចក់ឡានយើង ផាំងៗ ឱ្យចុះ។ ចាប់ អូសដៃខ្ញុំ ទៅកៀន មាត់ព្រៃ, ហើយ ចូលមក ឆែកយក ទ្រព្យសម្បត្តិ របស់ ពួកយើង៖ មាន អាយផេត, ទូរស័ព្ទ, វែនតា, ហើយ កាបូប ផ្ទាល់ខ្លួន របស់ខ្ញុំ។ គេ ថា, គេ យកទៅឱ្យមេគេ។ ប៉ុន្តែ ខ្ញុំ សួរ មេណា? គេ អត់ប្រាប់ទេ។ ដូច្នេះ ខ្ញុំ មើលទៅ ឃើញថា, របៀប អនាធិបតេយ្យ, មិនមាន ច្បាប់ទម្លាប់ អីទេ។ ប៉ុន្តែ ការរៀបចំហ្នឹង គឺ ជាទ្រង់ទ្រាយ ដែលមាន ការរៀបចំទុក ជាមុន។»
បើ ទោះបី ជាក្រុមមនុស្ស បានកាក់ រថយន្ត បេក្ខជន តំណាងរាស្ត្រ គណបក្ស សង្គ្រោះជាតិ និងឆែកយក ទ្រព្យសម្បត្តិ ក៏ដោយ ក៏កម្លាំង ប៉ូលិស និងកងរាជអាវុធហត្ថ ដែលដាក់ពង្រាយ នៅក្បែរគ្នានោះ មិនបាន ធ្វើអន្តរាគមន៍ ជួយទេ។
ទោះយ៉ាងណា អភិបាលខេត្ត ឧត្តរមានជ័យ លោក ស ថាវី នៅតែ មិនទទួល ទូរស័ព្ទ ដើម្បី ពន្យល់ជុំវិញ រឿងនោះទេ រយៈពេល ២ថ្ងៃ មកហើយ។
ចំណែក អ្នកនាំពាក្យ ក្រសួង មហាផ្ទៃ លោកឧត្ដមសេនីយ៍ ខៀវ សុភ័គ មានប្រសាសន៍ ថា, លោក មិនទាន់ បានដឹង រឿងនោះ នៅឡើយ, ដូច្នេះ លោក មិនអាច អធិប្បាយ បានឡើយ៖ «ឮសូរតែ អូនឯង ផ្សាយព្រឹក មិញហ្នឹង, ប៉ុន្តែ ព័ត៌មានផ្លូវការ មិនដឹង យ៉ាងណា។ បង មិនអាច អធិប្បាយ បានទេ។ បង សូម ទោស, មិនអាច អធិប្បាយបាន។»
ចាប់តាំងតែ ពីថ្ងៃសៅរ៍ ទី៧ ខែមិថុនា ក្រុមមនុស្ស ដែលគាំទ្រ គណបក្ស កាន់អំណាច បានលើកគ្នា ទៅរារាំង មិនឱ្យ លើកស្លាកសញ្ញា គណបក្ស សង្គ្រោះជាតិ នៅផ្ទះ ជួលមួយកន្លែង ដែលគេ គ្រោងធ្វើ ជាកន្លែងប្រជុំ នៅក្នុង ទីរួមស្រុក អន្លង់វែង។
អង្គការ សិទ្ធិមនុស្ស លីកាដូ និងសមាគម ការពារ សិទ្ធិមនុស្ស អាដហុក ដែលចុះឃ្លាំមើល បានរិះគន់ ថា, សមត្ថកិច្ច ទីនោះ បានព្រងើយកន្តើយ ចំពោះ កិច្ចការពារ សន្តិសុខ ទៅលើ សកម្មជន និងអ្នកតំណាងរាស្ត្រ នៃគណបក្ស ប្រឆាំង។ ដោយឡែក គេ បានមើលឃើញ ក្រុមមនុស្ស ដែលលើកគ្នា រារាំងប្រឆាំង នឹង គណបក្ស សង្គ្រោះជាតិនោះ, គឺ សុទ្ធតែ ជាមនុស្សប្រុស ទាំងអស់, ដូច្នេះ គេ បានចាត់ទុក ថា, មិនមែន ជាប្រជាពលរដ្ឋ ធម្មតាទេ៕
No comments:
Post a Comment