មន្ត្រីជាន់ខ្ពស់ របស់ រដ្ឋាភិបាល យោធាថៃ ស្វែងរក ការគាំទ្រ ពីរាជរដ្ឋាភិបាល កម្ពុជា
វិទ្យុ អាស៊ី សេរី | ១ កក្កដា ២០១៤
រដ្ឋមន្ត្រី ស្ដីទី ក្រសួង ការបរទេសថៃ លោក ស៊ីហាសាក់ ភួងកេតកែវ
(Sihasak Phuangketkeon) [ឆ្វេង]
ជួបពិភាក្សា ជាមួយ រដ្ឋមន្ត្រី ក្រសួង ការបរទេសកម្ពុជា លោក ហោ ណាំហុង
នៅថ្ងៃទី១ កក្កដា ២០១៤។ RFA/Van Vichar
មន្ត្រីការទូត ជាន់ខ្ពស់ របស់ រដ្ឋាភិបាល យោធាថៃ ស្វែងរក ការគាំទ្រ ពីរាជរ
ប្រមុខការទូតនៃរដ្ឋាភិបាលយោធាថៃ សន្យាចំពោះមន្ត្រីកម្ពុជា ថានឹងធ្វើយ៉ាងណាឲ្យប្រទេសរបស់ខ្លួនវិលត្រឡប់ទៅកាន់របប ប្រជាធិបតេយ្យឡើងវិញ។ ប្រទេសថៃ ក៏នឹងរៀបចំការបោះឆ្នោតឡើងវិញនៅខែតុលា ឆ្នាំ២០១៥ ខាងមុខ។ ភាគីទាំងពីរពិភាក្សាគ្នាលើបញ្ហាមួយចំនួន រួមមាន៖ ដំណោះស្រាយបញ្ហាពលករខ្មែរដែលទៅធ្វើការនៅប្រទេសថៃ ការឯកភាពគ្នាបើកច្រកអន្តរជាតិស្ទឹងបត់ កិច្ចព្រមព្រៀងសាងសង់ស្ពានផ្លូវដែកតភ្ជាប់រវាងថៃ និងកម្ពុជា បញ្ហាពលករនៅខេត្តតាកែវ ចំនួន ១៤នាក់ ដែលត្រូវថៃ ចាប់ខ្លួនពីបទធ្វើឯកសារស្នាក់នៅក្លែងក្លាយ និងបញ្ហាទាហានថៃ បាញ់សម្លាប់ពលរដ្ឋខ្មែរដែលចូលកាប់ឈើគ្រញូង។ ទោះជាបែបណាក្តី សំណុំរឿងប្រាសាទព្រះវិហារដែលតុលាការអន្តរជាតិទីក្រុងឡាអេ សម្រេចសេចក្ដីឲ្យកម្ពុជា ឈ្នះថៃ ហើយតម្រូវឲ្យថៃ ដកទ័ពចេញពីដីមានជម្លោះនោះ មិនត្រូវបានភាគីទាំងពីរលើកយកពិភាក្សាឡើយ។
រដ្ឋមន្ត្រីស្ដីទីក្រសួងការបរទេសថៃ លោក ស៊ីហាសាក់ ភួងកេតកែវ ថ្លែងប្រាប់អ្នកកាសែតថា ភារកិច្ចរបស់លោកគឺធ្វើយ៉ាងណាឲ្យប្រទេសនៅក្នុងតំបន់អាស៊ានជឿ ជាក់លើរដ្ឋាភិបាលយោធា ដែលដឹកនាំដោយលោក ប្រាយុទ្ធ។
លោកបន្តថា រដ្ឋាភិបាលថៃ នឹងធ្វើយ៉ាងណាឲ្យទំនាក់ទំនងទ្វេភាគីរវាងប្រទេសទាំងពីរកាន់តែ ប្រសើរ និងប្រយោជន៍ទាំងសងខាង។ លោកបញ្ជាក់ថា ចំពោះរឿងរ៉ាវព្រំដែននៅតំបន់ប្រាសាទព្រះវិហារនោះ ភាគីថៃនឹងដោះស្រាយជាជំហានៗតាមសេចក្ដីសម្រេចរបស់តុលាការ អន្តរជាតិ៖ «យើងនឹងធ្វើតាមអ្វីដែលបានព្រមព្រៀងតាមសាលដីការបស់ តុលាការអន្តរជាតិ ហើយរឿងចាំបាច់ពេលនេះរបស់ប្រទេសថៃ គឺថៃរៀបចំសណ្ដាប់ធ្នាប់ផ្ទៃក្នុងប្រទេស រហូតដល់បង្កើតរដ្ឋាភិបាលរួចសិនចាំធ្វើរឿងនេះ។»
ចំណែករដ្ឋមន្ត្រីក្រសួងការបរទេសកម្ពុជា លោក ហោ ណាំហុង វិញមានប្រសាសន៍ថា កម្ពុជាមិនបានបំភ្លេចសាលដីកាតុលាការអន្តរជាតិទីក្រុងឡាអេ ដែលសម្រេចបកស្រាយសាលក្រមក្នុងសំណុំរឿងប្រាសាទព្រះវិហារឡើយ។ ប៉ុន្តែការដែលកម្ពុជា មិនទាន់មាត់ករឿងអនុវត្តសាលដីកានោះ ដោយសារកម្ពុជា យោគយល់ចំពោះភាគីថៃ ប៉ុណ្ណោះ ក៏ប៉ុន្តែការរង់ចាំរបស់កម្ពុជា ក៏មានពេលវេលាកំណត់ដែរ។
ក្នុងជំនួបជាមួយលោក ហោ ណាំហុង ភាគីថៃ បានយល់ព្រមផ្ដល់កាដូមួយចំនួនដល់ប្រទេសកម្ពុជា។ ថៃយល់ព្រមបង្កើតទីស្នាក់ការចុះឈ្មោះពលករចំណាកស្រុកនៅតាមបណ្ដា ខេត្តតាមព្រំដែនមួយចំនួនដើម្បីទទួលពលករខ្មែរងាយស្រួលចុះឈ្មោះ ធ្វើការដោយស្របច្បាប់។ យល់ព្រមបន្ថយរយៈពេលនៃការស្នើសុំទិដ្ឋាការទៅពីរយៈពេល ៣ថ្ងៃមកនៅត្រឹម១ថ្ងៃ។ ពិចារណារឿងទាហានថៃ បាញ់ពលរដ្ឋខ្មែរដែលចូលកាប់ឈើគ្រញូង និងយល់ព្រមសាងសង់ស្ពានផ្លូវដែកឆ្លងព្រំដែនជាដើម។ ភាគីថៃ ក៏ចាត់ទុកថា ពលករកម្ពុជា ជាផ្នែកមួយនៃកំណើនសេដ្ឋកិច្ចរបស់ថៃទៀតផង។
ទាក់ទងនឹងបញ្ហានេះ អ្នកស្រាវជ្រាវទំនាក់ទំនងអន្តរជាតិ លោកសាស្ត្រាចារ្យ រស់ រ៉ាវុធ មានប្រសាសន៍ថា រដ្ឋាភិបាលយោធាថៃ ងាកមកពង្រឹងការទូតជាមួយកម្ពុជា ដោយសារប្រយោជន៍ពីរធំៗរួមមាន ប្រយោជន៍សេដ្ឋកិច្ចពីវត្តមានពលករខ្មែរទៅធ្វើការនៅថៃ និងរារាំងកុំឲ្យក្រុមប្រឆាំងរដ្ឋាភិបាលយោធាថៃ ណាមួយមានវត្តមាននៅកម្ពុជា។
លោកបន្តថា ការពន្យារពេលជជែករឿងបញ្ហាប្រាសាទព្រះវិហារ អាចមកពីមន្ត្រីធំៗកម្ពុជា មានផលចំណេញផងក៏មិនដឹង។ លោកយល់ថា រដ្ឋាភិបាលកម្ពុជា មិនត្រូវពន្យារពេលអនុវត្តសាលដីការបស់តុលាការអន្តរជាតិរបស់កម្ពុជា តទៅទៀតឡើយ៖ «បើនិយាយពីរឿងខ្សែបន្ទាត់ព្រំដែនវិញ វានៅបិទបាំង វានៅលាក់លៀម ហាក់បីដូចប្រទេសហ្នឹងសម្រាប់តែអ្នកដឹកនាំ អ៊ីចឹងកុំភ្លេចថៃ អត់ដែលទុកមុខឲ្យយើងទេ។ ទី១ ថៃរុញទម្លាក់ភ្នំដករែកដេញឲ្យរត់កាត់ចំការមីនរាប់ម៉ឺននាក់ ប្រជាជនខ្មែរតែងស្លាប់ ធនធានរ៉ែ និងទ្រព្យសម្បត្តិវប្បធម៌ខ្មែរជាច្រើនតែងត្រូវបានថៃ រំលោភយក ថៃមិនដែលទុកមុខឲ្យខ្មែរទេ។»
មកដល់ពេលនេះ ពលករខ្មែរដែលថៃ ចាប់បញ្ជូនមកកម្ពុជាវិញ មានចំនួនជាង ២សែននាក់។ ក្នុងនោះមានពលករខ្មែរចំនួនជាង ១ម៉ឺននាក់ហើយដែលបានស្នើសុំទិដ្ឋាការពីប្រទេសថៃ ដើម្បីត្រឡប់ទៅធ្វើការវិញ៕
No comments:
Post a Comment