ការចាប់ខ្លួនជនជាតិចិនជំរិតមនុស្សតាមប្រព័ន្ធអ៊ីនធឺណែតនៅសៀមរាប (រូបថតដោយ៖ បូ សាវី)
សមត្ថកិច្ច ចាប់បាន ជនជាតិចិន ៧៨នាក់ ពីបទជំរិតមនុស្ស តាមប្រព័ន្ធ អ៊ីនធឺណែត
ដោយ៖ ជន ស្រីណុច / វីអូឌី | ថ្ងៃព្រហស្បតិ៍ ទី3 កក្កដា 2014
មន្ត្រីជំនាញ ក្រសួង មហាផ្ទៃ នៅថ្ងៃព្រហស្បតិ៍នេះ ចាប់បាន ជនជាតិចិន ចំនួន៧៨នាក់ ដែលអះអាង ថាប្រព្រឹត្តិបទល្មើស ចាប់ជំរិតមនុស្ស តាមប្រព័ន្ធ អ៊ីនធឺណែត (VOIP) នៅរាជធានី ភ្នំពេញ និងក្នុងខេត្តចំនួនពីរ ។
អ្នកនាំពាក្យ អគ្គស្នងការដ្ឋាន នគរបាលជាតិ លោក គៀត ច័ន្ទថារិទ្ធ ប្រាប់ VOD នៅរសៀល ថ្ងៃទី០៣ ខែកក្កដានេះថា បន្ទាប់ពី កំលាំងជំនាញ បានធ្វើការស៊ើបអង្កេត អស់មួយរយៈពេល នៅថ្ងៃនេះសមត្ថកិច្ច ចូលទៅបង្ក្រាប នៅតំបន់គោលដៅ ចំនួនបី រួមមាន ភ្នំពេញ ខេត្តសៀមរាប និងតាកែវ ដែលចាប់បាន ជនជាតិ សរុប៧៨នាក់ ជាប់ពាក់ព័ន្ធ នឹងការចាប់ជំរិតមនុស្ស តាមប្រព័ន្ធអ៊ីនធឺណែត ។ លោក បន្តថា នៅខេត្តសៀមរាប ចំនួន៤៤នាក់ នៅខេត្តតាកែវ ចំនួន២៨នាក់ និងនៅរាជធានី ភ្នំពេញ ស្ថិតក្នុងខណ្ឌសែនសុខ ចំនួន៦នាក់ ដែលកំពុងលាក់ខ្លួន ក្នុងផ្ទះជួល ។
លោក គៀត ច័ន្ទថារិទ្ធ បញ្ជាក់ថា ជនជាតិចិន ទាំងអស់នោះ ខ្លះបានបញ្ជូន ទៅស្នងការ នគរបាលជាតិ តែខ្លះទៀត កំពុងនៅទីតាំង ដែលសមត្ថកិច្ច ចុះបង្ក្រាប ។
កន្លងទៅ រដ្ឋាភិបាល កម្ពុជា ធ្លាប់ចាប់បាន ជនអន្តោប្រវែសន៍ ជនជាតិចិន រាប់រយនាក់ ដែលមកប្រព្រឹត្តិបទល្មើស ចាប់ជំរិតមនុស្ស តាមប្រព័ន្ធ អ៊ីនធឺណែត (VOIP) ហើយក៏បានបញ្ជួនពួកគេ ត្រឡប់ទៅកាន់ ប្រទេសកំណើតវិញ តែរដ្ឋាភិបាល កម្ពុជា ក៏មិនបានដាក់ទោសទណ្ឌ អ្វីទៅលើ ពួកគេទេ ៕
No comments:
Post a Comment