លោក កឹម សុខា ផ្ដួចផ្ដើម ឲ្យបង្កើត មជ្ឈមណ្ឌល កត់ត្រាទុក ឯកសារ ឧក្រិដ្ឋកម្ម
RFA | ៥ កក្កដា ២០១៤
លោក កឹម សុខា អនុប្រធានគណបក្សសង្គ្រោះជាតិ
ថ្លែងក្នុងពិធីបុណ្យរំលឹកខួបរដ្ឋប្រហារថ្ងៃទី៥-៦ កក្កដា
លើកទី១៧ ឆ្នាំ១៩៩៧ នៅថ្ងៃទី៥ ខែកក្កដា ឆ្នាំ២០១៤។ RFA/Leng Maly
នៅព្រឹកថ្ងៃ ទី៥ កក្កដា គណបក្ស សង្គ្រោះជាតិ ធ្វើបុណ្យ រំលឹកខួប រដ្ឋប្រហារ ថ្ងៃទី៥-៦ កក្កដា លើកទី១៧ ដែលជា ព្រឹត្តិការណ៍ បង្ហូរឈាមគ្នា រវាង គណបក្ស ហ៊្វុនស៊ិនប៉ិច និងគណបក្ស ប្រជាជនកម្ពុជា នៅឆ្នាំ១៩៩៧។
អនុប្រធាន និងជាប្រធាន ស្ដីទី គណបក្ស សង្គ្រោះជាតិ លោក កឹម សុខា អះអាងថា នឹងបង្កើត មជ្ឈមណ្ឌល រក្សាទុក ឯកសារ ឧក្រិដ្ឋកម្មមួយ ដើម្បី បំបាត់និទ្ទណ្ឌភាព នៅកម្ពុជា។
លោក កឹម សុខា ថ្លែងប្ដេជ្ញា នយោបាយ នៅក្នុងពិធី បុណ្យរំលឹកខួប រដ្ឋប្រហារ លើកទី១៧ នៅថ្ងៃ ទី៥ កក្កដា ថា ការផ្ដួចផ្ដើម បង្កើតមជ្ឈមណ្ឌល កត់ត្រាទុក ឯកសារ ឧក្រិដ្ឋកម្ម គឺ ជាយន្តការ ធានា បញ្ចប់និទ្ទណ្ឌភាព នៅកម្ពុជា និងរកយុត្តិធម៌ ដល់អ្នក ដែលស្លាប់ នៅក្នុងឧក្រិដ្ឋកម្ម ចាប់តាំង ពីឆ្នាំ១៩៩៣ មក៖ «ដើម្បី បញ្ចប់និទ្ទណ្ឌភាពនេះ ដើម្បី រកយុត្តិធម៌ ឱ្យអ្នកទាំងឡាយ ដែលស្លាប់ ដោយអំពើ ឧក្រិដ្ឋ របស់ អ្នកមានអំណាច កន្លងមកនេះ, យើងខ្ញុំ នឹងស្នើ ឱ្យមានបង្កើត មជ្ឈមណ្ឌលមួយ, គេ ហៅថា មជ្ឈមណ្ឌល កត់ត្រា នូវឧក្រិដ្ឋកម្ម ទាំងឡាយ ដែលកើតមាន នៅកម្ពុជា នៅក្នុង ព្រះរាជាណាចក្រ កម្ពុជា ទីពីរនេះ ចាប់ពីឆ្នាំ ១៩៩៣ មក។»
លោក បញ្ជាក់ថា ឧក្រិដ្ឋកម្មដែលលោកចង់ឱ្យកត់ត្រាទុកក្នុងមជ្ឈមណ្ឌលរក្សាទុកឯកសារ នេះ មានជាអាទិ៍ ការសម្លាប់ លោក ជា វិជ្ជា ការបោកគ្រាប់ថ្ងៃទី៣០ ខែមីនា ឆ្នាំ១៩៩៧ រដ្ឋប្រហារថ្ងៃទី៥-៦ កក្កដា និងការបាញ់ប្រហារនៅខែមករា ឆ្នាំ២០១៤ នេះជាដើម។
លោក កឹម សុខា ថ្លែងទៀតថា ការរំលឹកខួបរដ្ឋប្រហារលើកទី១៧ នេះ គឺរំលឹកដល់វិញ្ញាណក្ខន្ធអ្នកដែលលោកចាត់ទុកថា ស្លាប់ដើម្បីបុព្វហេតុឯករាជ្យភាពជាតិ អធិបតេយ្យ បូរណភាពទឹកដីពេញលេញ មិនរណបបរទេស និងលទ្ធិប្រជាធិបតេយ្យ៖ «សុទ្ធ តែជាយុទ្ធមិត្តរបស់គណបក្សសង្គ្រោះជាតិ ពីព្រោះគណបក្សសង្គ្រោះជាតិ មានគោលបំណងដូចជាយុទ្ធយើងដែលបានបូជាជីវិតកន្លងទៅនេះដែរ ... ការស៊ូរបស់គណបក្សសង្គ្រោះជាតិ គឺជាការបន្តវេនរបស់អ្នកទៅនោះ។»
នៅក្នុងពិធីបុណ្យរំលឹកខួបរដ្ឋប្រហារលើកទី១៧ នៅថ្ងៃទី៥ កក្កដា លោក កឹម សុខា ក៏បានថ្លែងសារនយោបាយដាក់អ្នកនយោបាយដទៃទៀតដែរ។ ក្នុងនោះ លោកថ្លែងសំដៅការបង្កើតគណបក្សថ្មីរបស់អតីតប្រធានគណបក្ស ហ៊្វុនស៊ិនប៉ិច គឺសម្ដេចក្រុមព្រះ នរោត្ដម រណឫទ្ធិ៖ «ខ្ញុំនិយាយឱ្យ ចំចុះ សម្ដេចក្រុមព្រះ នរោត្ដម រណឫទ្ធិ នាំកងទ័ពប្រឆាំងគណបក្សប្រជាជន មែនឬមិនមែនបងប្អូន? បើ រណឫទ្ធិ អត់នាំទេ អ្នកទាំងនោះអត់ទៅទេ។ អ៊ីចឹងពេលអ្នកនាំទៅហើយ គេសម្លាប់កូនចៅរបស់ខ្លួន ហើយសម្ងំចង់បង្កើតគណបក្សគាំទ្រអ្នកសម្លាប់កូនចៅខ្លួនទៀត តើមេហ្នឹងអន់ដល់ប៉ុណ្ណា?»
នៅមិនទាន់មានការឆ្លើយតបយ៉ាងណាពីសម្ដេចក្រុមព្រះ នរោត្តម រណឫទ្ធិ ចំពោះប្រសាសន៍របស់ លោក កឹម សុខា នោះនៅឡើយ នៅរសៀលថ្ងៃទី៥ ខែកក្កដា។
នៅក្នុងពិធីនេះ យើងឃើញមានការចូលរួមពីអ្នកនយោបាយជើងចាស់មួយចំនួនទៀត ដូចជា លោក ប៉ែន សុវណ្ណ អតីតប្រធានគណបក្សប្រជាជនកម្ពុជា លោក សឺន ស៊ូប៊ែរ្តិ៍ ប្រធានគណបក្សសិទ្ធិមនុស្ស និងលោក លឺ ឡាយស្រេង ដែលជាអតីតមន្ត្រីជាន់ខ្ពស់គណបក្សហ៊្វុនស៊ិនប៉ិច។
ទាក់ទងនឹងព្រឹត្តិការណ៍នេះដែរ ប្រធានគណបក្ស សម រង្ស៊ី លោក គង់ គាំ ថ្លែងរិះគន់គណបក្សធ្លាប់ឈ្លោះគ្នា គឺគណបក្សប្រជាជនកម្ពុជា និងគណបក្សហ៊្វុនស៊ិនប៉ិច ដែលមិនហ៊ានហៅព្រឹត្តិការណ៍បង្ហូរឈាមនៅថ្ងៃទី៥-៦ ខែកក្កដា ឆ្នាំ១៩៩៧ នោះ ថាជារដ្ឋប្រហារ។
ទាក់ទងនឹងស្ថានការណ៍នយោបាយបច្ចុប្បន្នវិញ លោក កឹម សុខា ថ្លែងថា គណបក្សសង្គ្រោះជាតិ នៅតែរក្សាជំហរទាមទារឱ្យមានការកែទម្រង់គណៈកម្មាធិការរៀបចំការ បោះឆ្នោត ដោយការជ្រើសរើសតាមសំឡេង ២ភាគ៣ ដដែល៕
No comments:
Post a Comment