អ្នកនាំពាក្យ ស្ថានទូត វៀតណាម៖ ខ្ញុំ មិនសុំទោស ហើយអ្នកតវ៉ា រំលោភច្បាប់ កម្ពុជា និងអន្តរជាតិ
ដោយ៖ ស៊ុន ណារិន / វីអូឌី | ថ្ងៃអង្គារ ទី8 កក្កដា 2014
អ្នកនាំពាក្យ ស្ថានទូត វៀតណាម លោក ត្រឹង វ៉ានថុង (Trung Van Thong) ឆ្លើយតប នឹងការតវ៉ារបស់ ប្រជាពលរដ្ឋខ្មែរ នៅព្រឹកថ្ងៃអង្គារនេះ ថា លោក នឹងមិនសុំទោស តាមការទាមទារ លើការថ្លែង របស់ លោក ឡើយ ដោយចាត់ទុក ការតវ៉ា ជាការរំលោភច្បាប់ កម្ពុជា និងអន្តរជាតិ។
នៅព្រឹកថ្ងៃអង្គារនេះ អ្នកតវ៉ា បានប្រមូលផ្តុំ នៅមុខស្ថានទូត វៀតណាម ក្នុងបំណង ទាមទារ ឲ្យប្រទេសនេះ សុំទោស ចំពោះការដែល មន្ត្រី វៀតណាម អះអាងថា ទឹកដីកម្ពុជាក្រោម ជារបស់វៀតណាម តាំងពីអតីតកាល។ សមត្ថកិច្ចចម្រុះ និងអ្នកតវ៉ា បានប៉ះទង្គិចគ្នា ដោយមាន ការបំបែក ការតវ៉ា ការគប់ដំថ្ម រហូតធ្វើឲ្យ មនុស្ស យ៉ាងតិច ១០នាក់ រងរបួស។
លោក ត្រឹង វ៉ានថុង ប្រាប់សារព័ត៌មានShanghay Dailyនៅថ្ងៃអង្គារនេះថា លោកមិនមានគម្រោងសុំទោសចំពោះការថ្លែងរបស់លោកឡើយ។ សារព័ត៌មានបានដកស្រង់សម្តីរបស់លោក ត្រឹង វ៉ានថុង ថា«ខ្ញុំពុំមានអ្វីសំទោសសម្រាប់ការថ្លែងរបស់ខ្ញុំទេ ពីព្រោះទឹកដីផ្នែកខាងត្បូងវៀតណាមជាកម្មសិទ្ធិរបស់វៀតណាម។ អ្នកតវ៉ាកំពុងតែរំលោភច្បាប់កម្ពុជា និងអន្តរជាតិ។»
កាលពីដើមខែមិថុនា ឆ្នាំ២០១៤ អ្នកនាំពាក្យស្ថានទូតវៀតណាមប្រចាំនៅក្នុងប្រទេសកម្ពុជា លោកត្រឹង វ៉ានថុង បានអះអាងប្រាប់អ្នកសារព័ត៌មានថា«បារាំងមិនបានកាត់ ទឹកដីខ្មែរកម្ពុជាក្រោមឲ្យវៀតណាមទេតែកម្ពុជាក្រោម ជាទឹកដីរបស់វៀតណាម តាំងពីយូរយារណាស់មកហើយព័ត៌មានបាត់បង់ទឹកដីគ្មានអ្វីជាមូលដ្ឋានទេ គ្មានអ្វីជាភ័ស្តុតាងទេ។»
អ្នកនាំពាក្យទីស្តីការគណៈរដ្ឋមន្ត្រី លោក ផៃ ស៊ីផាន នៅថ្ងៃអង្គារនេះ អំពាវនាវប្រជាពលរដ្ឋខ្មែរដែលបានចូលតវ៉ានៅមុខស្ថានទូតវៀតណាមប្រចាំកម្ពុជារឿងដីកម្ពុជាក្រោម កុំឲ្យមានអំពើហិង្សាណាមួយកើតឡើង ដើម្បីរក្សាទំនាក់ទំនងល្អជាមួយប្រទេសវៀតណាម។
លោក ផៃ ស៊ីផាន មានប្រសាសន៍ថា ប្រសិនបើមើលទៅលើទិដ្ឋភាពច្បាប់អន្តរជាតិ មន្ត្រីរបស់ស្ថានទូតដែលបោះទីតាំងនៅកម្ពុជា មានសិទ្ធិបញ្ចេញមតិរបស់គេនៅលើទឹកដីកម្ពុជា។ លោកបន្តថាប្រជាពលរដ្ឋមានសិទ្ធិក្នុងការសម្តែងរបស់គេតទល់នឹងបញ្ហាអ្វីមួយ។ លោកអំពាវនាវកុំឲ្យមានអំពើហិង្សាកើតឡើង និងឲ្យប្រជាពលរដ្ឋខ្មែរ រក្សាភាពថ្លៃថ្នូរនៃប្រជាជាតិកម្ពុជា និងចូលរួមសហការជាមួយរដ្ឋាភិបាល ក្នុងការគោរពច្បាប់ជាតិ និងអន្តរជាតិ គឺតាមអ្វីដែលមានចែងក្នុងគោលការណ៍អាស៊ាន។
លោក ផៃ ស៊ីផាន បញ្ជាក់ថា«រាជរដ្ឋាភិបាល ដំណាក់កាលទី១ យើងផ្អាករាល់សកម្មភាពណាដែលយើងយល់ឃើញថា ប៉ះពាល់ដល់សណ្តាប់ធ្នាប់ជាមួយនឹងការរំលោភលើច្បាប់ជាតិ និងច្បាប់អន្តរជាតិ ដែលអាចបង្កនូវភាពហិង្សាណាមួយ។....វិធានការទី២ នៅក្នុងជំហររបស់រដ្ឋាភិបាល គឺយើងគោរពនូវអ្វីដែលចែងនៅក្នុងច្បាប់អន្តរជាតិ យើងគោរពនូវអ្វីដែលជានិន្នារបស់អាស៊ានដែលជាច្បាប់ក្នុងតំបន់៕»
No comments:
Post a Comment