លោក សម រង្ស៊ី ផ្ញើសារ ពន្យល់ អ្នកគាំទ្រ ឲ្យយល់ ពីការចូលរួម សភា
លោក សម រង្ស៊ី (ស្ដាំ) ប្រធាន គណបក្ស សង្គ្រោះជាតិ
ថ្លែងក្នុង សន្និសីទកាសែត នាស្នាក់ការ កណ្ដាល គណបក្ស សង្គ្រោះជាតិ
នៅព្រឹកថ្ងៃ ទី២៩ ខែសីហា ឆ្នាំ២០១៣។ RFA/Tin Zakariya
លោក សម រង្ស៊ី ប្រធាន គណបក្ស សង្គ្រោះជាតិ ផ្ញើសារ លួងចិត្ត អ្នកគាំទ្រ កុំឲ្យអន់ចិត្ត ពេលសង្គ្រោះជាតិ ចូលសភា ជាមួយ បក្សប្រជាជន។
លោក សម រង្ស៊ី បានផ្ញើសារ នយោបាយ អំពាវនាវ ទៅកាន់ អ្នកគាំទ្រ បក្សសង្គ្រោះ ឲ្យទប់ចិត្ត កុំអាក់អន់ចិត្ត ឬខឹង នឹងថ្នាក់ដឹកនាំបក្ស ដែលបាន សម្រេច ចូលរួមសភា ជាមួយ បក្សប្រជាជន នៅពេលថ្មី យ៉ាងតក់ក្រហល់ ដែលធ្វើ ឲ្យអ្នកគាំទ្រខ្លះ មិនពេញចិត្ត។
លោក សម រង្ស៊ី ថ្លែង នៅក្នុងវីដេអូឃ្លីបមួយ មានរយៈពេលជិត ៥នាទី ព្យាយាមពន្យល់ប្រាប់អ្នកគាំទ្រថា ការសម្រេចចិត្តចូលនេះគឺជាការត្រឹមត្រូវ និងស្របតាមតាមកាលៈទេសៈ នៃសភាពការនយោបាយបច្ចុប្បន្នភាព ដែលអាចឲ្យបក្សសង្គ្រោះជាតិបន្ត ទាមទារធ្វើការកែទម្រង់ស្ថាប័ននានា ដូចកែទម្រង់គណៈកម្មាធិការជាតិរៀបចំការបោះឆ្នោត ដែលនឹងឈានឡើងឲ្យមានការផ្លាស់ប្ដូរបានសម្រេចដូចបំណងអ្នកគាំទ្រ បក្សទៅអនាគត។
លោក សម រង្ស៊ី ថ្លែងដូច្នេះ ៖ «មុន នឹងវិនិច្ឆ័យ ឬធ្វើការ ថ្កោលទោស អ្វីមួយ, សូម បងប្អូន ជនរួមជាតិ រង់ចាំ បន្តិចសិន ទាល់តែ ពេលវេលា ការងារ របស់យើង និងលទ្ធផល ដែលយើង ទទួលបាន បានចេញ ជារូបរាង ច្បាប់លាស់ ទើប បងប្អូន ជនរួមជាតិ អាចវិនិច្ឆ័យ ថា, ត្រូវ ឬក៏មិនត្រូវ។ ចំពោះខ្ញុំ យល់ថា គ្មាន ជម្រើសណាល្អ ជាងជម្រើស ដែលយើង បានសម្រេច នេះទេ។ ទី១ គឺ យើង បានបញ្ចប់ សភាពការណ៍ តានតឹង, អ្នក ដែលត្រូវ បានគេ ចាប់ខ្លួន, ហើយ យកទៅដាក់ ពន្ធនាគារ គឺ ត្រូវ បានដោះលែង អស់ហើយ។ បន្តិចទៀតនេះ ទីលាន ប្រជាធិបតេយ្យ នឹងត្រូវ បើកឡើងវិញ ដើម្បី ឲ្យប្រជាពលរដ្ឋ ឲ្យប្រជាពលរដ្ឋ ទៅជួបជុំគ្នា ដូចពេល មុនៗ ទៀត, បម្រាមហាមឃាត់ មិនឲ្យ ប្រជាពលរដ្ឋ ធ្វើបាតុកម្ម ដង្ហែក្បួន តាមផ្លូវ, បម្រាមនោះ ត្រូវ លប់ចោល, គឺ យើង នឹងមាន សិទ្ធិសេរីភាព ដូចដើមវិញ។»
សារនយោបាយរបស់លោក សម រង្ស៊ី ពេលនេះ បន្ទាប់ពីមានពលរដ្ឋ និងអ្នកគាំទ្របក្សសង្គ្រោះជាតិ ខ្លះបានបង្ហោះមតិយោបល់ អាក់អន់ចិត្ត និងបញ្ចេញកំហឹងរបស់ខ្លួន ដៀមដាមដាក់មេដឹកនាំបក្សសង្គ្រោះជាតិ តាមរយៈហ្វេសប៊ុក ដោយសារពួកគាត់មិនពេញចិត្ត និងមិនចង់ឲ្យបក្សសង្គ្រោះជាតិ ចូលរួមរដ្ឋាភិបាលដែលដឹកនាំដោយបក្សប្រជាជន ដែលពួកគាត់យល់ថា នឹងចាញ់ល្បិចកលនយោបាយរបស់បក្សប្រជាជន ហើយបក្សប្រជាជន នឹងបំផ្លាញបក្សសង្គ្រោះជាតិឲ្យរលាយ ដូចដែលបក្សប្រជាជន បានកម្ទេចបក្សនយោបាយមួយចំនួនកន្លងមក ដូចជា បក្សសេរីនិយមព្រះពុទ្ធសាសនា ដែលដឹកនាំដោយ លោក សឺន សាន និងបក្សហ៊្វុនស៊ីនប៉ិចជាដើម។
ទោះយ៉ាងណាការសម្រេចចិត្តរបស់បក្សសង្គ្រោះជាតិ ចូលសភានឹងបក្សប្រជាជន ក្នុងចំនួនកាលពីថ្ងៃទី២២ កក្កដា បានទម្លាយភាពទាល់ច្រកនយោបាយ ដែលបានជាប់គាំងអស់ជិតមួយឆ្នាំមកហើយនោះ ត្រូវបានមជ្ឈដ្ឋានជាតិ និងអន្តរជាតិនានា អបអរសាទរ ជាពិសេសអង្គការសហប្រជាជាតិដែលបានទទូចឲ្យបក្សទាំងពីរចរចាគ្នា បញ្ចប់នយោបាយជាប់គាំងប្រកបដោយសន្តិវិធី និងស្ងៀមស្ងាត់ កាលពីពេលកន្លងមក៕
No comments:
Post a Comment