លោក សម រង្ស៊ី ថា, កិច្ចចរចា នឹងអាចប្រព្រឹត្ត ទៅបាន ចាប់ពីថ្ងៃ ទី២១ កក្កដា
RFA | ១៩ កក្កដា ២០១៤
លោក សម រង្ស៊ី ប្រធាន គណបក្ស សង្គ្រោះជាតិ
ធ្វើដំណើរ តាមបណ្ដោយ មហាវិថី សហព័ន្ធរុស្ស៊ី ឆ្ពោះទៅ រមណីយដ្ឋាន វត្ត
ភ្នំ នៅថ្ងៃ ទី១៩ ខែកក្កដា ឆ្នាំ២០១៤។ RFA/Uon Chhin
មេដឹកនាំ គណបក្ស សង្គ្រោះជាតិ ប្រកាស ចរចា ជាមួយ ថ្នាក់ដឹកនាំ កំពូល គណបក្ស ប្រជាជនកម្ពុជា។ ប្រធាន គណបក្ស សង្គ្រោះជាតិ លោក សម រង្ស៉ី ថ្លែង នៅខាងមុខ ស្នាក់ការ គណបក្ស ថា, កិច្ចចរចា រវាង ថ្នាក់ដឹកនាំ កំពូល គណបក្ស ទាំងពីរ នឹងអាចប្រព្រឹត្ត ទៅបាន ចាប់ពីថ្ងៃ ទី២១ ខែកក្កដា តទៅ។
របៀបវារៈ នៃកិច្ចចរចានោះ រួមមាន៖ ការដោះលែង អ្នកតំណាងរាស្ត្រ និងសកម្មជន ដែលកំពុង ជាប់គុក, សេរីភាព ក្នុងការបញ្ចេញមតិ, បើកទីលាន ប្រជាធិបតេយ្យ ឡើងវិញ, និងការកែទម្រង់ ការបោះឆ្នោត។ លោក សម រង្ស៉ី បញ្ជាក់ថា, លោក ជឿថា ខ្មែរ និងខ្មែរ នឹងដោះស្រាយ បញ្ចប់បញ្ហា ជាប់គាំង នយោបាយ នេះបាន។
លោក សម រង្ស៊ី នឹងជួបប្រជុំ ជាមួយ អ្នកគាំទ្រ នៅទីស្នាក់ការ ជំនួស ការជួប នៅវត្តភ្នំ
លោក សម រង្ស៊ី នឹងជួបប្រជុំ ជាមួយ អ្នកគាំទ្រ របស់ គណបក្ស សង្គ្រោះជាតិ នៅទីស្នាក់ការ គណបក្ស នាសង្កាត់ ចាក់អង្រែ លើ ខណ្ឌមានជ័យ ជំនួស ឲ្យការជួបប្រជុំ នៅវត្តភ្នំ។ អ្នកនាំពាក្យ គណបក្ស សង្គ្រោះជាតិ លោក យឹម សុវណ្ណ ពុំបានបញ្ជាក់ អ្វីច្រើនទេ ចំពោះ ការផ្លាស់ប្ដូរ ទិសដៅ របស់ គណបក្ស ពីការជួបជុំ នៅវត្តភ្នំ ទៅទីស្នាក់ការ បក្សនេះទេ ដោយអះអាង ថា គឺ ប្រធាន គណបក្ស លោក សម រង្ស៊ី ចង់ជួប អ្នកគាំទ្រ នៅស្នាក់ការ បក្សវិញ។ក្បួន ដែលដឹកនាំ ដោយលោក សម រង្ស៊ី បានសម្រេច បត់ក្បាល ចូលទៅផ្លូវ មុនីវង្ស នៅពេល ទៅដល់ រង្វង់មូល ធនាគារ កាណាឌីយ៉ា ដោយមិនបន្ត ទៅវត្តភ្នំឡើយ។ ដោយឡែក នៅទីលាន ប្រជាធិបតេយ្យ អាជ្ញាធរ ពង្រាយកម្លាំង រឹតបន្តឹង សុវត្ថិភាព ក្នុងតំបន់ ជុំវិញនោះ ហាក់ដូច ជាត្រៀម ជាស្រេច ដើម្បី រក្សាសុវត្ថិភាព ក្នុងតំបន់នោះ, ប៉ុន្តែ ពុំឃើញ មានក្រុមសន្តិសុខ សាលាខណ្ឌ ត្រូវ ដាក់ពង្រាយ ដូចសព្វដងឡើយ។
លោក សម រង្ស៊ី ប្រកាសស្នើ ឲ្យមាន ការចរចាបន្ទាន់ ជាមួយ បក្សប្រជាជន
មេដឹកនាំគណបក្សប្រឆាំង ប្រកាសជាសាធារណៈដោយស្នើឲ្យមានការចរចាបន្ទាន់ជាមួយគណបក្សប្រជាជន កម្ពុជា ដើម្បីដោះស្រាយបញ្ហាចម្រូងចម្រាសនយោបាយកម្ពុជា បច្ចុប្បន្ន និងឲ្យមានការដោះលែងបេក្ខជនតំណាងរាស្ត្រគណបក្សនេះពីពន្ធនាគារ។លោក សម រង្ស៊ី បានប្រកាសបែបនេះពេលក្បួនដឹកនាំអ្នកគាំទ្របានទៅដល់ខាងមុខ ទីស្ដីការគណៈរដ្ឋមន្ត្រី។ លោកបញ្ជាក់ទៀតថា បញ្ហាឃុំខ្លួនបេក្ខជនតំណាងរាស្ត្រគណបក្សសង្គ្រោះជាតិ បញ្ហាជាប់គាំងនយោបាយ និងការបិទទីលានប្រជាធិបតេយ្យ គឺឋិតនៅក្នុងកញ្ចប់តែមួយ ដែលត្រូវដោះស្រាយបញ្ចប់តាមរយៈការចរចារវាងគណបក្សជាប់ឆ្នោតទាំង ពីរ ដែលលោកគិតថាអាចនឹងធ្វើឡើងក្នុងពេលឆាប់ៗនេះ។
លោក សម រង្ស៊ី ប្រកាសដឹកនាំយុទ្ធនាការរំដោះទីលានប្រជាធិបតេយ្យ
លោក សម រង្ស៊ី ប្រកាសដឹកនាំយុទ្ធនាការទាមទារដោះលែងបេក្ខជនតំណាងរាស្ត្រគណបក្សសង្គ្រោះជាតិ និងរំដោះទីលានប្រជាធិបតេយ្យ។ថ្លែងនៅខាងមុខប្រលានយន្តហោះអន្តរជាតិភ្នំពេញ នៅពេលទើបមកដល់ភ្លាមៗ លោក សម រង្ស៊ី សង្ឃឹមថា ដំណើរត្រឡប់មកវិញរបស់លោក នឹងធ្វើឲ្យស្ថានភាពនយោបាយនៅកម្ពុជា បានធូរស្រាល។ លើសពីនេះ លោកនឹងចាប់ផ្ដើមដឹកនាំការទាមទារឲ្យមានការដោះលែងបេក្ខជនតំណាង រាស្ត្រទាំង ៧នាក់ ដែលកំពុងជាប់ឃុំដោយពុំមានលក្ខខណ្ឌ និងរំដោះទីលានប្រជាធិបតេយ្យ។
ប្រធានគណបក្សសង្គ្រោះជាតិ ដឹកនាំអ្នកគាំទ្រឆ្ពោះទៅរមណីយដ្ឋានវត្តភ្នំ ដើម្បីជួបប្រជុំអ្នកគាំទ្ររបស់គណបក្ស និងទាមទារអោយអាជ្ញាធរដោះលែងទីលានប្រជាធិបតេយ្យ។
ភ្លាមៗបន្ទាប់ពីបានមកដល់កម្ពុជា លោក សម រង្ស៊ី ប្រធានគណបក្សសង្គ្រោះជាតិ ធ្វើដំណើរតាមដងផ្លូវសហព័ន្ធរុស្ស៊ី នាំមុខអ្នកគាំទ្រសំដៅទៅតំបន់ដែលទីលានប្រជាធិបតេយ្យ តាំងនៅ។
លោក សម រង្ស៊ី មកដល់កម្ពុជានៅម៉ោងប្រមាណ ៩ព្រឹកថ្ងៃទី១៩ កក្កដា
លោក សម រង្ស៊ី ប្រធានគណបក្សសង្គ្រោះជាតិ ត្រឡប់មកដល់ប្រទេសកម្ពុជា វិញហើយនៅម៉ោងប្រមាណ ៩ព្រឹកថ្ងៃសៅរ៍ ទី១៩ កក្កដា តាមការគ្រោងទុក។អ្នកគាំទ្រជាច្រើន បានចាំទទួលដំណើរវិលមកវិញរបស់មេបក្សប្រឆាំងរូបនេះ។ ចរាចរណ៍លើផ្លូវសហព័ន្ធរុស្ស៊ី ចាប់តាំងពីមុខអាកាសយានដ្ឋានអន្តរជាតិភ្នំពេញ បន្តរហូតដល់ខាងមុខវិទ្យាស្ថានបច្ចេកវិទ្យានៃកម្ពុជា (តិចណូ) ចាប់ផ្ដើមកកស្ទះ។
ចាប់តាំងពីព្រឹកព្រលឹមថ្ងៃសៅរ៍ នេះ ប្រជាពលរដ្ឋអ្នកគាំទ្របក្សសង្គ្រោះជាតិ បានប្រមូលផ្ដុំគ្នាជាក្រុមៗចាំទទួល លោក សម រង្ស៊ី ដោយក្នុង១ក្រុមៗមានមនុស្សពី ៥០ ទៅ ១០០នាក់ ប្រមូលផ្ដុំជាដុំៗ។
No comments:
Post a Comment