គណបក្ស ទាំងពីរ ថ្លែងសារ សន្តិភាព ក្នុងរដ្ឋសភា ពេលបក្ស ប្រឆាំង ចូលប្រជុំ លើកដំបូង
៨ សីហា ២០១៤
សមាជិក គណបក្ស ប្រឆាំង ចូលរួមប្រជុំ សភា នៅថ្ងៃ ទី៨ សីហា ឆ្នាំ២០១៤។ RFI/Siv Channa
នៅថ្ងៃសុក្រ ទី០៨ សីហានេះ
សមាជិក ទាំង៥៥រូប របស់ គណបក្ស សង្គ្រោះជាតិ
បានចូលប្រជុំ សភា លើកដំបូងហើយ បន្ទាប់ ពីបានស្បថ ក្នុង
ព្រះបរមរាជវាំង កាលពីថ្ងៃ ទី៥ សីហា កន្លងទៅ។
ជាកិច្ចប្រជុំ វិសាមញ្ញ ពិសេស ដែលមាន សមាជិកសភា ជាប់ឆ្នោត
ទាំងពីរ គណបក្ស, ពោល គឺ គណបក្ស ប្រជាជនកម្ពុជា
និងគណបក្ស សង្គ្រោះជាតិ។
មេដឹកនាំ គណបក្ស ទាំងពីរ បានប្រកាស បញ្ចប់ជម្លោះ នយោបាយ នៅកម្ពុជា។
ទីបំផុត ទៅសមាជិក ទាំង៥៥រូប របស់ គណបក្ស សង្គ្រោះជាតិ បានចូល ទៅអង្គុយ ក្នុងរដ្ឋសភា ជាលើកដំបូង នៅថ្ងៃសុក្រនេះ បន្ទាប់ ពីបិទបញ្ចប់ជម្លោះ នយោបាយ រយៈពេល មួយឆ្នាំ។ កិច្ចប្រជុំ លើកដំបូង ដែលមាន វត្តមាន សមាជិក បក្សប្រឆាំង នៅថ្ងៃនេះ រដ្ឋសភា បានអនុម័ត បង្កើតគណៈកម្មកា ជំនាញ ទី១០ របស់ រដ្ឋសភា តាមកិច្ចព្រមព្រៀង រវាង គណបក្ស ទាំងពីរ។ នេះ ជារបៀបវារៈ តែមួយគត់ នៅក្នុងកិច្ចប្រជុំ រួមគ្នា លើកដំបូង រវាង តំណាងរាស្ត្រ គណបក្ស ប្រជាជន កម្ពុជា និងគណបក្ស សង្គ្រោះជាតិ។
ក្រៅពីរបៀបវារៈ ដែលបានគ្រោងទុក សារនយោបាយ សន្តិភាព និងការលុបបំបាត់ ហិង្សា សងសឹកគ្នា រវាង ខ្មែរ និងខ្មែរ ត្រូវ បានមេដឹកនាំ គណបក្ស ប្រជាជនកម្ពុជា និងគណបក្ស សង្គ្រោះជាតិ បានលើកឡើង។ ថ្លែងទៅកាន់ សមាជិកសភា ជាលើកដំបូង, លោក សម រង្ស៊ី ប្រធាន គណបក្ស សង្គ្រោះជាតិ បានថ្លែង ថា ការប្រជុំ សភា ដែលមាន សមាជិក ទាំងពីរ គណបក្ស ចូលប្រជុំ ជាមួយគ្នានេះ គឺ ជាការបង្កើតទំព័រ សករាជថ្មី ក្នុងសង្គមកម្ពុជា ដែលធ្លាប់តែ ញ៉ាំញី ដោយអំពើហិង្សា សងសឹកគ្នា។
ក្រៅពីការឡើងថ្លែង អំពាវនាវ ឱ្យបញ្ឈប់ ការប្រើប្រាស់ យុទ្ធសាស្ត្រឈ្នះ ចាញ់រៀងខ្លួននោះ, ប្រធាន គណបក្ស ប្រឆាំង បួនអាណត្តិ លោក សម រង្ស៊ី បានអំពាវនាវ ឱ្យបង្កើតវប្បធម៌ ពិភាក្សា រវាង បក្សទាំងពីរ ដោយសន្តិវិធី គ្រប់កាលៈទេស។ លោក សម រង្ស៊ី បានគូសបញ្ជាក់ ថា ក្នុងវប្បធម៌ ថ្មីនេះ មិនសំខាន់ឡើយ អ្នកណា ជាអ្នកឈ្នះ, ហើយ អ្នកណា ជាអ្នកចាញ់នោះ។ អ្វី ដែលសំខាន់នោះ គឺ ការស្វែងរក គំនិតជាវិជ្ជមាន ដើម្បី កសាងប្រទេសជាតិ ជាចិរភាព។
ជាការឆ្លើយតប ក្នុងសម្តីផ្លែផ្កាឱ្យគណបក្សសង្គ្រោះជាតិ លោកនាយករដ្ឋមន្ត្រីហ៊ុន សែន បានស្វាគមន៍ចំពោះការលើកឡើងរបស់ប្រធានគណបក្សប្រឆាំង ក្នុងការបិទបញ្ចប់វប្បធម៌ហិង្សាជាមួយគ្នានោះ។ ប្រមុខរដ្ឋាភិបាល និងជាអនុប្រធានគណបក្សប្រជាជនកម្ពុជារូបនេះ បានសង្កត់ធ្ងន់ថាការសម្រេចបាននៅការស្រុះស្រួលនយោបាយនេះ គឺមិនបានមកពីការជេរប្រមាថគ្នា និងការប្រឈមដាក់គ្នានោះទេ។
សូមបញ្ជាក់ជូនថា ការប្រជុំសភាវិសាមញ្ញដែលបានសម្រេចអនុម័តបង្កើត គណកម្មការជំនាញសភាទី១០ថ្មីមួយទៀតដើម្បីប្រគល់ឱ្យគណបក្សសង្គ្រោះ ជាតិ គឺជារបៀបវារៈមួយមុននឹងគណបក្សទាំងពីរឈានដល់ការជ្រើសរើសក្បាលម៉ាស៊ីន រដ្ឋសភា ការបង្កើតគណៈកម្មាធិការជាតិរៀបចំការបោះឆ្នោត និងវិសោធនកម្មរដ្ឋធម្មនុញ្ញជាដើម។ ដំណើរការនេះគឺយោងទៅតាមកិច្ចព្រមព្រៀងនៃការចរចារវាងគណបក្សទាំងពីរ កាលពីថ្ងៃទី២២ កក្កដា។
ទន្ទឹមនឹងការចូលប្រជុំសភាវិសាមញ្ញដែលមានសមាសភាពទាំងពីរគណបក្សនេះ ពីទីក្រុងញ៉ូយក សហរដ្ឋអាមេរិក លោក បានគីម៉ូន អគ្គលេខាធិការអង្គការសហប្រជាជាតិ ក៏បានប្រកាសស្វាគមន៍ចំពោះទំព័រថ្មីរបស់រដ្ឋសភាកម្ពុជាផងដែរ។ លោកបានគីម៉ូន បានស្នើឱ្យបក្សទាំងពីរសហការគ្នាដើម្បីដឹកនាំនាវាកម្ពុជាឆ្ពោះទៅ កំណែទម្រង់និងពង្រឹងស្ថាប័នប្រជាធិបតេយ្យក្នុងន័យជាប្រយោជន៍ដល់ ប្រជាពលរដ្ឋកម្ពុជា៕
No comments:
Post a Comment