កម្ពុជា សម្រេច ទទួលយក ជនភៀសខ្លួន ពីអូស្ត្រាលី
RFA | ២៧ សីហា ២០១៤
រដ្ឋលេខាធិការ ក្រសួង ការបរទេស កម្ពុជា លោក អ៊ុច បូរិទ្ធិ
ថ្លែងប្រាប់ អ្នកកាសែត បន្ទាប់ជំនួប ទ្វេភាគី ជាមួយ ឧបការីរង
រដ្ឋមន្ត្រី ការបរទេស សហរដ្ឋអាមេរិក លោក ស្កុត ម៉ាកសែល (Scot Marciel)
នាទីស្ដីការ គណៈរដ្ឋមន្ត្រី នៅថ្ងៃ ទី២៧ ខែសីហា ឆ្នាំ២០១៤។
RFA/Vann Vichar
កម្ពុជា សម្រេចចិត្ត ទទួល ជនភៀសខ្លួន ពីអូស្ត្រាលី ឲ្យមករស់នៅ ក្នុងកម្ពុជាហើយ។ នេះ ជាការបញ្ជាក់ ជាថ្មី របស់ មន្ត្រីជាន់ខ្ពស់ ក្រសួង ការបរទេស កម្ពុជា នៅក្នុងជំនួប ជាមួយ ឧបការីរង រដ្ឋមន្ត្រី ក្រសួង ការបរទេស សហរដ្ឋ អាមេរិក នៅព្រឹកថ្ងៃ ទី២៧ ខែសីហា នាទីស្ដីការ ក្រសួង ការបរទេស កម្ពុជា។
ក្នុងជំនួបទ្វេភាគីរវាងមន្ត្រីជាន់ខ្ពស់កម្ពុជា ជាមួយឧបការីរងរដ្ឋមន្ត្រីការបរទេសសហរដ្ឋអាមេរិក លោក ស្កុត ម៉ាកសែល (Scot Marciel) បានពិភាក្សាលើកិច្ចការបរទេសមួយចំនួន ក្នុងនោះក៏បានផ្ដោតសំខាន់លើបញ្ហាកម្ពុជា គ្រោងទទួលជនភៀសខ្លួនពីប្រទេសអូស្ត្រាលី នៅពេលខាងមុខនេះ។
រដ្ឋលេខាធិការក្រសួងការបរទេសកម្ពុជា លោក អ៊ុច បូរិទ្ធិ បានបញ្ជាក់ជំហររបស់កម្ពុជា ថា កម្ពុជា នឹងទទួលយកជនភៀសខ្លួនពីប្រទេសអូស្ត្រាលី ពិតមែន តែទទួលយកតាមគោលការណ៍មនុស្សធម៌ប៉ុណ្ណោះ។ លោក អ៊ុច បូរិទ្ធិ មានប្រសាសន៍បន្តថា កម្ពុជា និងអូស្ត្រាលី បានជជែកគ្នាពីយន្តការផ្សេងៗមុននឹងទទួលយកជនភៀសខ្លួនពី អូស្ត្រាលី ប៉ុន្តែពេលវេលា និងទីកន្លែងទទួលជនភៀសខ្លួន ដែលភៀសខ្លួនពីប្រទេសកំណើតរបស់ខ្លួនទៅអូស្ត្រាលី ហើយអូស្ត្រាលី គ្រោងបញ្ជូនបន្តមកកម្ពុជា នោះ មិនទាន់ត្រូវបានមន្ត្រីកម្ពុជា ប្រាប់ឲ្យដឹងទេ។ លោក អ៊ុច បូរិទ្ធិ ពន្យល់ថា កម្ពុជា និងអូស្ត្រាលី នៅពិភាក្សាលម្អិតជាមុនសិន។
ចំណែកមន្ត្រីការទូតអាមេរិក លោក ស្កុត ម៉ាកសែល វិញ មិននិយាយជាមួយអ្នកកាសែតឡើយ។
លោក អ៊ុច បូរិទ្ធិ លើកឡើងថា ភាគីអាមេរិក គ្រាន់តែសួរប៉ុណ្ណោះ ហើយមិនបញ្ចេញទស្សនៈបែបណាជុំវិញបញ្ហានេះទេ។
ក្រៅពីជជែកពីរឿងបញ្ជូនជនភៀសខ្លួនពីប្រទេសអូស្ត្រាលី មកកម្ពុជា ភាគីអាមេរិក ក៏ស្នើឲ្យកម្ពុជា ឯកភាពតាមការលើកឡើងរបស់រដ្ឋមន្ត្រីការបរទេសអាមេរិក លោក ចន ឃែររី (John Kerry) ក្នុងកិច្ចប្រជុំមន្ត្រីការបរទេសអាស៊ាន នៅប្រទេសភូមា។ លោក ចន ឃែររី ចង់ឲ្យភាគីជម្លោះនៅសមុទ្រចិនខាងត្បូង ចុះសន្ធិសញ្ញាថ្មីមួយ ស្ដីពីការធ្វើសកម្មភាពដោយសេរីនៅទីនោះ។
ភាគីកម្ពុជា មិនទាន់សម្រេចថាយល់ព្រមតាមសំណើរបស់អាមេរិក ឬអត់នោះទេ។ អាមេរិក ក៏ជជែកពីផលប៉ះពាល់ពីការសាងសង់ទំនប់វារីអគ្គិសនីលើដងទន្លេ មេគង្គ នៅប្រទេសឡាវ និងគម្រោងសាងសង់ទំនប់វារីអគ្គិសនីក្នុងប្រទេសកម្ពុជា ដែរ។ លោក ស្កុត ម៉ាកសែល ចង់ឲ្យកម្ពុជា សាងសង់ទំនប់វារីអគ្គិសនីដោយគិតឲ្យបានគ្រប់ជ្រុងជ្រោយ និងសិក្សាឲ្យបានល្អិតល្អន់ លើហេតុប៉ះពាល់នៃបរិស្ថាន។ ការជជែកនេះ ធ្វើឡើងក្នុងពេលដែលរដ្ឋាភិបាល មានគម្រោងបំផ្លាញធនធានធម្មជាតិ ដើម្បីសាងសង់ទំនប់វារីអគ្គិសនីនៅទន្លេសេសានក្រោមពីរ និងនៅស្ទឹងអារ៉ែង។ គម្រោងសាងសង់ទំនប់វារីអគ្គិសនីទាំងពីរកន្លែងនេះ ត្រូវបានសង្គមស៊ីវិលរិះគន់យ៉ាងខ្លាំងថា ធ្វើឲ្យប៉ះពាល់យ៉ាងធ្ងន់ធ្ងរដល់បរិស្ថាន និងប្រព័ន្ធអេកូឡូស៊ី។ ហើយថា បើទុកធនធានធម្មជាតិនៅតំបន់នេះ នោះកម្ពុជា នឹងមានប្រយោជន៍សេដ្ឋកិច្ចច្រើនជាងសាងសង់ទំនប់វារីអគ្គិសនីទៅទៀត។
ត្រឡប់មកមើលសំណុំរឿងបញ្ជូនជនភៀសខ្លួនពីអូស្ត្រាលី មកកម្ពុជា វិញ សង្គមស៊ីវិលនៅកម្ពុជា បានទទូចឲ្យរដ្ឋាភិបាលផ្តល់ព័ត៌មានឲ្យបានគ្រប់ជ្រុងជ្រោយ ក្រោយពីគម្រោងការនេះ។ ហើយ អ្នកខ្លះ ថែមទាំង ទទូចកុំឲ្យ រដ្ឋាភិបាល ទទួល ជនភៀសខ្លួន ពីអូស្ត្រាលី មកកម្ពុជា ទៀតផង។
រដ្ឋលេខាធិការ ក្រសួង
ការបរទេស កម្ពុជា លោក អ៊ុច បូរិទ្ធិ (ស្ដាំ)
និងឧបការីរង រដ្ឋមន្ត្រី ការបរទេស សហរដ្ឋ អាមេរិក លោក ស្កុត ម៉ាកសែល
(Scot Marciel) ចេញពីជំនួប ទ្វេភាគី នាទីស្ដីការ គណៈរដ្ឋមន្ត្រី
នៅថ្ងៃ ទី២៧ ខែសីហា ឆ្នាំ២០១៤។ RFA/Vann Vichar
មន្ត្រីជាន់ខ្ពស់ អង្គការ ការពារ សិទ្ធិមនុស្ស លីកាដូ (Licadho) លោក អំ សំអាត លើកឡើងថា ការទទួលជនភៀសខ្លួនពីប្រទេសអូស្ត្រាលី នេះ ជាបន្ទុកមួយធ្ងន់ធ្ងរទៀតសម្រាប់រដ្ឋាភិបាលកម្ពុជា ស្របពេលដែលកម្ពុជា កំពុងញាំញីដោយវិបត្តិដីធ្លី និងការរំលោភសិទ្ធិមនុស្ស។ លោកបន្តថា កម្ពុជា គួរគិតគូរដោះស្រាយបញ្ហាផ្ទៃក្នុងឲ្យបានប្រសើរជាមុនសិន មុននឹងសម្រេចចិត្តថា នឹងជួយបរទេស។
ប្រទេសអូស្ត្រាលី បានដាក់សំណើតាំងពីដើមឆ្នាំ ដើម្បីសុំឲ្យកម្ពុជា ទទួលជនភៀសខ្លួនដែលសុំសិទ្ធិជ្រកកោននៅអូស្ត្រាលី ឲ្យមករស់នៅក្នុងប្រទេសកម្ពុជា។ រដ្ឋាភិបាលនៃប្រទេសទាំងពីរ បានបង្កើតគណៈកម្មការសិក្សាស្រាវជ្រាវពីផលប៉ះពាល់ និងលទ្ធភាពក្នុងការព្រមព្រៀងគ្នាលើបញ្ហានេះ។
កាសែតអូស្ត្រាលី ក៏ធ្លាប់បានផ្សាយថា កិច្ចព្រមព្រៀងរវាងប្រទេសទាំងពីរ អាចនឹងត្រូវចុះសន្ធិសញ្ញាស្ងាត់ៗទៀតផង៕
No comments:
Post a Comment