នាយករដ្ឋមន្ត្រី ប្រកាស មិនទទួល ខុសត្រូវ ប្រាក់ខែ តំណាងរាស្ត្រ បក្សប្រឆាំង
RFA | ១១ សីហា ២០១៤
លោកនាយករដ្ឋមន្ត្រី ហ៊ុន សែន ថ្លែងក្នុងពិធី សម្ពោធស្ពាន ស្ទឹងមានជ័យ កាលពីថ្ងៃ ទី៣១ ខែកក្កដា ឆ្នាំ២០១៤។ RFA/Uon Chhin
លោកនាយករដ្ឋមន្ត្រី ហ៊ុន សែន ប្រកាស មិនទទួល ខុសត្រូវ រឿងបើក ប្រាក់ខែ ឲ្យតំណាងរាស្ត្រ បក្សប្រឆាំង ចំនួន ៥៥រូប ដែលមិនបាន ចូលធ្វើការ នៅក្នុងរដ្ឋសភា ក្រោយពេល បោះឆ្នោត តំណាងរាស្ត្រ ឆ្នាំ២០១៣ កន្លងទៅ។ ទោះយ៉ាងណា ការប្រកាសនេះ ធ្វើឡើង នៅពេល តំណាងរាស្ត្រ បក្សសង្គ្រោះជាតិ មិនបាន ស្នើសុំ ប្រាក់ខែ នេះទេ។
ថ្លែង នៅក្នុងពិធី ចែកសញ្ញាប័ត្រ ដល់និស្សិត ធ្វើឡើង នៅមជ្ឈមណ្ឌល ពាណិជ្ជកម្ម កោះពេជ្រ រាជធានី ភ្នំពេញ នៅថ្ងៃ ទី១១ សីហា, លោកនាយករដ្ឋមន្ត្រី ហ៊ុន សែន ប្រកាសថា, ចំនួន ប្រាក់ខែ សរុប របស់ តំណាងរាស្ត្រ រដ្ឋសភា បក្សសង្គ្រោះជាតិ ក្នុងម្នាក់ៗ ចំនួន ប្រហែល ២ពាន់ ដុល្លា,រ ហើយ បើ បូកសរុប ចំនួន តំណាងរាស្ត្រ ទាំង៥៥រូប គឺ ចំនួន ប្រាក់ខែ សរុប មានដល់ទៅ ជាង១លាន ដុល្លារ ឯណោះ, ដែលករណីនេះ រដ្ឋាភិបាល ត្រូវ ចំណាយថវិកា ជាតិ យ៉ាងច្រើន ធ្វើឲ្យលោក មិនហ៊ាន សម្រេចចិត្តដោយ ខ្លួនឯង ផ្ទាល់ទេ ព្រោះ ខ្លាចមានទោស។
លោកនាយករដ្ឋមន្ត្រី បានទម្លាក់បន្ទុកនេះទៅឲ្យក្រុមប្រឹក្សាធម្មនុញ្ញសម្រេចជំនួសវិញ ដោយលោកបញ្ជាក់ថា ស្ថាប័នក្រុមប្រឹក្សាធម្មនុញ្ញជាស្ថាប័នដែលមានសិទ្ធិស្របច្បាប់ ក្នុងការសម្រេចរឿងនេះ៖ «កុំលើកបញ្ហារឿងប្រាក់ខែថា សុំឲ្យនាយករដ្ឋមន្ត្រីជួយដោះស្រាយ ឬប្រធានសភាស្អីៗ អត់ទេ ថវិកាជាតិណា អានេះលុយជាតិណា! ហើយយើងអត់ចូលធ្វើការស្រាប់តែមកដល់រាប៉ែលប្រាក់ខែប៉ុន្មានខែ ១០ខែប្លាយ ហើយមួយខែ ២ពាន់ដុល្លារនោះ វាមិនប៉ុន្មានទៅ? អត់ទេ សុំសួរទៅក្រុមប្រឹក្សាធម្មនុញ្ញ ពេលដែលមិនចូលធ្វើការអ៊ីចឹងបើកប្រាក់ខែបានដែរឬអត់? ខ្ញុំនឹងគោរពនូវសេចក្ដីសម្រេចរបស់ក្រុមប្រឹក្សាធម្មនុញ្ញ។»
ទោះយ៉ាងណា ការប្រកាសនេះ ធ្វើឡើងនៅពេលមិនទាន់មានការស្នើសុំបើកប្រាក់ខែជាផ្លូវការណាមួយទេពីបក្សសង្គ្រោះជាតិ។
តំណាងរាស្ត្របក្សសង្គ្រោះជាតិចំនួន ៥៥រូប បានពហិការមិនបានចូលធ្វើការនៅរដ្ឋសភាអស់រយៈពេលមួយឆ្នាំមកហើយ ដោយមិនសុខចិត្ត ហើយបានយកឱកាសនោះធ្វើបាតុកម្មជាបន្តបន្ទាប់ប្រឆាំងនឹងលទ្ធផល បោះឆ្នោត ដែលបក្សប្រឆាំងចោទថា បក្សប្រជាជនលួចបន្លំ។ ក៏ប៉ុន្តែ ក្រោយពីកិច្ចចរចាត្រូវរ៉ូវគ្នាជាមួយបក្សប្រជាជន កាលពីថ្ងៃទី២២ កក្កដា ឆ្នាំ២០១៤ រួចមក បក្សសង្គ្រោះជាតិក៏ព្រមចូលសភាដើម្បីបន្តធ្វើការចរចាកែទម្រង់ នានា ជាមួយបក្សប្រជាជនបន្តទៅទៀត។
ទាក់ទងការទាមទារប្រាក់ខែតំណាងរាស្ត្រនេះ កន្លងមកមន្ត្រីបក្សសង្គ្រោះជាតិធ្លាប់អះអាងថា ខ្លួនមិនចាប់អារម្មណ៍ទេ។ ចំណែកអនុប្រធានបក្សសង្គ្រោះជាតិ លោក កឹម សុខា សុំមិនធ្វើអត្ថាធិប្បាយអ្វីដែរលើរឿងទាមទារប្រាក់ខែសមាជិកសភា នៅថ្ងៃទី១១ សីហា នេះ។ រីឯមន្ត្រីនាំពាក្យក្រុមប្រឹក្សាធម្មនុញ្ញ លោក ព្រំ ញៀនវិចិត្រ បានបញ្ជាក់យ៉ាងខ្លីថា ក្រុមប្រឹក្សាធម្មនុញ្ញអាចធ្វើការលើរឿងនេះបានលុះត្រាណាមាន លិខិតជាផ្លូវការណាមួយស្នើសុំដោយគណបក្សសង្គ្រោះជាតិផ្ញើមក ក្រុមប្រឹក្សាធម្មនុញ្ញ៕
No comments:
Post a Comment