លោក សម រង្ស៊ី សន្យា នឹងទាមទារដី ជូនអ្នកភូមិ ឡពាងវិញ ដោយអហិង្សា
RFA | ១៤ សីហា ២០១៤
លោក សម រង្ស៊ី ថ្លែងទៅកាន់អ្នកភូមិឡពាង ក្នុងតំបន់បឹងកក់ រាជធានីភ្នំពេញ នៅថ្ងៃទី១៤ ខែសីហា ឆ្នាំ ២០១៤។ RFA/Ouk Savborey
អ្នកភូមិ ឡពាង ប្រមាន ១០០នាក់ ដែលបាន ធ្វើដំណើរ ដោយថ្មើរជើង ក្នុងចម្ងាយដី ជាង៦០ គីឡូម៉ែត្រ ពីឃុំ តាជេស្ឋ ស្រុក កំពង់ ត្រឡាច, ខេត្ត កំពង់ឆ្នាំង មកដល់ភ្នំពេញ ដោយចំណាយ អស់រយៈពេល ២ថ្ងៃ ក្រោមការរារាំង និងចាប់មនុស្ស ដាក់ឃុំ ចោទ ពីបទផ្សេងៗ របស់ អាជ្ញាធរ ខេត្តកំពង់ឆ្នាំង នឹងនាំគ្នា បន្តតវ៉ាទៀត បន្ទាប់ ពីសុខភាព ពួកគេ បានប្រសើរ។ ពួកគេ មានបំណង សូម ឲ្យរដ្ឋាភិបាល ដោះស្រាយ ដីធ្លី ពួកគេ ដែលពាក់ព័ន្ធ ក្រុមហ៊ុន ខេឌីស៊ី (KDC) មិនព្រម ដោះស្រាយនោះ។
ក្នុងពេលកំពុងសម្រាកក្នុងតំបន់បឹងកក់ នៅព្រឹកថ្ងៃទី១៤ ខែសីហា ប្រធានគណបក្សប្រឆាំង លោក សម រង្ស៊ី ដែលចុះទៅជួបពួកគេបានសំដែងការគាំទ្រ និងលើកទឹកចិត្តឲ្យតស៊ូបន្តទៀត ហើយអះអាងថា នឹងទាមទារដីជូនអ្នកភូមិវិញ។
ការសន្យារបស់ប្រធានគណបក្សប្រឆាំង លោក សម រង្ស៊ី ធ្វើឡើងនៅចំពោះមុខអ្នកភូមិដែលកំពុងស្នាក់បណ្ដោះអាសន្ននៅក្នុង បន្ទប់រួមមួយក្នុងតំបន់បឹងកក់។ ប៉ុន្តែលោក សម រង្ស៊ី ពុំបានបញ្ជាក់អោយច្បាស់លាស់ទេ ថាតើអ្វីខ្លះដែលជាវិធានការក្នុងការទាមទារដីអោយអ្នកភូមិ។
លោក សម រង្ស៊ី ថ្លែងថា ដីមិនដើរទេ ប៉ុន្តែមនុស្សខូចទេដែលរំលោភយកដីអ្នកភូមិឡពាង ឲ្យរងទុក្ខវេទនាគ្មានជម្រក គ្មានអាហារ គ្មានដីដាំដុះ លំនៅឋាន ព្រាត់ប្រាសគ្រួសារ ជាប់ពន្ធនាគារដោយសារតែដីរបស់ខ្លួនត្រូវគេជួញដូរ។
លោកបន្តថា គណបក្សសង្គ្រោះជាតិ នឹងខំតស៊ូអស់ពីលទ្ធភាពដោយមិនប្រើហិង្សា ដើម្បីជួយទាមទារដីពីក្រុមហ៊ុន ខេ.ឌី.ស៊ី ជូនអ្នកភូមិឡពាង៖ «យើង នឹងប្រើប្រាស់គ្រប់មធ្យោបាយ មធ្យោបាយស្របច្បាប់ មធ្យោបាយអហិង្សាដែលមានចែងក្នុងរដ្ឋធម្មនុញ្ញជាច្បាប់កំពូលនៃ ព្រះរាជាណាចក្រកម្ពុជា ទំនាក់ទំនងជាតិនិងអន្តរជាតិ គឺយើងប្រើប្រាស់ទាំងអស់ ដើម្បីជួយបងប្អូន។ អ៊ីចឹងបងប្អូនកុំអស់សង្ឃឹម ដីរបស់បងប្អូននៅឃុំតាជេស្ឋ គឺដីវាអត់មានជើងដើរទេ ដីវានៅត្រង់ណា គឺនៅត្រង់នឹង មានតែមនុស្សខូចដែលមកយកដីបងប្អូន ខ្ញុំជឿថា មនុស្សខូចនឹងវិនាស និងខ្ចាយ នឹងចាកចេញ។»
បើទោះជាមិនបានបញ្ជាក់ពីមធ្យោបាយនោះ ក៏លោក សម រង្ស៊ី បានបង្ហោះក្នុងទំព័រហ្វេសប៊ុក របស់លោក កាលពីយប់ថ្ងៃទី១៣ ខែសីហា ថា ក្រុមអ្នកតំណាងរាស្ត្រគណបក្សសង្គ្រោះជាតិ នឹងកោះហៅរដ្ឋមន្ត្រីក្រសួងរ៉ែនិងថាមពល អោយទៅឆ្លើយក្នុងរដ្ឋសភាចំពោះករណីជាប់ពាក់ព័ន្ធនឹងបញ្ហាដីធ្លី ដ៏ចម្រូងចម្រាសនៅភូមិឡពាង។
កាលពីថ្ងៃទី១២ ខែសីហា អ្នកភូមិឡពាង ប្រមាណ ១០០នាក់ រួមទាំងកុមារ បានរែកចាន ឆ្នាំង មុងកន្ទេល ដើរសំដៅមករកថ្នាក់ដឹកនាំនៅភ្នំពេញ ឲ្យជួយដោះស្រាយជម្លោះដីពួកគាត់ជាមួយក្រុមហ៊ុន ខេ.ឌី.ស៊ី ខណៈអាជ្ញាធរខេត្តកំពង់ឆ្នាំង សាលាដំបូងខេត្តកំពង់ឆ្នាំង និងក្រុមហ៊ុន ខេ.ឌី.ស៊ី របស់អ្នកស្រី ជា ខេង ភរិយាលោក ស៊ុយ សែម មិនអាចដោះស្រាយបញ្ចប់ជម្លោះដីនោះចប់សព្វគ្រប់។
ក្នុងការធ្វើដំណើរ របស់អ្នកភូមិពីខេត្តកំពង់ឆ្នាំង មកដល់ភ្នំពេញនេះ អាជ្ញាធរខេត្តកំពង់ឆ្នាំង បានវាយបំបែកអ្នកភូមិ និងបានចាប់ខ្លួនអ្នកស្រុកដាក់ពន្ធនាគារ ៥នាក់។
លោក សម រង្ស៊ី ថ្លែងលើកទឹកចិត្តអ្នកភូមិឡពាង ហើយបានផ្តល់ថវិកាផ្ទាល់ខ្លួន និងស្វែងរកជំនួយបន្ថែម ដើម្បីសម្រួលដល់ការស្នាក់នៅបណ្តោះអាសន្នរបស់អ្នកភូមិឡពាង នៅក្នុងទីក្រុងភ្នំពេញ៖ «ព្រោះក្រុមហ៊ុនរបស់ភរិយារដ្ឋមន្រ្តី ស៊ុយ សែម ហ្នឹង គឺកំសាក ប្រើឥទ្ធិពល អាងថាប្តីខ្លួនធ្វើរដ្ឋមន្រ្តី ប្រើឥទ្ធិពលប្តី មកលួចប្លន់ដីធ្លីប្រជារាស្ត្រ មកធ្វើបាបប្រជារាស្ត្រ ជាអំពើកំសាក អំពើថោកទាបជាទីបំផុត ដែលប្រជារាស្ត្រខ្មែរទាំងមូលថ្កោលទោស។»
តំណាងអ្នកភូមិឡពាង អ្នកគ្រូ អ៊ុំ សុភី ថ្លែងថា ក្រុមហ៊ុនហ៊ុមព័ទ្ធភូមិ មិនឲ្យពួកគាត់ចេញរកស៊ី។ ទន្ទឹមនោះ ក្រុមហ៊ុន ខេ.ឌី.ស៊ី រឹបយកដីដោយប្រើក្រុមប្រដាប់អាវុធ គាបអ្នកភូមិមិនឲ្យដាំស្រូវ និងដំណាំ ធ្វើឲ្យអ្នកភូមិដាច់ពោះ បបរចែកគ្នាហូប ដោយសារតែមានអ្នកលួចបន្លំការជួញដូរដីពួកគាត់។ ភាពទាល់ច្រកនេះ អ្នកភូមិទម្លុះការហ៊ុមព័ទ្ធ ធ្វើដំណើរដោយជើងមករកយុត្តិធម៌នៅភ្នំពេញ៖ «ប៉ុន្តែដោយសារពួកខ្ញុំគិតថា អស់ជម្រើស ហើយបើខ្ញុំនៅផ្ទះក៏មានការហ៊ុមព័ទ្ធរបស់សមត្ថកិច្ចដែរ ដូច្នេះហើយទើបខ្ញុំសុខចិត្តចេញមកនាំគ្នាពុះពារ សំដៅមកទីក្រុងភ្នំពេញនេះ ដើម្បីទាមទារយកទឹកយកដី និងរកយុត្តិធម៌សម្រាប់អ្នកដែលជាប់ឃុំឃាំងនៅពន្ធនាគារខេត្តកំពង់ឆ្នាំង ពេលនេះជាប់ ៥នាក់ហើយ។»
លោកស្រី ស៊ុំ ថុន អាយុ ៥៥ឆ្នាំ ឲ្យដឹងថា ប្តីគាត់ឈ្មោះ ស សុង ជាប់ពន្ធនាគារ ៦ឆ្នាំ ព្រោះតែមិនព្រមលក់ដីឲ្យក្រុមហ៊ុន ខេ.ឌី.ស៊ី។ លោកស្រីថា ពួកគាត់មកដល់ភ្នំពេញនេះ មកសុំឲ្យរដ្ឋាភិបាលផ្តល់ដីរស់នៅស្របច្បាប់ផង មកសុំឲ្យឈប់ចាប់អ្នកភូមិដាក់គុកផង និងសុំដោះលែងអ្នកកំពុងជាប់ឃុំ ៥នាក់ ដោយសារដីធ្លីភូមិឡពាងផង។
ជម្លោះដីធ្លីនៅភូមិឡពាង ចាប់ផ្តើមពីឆ្នាំ២០០៦ មកដល់បច្ចុប្បន្ន ដោយសារការជួញដូរដី និងការឃុបឃិតបន្លំឯកសារដីពីសំណាក់អាជ្ញាធរមូលដ្ឋាន សហការជាមួយឈ្មួញទិញដី បណ្តាលឲ្យពលរដ្ឋក្នុងភូមិ រួមទាំងមេភូមិផង បានជាប់ពន្ធនាគារ និងមនុស្សច្រើនរយនាក់ដាច់ស្បៀង។ ក្រុមអង្គការការពារសិទ្ធិមនុស្សនៅកម្ពុជា បានថ្កោលទោសចំពោះការប្រើហិង្សាបង្ក្រាបអ្នកភូមិឡពាង ដែលដើរមករកការជួយអន្តរាគមន៍ពីរដ្ឋាភិបាលក្នុងរឿងជម្លោះដីនេះ។
ក្នុងរឿងជម្លោះដីនៅភូមិឡពាង ជាមួយក្រុមហ៊ុន ខេ.ឌី.ស៊ី នេះដែរ អង្គការសង្គមស៊ីវិលចំនួន២៧ នៅថ្ងៃទី១៤ ខែសីហា នេះ ចេញសេចក្តីថ្លែងការណ៍រួមមួយ សុំអោយអាជ្ញាធរ និងតុលាការខេត្តកំពង់ឆ្នាំង ដោះលែងអ្នកភូមិឡពាង ៥នាក់ និងដោះស្រាយបញ្ចប់បញ្ហាជម្លោះដីធ្លីអោយបានឆាប់។
ក្រុមអង្គការសង្គមស៊ីវិលយល់ថា ការចាប់ខ្លួន និងការចេញដីកាកោះហៅតំណាងប្រជាពលរដ្ឋជាបន្តបន្ទាប់ ព្រមទាំងធ្វើទុក្ខបុកម្នេញ គឺជាការគំរាមកំហែង គាបសង្កត់ ឲ្យបញ្ឈប់ការតវ៉ា និងយល់ព្រមប្រគល់ដីធ្លីទៅក្រុមហ៊ុនរបស់ លោកស្រី ជា ខេង ដែលនេះ គឺជាការរំលោភសិទ្ធិមនុស្សធ្ងន់ធ្ងរ។
តាមរយៈទង្វើនេះ អង្គការសង្គមស៊ីវិលមើលឃើញថា សមត្ថកិច្ចទាំងនេះកំពុងតែរណបក្រុមឈ្មួញ និងអ្នកមានអំណាច ដោយមិនគិតពីសុខទុក្ខរបស់ប្រជាពលរដ្ឋក្រីក្រ ដែលកំពុងបាត់បង់ដីធ្លី។ ក្រុមអង្គការទាំងនោះលើកឡើងទៀតថា ការចាប់អ្នកភូមិដាក់ពន្ធនាគារនៅពេលនេះ គឺផ្ទុយស្រឡះពីប្រសាសន៍របស់លោកនាយករដ្ឋមន្ត្រី ហ៊ុន សែន ដែលធ្លាប់ថ្លែងថា នឹងពុំអោយមានការចាប់ខ្លួនពលរដ្ឋណាម្នាក់ដោយសារបញ្ហាដីធ្លី៕
No comments:
Post a Comment