សកម្មជន ដីធ្លី បឹងកក់ ៤នាក់ ត្រូវ សមត្ថកិច្ច ចាប់ខ្លួន ពេលចុះចូល រួមតវ៉ា ជាមួយ អ្នកមានទំនាស់ ដីធ្លី មកពី៣ខេត្ត នៅវត្តចាស់
VOD | ២៩ សីហា ២០១៤
រូបភាពពីអង្គការលីកាដូ
នាព្រឹក ថ្ងៃសុក្រនេះ ប្រជាពលរដ្ឋ មានទំនាស់ ដីធ្លី ជិត១០០នាក់ មកពីខេត្ត ប៉ៃលិន, បាត់ដំបង, និងបន្ទាយមានជ័យ, ដែលកំពុង ស្នាក់នៅក្នុងវត្ត ពុទ្ធិយារាម (ហៅ វត្តចាស់) ក្នុងសង្កាត់ ជ្រោយចង្វារ ខណ្ឌ ជ្រោយចង្វារ មានគម្រោង ហែញត្តិចេញ ពីវត្ត ទៅកាន់ផ្ទះ លោកនាយករដ្ឋមន្ត្រី ហ៊ុន សែន ដើម្បី ស្នើសុំ អន្តរាគមន៍, តែ ត្រូវ សមត្ថកិច្ច ចម្រុះ ចុះមករារាំង មិនឲ្យចេញ ពីវត្ត ទើបធ្វើ ឲ្យមាន ការរុញគ្នា ទៅវិញ ទៅមក។ អាជ្ញាធរ បានចាក់សោ បិទទ្វារ របង ដើម្បី រារាំង មិនឲ្យ ប្រជាពលរដ្ឋ ចេញពីវត្ត។
សកម្មជនជម្លោះដីធ្លីមកពីតំបន់បឹងកក់៤នាក់បានធ្វើដំណើរទៅកាន់ វត្តចាស់ដើម្បីចូលរួមការតវ៉ានេះ តែត្រូវអាជ្ញាធរហាមឃាត់ ដោយអះអាងថា ពួកគាត់មកពីខណ្ឌដូនពេញ មិនមានសិទ្ធិមកតវ៉ានៅក្នុងខណ្ឌជ្រោយចង្វារទេ ហើយបានដេញឲ្យពួកគាត់ត្រឡប់ទៅវិញ។ សកម្មជនម្នាក់ អ្នកស្រី ទេព វន្នី សួរតបទៅកាន់អាជ្ញាធរថា តើមានច្បាប់ណាដែលហាមពួកគាត់មិនឲ្យមកតវ៉ាឆ្លងខណ្ឌ ហើយមិនព្រមត្រឡប់ទៅវិញ ទើបអាជ្ញាធរចាប់បង្ខំស្ត្រីជាសកម្មជនទាំង៤នាក់ឡើងឡាន មិនដឹងយកទៅទីណាទេ។
ស្ត្រីដែលត្រូវបានចាប់ខ្លួនទាំង៤នាក់រួមមាន អ្នកស្រី ទេព វន្នី អ្នកស្រី សុង ស្រីលាភ អ្នកស្រីគង់ ចន្ថា និងអ្នកស្រីខែក ច័ន្ទរស្មី។
អង្គការលីកាដូ ឲ្យដឹងថាអ្នកទាំងនោះបច្ចុប្បន្ន កំពុងឃាត់ខ្លួននៅប៉ុស្តិ៍នគរបាលជ្រោយចង្វារ ហើយឥឡូវនេះអាជ្ញាធរបានបិទផ្លូវ ដោយមិនឲ្យអ្នកសហគមន៍ចេញទៅខាងក្រៅវត្តចាស់នោះទេ។
អាជ្ញាធរប្រដាប់ដោយខែល កាំភ្លើងអាកា ដំបងឆក់ និងបំពង់ទីប ជាង១០នាក់ រួមជាមួយសន្តិសុខខណ្ឌជាង២០នាក់ ក៏បានហាមប្រជាពលរដ្ឋនៅក្បែរវត្តចាស់ មិនឲ្យទៅឈរមើលនៅក្បែរនោះផងដែរ។
នាម៉ោងប្រមាណជិត១០ព្រឹកនេះ ពលរដ្ឋមកពីខេត្តបាត់ដំបង២នាក់ ខ្យល់គរសន្លប់ ត្រូវបានដឹកតាមរ៉ឺម៉កម៉ូតូចេញទៅរកពេទ្យ តែអាជ្ញាធរមិនបើកទ្វាររបងឲ្យចេញ ទើបពលរដ្ឋត្រូវអៀវដើរចេញទៅរកពេទ្យនៅក្បែរនោះ។
កាលពីដើមសប្ដាហ៍នេះ ក្រុមអ្នកមានជម្លោះដីធ្លីមកពីខេត្តប៉ៃលិន បាត់ដំបង និងបន្ទាយមានជ័យ បានឡើងមកតវ៉ានៅរាជធានីដើម្បីរកអន្តរាគមន៍ ដោយពួកគេអះអាងថា អាជ្ញាធរនៅខេត្តមិនអាចដោះស្រាយបញ្ហាឲ្យពួកគាត់បាន។ បច្ចុប្បន្នពួកគាត់ស្នាក់នៅវត្តពុទ្ធិយារាម ហៅវត្តចាស់ ក្នុងសង្កាត់ជ្រោយចង្វារ ខណ្ឌជ្រោយចង្វារ ៕
No comments:
Post a Comment