វៀតណាម ទទូច ឲ្យរដ្ឋាភិបាល ខ្មែរ ចាត់វិធានការ រឿងតវ៉ា និងដុតទង់ជាតិ
RFA | ១៤ សីហា ២០១៤
អ្នកតវ៉ា នៅមុខស្ថានទូត វៀតណាម បានដុតទង់ជាតិ វៀតណាម នៅរសៀលថ្ងៃ ទី១២ សីហា ឆ្នាំ ២០១៤ នៅក្បែរស្ថានទូត វៀតណាម។ Photo: បណ្ដាញព្រះសង្ឃឯករាជ្យ ដើម្បីយុត្តិធម៌សង្គម
រដ្ឋាភិបាល ប្រទេស វៀតណាម ទទូច ឲ្យរដ្ឋាភិបាល កម្ពុជា ចាត់វិធានការ មានប្រសិទ្ធភាព ដើម្បី បញ្ចៀស នូវការតវ៉ា និងដុតទង់ជាតិ វៀតណាម ដោយបាតុករ ខ្មែរក្រោម។ ការអំពាវនាវ របស់ រដ្ឋាភិបាល វៀតណាម នេះ ធ្វើឡើង បន្ទាប់ ពីអង្គការ សមាគម ខ្មែរ កម្ពុជា ក្រោម និងបណ្ដាញ យុវជន ធ្វើបាតុកម្ម ជាលើកទី៣ ចំនួន បីថ្ងៃជាប់គ្នា ដើម្បី ទាមទារ ឲ្យរដ្ឋាភិបាល វៀតណាម ទទួលស្គាល់ ប្រវត្តិសាស្ត្រពិត ទឹកដី កម្ពុជាក្រោម និងសុំទោស ពលរដ្ឋខ្មែរ ជាសាធារណៈ។ ក្នុងពេលបាតុកម្មនោះ បាតុករ ក៏បាន អំពាវនាវ ឲ្យឈប់ប្រើប្រាស់ ទំនិញវៀតណាម ព្រមទាំង ដុតទង់ជាតិ វៀតណាម ដើម្បី សម្ដែងកំហឹង ផងដែរ។
ថ្លែងក្នុងសេចក្តីប្រកាសព័ត៌មាននៅលើគេហទំព័រក្រសួងការបរទេស វៀតណាម ចុះថ្ងៃទី១៣ ខែសីហា អ្នកនាំពាក្យក្រសួងការបរទេសវៀតណាម លោក ឡេ ហាយ បិញ (Le Hai Binh) លើកឡើងថា ប្រទេសវៀតណាម ប្រឆាំងដាច់ខាតចំពោះបាតុកម្មខុសច្បាប់ និងការដុតទង់ជាតិវៀតណាម ដោយបាតុករខ្មែរក្រោម និងទាមទារឲ្យរដ្ឋាភិបាលកម្ពុជា នាំខ្លួនពួកគេទៅកាត់ទោសតាមច្បាប់។
លោក ឡេ ហាយ បិញ ដែលចាត់ទុកក្រុមអ្នកតវ៉ា ថាជាជនជ្រុលនិយមនោះ ថ្លែងថា សកម្មភាពរបស់អ្នកតវ៉ា គឺមានចេតនាធ្វើឲ្យប៉ះពាល់ដល់អារម្មណ៍ជនជាតិវៀតណាម និងធ្វើផ្ទុយពីទំនាក់ទំនងមិត្តភាព ប្រពៃណីល្អ រវាងកម្ពុជា និងវៀតណាម ដែលជាប្រទេសក្បែរខាងគ្នា។
នេះមិនមែនជាលើកទី១ទេ ដែលរដ្ឋាភិបាលវៀតណាម ទទូចឲ្យរដ្ឋាភិបាលកម្ពុជា ចាត់វិធានបង្ការការតវ៉ារបស់ពលរដ្ឋខ្មែរប្រឆាំងពួកគេ។ កាលពីថ្ងៃទី១០ ខែកក្កដា ឆ្នាំ២០១៤ ពោល គឺបន្ទាប់ពីបាតុកម្មខ្មែរក្រោមប្រឆាំងវៀតណាម លើកទី១ អ្នកនាំពាក្យក្រសួងការបរទេសវៀតណាម ក៏បានស្នើឲ្យរដ្ឋាភិបាលកម្ពុជា ចាត់វិធានការរារាំងសកម្មភាពខុសឆ្គងរបស់បាតុករ។ ពួកគេថែមទាំងចាត់ទុកសកម្មភាពរបស់បាតុករខ្មែរ ថាបានធ្វើឲ្យខូចសណ្ដាប់ធ្នាប់ និងប៉ះពាល់ដល់ទំនាក់ទំនងមិត្តភាពល្អរវាងកម្ពុជា និងវៀតណាម ទៀតផង។
វិទ្យុអាស៊ីសេរី នៅមិនទាន់អាចសុំការឆ្លើយតបពីអ្នកនាំពាក្យក្រសួងការបរទេស កម្ពុជា លោក កុយ គួង បាននៅឡើយនៅថ្ងៃទី១៤ សីហា ដោយលោកមានប្រសាសន៍ថាជាប់រវល់។
ការអំពាវនាវរបស់រដ្ឋាភិបាលវៀតណាម ពេលនេះ ធ្វើឡើងស្របពេលដែលប្រធានកិត្តិយសគណបក្សប្រជាជនកម្ពុជា និងជាប្រធានរដ្ឋសភា លោក ហេង សំរិន គ្រោងធ្វើទស្សនកិច្ចទៅកាន់ប្រទេសវៀតណាម ពីថ្ងៃទី១៨ ដល់ថ្ងៃទី២០ សីហា ខាងមុខ។ ក្នុងដំណើរទស្សនកិច្ចនេះ លោក ហេង សំរិន នឹងជួបពិភាក្សាជាមួយថ្នាក់ដឹកនាំកំពូលៗរបស់វៀតណាម ស្ទើរតែទាំងអស់ ក្នុងនោះរួមមាន ប្រធានរដ្ឋវៀតណាម លេខាបក្សកុម្មុយនីស្តវៀតណាម ប្រធានរដ្ឋសភា និងនាយករដ្ឋមន្ត្រីវៀតណាម។ ក្នុងដំណើរទស្សនកិច្ចរបស់ លោក ហេង សំរិន នេះ អង្គការសមាគមខ្មែរកម្ពុជាក្រោម ក៏ស្នើឲ្យប្រធានសភាខ្មែរ លើកឡើងបញ្ហាប្រវត្តិសាស្ត្រទឹកដីកម្ពុជាក្រោម ជាមួយថ្នាក់ដឹកនាំវៀតណាម ផងដែរ។
ចំណែកអនុប្រធានគណបក្សសង្គ្រោះជាតិ លោក កឹម សុខា កត់សម្គាល់ថា ប្រទេសនីមួយៗមានឯករាជ្យភាព និងអធិបតេយ្យភាពរៀងៗខ្លួន គឺមិនមែនធ្វើអ្វីៗតាមការស្តាប់បញ្ជារបស់ប្រទេសដទៃនោះទេ។ លោក កឹម សុខា ថ្លែងថា ការធ្វើបាតុកម្មទាមទារអ្វីមួយ វាជាសិទ្ធិសេរីភាពរបស់ប្រជាពលរដ្ឋនៅក្នុងប្រទេសកាន់ លទ្ធិប្រជាធិបតេយ្យ ប្រសិនបើបាតុកម្មនោះជាបាតុកម្មអហិង្សា។
លោក កឹម សុខា៖ «រដ្ឋាភិបាលខ្មែរ ជាពិសេសលោកនាយករដ្ឋមន្ត្រី ហ៊ុន សែន គាត់ធ្លាប់និយាយហើយថា គាត់មិនធ្វើតាមបរទេសបញ្ជាទេ អ៊ីចឹងខ្ញុំសង្ឃឹមថា គាត់នឹងធ្វើតាមប្រជាពលរដ្ឋ ប្រជាពលរដ្ឋខ្មែរមិនមែនធ្វើតាមបរទេស គេៗគ្រាន់តែសុំចឹង គេមិនមែនបញ្ជាយើងណា ដូច្នេះស្រេចយើង តើយើងឆ្លើយតបជាមួយគេយ៉ាងម៉េច បើយើងឆ្លើយតបគេអ៊ីចឹង គឺប្រជារាស្ត្រវាយតម្លៃ តែបើអត់ឆ្លើយតបតាមគេ ធ្វើតាមគេទេ ធ្វើតាមឆន្ទៈប្រជាពលរដ្ឋ អត់អីទេ។»
រីឯគណបក្សសម្ព័ន្ធដើម្បីលទ្ធិប្រជាធិបតេយ្យវិញ ក៏បានថ្លែងប្រឆាំងដាច់ខាតចំពោះការលើកឡើងរបស់មន្ត្រីស្ថានទូត វៀតណាម និងចាត់ទុកទង្វើនេះ ថាជាការមើលងាយរបស់រដ្ឋាភិបាលវៀតណាម មកលើប្រជាពលរដ្ឋ និងរដ្ឋាភិបាលកម្ពុជា ទាំងមូល។ គណបក្សសម្ព័ន្ធដើម្បីលទ្ធិប្រជាធិបតេយ្យ ក៏បានរិះគន់ទៅលើរដ្ឋាភិបាលកម្ពុជា ដែលមានជំហរមិនច្បាស់លាស់ និងគ្មានវិធានការឆ្លើយតបចំពោះការលើកឡើងរបស់មន្ត្រីវៀតណាម។ ប្រការនេះហើយ ដែលគណបក្សមួយនេះយល់ថា រដ្ឋាភិបាលកម្ពុជា សព្វថ្ងៃ មិននៅខាងពលរដ្ឋរបស់ខ្លួនឡើយ។
លោកនាយករដ្ឋមន្ត្រី ហ៊ុន សែន កាលពីពេលថ្មីៗនេះ បានទទូចឲ្យបក្សប្រឆាំងឈប់ចាត់ទុកថ្នាក់ដឹកនាំគណបក្សប្រជាជន កម្ពុជា ថាជាអាយ៉ងរបស់យួន។ លោក ហ៊ុន សែន ថែមទាំងលើកឡើងថា ប្រសិនបើបក្សប្រឆាំងនៅចាត់ទុកពួកលោកថាជាអាយ៉ងរបស់យួន នោះ នោះមានន័យថា បក្សប្រឆាំង និងបក្សកាន់អំណាច នៅតែជាសត្រូវនឹងគ្នាដដែល។ យ៉ាងណាក៏ដោយ រហូតមកទល់ពេលនេះ នៅមិនទាន់ឃើញរដ្ឋាភិបាលកម្ពុជា បញ្ចេញប្រតិកម្មប្រឆាំងចំពោះការបំភ្លៃប្រវត្តិសាស្ត្ររបស់ រដ្ឋាភិបាលវៀតណាម នៅឡើយ បើទោះជាមានការស្នើសុំពីខ្មែរក្រោម ឲ្យរដ្ឋាភិបាលកោះហៅមន្ត្រីស្ថានទូតវៀតណាម បំភ្លឺឲ្យបានច្បាស់អំពីប្រវត្តិសាស្ត្រនេះក៏ដោយ។
ក្នុងពេលបាតុកម្មរបស់ខ្មែរក្រោម និងយុវជន រយៈពេល ៣ថ្ងៃចុងក្រោយនេះ ក៏ឃើញមានវត្តមានតំណាងរាស្ត្រគណបក្សសង្គ្រោះជាតិ ចូលរួមដែរ។ ក្នុងនោះ ក៏មានតំណាងរាស្ត្រខ្លះថ្លែងថា ពួកគេនឹងកោះហៅរដ្ឋមន្ត្រីក្រសួងការបរទេសកម្ពុជា បកស្រាយការឆ្លើយតប អំពីការបំភ្លៃប្រវត្តិសាស្ត្ររបស់មន្ត្រីស្ថានទូតវៀតណាម នេះ៕
No comments:
Post a Comment