អ្នកភូមិ ៣នាក់ រងរបួស ដោយសារ សន្តិសុខ ក្រុមហ៊ុន ប្រើអាវុធ បាញ់គំរាម
RFA / វិទ្យុ អាស៊ី សេរី | ៧ កញ្ញា ២០១៤
ពលរដ្ឋរងគ្រោះ លោក តិច ងៀម
សម្រាកព្យាបាល របួស នៅមន្ទីរពេទ្យ បង្អែក ខេត្ត មណ្ឌលគិរី
បន្ទាប់ ពីកងសន្តិសុខ ក្រុមហ៊ុន អិលខេអិល (LKL) បាញ់កាល ពីថ្ងៃ ទី៦
ខែកញ្ញា ២០១៤។ Adhoc
អ្នកភូមិ ជនជាតិដើម ព្នង ៣នាក់ រងរបួស ដោយសារ កងសន្តិសុខ ក្រុមហ៊ុន ឯកជនមួយ ប្រើអាវុធបាញ់ គំរាម។ មន្ត្រី ឃ្លាំមើល សិទ្ធិមនុស្ស ហៅទង្វើនេះ ជាអំពើហិង្សា រំលោភសិទ្ធិ មនុស្ស ជាពិសេស រំលោភសិទ្ធិ ជនជាតិដើម ភាគតិច។
មន្ត្រី ឃ្លាំមើល សិទ្ធិមនុស្ស អំពាវនាវ ឲ្យសមត្ថកិច្ច ខេត្ត មណ្ឌលគិរី ចាត់វិធានការ ផ្លូវច្បាប់ ចំពោះ កងសន្តិសុខ បីនាក់ ដែលបានបង្ក របួសស្នាម ប្រជាពលរដ្ឋ ដោយចេតនា និងស្លៀកពាក់ ឯកសណ្ឋាន យោធា, ហើយ ប្រើប្រាស់ កាំភ្លើង កងទ័ពជាតិ បម្រើក្រុមហ៊ុន ឯកជន។
ការអំពាវនាវនេះ ធ្វើឡើង បន្ទាប់ ពីអ្នកភូមិ ពូលុ ៣នាក់ ត្រូវ បានកងសន្តិសុខ ក្រុមហ៊ុន ឈ្មោះ អិលខេអិល (LKL) មិនស្គាល់ឈ្មោះ ពីរនាក់ ស្លៀកពាក់ ឯកសណ្ឋាន ទាហាន ប៉ារ៉ា កាន់កាំភ្លើង មួយដើម និងម្នាក់ទៀត ស្លៀកពាក់ ស៊ីវិល កាលពីថ្ងៃ ទី៦ ខែកញ្ញា បានបាញ់ផ្ញុចដី គំរាម ប្រជាពលរដ្ឋ, ហើយ បែកថ្ម ធ្វើឲ្យ ប្រជាពលរដ្ឋ ម្នាក់ រងរបួស ធ្លុះសាច់ ច្រើនកន្លែង កំពុងព្យាបាល នៅមន្ទីរពេទ្យ និងពីរនាក់ ទៀត របួសស្រាល។
មន្ត្រី សម្របសម្រួល សមាគមអាដហុក (Adhoc) ខេត្ត មណ្ឌលគិរី លោក សុក រដ្ឋា ថ្លែងថា នេះជាចេតនាបង្កហេតុនិងគំរាមស្មារតីអ្នកភូមិ។ លោកបន្តថា កងទាហានរដ្ឋាភិបាលមិនត្រូវបានអនុញ្ញាតប្រើប្រាស់ឯកសណ្ឋាន និងអាវុធបម្រើការឲ្យក្រុមហ៊ុនឯកជននោះឡើយ។ ហេតុនេះបុគ្គលិកសន្តិសុខក្រុមហ៊ុនមានកំហុសបង្ករបួសស្នាមនិង ប្រើប្រាស់តួនាទីជាកងប្រដាប់អាវុធរដ្ឋាភិបាលបម្រើក្រុមហ៊ុនឯកជន ខុសគោលការហាមឃាត់របស់ប្រមុខរាជរដ្ឋាភិបាល។
លោក សុក រដ្ឋា៖ «យើង សូម ធ្វើការ ថ្កោលទោស ចំពោះ សន្តិសុខ ក្រុមហ៊ុនហ្នឹង ដែលបាន ប្រើប្រាស់ អាវុធ លើប្រជាពលរដ្ឋ ដោយកម្រោល។ ក្នុងសកម្មភាព នៃរឿងនេះ ហាក់បីដូច ជាចេតនា ចង់សម្លាប់ មនុស្ស។ ប្រជាពលរដ្ឋ គាត់ មិនបានធ្វើអ្វី ឲ្យមាន ការប៉ះពាល់ ទៅលើបរិវេណ ក្រុមហ៊ុន, ហើយ ក៏មិនបាន ប៉ះពាល់ តំបន់ក្រុមហ៊ុន ហ្នឹងដែរ។»
ប្រជាពលរដ្ឋ រងរបួស ទាំងបីនាក់ មានឈ្មោះ តិច ងៀម, ហ៊ឹម គួយ, និង ប៉ុស កូស រស់នៅ ភូមិ ពូលុ, ឃុំ ប៊ូស្រា, ស្រុក ពេជ្រាដា។
អ្នករងរបួសឈ្មោះ តិច ងៀម រៀបរាប់ថា ពួកគាត់ ៨នាក់ បានធ្វើដំណើរដោយម៉ូតូក្នុងបំណងចូលព្រៃមើលអន្ទាក់ដាក់សត្វ។ លុះពួកគាត់ធ្វើដំណើរមកដល់ចំណុចផ្លូវក្បែរបរិវេណក្រុមហ៊ុន ម៉ូតូមួយគ្រឿងបានខូចទើបពួកគាត់សម្រាកនាំគ្នាជួសជុលម៉ូតូ។ បន្ទាប់នោះស្រាប់តែឃើញក្រុមសន្តិសុខក្រុមហ៊ុនមកដល់ទីនោះ ហើយបណ្ដេញអ្នកភូមិចេញ ព្រមទាំងពោលពាក្យប្រមាថ បន្ទាប់មកសន្តិសុខម្នាក់បានផ្ទុះអាវុធបាញ់ផ្ញុចដី តែត្រូវថ្មបែកខ្ទាតធ្លុះខ្លួនអ្នកភូមិបីនាក់ភ្លាម ក្នុងនោះរូបលោកសន្លប់ដោយសារឈឺមុខរបួសទើបអ្នកភូមិដឹកជញ្ជូនមក មន្ទីរពេទ្យ។ ចំណែកក្រុមសន្តិសុខក្រុមហ៊ុននាំគ្នាវិលត្រឡប់ទៅក្រុមហ៊ុនវិញ។
លោក តិច ងៀម៖ «ប្រជាជនខ្ញុំទៅមើលអន្ទាក់ហ្នឹងមានខុសស្អីគាត់បាញ់។ គាត់និយាយច្រើនណាស់ បាញ់បំបាក់ជើងម្ខាងទៀត គាត់ថាអ៊ីចេះទៀត។»
ទាក់ទងករណីនេះ ស្នងការប៉ូលិសខេត្តមណ្ឌលគិរី លោក ញ៉ែម វន្នី ទទួលស្គាល់ថា សមត្ថកិច្ចប៉ូលិសបានទៅកាន់ទីកើតហេតុដើម្បីធ្វើកំណត់ហេតុពីករណី នេះ។ លោកអះអាងថា ក្រុមហ៊ុនគ្មានសិទ្ធិប្រើប្រាស់កងយោធា និងប្រើប្រាស់អាវុធការពារក្រុមហ៊ុនឡើយ ហេតុនេះលោកនឹងធ្វើរបាយការណ៍ជូនអង្គភាពយោធាដើម្បីចាត់ការក្នុង បញ្ហានេះ។
លោក ញ៉ែម វន្នី៖ «ក្រុមហ៊ុនហ្នឹងគេទទួលខុសត្រូវទេ វាខុសទាំងស្រុងហើយអាហ្នឹង ប៉ុន្តែយើងព្យាយាមសម្របសម្រួលទាំងសងខាង។ ខាងកងកម្លាំងយើងឲ្យមេកើយគេយើងរាយការណ៍ ឬកសាងសំណុំរឿងឲ្យគ្រប់គ្រាន់ទៅហើយ យើងឲ្យគេដាក់ពិន័យអប់រំកូនចៅគេ។»
យ៉ាងនេះក្តីតំណាងប្រជាពលរដ្ឋភូមិពូលុ សង្កេតឃើញថា ក្រុមហ៊ុន អិល.ខេ.អិល ទើបចូលមកបោះទីតាំងនៅតំបន់នោះហើយដឹកជញ្ជូនឈើមូលពីក្នុងព្រៃ ចូលបរិវេណរោងអារឈើក្នុងបរិវេណក្រុមហ៊ុន។ ជាញឹកញាប់សន្តិសុខក្រុមហ៊ុននេះតែងប្រើអាវុធបាញ់គំរាមមិនឲ្យ ប្រជាពលរដ្ឋចូលទៅជិតរោងអារឈើនោះទេ។ ហេតុនេះនៅសប្ដាហ៍ក្រោយអ្នកភូមិគ្រោងនាំគ្នាធ្វើបាតុកម្មទាមទារ ឲ្យក្រុមហ៊ុនទទួលខុសត្រូវករណីបាញ់អ្នកភូមិឲ្យរបួស និងសន្យាបញ្ឈប់ការផ្ទុះអាវុធគំរាមប្រជាពលរដ្ឋតទៅទៀត។
រហូតមកទល់នឹងរសៀលថ្ងៃដដែល វិទ្យុអាស៊ីសេរីមិនទាន់អាចសុំការបំភ្លឺករណីនេះពីតំណាងក្រុមហ៊ុនបាននៅឡើយ៕
No comments:
Post a Comment