ពលករខ្មែរ ៧នាក់ ដែលជាប់គុក នៅម៉ាឡេស៊ី បញ្ជូនមក កម្ពុជា នៅល្ងាចនេះ
RFA / វិទ្យុ អាស៊ី សេរី | ១០ កញ្ញា ២០១៤
ពលករខ្មែរ មកពីម៉ាឡេស៊ី (Photo: RFA)
លោក ចៅ សែនសុខ មន្ត្រីអង្គការ ការពារ សិទ្ធិមនុស្ស លីកាដូ (Licadho) ឲ្យដឹងថា, ពួកគាត់ ទាំង៧នាក់ មានប្រុស ៤នាក់ និងស្រី ៣នាក់ មកពីបណ្ដា ខេត្តផ្សេងគ្នា, ដូចជាខេត្ត សៀមរាប, បន្ទាយ មានជ័យ, ក្រចេះ, ព្រៃវែង, កំពង់ស្ពឺ, និងរាជធានី ភ្នំពេញ។
ស្ត្រី ៣នាក់ បានទៅធ្វើការ នៅប្រទេស ម៉ាឡេស៊ី តាមរយៈ ក្រុមហ៊ុន នាំពលករ តាំងពីឆ្នាំ ២០១០មក។ ពួកនាង បានសម្រេច រត់គេច ពីម្ចាស់ផ្ទះ ឈ្នួល ដោយសារ ការធ្វើបាប, រំលោភ លើសិទ្ធិ ធ្ងន់ធ្ងរ, និងមិនមាន លិខិតការងារ ត្រឹមត្រូវ ពីថៅកែ, ទើប ពួកនាង រត់គេច ដោយគ្មាន លិខិតឆ្លងដែន, ហើយ ប្រឈម នឹងប៉ូលិស ចាប់ផ្ដន្ទាទោស។
ចំណែក ឯបុរស ៤នាក់ ផ្សេងទៀត ត្រូវ បានគេ បោក យកទៅលក់ ធ្វើជាកម្មករ នេសាទសមុទ្រ តាមរយៈ មេខ្យល់ នៅប្រទេស ថៃ កាលពីដើមឆ្នាំ ២០១៣។
លោក ចៅ សែនសុខ សំណូមពរ ដល់ពលរដ្ឋខ្មែរ ទាំងអស់ ត្រូវ សិក្សា ឲ្យច្បាស់ មុន នឹងចំណាកស្រុក ទៅធ្វើការ បរទេស ប្រកប ដោយសុវត្ថិភាព៖ «ពួកគាត់ ត្រូវ ដឹង, ឲ្យយល់ អំពី លក្ខខណ្ឌ ការងារ ដែលត្រូវ ទៅធ្វើ , ឲ្យយល់ ពីកន្លែងការងារ ដែលត្រូវ ធ្វើ, ឲ្យយល់ ពីផលប្រយោជន៍ ដែលគាត់ ទទួលបាន, ហើយ ឲ្យមាន ការទទួល ខុសត្រូវ ពីក្រុមហ៊ុន ដែលបញ្ជូន គាត់ទៅ, ហើយ ឲ្យមាន ការការពារ ពីរាជរដ្ឋាភិបាល កម្ពុជា ផងដែរ, ទើប ប្រជាពលរដ្ឋ ទាំងអស់យើង រួចផុត ពីការទទួល រងគ្រោះ អំពី ការរំលោភ បំពាន ផ្សេងៗ។»
ដោយមានស្នើសុំពីស្ថានទូតខ្មែរនៅម៉ាឡេស៊ី ដល់អង្គការទេសន្តរប្រវេសក៍អន្តរជាតិ ហៅកាត់អាយអូអឹម (International Organization for Migration) បានសម្រេចបញ្ជូនអ្នកទាំង៧នេះមកកម្ពុជាវិញ ដោយមានការសហការជាមួយអង្គការការពារសិទ្ធិមនុស្សលីកាដូ(Licadho) ជួយសម្របសម្រួល និងជួយផ្ដល់វគ្គបណ្ដុះបណ្ដាលកែប្រែនីតិសម្បទា មុនហ្នឹងបញ្ជូនពួកគាត់ទៅកាន់ស្រុកកំណើតរៀងៗខ្លួន៕
No comments:
Post a Comment