វិភាគ៖ សញ្ញាណ នៃការរំលោភ កិច្ចព្រមព្រៀង ២២ កក្កដា
VOD | ១ កញ្ញា ២០១៤
ស្តាប់សំឡេង៖ |
ចម្លងទុក |
(រូបថត៖ តាំង វីដា)
ក្នុងបទវិភាគ កាលពីថ្ងៃ ទី១១ សីហា ២០១៤ អំពី “តើ លោក ហ៊ុន សែន អាចរំលោភ កិច្ចព្រមព្រៀង ២២ កក្កដា ជាមួយ គណបក្ស សង្គ្រោះជាតិ ដែរ ឬទេ?” លោក អ្នកនាង បានស្ដាប់ រួចមកហើយ ថា, ចាស់ៗ មានពិសោធន៍ ខាងនយោបាយ បានមើលឃើញ ថា, លោក ហ៊ុន សែន ធ្លាប់រំលោភ កិច្ចព្រមព្រៀង ជាមួយ អង្គការ សហប្រជាជាតិ ដល់ទៅពីរដង រួចមកហើយ, គឺ ករណីកិច្ច ព្រមព្រៀង ទីក្រុងប៉ារីស ថ្ងៃទី២៣ ខែតុលា ឆ្នាំ១៩៩១ និងកិច្ចព្រមព្រៀង បង្កើតតុលាការ ខ្មែរក្រហម។
ប៉ុន្តែ កាលនោះ ទាំងអ្នកវិភាគ និងទាំងមន្ត្រី ជាន់ខ្ពស់ គណបក្ស សង្គ្រោះជាតិ សុទ្ធតែ យល់ថា, លោក ហ៊ុន សែន មិនអាច រំលោភ កិច្ចព្រមព្រៀង ២២ កក្កដា ២០១៤ បានទេ ព្រោះ ប្រជាពលរដ្ឋ បច្ចុប្បន្ន ចូលរួម តាមដាន ព្រឹត្តិការណ៍ នយោបាយ យ៉ាងសកម្ម, ហើយ មានបណ្ដាញ ទំនាក់ទំនង សង្គម ជាជំនួយ ឲ្យពួកគេ អាចទទួលបាន ព័ត៌មាន យ៉ាងឆាប់រហ័ស បំផុត។
យ៉ាងណា ក៏ដោយ ការកោះហៅ យុវជន និងសកម្មជន គណបក្ស សង្គ្រោះជាតិ ជាបន្តបន្ទាប់ ដោយតុលាការ ដែលគេនិយាយគ្រប់គ្នាថា ជាឧបករណ៍របស់គណបក្សប្រជាជនកម្ពុជា ក្នុងការគាបសង្កត់គណបក្សសង្គ្រោះជាតិឲ្យចូលប្រជុំសភានោះ និងការដែលសមាជិកសភាមកពីគណបក្សប្រជាជនកម្ពុជា មិនបោះឆ្នោតគាំទ្របេក្ខភាពពីររូបមកពីគណបក្សសង្គ្រោះជាតិ ជាប្រធានគណកម្មការទី៨ និងទី១០ នៃរដ្ឋសភា ត្រូវគេមើលឃើញថា សញ្ញាណមួយនៃការរំលោភកិច្ចព្រមព្រៀង២២ កក្កដា។
តើក្រុមអ្នកវិភាគយល់យ៉ាងណាចំពោះសញ្ញាណនៃការរំលោភកិច្ចព្រមព្រៀងនេះ?
អ្នកស្រាវជ្រាវពីការអភិវឌ្ឍសង្គម លោក កែម ឡី យល់ថា ដោយសារមេដឹកនាំគណបក្សសង្គ្រោះជាតិ ទាន់ខ្សោយ ខ្លាចគុកច្រវាក់ គ្មានជំហររឹងមាំច្បាស់លាស់ ទើបជាហេតុធ្វើឲ្យថ្លោះធ្លោយក្នុងការចរចា ជាឱកាសឲ្យគណបក្សប្រជាជនកម្ពុជា កេងចំណេញពីលើរឿងនេះបាន៖ «យើង ក៏ដឹងដែរថា គណបក្សប្រជាជនគឺនៅបន្តគ្រប់គ្រងប្រព័ន្ធទាំងមូល បើទោះបីជាកិច្ចព្រមព្រៀងដល់ណាក៏ដោយ ក៏គណបក្សប្រជាជនគាត់មិនធ្វើតាមដែរ។»
សម្រាប់លោកបណ្ឌិតសុខ ទូច យល់ថា សញ្ញាណទាំងពីរនោះ មិនបញ្ជាក់ពីការរំលោភកិច្ចព្រមព្រៀងទេ។ ទី១ លោកថា ការដែលតុលាការចេញដីកាកោះហៅយុវជន និងសកម្មជនគណបក្សសង្គ្រោះជាតិចូលបំភ្លឺជាបន្តបន្ទាប់ គឺជាចេតនាព្រមានគណបក្សសង្គ្រោះជាតិ កុំឲ្យធ្វើសកម្មភាពណាខុសប្រក្រតី ព្រោះថា អ្នកដែលអាចគេចផុតពីសំណាញ់ច្បាប់ មានតែ៥៥នាក់ប៉ុណ្ណោះ ឯអ្នកដទៃទៀត តែធ្វើខុសនឹងគោលការណ៍ នោះគេនឹងកោះហៅ ហើយនឹងត្រូវទទួលរងពិរុទ្ធតាមប្រព័ន្ធតុលាការ។
អត្ថបទវិភាគផ្សេងទៀត
សម្រាប់ប្រធានផ្នែកស៊ើបអង្កេត នៃសមាគមការពារសិទ្ធិមនុស្សអាដហុក លោក នី ចរិយា វិញយល់ថា សញ្ញាណទាំងពីរនេះបញ្ជាក់ថា កិច្ចព្រមព្រៀង២២ កក្កដា មិនទាន់ត្រូវបានទទួលយក ឬត្រូវបានគោរពមួយរយភាគរយពីគណបក្សប្រជាជនកម្ពុជាទេ គឺគេនៅតែឆ្លៀតប្រើប្រាស់យុទ្ធសាស្ត្រគំរាមកំហែងនៅឡើយ។ លោកថា កត្តានេះអាចធ្វើឲ្យប៉ះពាល់ដល់កិច្ចព្រមព្រៀង។
លោកនី ចរិយា មានប្រសាសន៍បន្ថែមថា តាមលោកយល់ សញ្ញាណនេះគឺមានរូបភាពពីរ ទី១ គណបក្សប្រជាជនកម្ពុជាចង់ពិសោធមើល ថាបើខ្លួនរំលោភកិច្ចព្រមព្រៀង តើគណបក្សសង្គ្រោះជាតិមានកម្លាំងប៉ុនណាក្នុងការតវ៉ា និងទី២ អាចជាយុទ្ធសាស្ត្រមួយរបស់គណបក្សប្រជាជនកម្ពុជា ក្នុងការរំលាយកិច្ចព្រមព្រៀង ព្រោះកិច្ចព្រមព្រៀងនេះ បានបញ្ជាក់ច្បាស់ពីការរៀបចំគណៈកម្មាធិការជាតិរៀបចំការបោះឆ្នោតថ្មី ។
លោកនី ចរិយា បញ្ជាក់ថា តាមលោកពិនិត្យមើល និងតាមដានការចរចានេះ លោកយល់ថា ចេតនារបស់គណបក្សប្រជាជនកម្ពុជា គឺមិនចង់បាន គជប ថ្មីនោះទេ។ ដូច្នេះវាអាចជាចេតនាបញ្ឆេះភ្លើងកំហឹង ឲ្យគណបក្សសង្គ្រោះជាតិ រំលាយកិច្ចព្រមព្រៀងដោយខ្លួនឯង នៅពេលនោះអ្វីៗនឹងចប់ ព្រោះគណបក្សសង្គ្រោះជាតិបានចូលក្នុងសភាទៅហើយ៖ «អាចជាការអុជ ឲ្យមានភ្លើងមួយឆេះ គឺថាធ្វើអ៊ីចឹងទៅដើម្បីឲ្យគណបក្សសង្គ្រោះជាតិទប់ខ្លួនមិនបាន ទប់កំហឹងមិន ក៏អាចឆេះឆាបទៅ រំលាយកិច្ចព្រមព្រៀងនេះទៅ។ ដល់ពេលរំលាយកិច្ចព្រមព្រៀង គឺថា គណបក្សសង្គ្រោះជាតិបានចូលក្នុងសភាហើយ អីហើយ អ៊ីចឹងដំណើរការសភាត្រឹមត្រូវហើយ ក៏ប៉ុន្តែមិនអាចទៅបង្កើតគណៈកម្មាធិការជាតិរៀបចំការបោះឆ្នោតថ្មី បាន។ អ៊ីចឹងទេ គណបក្សប្រជាជននឹងយកឱកាសនេះ សម្រាប់ប្រើប្រាស់ក្នុងការប្រើគណៈកម្មាធិការជាតិរៀបចំការបោះឆ្នោត ចាស់ហ្នឹងបន្តទៅទៀត៕»
No comments:
Post a Comment