ក្រុមការងារ បក្សទាំង២ បន្តកិច្ចប្រជុំ វិសោធនកម្ម ច្បាប់បោះឆ្នោត ថ្ងៃ ៨ កញ្ញា
RFA / វិទ្យុ អាស៊ី សេរី | ៨ កញ្ញា ២០១៤
ពលរដ្ឋចូលរួមបោះឆ្នោតបោះឆ្នោតជ្រើសតាំងតំណាងរាស្ត្រ
នីតិកាលទី៥ នាមណ្ឌលបោះឆ្នោត ក្នុងសង្កាត់កាកាប ខណ្ឌពោធិ៍សែនជ័យ
នៅថ្ងៃទី២៨ កក្កដា ឆ្នាំ២០១៣។ RFA/Mom Sophon
ក្រុមការងារ គណបក្ស ជាប់ឆ្នោត ទាំងពីរ បន្តកិច្ចប្រជុំ ក្រុម ការងារ វិសោធនកម្ម ច្បាប់បោះឆ្នោត នៅថ្ងៃ ទី៨ ខែកញ្ញា។ ក្រុមចរចា បក្សទាំងពីរ គ្រោងជជែកគ្នា ពីតួនាទី និងភារកិច្ច គណៈកម្មការ ឃុំ រៀបចំ ការបោះឆ្នោត ដើម្បី ធានា ថា, មន្ត្រី រៀបចំ ការបោះឆ្នោត នៅថ្នាក់មូលដ្ឋាន ជំនាន់ក្រោយ អាចបំពេញ ការងារ ប្រកប ដោយតម្លាភាព។
សេចក្ដីស្នើច្បាប់ ដែលគណបក្ស ទាំងពីរ គ្រោង នឹងពិនិត្យ នៅរសៀល ថ្ងៃ ទី៨ ខែកញ្ញា នោះ រៀបរាប់ លំអិត តាំងពីរបៀប ជ្រើសរើស មន្ត្រី រៀបចំ ការបោះឆ្នោត ថ្នាក់ឃុំ និងថ្នាក់ការិយាល័យ រហូត ដល់ប្រាក់កម្រៃ ក្នុងពេលបំពេញ ការងារ របស់ មន្ត្រីទាំងនោះ។ ប៉ុន្តែ ខ្លឹមសារ លំអិត នៃសេចក្ដី ស្នើច្បាប់នោះ មិនទាន់ ត្រូវ បានបង្ហាញ ឲ្យដឹង នោះឡើយ។
ប្រធាន ក្រុមចរចា ធ្វើវិសោធនកម្ម ច្បាប់បោះឆ្នោត គណបក្ស សង្គ្រោះជាតិ លោក គួយ ប៊ុនរឿន មានប្រសាសន៍ថា គណបក្សទាំងពីរនឹងពន្លឿនកិច្ចពិភាក្សាពីសេចក្ដីស្នើច្បាប់បោះឆ្នោត ថ្មីនេះឲ្យបានឆាប់ ហើយគ្រោងបញ្ជូនឲ្យសភាពេញអង្គពិនិត្យនិងអនុម័តនៅដើមខែតុលា ខាងមុខ។
លោកបន្តថា គណបក្សទាំងពីរនឹងពិគ្រោះឲ្យគ្រប់ជ្រុងជ្រោយជាមុនសិន តាំងពីមូលដ្ឋានគ្រឹះដែលដកស្រង់ចេញពីច្បាប់ចាស់ និងមតិយោបល់នានាដែលសង្គមស៊ីវិលបានលើកឡើង៖ «សប្ដាហ៍ក្រោយថ្ងៃ ច័ន្ទនេះ យើងនឹងជជែកគ្នាបន្តទៀតពីតួនាទីគណៈកម្មការឃុំនិងថ្នាក់ការិយាល័យ ជាស្មារតីឯកភាពរបស់គណបក្សទាំងពីរហ្នឹង ធ្វើម៉េចពន្លឿនពេលសភាចូលបវេសនកាលវិញ ដាក់ពង្រាងហ្នឹងស្នើសុំឲ្យសភាពិនិត្យអនុម័តនិងសម្រេច។»
កាលពីថ្ងៃច័ន្ទដើមសប្ដាហ៍នេះ ភាគីទាំងសងខាងបានព្រមព្រៀងគ្នាលើសេចក្ដីស្នើច្បាប់ដែលចែងពី តួនាទីរបស់គណៈកម្មការខេត្តរៀបចំការបោះឆ្នោត។ សេចក្ដីស្នើច្បាប់បោះឆ្នោតថ្មីនោះ ខុសពីច្បាប់ចាស់នៅត្រង់ថា ច្បាប់នេះនឹងមានចែងពីបុព្វសិទ្ធិរបស់ប្រធាននិងអនុប្រធានព្រម ទាំងបុគ្គលិកគណៈកម្មការខេត្តរៀបចំការបោះឆ្នោត។ បើច្បាប់ត្រូវបានអនុម័តមែននោះ នៅថ្ងៃអនាគតប្រធានគណៈកម្មការខេត្តរៀបចំការឆ្នោតនឹងមានតួនាទី ស្មើនឹងប្រធាននាយកដ្ឋាន អនុប្រធានគណៈកម្មការខេត្តរៀបចំការបោះឆ្នោតមានតួនាទីស្មើអនុ ប្រធាននាយកដ្ឋាន ហើយសមាជិកថ្នាក់ខេត្តនោះមានតួនាទីស្មើនឹងប្រធានការិយាល័យក្នុង ស្ថាប័នរដ្ឋមន្ត្រីថ្នាក់ខេត្តទាំងនេះ នឹងត្រូវជ្រើសតាំងដោយសមាជិកគណៈកម្មាធិការជាតិរៀបចំការបោះឆ្នោត ហើយក៏នឹងមានប្រាក់ខែប្រហាក់ប្រហែលនឹងតួនាទីទាំងនេះដែរ។
សមាជិកសភាទាំងអស់នឹងចូលធ្វើការក្នុងសភាវិញនៅថ្ងៃទី១ ខែតុលា បន្ទាប់ពីពួកគេសម្រាកវិស្សមកាលអស់រយៈពេល ៦ខែមកនោះ។ ច្បាប់ដំបូងដែលសភាគ្រោងនឹងអនុម័តនោះទំនងជាអនុម័តលើវិសោធនកម្ម រដ្ឋធម្មនុញ្ញ ដែលចែងពីគណៈកម្មាធិការជាតិរៀបចំការបោះឆ្នោត។
អ្នកតំណាងរាស្ត្រគណបក្សប្រជាជនកម្ពុជា លោក ឈាង វុន សុំមិនធ្វើអត្ថាធិប្បាយពីកិច្ចប្រជុំរបស់ក្រុមការងារវិសោធនកម្ម ច្បាប់បោះឆ្នោតនេះទេ នៅថ្ងៃទី៧ ខែកញ្ញា ឆ្នាំ២០១៤។
ទោះជាគណបក្សទាំងពីរកំពុងជជែកគ្នាពីការធ្វើវិសោធនកម្មច្បាប់ បោះឆ្នោតថ្មីក៏ដោយចុះ តែគណៈកម្មាធិការជាតិរៀបចំការបោះឆ្នោតនៅតែបំពេញការងារជាធម្មតា នៅឡើយ។ គ.ជ.ប ថែមទាំងប្រកាសចុះឈ្មោះអ្នកបោះឆ្នោតចាប់ពីថ្ងៃទី១ ដល់ថ្ងៃទី២០ ខែតុលា ទៀតផង។ ដំណើរការចុះឈ្មោះបោះឆ្នោតនេះនឹងត្រូវចាយថវិកាជាតិអស់ប្រមាណ ១លានដុល្លារ។ សង្គមស៊ីវិលឲ្យរិះគន់ថា ការរៀបចំចុះឈ្មោះបោះឆ្នោតថ្មីនេះ ដូចជាការចាយលុយជាតិខ្ជះខ្ជាយ នៅពេលដែលកម្ពុជា កំពុងក្រីក្រ។ ក៏ប៉ុន្តែ គ.ជ.ប តបវិញថា ខ្លួនធ្វើតាមច្បាប់ដែលកំពុងឋិតនៅជាធរមាន៕
No comments:
Post a Comment