សង្គមស៊ីវិល ជំរុញ ឲ្យរដ្ឋាភិបាល បង្ហាញខ្ទង់ ចំណូលចំណាយ ថវិកាជាតិ
RFA | ១១ កញ្ញា ២០១៤
ប្រធានអង្គការអភិវឌ្ឍន៍និងភាពជាដៃគូក្នុងសកម្មភាព (DPA) លោក ម៉ម សម្បត្តិ ផ្ដល់បទសម្ភាសន៍កាលពីថ្ងៃទី១០ កញ្ញា ២០១៤។ RFA/Tin Zakariya
តំណាង អង្គការ សង្គមស៊ីវិល ទាមទារ ឲ្យរដ្ឋាភិបាល ប្រើប្រាស់ ថវិកាជាតិ ឲ្យមាន តម្លាភាព និងបង្ហាញ របាយការណ៍ ឲ្យសាធារណជន បានដឹង អំពី ចំណូលចំណាយ ថវិកាជាតិ ឲ្យបាន ច្បាស់លាស់ ដើម្បី លុបបំបាត់ អំពើ ពុករលួយ នៅតាម ស្ថាប័នរដ្ឋ។
ការទាមទារ ដូច្នេះ ធ្វើឡើង នៅក្នុង សិក្ខាសាលាមួយ នៅថ្ងៃ ទី១០ កញ្ញា ស្ដីពី តម្លាភាព នៃថវិកាជាតិ និងបទពិសោធន៍ នៃការចូលរួម របស់ ប្រជាពលរដ្ឋ ដែលរៀបចំឡើង ដោយវេទិកា មិនមែន រដ្ឋាភិបាល ស្ដីពី កម្ពុជា (NGO Forum)។
មន្ត្រី អង្គការ សង្គមស៊ីវិល លើកឡើង ថា, ការបិទបាំងអំពីចំណូលនិងចំណាយថវិកាជាតិប្រចាំឆ្នាំ នៅតាមស្ថាប័នរដ្ឋនីមួយៗនោះ ជាឱកាសងាយស្រួលឲ្យមន្ត្រីរដ្ឋាភិបាលប្រព្រឹត្តិអំពើពុករលួយ។
មន្ត្រីអង្គការសង្គមស៊ីវិលលើកឡើងថា ថវិកាជាតិប្រើប្រាស់កន្លងមករបស់រដ្ឋាភិបាលមិនមានតម្លាភាពនោះទេ។ ពួកគាត់ទាមទារឲ្យរដ្ឋាភិបាលលាតត្រងដាងអំពីចំណូលប្រចាំឆ្នាំដែល រកបានមកគ្រប់វិស័យ និងការប្រើប្រាស់ខ្ទង់ចំណាយក៏ត្រូវឲ្យប្រជាពលរដ្ឋបានដឹងវិញដែរ។
ប្រធានអង្គការអភិវឌ្ឍន៍ និងភាពជាដៃគូក្នុងសកម្មភាពហៅកាត់ថា ឌីភីអេ (DPA) លោក ម៉ម សម្បត្តិ មានប្រសាសន៍ថា ប្រជាពលរដ្ឋបានបង់ពន្ធជូនរដ្ឋ ដូច្នេះ រដ្ឋាភិបាលត្រូវតែឲ្យប្រជាពលរដ្ឋបានដឹងអំពីចំណាយថវិកាជាតិប្រចាំ ឆ្នាំ ដែលសភាបានអនុម័តឲ្យស្ថាប័នរដ្ឋនីមួយៗប្រើប្រាស់នោះ។
ថវិកាជាតិដែលសភាអនុម័តប្រើប្រាស់ឆ្នាំ២០១៤ មានជាង ៣ពាន់លានដុល្លារសហរដ្ឋអាមេរិក ដែលថវិកាទាំងនេះស្ថាប័នសំខាន់ៗ ទទួលបានថវិកាច្រើនជាងគេ មានស្ថាប័នសុខាភិបាល ការពារជាតិ អប់រំ និងទីស្ដីការគណៈរដ្ឋមន្ត្រីជាដើម។ ក៏ប៉ុន្តែរបាយការណ៍ប្រើប្រាស់ថវិការបស់ស្ថាប័នរដ្ឋនីមួយៗ ហាក់បីដូចជាអាថ៌កំបាំង ដែលរដ្ឋាភិបាលមិនបានលាតត្រដាងឲ្យសាធារណជនដឹងនោះឡើយ។
នាយកប្រតិបត្តិវេទិកានៃអង្គការមិនមែនរដ្ឋាភិបាលស្ដីពីកម្ពុជា លោក តឹក វណ្ណារ៉ា មានប្រសាសន៍ថា លទ្ធផលនៃការអង្កេតជាសាកលឆ្នាំ២០១២ បង្ហាញថា តម្លាភាពថវិការបស់កម្ពុជា នៅមានកម្រិតទាបនៅឡើយ ក្នុងនោះមានថវិកាចំនួន ៤ ក្នុងចំណោមថវិកាសំខាន់ៗទាំង៨ ដែលកំណត់ដោយអង្គការភាពជាដៃគូនៃថវិកាអន្តរជាតិ ហើយកម្ពុជា ទទួលបានពិន្ទុ ១៥ លើ ១០០។ ពិន្ទុនោះមានកម្រិតទាបជាងពិន្ទុតម្លាភាពជាមធ្យមក្នុងតំបន់ស្មើ ៣២ និងក្នុងពិភពលោកស្មើនឹង ៤៣។ ឯកសារព័ត៌មានថវិកាដែលរដ្ឋាភិបាលមិនបានផ្សព្វផ្សាយជាសាធារណៈរួម មាន សេចក្ដីព្រាងច្បាប់ថវិកាប្រចាំឆ្នាំ របាយការណ៍ហិរញ្ញវត្ថុពាក់កណ្ដាលឆ្នាំជាដើម។
អនុប្រធានគណៈកម្មការទី២នៃរដ្ឋសភា គឺគណៈកម្មការសេដ្ឋកិច្ច ហិរញ្ញវត្ថុនិងសវនកម្មនៃរដ្ឋសភា លោក សុន ឆ័យ ឲ្យដឹងថា នៅព្រឹកថ្ងៃទី១០ កញ្ញា នេះ គណៈកម្មការទី២ បានប្រជុំលើកទី១ របស់ខ្លួនអំពីបញ្ហានេះ។ លោកបញ្ជាក់ថា កន្លងមកចំណូលនិងចំណាយថវិកាជាតិមិនបានផ្សព្វផ្សាយជាសាធារណៈទេ។ តែយ៉ាងនេះក្ដី លោកសង្ឃឹមថា គណៈកម្មការនេះនឹងកែប្រែ ហើយនឹងមានការផ្សព្វផ្សាយឲ្យសាធារណជនបានដឹងអំពីករណីនេះ។
អនុប្រធានផ្នែកអង្កេតសិទ្ធិមនុស្សនៃសមាគមសិទ្ធិមនុស្សអាដហុក (Adhoc) និងជាជំនួយការផ្នែកច្បាប់ លោក ណៃ វ៉ង់ដា បញ្ជាក់ថា ការប្រើប្រាស់ថវិកាជាតិ និងចំណូលពីធនធានធម្មជាតិផ្សេងៗនោះ កុំថាឡើយប្រជាពលរដ្ឋបានដឹង សូម្បីតែមន្ត្រីរាជការ និងសមាជិកសភាគណបក្សប្រឆាំងក៏មិនដឹងដែរ។
អង្គការសង្គមស៊ីវិលទាមទារឲ្យរដ្ឋាភិបាលបង្កើនថវិកាជាតិឲ្យ ស្ថាប័នសំខាន់ៗមួយចំនួនទៀត ដូចជាក្រសួងសុខាភិបាល ក្រសួងអប់រំ និងក្រសួងកសិកម្មជាដើម។
លោក សុន ឆ័យ អះអាងថា តាមការស្រាវជ្រាវរបស់លោកកាលពីឆ្នាំ២០១៣ រកឃើញថា ស្ថាប័នដែលប្រព្រឹត្តអំពើពុករលួយខ្លាំងជាគេនោះ គឺក្រសួងសេដ្ឋកិច្ចនិងហិរញ្ញវត្ថុខ្លួនឯង។ លោកបញ្ជាក់ថា ពន្ធគយនិងពន្ធដារបាត់លុយមិនតិចជាង ៦០០លានដុល្លារទេក្នុង១ឆ្នាំៗ។ បន្ទាប់មកគឺស្ថាប័នសុខាភិបាលជាដើម។
ថវិកាជាតិគឺជាឧបករណ៍ដ៏សំខាន់បំផុតមួយរបស់រដ្ឋាភិបាលក្នុង ការអនុវត្តគោលនយោបាយរបស់ខ្លួន និងមានឥទ្ធិពលលើជាតិប្រចាំថ្ងៃ និងអនាគតរបស់សង្គមទាំងមូល៕
No comments:
Post a Comment