ព្រះសង្ឈ ព្រមាន ធ្វើបាតុកម្ម បើ មានការបណ្តេញ ព្រះសង្ឃ និងពលរដ្ឋ មិនឲ្យ ស្នាក់នៅ វត្ត ស្ទឹងមានជ័យ
VOD | 11 កញ្ញា 2014
ព្រះអង្គ យិន រតនសុធាវី (កណ្តាល) ក្នុងសន្និសីទ សារព័ត៌មាន នៅវត្ត ស្ទឹងមានជ័យ កាលពីព្រឹកមិញ (រូបថត៖ ណាត សុភាព)
ក្រុមព្រះសង្ឈ ព្រមាន ធ្វើបាតុកម្ម ប្រឆាំង ព្រះចៅអធិការ វត្ត ស្ទឹងមានជ័យ បើសិន មានការបណ្ដេញ ព្រះសង្ឃ មួយចំនួន និងអ្នកមានជម្លោះ ដីធ្លី ប្រមាណ ជិត១០០នាក់ មិនឲ្យ ស្នាក់នៅ ក្នុងវត្តនេះ បណ្តោះអាសន្ន ដើម្បី សុំអន្តរាគមន៍ រឿងដីធ្លី ពីលោក នាយករដ្ឋមន្ត្រី ហ៊ុន សែន។
ក្នុងសន្និសីទសារព័ត៌មាននៅវត្តស្ទឹងមានជ័យ ក្នុងរាជធានីភ្នំពេញ នៅព្រឹកថ្ងៃព្រហស្បតិ៍នេះ ព្រះសង្ឃព្រះនាម យិន រតនសុធាវី មានថេរដីកាថា ព្រះអង្គពុំបានបង្កភាពអនាធិបតេយ្យ ឬអសន្តិសុខក្នុងវត្តទេ។ ព្រះអង្គបន្តថាប្រសិនជាចៅអធិការវត្តបណ្ដេញព្រះអង្គ និងព្រះសង្ឃមួយចំនួន រួមជាមួយពលរដ្ឋផ្សេងទៀតចេញពីវត្តមែន នោះនឹងមានបាតុកម្មបណ្ដេញព្រះចៅអធិការឲ្យចេញពីវត្តដូចគ្នា។
កាលពីម៉ោងជាង៧និង៣០នាទីយប់ម្សិលមិញនេះ ប្រជាពលរដ្ឋប្រមាណ៥០គ្រួសារមកពីខេត្តបន្ទាយមានជ័យ បានជ្រួលច្របល់នៅពេលឮព័ត៌មានថា ព្រះចៅអធិការស្តីទីវត្តស្ទឹងមានជ័យ គ្រោងបណ្តេញពលរដ្ឋនិងព្រះសង្ឃមួយចំនួនចេញពីវត្ត ដើម្បីរក្សាសណ្តាប់ធ្នាប់ និងសន្តិសុខខណៈអ្នកមានជម្លោះដីធ្លី៣០គ្រួសារទៀតបានឡើងមកស្នាក់នៅ វត្តបន្ថែមទៀត នៅព្រឹកថ្ងៃព្រហស្បតិ៍នេះ។
ពលរដ្ឋម្នាក់មានទំនាស់ដីធ្លី លោក ហ៊ឹម យឿន អាយុ៤៩ឆ្នាំមានប្រសាសន៍ថា លោកបារម្ភពីការបណ្តេញចេញ។ លោកស្នើឲ្យព្រះចៅអធិការវត្តមេត្តា និងអនុគ្រោះដល់ជនរងគ្រោះដីធ្លី ដែលមានបំណងមកសុំអន្តរាគមន៍ពីអាជ្ញាធរ មិនមែនមកបង្ករឿងនោះទេ។
ព្រះចៅអធិការស្តីទីវត្តស្ទឹងមានជ័យ ព្រះតេជគុណ ថៃ ប៊ុនធៀន បដិសេធនឹងការចោទប្រកាន់នេះ។ ព្រះអង្គមានថេរដីកាថា ការកោះហៅព្រះសង្ឃប្រជុំ គឺដើម្បីពិភាក្សារៀបចំសណ្តាប់ធ្នាប់ និងសន្តិសុខក្នុងវត្ត មិនមែនមានគម្រោងដេញប្រជាពលរដ្ឋនោះទេ។
ប្រជាពលរដ្ឋមកពីភូមិប្រាសាទរ៉ាង ឃុំតាគង់ ស្រុកម៉ាឡៃ ខេត្តបន្ទាយមានជ័យ គឺមានជម្លោះដីធ្លីជាមួយក្រុមហ៊ុនថៃមួយ លើផ្ទៃដី ២៩០០ហិកតា តាំងពីឆ្នាំ១៩៩៧។ មកដល់ថ្ងៃ១១ ខែកញ្ញានេះ ពួកគេប្រមាណជិត១០០នាក់បានស្នាក់នៅក្នុងវត្តស្ទឹងមានជ័យ បណ្តោះអាសន្ន ដើម្បីសុំដំណោះស្រាយបញ្ហាដីធ្លីពីនាយករដ្ឋមន្ត្រីហ៊ុន សែន និងរដ្ឋសភា។ ប៉ុន្តែរហូតមកដល់ពេលនេះមិនទាន់មានដំណោះស្រាយណាមួយនៅឡើយទេ៕
No comments:
Post a Comment