មន្ត្រីសិទ្ធិមនុស្ស អន្តរជាតិ ថា, លោក ហ៊ុន សែន គួរ កុំបង្វែរបញ្ហា ពុករលួយ ទៅអ្នកដទៃ
RFA / វិទ្យុ អាស៊ី សេរី | ៥ កញ្ញា ២០១៤
លោកនាយករដ្ឋមន្ត្រី ហ៊ុន សែន
ថ្លែងក្នុងសន្និសីទ ប្រឆាំង អំពើពុករលួយ ក្នុងតំបន់ អាស៊ី ប៉ាស៊ីហ្វិក រាជធានី ភ្នំពេញ នៅព្រឹកថ្ងៃ ទី៣ កញ្ញា ឆ្នាំ ២០១៤។ RFA/Vann Vichar
នាយកប្រតិបត្តិ ទទួលបន្ទុក ផ្នែកអាស៊ី នៃអង្គការ ឃ្លាំមើល សិទ្ធិមនុស្ស អន្តរជាតិ យូមែន រ៉ៃត៍ វ៉ច្ឆ (Human Rights Watch) លោក ប្រេដ អាដាម (Brad Adams) និយាយ ថា, ការដែល លោកនាយករដ្ឋមន្ត្រី ហ៊ុន សែន ព្យាយាមបង្វែរ ការចាប់អារម្មណ៍ អំពី បញ្ហាពុករលួយ នៅកម្ពុជា ទៅចោទប្រកាន់ អំពើពុករលួយ មាននៅក្នុងស្ថាប័ន អន្តរជាតិ ធំៗនោះ, វា មិនបានជួយ កាត់បន្ថយ កំហឹង របស់ ពលរដ្ឋកម្ពុជា ចំពោះ អំពើពុករលួយ នៅកម្ពុជា ឡើយ។
លោក ប្រេដ អាដាម៖ «មិនអាច ប្រកែក បានទេ ថា, កម្ពុជា ជាប្រទេស ដែលពុករលួយ ខ្លាំងបំផុត។ អ្នក ដែលពុករលួយ ភាគច្រើន គឺ ជាមន្ត្រី ដែលមាន ស័កិ្តយស កំពូលៗ។ ឧទាហរណ៍ ដូចជា លោក ហ៊ុន សែន ក្នុងជីវិត ពេញវ័យ របស់លោក, លោក គឺ ជាមន្ត្រី រាជការ។ ប្រសិនបើ អ្នក បូកសរុប ប្រាក់ខែ, ប្រាក់បៀវត្ស តាំងពីគាត់ ចូលបម្រើ ការរដ្ឋ ទៅនឹងលុយកាក់ ទ្រព្យសម្បត្តិ ផ្ទាល់ខ្លួន ទាំងអស់ របស់លោក ហ៊ុន សែន ដែលមាន សព្វថ្ងៃនេះ, អ្នក នឹងឃើញ ថា, វា មិនស៊ីសង្វាក់ គ្នាទេ ឬមិនអាច ពន្យល់ បកស្រាយ បានទេ ពីព្រោះ វា ច្រើន ខុសគ្នា ឆ្ងាយណាស់។ ដូចគ្នា ទៅនឹងមន្ត្រី ជាន់ខ្ពស់ ដទៃទៀតដែរ, ដូចជាលោក ឧបនាយករដ្ឋមន្ត្រី សុខ អាន និងថ្នាក់ដឹកនាំ ទាហាន និងប៉ូលិស ជាដើម។ ពួកគេ មានវីឡា ធំៗ និងបើករថយន្ត ទំនើប។ គ្មាន ពលរដ្ឋ កម្ពុជាណា ដឹងទេ ថា, លុយកាក់ ទ្រព្យសម្បត្តិ សម្បូរហូរហៀរ របស់ ពួកគេ ទាំងនោះ បានពីណា មកនោះទេ នៅខណៈ ប្រាក់ខែ របស់ ពួកគេ មានមិនច្រើននោះ។»
លោក ប្រេដ អាដាម បន្តទៀត ថា, ចំណែកច្បាប់ ប្រឆាំង អំពើពុករលួយ របស់ កម្ពុជា ក៏មិនមាន ប្រសិទ្ធភាព ក្នុងការចាប់ ដាក់ទោស មន្ត្រីធំៗ ដែលស្និទ្ធ នឹងលោក ហ៊ុន សែន ដែរ ពីព្រោះ សមាសភាព នៃអង្គភាព ប្រឆាំង អំពើពុករលួយ មិនឯករាជ្យ, ហើយ ច្បាប់ប្រកាស ទ្រព្យសម្បត្តិ របស់ មន្ត្រីរាជការ ក៏តម្រូវ ឲ្យធ្វើឡើង ដោយស្ងាត់ៗ មិនបើកចំហ។ ដូច្នេះ តើ ពលរដ្ឋកម្ពុជា ទូទៅ នៅតែ មិនដឹង ថា, មន្ត្រីគ្រាក់ៗ ទាំងនោះ មានទ្រព្យសម្បត្តិ ច្រើនប៉ុណ្ណា និងបានមក ពីណាឡើយ។
លោក ប្រេដ អាដាម បន្ថែមថា, ដូច្នេះ លោកនាយករដ្ឋមន្ត្រី ហ៊ុន សែន គួរតែ មើលពិនិត្យ កែលំអ បញ្ហា ក្នុងប្រទេស ខ្លួនឯង ជាជាងបង្វែរ ការចាប់អារម្មណ៍ ទៅចោទ អ្នកដទៃ ដោយគ្មាន ភស្តុតាងនោះ។
ប្រតិកម្ម របស់លោក ប្រេដ អាដាម នេះ ធ្វើឡើង មួយថ្ងៃ បន្ទាប់ ពីលោក នាយករដ្ឋមន្ត្រី ហ៊ុន សែន នៅក្នុងពិធី បើកសន្និបាត ប្រឆាំង អំពើ ពុករលួយ ប្រចាំតំបន់ អាស៊ី ប៉ាស៊ីហ្វិក នាព្រឹកថ្ងៃ ទី៣ ខែកញ្ញា នៅរាជធានី ភ្នំពេញ ថ្លែងរិះគន់ អង្គការ អន្តរជាតិ ដែលវាយតម្លៃ ចំណាត់ថ្នាក់ ពុករលួយ នៅកម្ពុជា និងប្រទេស ក្រីក្រ ថា មិនតម្លាភាព និងមិនយុត្តិធម៌។ ហើយ ក្នុងឱកាសនោះ, លោក ក៏ឆ្លៀតរិះគន់ នាយក ធនាគារ ពិភពលោក (Wold Bank) និងនាយក ស្ថាប័ន រូបិយវត្ថុ អន្តរជាតិ (IMF) ថា មានការជាប់ ពាក់ព័ន្ធ នឹងអំពើ ពុករលួយដែរ៕
No comments:
Post a Comment