លោក កឹម សុខា ថា, តំណាងរាស្ត្រ មិនមែន មានតួនាទី តែ ក្នុងរដ្ឋសភាទេ
RFA / វិទ្យុ អាស៊ី សេរី | ២០ កញ្ញា ២០១៤
អនុប្រធានរដ្ឋសភានៃព្រះរាជាណាចក្រកម្ពុជា លោក កឹម សុខា
សំណេះសំណាលជាមួយប្រជាពលរដ្ឋក្នុងឱកាសចូលរួមកាន់បិណ្ឌវេនទី១២
នៅវត្តពោធិ៍អណ្ដែត ឃុំស៊ាងឃ្វាង ស្រុកកំចាយមារ ខេត្តព្រៃវែង
នៅព្រឹកថ្ងៃទី២០ ខែកញ្ញា ឆ្នាំ២០១៤។ RFA/Hum Chamroeun
អនុប្រធាន ទី១ នៃរដ្ឋសភា ថ្លែងខណៈ សំណេះសំណាល ជាមួយ ប្រជាពលរដ្ឋ នៅខេត្ត ព្រៃវែង ថា, សមាជិក សភា, តំណាងរាស្ត្រ គ្រប់រូប, មានតួនាទី សំខាន់ណាស់ ក្នុងការជួយ ដោះស្រាយ ពីទុក្ខកង្វល់ របស់ ប្រជាពលរដ្ឋ, មិនថា ខាងក្នុង ឬនៅក្រៅ របងរដ្ឋសភា នោះទេ, គឺ មានកាតព្វកិច្ច ពន្យល់ និងបកស្រាយ គ្រប់ទីកន្លែង ទាំងអស់។
ការលើកឡើង របស់ លោក កឹម សុខា ទំនងឆ្លើយតប នឹងប្រសាសន៍ លោក នាយករដ្ឋមន្ត្រី ហ៊ុន សែន ដែលថ្លែង ថា, តំណាងរាស្ត្រ អង្គុយនៅកៅ អីណា ធ្វើការ នៅទីនោះ និងមិនគួរ ដើររិះគន់ ក្រៅសភា។
លោក កឹម សុខា ថ្លែងបែបនេះ ក្នុងឱកាស ដឹកនាំ សមាជិក សភា តំណាងរាស្ត្រ គណបក្ស សង្គ្រោះជាតិ ទៅចូលរួម កាន់បិណ្ឌវេន ទី១២ នៅវត្ត ពោធិ៍អណ្ដែត, ឃុំ ស៊ាងឃ្វាង, ស្រុក កំចាយមារ, ខេត្ត ព្រៃវែង នាព្រឹកថ្ងៃ ទី២០ ខែកញ្ញា។
លោក កឹម សុខា និយាយ ក្នុងទឹកមុខ ញញឹមញញែម ទៅកាន់ប្រជាពលរដ្ឋ ម្ចាស់ឆ្នោត ក្នុងឱកាស កាន់បិណ្ឌនោះ ថា, លោក នឹងមិនថ្លែងសារ នយោបាយ ក្នុងរដូវ បុណ្យភ្ជុំបិណ្ឌ នេះទេ ដើម្បី ឲ្យប្រជាពលរដ្ឋ ធ្វើបុណ្យ ឧទ្ទិសកុសល ជូនទៅដល់ ជីដូនជីតា និងបុព្វការី ជនទាំង ៧សន្ដាន។ ឆ្លៀត ក្នុងឱកាស នោះដែរ, លោក កឹម សុខា បានពន្យល់ ប្រជាពលរដ្ឋ ទំនងបែប ឆ្លើយតប ទៅនឹង ប្រសាសន៍ របស់ លោក នាយករដ្ឋមន្ត្រី ហ៊ុន សែន ដោយលោក លើកឡើង ថា, សមាជិក សភា, តំណាងរាស្ត្រ គ្រប់រូប, មានតួនាទី សំខាន់, មិនមែន នៅតែ ក្នុងបន្ទប់ ម៉ាស៊ីនត្រជាក់ ដែលមាន កម្រាលព្រំស្អាត នោះទេ, គឺ សមាជិកសភា តំណាងរាស្ត្រ មាននាទី ចុះទៅសួរ សុខទុក្ខ និងជួយ ដោះស្រាយ ទុក្ខកង្វល់ របស់ ប្រជាពលរដ្ឋ គ្រប់ទីកន្លែង ទាំងអស់។
កន្លងមក លោក ហ៊ុន សែន ធ្លាប់បានថ្លែងនៅក្នុងពិធីប្រកាសផ្សព្វផ្សាយដាក់ឲ្យប្រើប្រាស់ជា ផ្លូវការនូវផែនការយុទ្ធសាស្ត្រអភិវឌ្ឍន៍ជាតិ ឆ្នាំ២០១៤-២០១៨ នាសណ្ឋាគារសូហ្វីតែល ភ្នំពេញ ភូកេត្រា (SOFITEL PHNOM PENH PHOKEETHRA) នៅព្រឹកថ្ងៃទី១៨ ខែកញ្ញា ថា នៅក្នុងរយៈពេលប៉ុន្មានថ្ងៃមកនេះ គ្មានអ្នកបាញ់កាំភ្លើងធំដាក់លោកទេ គឺលោក ហ៊ុន សែន ចង់សំដៅទៅលើ លោក កឹម សុខា មិនបានរិះគន់ដល់លោកនៅឱកាសពិធីភ្ជុំបិណ្ឌជិតមកដល់នេះ។ លោក ហ៊ុន សែន អះអាងថា តំណាងរាស្ត្រទាំងអស់អង្គុយលើកៅអីណា ត្រូវធ្វើការនៅកៅអីនោះនៅក្នុងសភា មិនត្រូវដើររិះគន់នៅក្រៅសភាទេ។
ទាក់ទងនឹងបញ្ហានេះ អ្នកវិភាគនយោបាយ លោកបណ្ឌិត សុខ ទូច មានប្រសាសន៍ថា សមាជិកសភាតំណាងរាស្ត្រ មានសិទ្ធិសម្ដែងមតិគ្រប់ទីកន្លែង ទាំងនៅក្នុង និងខាងក្រៅរដ្ឋសភា លើកលែងតែការទៅឃោសនាឲ្យគណបក្សនយោបាយ ដើម្បីប្រជាប្រិយភាពគណបក្សរបស់ខ្លួន ព្រោះមានតួនាទីក្នុងការបង្កើតច្បាប់ និងមានតួនាទីចុះទៅសួរសុខទុក្ខប្រជារាស្ត្រម្ចាស់ឆ្នោត។ លោកបណ្ឌិត សុខ ទូច ចាត់ទុកការឌឺដងដាក់គ្នារបស់ថ្នាក់ដឹកនាំគណបក្សធំៗទាំងពីរ ថាជារឿងធម្មតារបស់អ្នកនយោបាយហើយ ដើម្បីបង្កើតសកម្មភាពមិនឲ្យស្ងប់ស្ងាត់ក្នុងសង្គម។
កន្លងមក លោក ហ៊ុន សែន ធ្លាប់គំរាមដកតួនាទីអនុប្រធានទី១រដ្ឋសភា គឺលោក កឹម សុខា។ ការគំរាមដកនេះ ដោយសារតែ លោក កឹម សុខា មានប្រសាសន៍ទៅកាន់អ្នកគាំទ្ររបស់ខ្លួននៅខេត្តសៀមរាប កាលពីថ្ងៃទី៦ កញ្ញា ថា គណបក្សសង្គ្រោះជាតិ រកឃើញថា មន្ត្រីពុករលួយមួយចំនួន កំពុងសម្ងំកាន់តំណែងនៅក្នុងជួររដ្ឋាភិបាល ចង់មិនចង់ គឺអាចបោះឆ្នោតទម្លាក់មន្ត្រីរដ្ឋាភិបាល ឬក៏រដ្ឋមន្ត្រីណាមួយចេញពីតំណែងទៀតផង បើរកឃើញថា មន្ត្រីទាំងនោះប្រព្រឹត្តអំពើពុករលួយ៕
No comments:
Post a Comment