សកម្មជន បក្សប្រឆាំង ដែលរងការចោទ ថា គំរាមប្រជាការពារ នៅពោធិ៍សាត់ ពន្យារពេល ចូលបំភ្លឺ
RFA / វិទ្យុ អាស៊ី សេរី | ១៧ កញ្ញា ២០១៤
សកម្មជន គណបក្ស សង្គ្រោះជាតិ លោក កេង កប
ផ្ដល់បទសម្ភាសន៍ ដល់មន្ត្រី សមាគម អាដហុក (Adhoc) ប្រចាំខេត្ត ពោធិ៍សាត់
កាលពីថ្ងៃ ទី១៦ ខែកញ្ញា ឆ្នាំ២០១៤។ Photo Adhoc
ចៅក្រមស៊ើបសួរ សាលាដំបូង ខេត្តពោធិ៍សាត់ បានចេញដីកា បង្គាប់ ឲ្យសកម្មជន គណបក្ស សង្គ្រោះជាតិ ម្នាក់ ចូលខ្លួន បំភ្លឺ ជុំវិញ ករណី គំរាមកំហែង ប្រជាការពារ ភូមិ ចំនួន ៤នាក់ នៅព្រឹក ថ្ងៃ ទី១៧ ខែកញ្ញា។
មន្ត្រី សិទ្ធិមនុស្ស ចាត់ទុក ការចេញដីកា របស់ តុលាការនា ពេលនេះ ថា គឺ ជាចេតនា នយោបាយ និងជាការ គំរាមកំហែង បក្សប្រឆាំង។
ជនសង្ស័យ ដែលជាសកម្មជន គណបក្ស សង្គ្រោះជាតិ នៅឃុំ មេទឹក, ស្រុក បាកាន, ខេត្ត ពោធិ៍សាត់ មិនបាន ចូលខ្លួនបំភ្លឺ តាមកាលកំណត់ របស់ ចៅក្រម នៅវេលាម៉ោង ៨ព្រឹក ថ្ងៃទី១៧ ខែកញ្ញា នោះទេ ក្រោយដាក់ពាក្យសុំ ពន្យារពេល ចូលខ្លួនបំភ្លឺ ដោយសំអាង ថា, មិនទាន់មាន មេធាវី ការពារសិទ្ធិ, ហើយ គាប់ជួន នឹងការរវល់ ធ្វើបុណ្យទាន ក្នុងរដូវ ភ្ជុំបិណ្ឌផង។
ពលរដ្ឋរស់នៅភូមិតាមុំ និងជាអតីតភ្នាក់ងារសង្កេតការណ៍មកពីគណបក្សសង្គ្រោះជាតិ លោក កេង កប មានប្រសាសន៍ថា លោកមានការភ្ញាក់ផ្អើល និងមិនគួរឲ្យជឿថា មានដីកាពីតុលាការប្រឆាំងនឹងរូបលោកដូច្នេះឡើយ ពីព្រោះហេតុការណ៍ដែលបានកើតឡើងនៅអំឡុងពេល នៃការបោះឆ្នោតជាតិតាំងពីមួយឆ្នាំមុននោះ ខាងគណៈកម្មការឃុំរៀបចំការបោះឆ្នោត (CEC) និងប៉ុស្តិ៍នគរបាលរដ្ឋបាលឃុំមេទឹក បានហៅលោកទៅបំភ្លឺអំពីដំណើររឿងចប់សព្វគ្រប់ និងពុំមានបញ្ហាអ្វីទាំងអស់តាំងពីពេលនោះមក៖ «ខ្ញុំមិនបានទៅ គំរាមកំហែងអ្នកទាំង ៤នាក់ហ្នឹងទេ ព្រោះខ្ញុំម្នាក់ឯងទៅគំរាមកំហែងឯណាឈ្នះគេ។ ខ្ញុំឃើញវាធ្វើស៊ីញ៉ូដៃជើងបោះឆ្នោតឲ្យលេខ៤ (គណបក្សប្រជាជនកម្ពុជា) ទៅ ហើយអង្គុយកត់នឹងសៀវភៅ ហើយអង្គុយហូបស្រា គឺថ្ងៃហ្នឹង គឺថ្ងៃគេបិទមិនឲ្យមានការហូបចុក ហើយធ្វើអ៊ីចឹងទេ។»
កាលពីព្រឹកថ្ងៃទី២៨ ខែកក្កដា ឆ្នាំ២០១៣ រូបលោកបានចេញពីសង្កេតការណ៍នៅការិយាល័យបោះឆ្នោតវត្តកោះខ្សាច់ ហើយចេញមកបោះឆ្នោតខ្លួនឯងនៅការិយាល័យបោះឆ្នោតទួលលៀប។ ពេលធ្វើដំណើរមកដល់ការិយាល័យនេះ ស្រាប់តែឃើញប្រជាការពារភូមិតាមុំ ចំនួន ៤នាក់ កំពុងអង្គុយផឹកស្រាសក្នុងតូបមួយ ដែលមានចម្ងាយប្រមាណជា ២០០ម៉ែត្រពីការិយាល័យបោះឆ្នោត ហើយបានស្រែកលើកដៃជាសញ្ញាលេខ៤ ព្រមទាំងយកប៊ិច និងសៀវភៅអង្គុយចាំកត់ឈ្មោះពលរដ្ឋដើរទៅបោះឆ្នោតទៀតផង។ ឃើញបែបនេះ លោកក៏ស្រែកទៅអ្នកទាំងបួនថា ខ្លួនជាប្រជាការពារភូមិ ធ្វើបែបនេះមិនត្រឹមត្រូវទេ ហើយក៏ដើរចេញពីហ្នឹងទៅ។
វិទ្យុអាស៊ីសេរី មិនអាចស្វែងរកប្រភពទាក់ទងប្រជាការពារភូមិតាមុំ នៃឃុំមេទឹក ទាំងបួននាក់ ដើម្បីសុំការពន្យល់បន្ថែមជុំវិញករណីគំរាមកំហែងនេះបានទេ នៅថ្ងៃទី១៧ ខែកញ្ញា។
ទាក់ទងករណីនេះ មន្ត្រីសម្របសម្រួលសមាគមអាដហុក (Adhoc) ប្រចាំខេត្តពោធិ៍សាត់ លោក ភួង សុធា ថ្លែងថា នៅអំឡុងពេលនៃការបោះឆ្នោតម្ដងៗ គណបក្សកាន់អំណាចបានប្រើគ្រប់វិធីសាស្ត្រ ដើម្បីកៀរគរសំឡេងឆ្នោតរបស់ខ្លួន ហើយបើមានអ្នកសង្កេតការណ៍ ឬសកម្មជនណាហ៊ានចង្អុលបង្ហាញនូវភាពមិនប្រក្រតីអ្វីមួយ ពួកគាត់នឹងត្រូវគេចោទប្រកាន់ពីបទគំរាមកំហែង ឬបរិហារកេរ្តិ៍ជាដើម។ លោកថា ករណីនេះ គឺជាការគំរាមកំហែងបំបាក់ស្មារតីទៅលើសកម្មជនគណបក្សប្រឆាំង៖ «វា មិនមែនជារឿងព្រហ្មទណ្ឌធម្មតាទេ វាជាចេតនាមួយផ្នែកនយោបាយហើយ ពីព្រោះអីរឿងទាំងអស់ហ្នឹងបានស្ងប់ស្ងាត់ហើយ បន្ទាប់ពីគណបក្សទាំងពីរបានចូលក្នុង (សភា)។ ប៉ុន្តែវាហាក់បីដូចជាមានសង្គ្រាមពាក្យសម្ដីមួយរវាងនាយក រដ្ឋមន្ត្រី ហើយនិងអនុប្រធានរបស់បក្សសង្គ្រោះជាតិ។ អ៊ីចឹងរឿងទាំងអស់ហ្នឹងវាអាចរសើបឡើងវិញផងដែរ។»
នៅក្នុងដីកាចេញដោយចៅក្រមស៊ើបសួរសាលាដំបូងខេត្តពោធិ៍សាត់ លោក ថោង ផល្លារង្សី ចុះថ្ងៃទី៨ ខែកញ្ញា ឆ្នាំ២០១៤ ព្រមានចេញដីកាបង្គាប់ឲ្យនាំខ្លួនតាមនីតិវិធី ក្នុងករណីជនសង្ស័យមិនបានចូលបង្ហាញខ្លួនដោយគ្មានមូលហេតុ។ ចៅក្រមបើកការស៊ើបអង្កេតលើអង្គហេតុបទល្មើសគំរាមកំហែង ដែលមានចែង និងផ្ដន្ទាទោសតាមមាត្រា២៣១ នៃក្រមព្រហ្មទណ្ឌ។ ប្រសិនបើតុលាការរកឃើញកំហុសដូចការចោទនោះ សកម្មជនគណបក្សសង្គ្រោះជាតិ លោក កេង កប ប្រឈមនឹងការផ្ដន្ទាទោសដាក់ពន្ធនាគារពីមួយខែ ទៅ ៦ខែ និងពិន័យជាប្រាក់ពីមួយសែនរៀល ទៅដល់មួយលានរៀល៕
No comments:
Post a Comment