តំណាង ពលរដ្ឋ តវ៉ា ដីធ្លី នៅក្រចេះ ថា, ការកោះហៅ ចូលបំភ្លឺ ជាការបំបាក់ ស្មារតី
RFA / វិទ្យុ អាស៊ី សេរី | ១៧ កញ្ញា ២០១៤
ប្រជាពលរដ្ឋ នៅឃុំ ឃ្សឹម, ស្រុក ស្នួល, ខេត្ត ក្រចេះ
ឡើងទៅស្តាប់ ការសាកសួរ តំណាង ពួកគាត់ តាមដីកា កោះហៅ របស់ តុលាការ
ខេត្តក្រចេះ នៅថ្ងៃទី១៧ ខែកញ្ញា ឆ្នាំ២០១៤។ Photo Provided
តំណាង ពលរដ្ឋម្នាក់ នៅឃុំ ឃ្សឹម, ស្រុក ស្នួល, ខេត្ត ក្រចេះ ដែលបាន ដឹកនាំ ប្រជាពលរដ្ឋ តវ៉ា រឿងដីធ្លី នៅភ្នំពេញ រហូត បានសម្រេចនោះ ពេលនេះ ត្រូវ បានសាលាដំបូង ខេត្ត កោះហៅ ដើម្បី ចូលបំភ្លឺ ជុំវិញរឿង ឆបោក។
ចំណែក តំណាង ពលរដ្ឋ អះអាង ថា, លោក មិនបាន ពាក់ព័ន្ធ នឹងរឿង ឆបោកឡើយ។ ផ្ទុយទៅវិញ, លោក យល់ថា, ការកោះហៅនោះ គឺ ដើម្បី បំបាក់ស្មារតី នរណា ដែលចេញមុខ តវ៉ា រឿងដីធ្លី តែប៉ុណ្ណោះ។
ដីកាកោះហៅ តំណាង ប្រជាពលរដ្ឋ មានបញ្ហាដីធ្លី នៅឃុំ ឃ្សឹម, ស្រុក ស្នួល, ខេត្ត ក្រចេះ កើតឡើង បន្ទាប់ ពីតំណាង រូបនោះ បានចេញ សកម្មភាព តវ៉ា រឿងដីធ្លី កាលពីពេល កន្លងទៅ, ហើយ ថែមទាំង ដឹកនាំ ប្រជាពលរដ្ឋ ដែលមានបញ្ហា ឡើងទៅ រាជធានី ភ្នំពេញ នៅពេល ថ្មីៗនេះ ទៀតផង។
តំណាង ពលរដ្ឋ ប្រមាណ ៣០០គ្រួសារ ដែលត្រូវ សាលាដំបូង ខេត្តក្រចេះ កោះហៅ ចូលបំភ្លឺ នៅម៉ោង ជាង២ រសៀលនោះ លោក ងួន វិបុល មានប្រសាសន៍ ថា, ការកោះហៅ រូបលោក ដោយឱ្យចូលបំភ្លឺ បទឆបោក, លោក បញ្ជាក់ថា, វា ជារឿង មិនត្រឹមត្រូវ និងមិនមាន ភាពច្បាស់លាស់។ លោក បន្តថា តាមពិត នៃការកោះហៅ អាចជាលេស ដើម្បី ឱ្យតំណាង ពលរដ្ឋ ផ្សេងៗ បាក់ស្បាត, មិនហ៊ាន ចេញមុខ តវ៉ា រឿងដីធ្លី របស់ខ្លួន។
លោក ងួន វិបុល៖ «ខ្ញុំ បានពឹង មេធាវី អាដហុក (Adhoc) និងមេធាវី អប់រំច្បាប់។ គាត់ បានឆ្លើយ ថា, គាត់ បានទៅ បើកមើល សំណុំរឿង នៅក្នុង ព្រះរាជអាជ្ញា, បានឆ្លើយ ថា មានគេ ប្ដឹងពាក់ព័ន្ធ នឹងតំណាងចាស់។ ប៉ុន្តែ មិនមាន អ្នកដឹងពិត ប្រាកដទេ។ តែ អាជ្ញាធរ ខេត្ត, អាជ្ញាធរ ស្រុកហ្នឹង បានសរសេរ របាយការណ៍ បញ្ជូនទៅ ព្រះរាជអាជ្ញា, ហើយ ព្រះរាជអាជ្ញា ក៏កោះខ្ញុំ ក្នុងលក្ខណៈ ដែលមិន ច្បាស់លាស់។ ក្នុងនោះ ខ្ញុំ មានការបារម្ភ ថា, ជាលេស អ្វីមួយ ដើម្បី ទម្លាក់មកលើខ្ញុំ ឬក៏ក្រង សំណុំរឿង អ្វីមួយ ដើម្បី ចោទប្រកាន់ មកលើរូបខ្ញុំ ដើម្បី ឱ្យមានគំនាប។»
ទិដ្ឋភាពនៅខាងក្រៅ និងខាងក្នុងបរិវេណសាលាដំបូងខេត្តក្រចេះ វិញ មានប្រជាពលរដ្ឋជិត ៤០០នាក់ នៅរង់ចាំទទួលដំណឹងជុំវិញការចូលបំភ្លឺរបស់តំណាងពួកគាត់ រហូតធ្វើឱ្យខាងតុលាការផ្អាកដំណើរការ ហើយប្រកាសពន្យារពេលឲ្យចូលបំភ្លឺពេលក្រោយ ប៉ុន្តែក្រោយពេលមានប្រតិកម្មពីប្រជាពលរដ្ឋខ្លាំង ទើបមានការព្រមព្រៀងគ្នាឱ្យតំណាងរូបនោះ ចូលបំភ្លឺវិញនៅម៉ោងប្រមាណជាង ៣រសៀល។
ទាក់ទងបញ្ហានេះ ព្រះរាជអាជ្ញារងអមសាលាដំបូងខេត្តក្រចេះ លោក ធុច បញ្ចសន្តិភាព ដែលកាន់សំណុំរឿងនេះមានប្រសាសន៍ថា ខាងលោកកំពុងធ្វើការសាកសួរដោយមិនមានការផ្អាកទេ ហើយការសាកសួរនោះ គឺពាក់ព័ន្ធនឹងរឿងដីធ្លីកាលពីពេលកន្លងទៅ មិនមែនរឿងឆបោកឡើយ។ ដីកាលើកទីពីរ ដែលចេញដោយតំណាងអយ្យការអមសាលាដំបូងដែលមានឈ្មោះ លោក ធុច បញ្ចសន្តិភាព កាលពីថ្ងៃទី២៤ សីហា គឺបានអញ្ជើញ លោក ងួន វិបុល ជាជនសង្ស័យរស់នៅភូមិស្រែថ្មី ឃុំឃ្សឹម ឱ្យចូលបំភ្លឺនៅថ្ងៃទី១៧ កញ្ញា វេលាម៉ោង ២កន្លះ ជុំវិញរឿងឆបោកនៅក្នុងភូមិស្រែថ្មី កាលពីឆ្នាំ២០១១ ដល់ឆ្នាំ២០១៣។
ចំណែកឯមេធាវីការពារក្តីឱ្យ លោក ងួន វិបុល គឺលោក ចាន់ សុជាតិ មានប្រសាសន៍នៅក្រោយពេលបញ្ចប់ការសាកសួរថា នេះគ្រាន់តែជាការបំពេញតាមនីតិវិធីរបស់តុលាការតែប៉ុណ្ណោះ ព្រោះកាលពីឆ្នាំ២០១៣ មានប្រជាពលរដ្ឋខ្លះបានប្ដឹងទៅថ្នាក់ស្រុកពីរឿងមិនទទួលបាន ដីធ្លី ប៉ុន្តែរឿងដីនោះក៏បានចប់សព្វគ្រប់ទៅហើយ។ បន្ថែមពីនេះ ប្រជាពលរដ្ឋទាំងនោះក៏មិនបានប្ដឹងមកតុលាការដែរ តែខាងសមត្ថកិច្ចទេដែលបញ្ជូនសំណុំរឿងនេះមកតុលាការ។
លោក យល់ថា ព្រះរាជអាជ្ញា គប្បីតម្កល់រឿងមួយនេះមិនចាត់ការ ពីព្រោះសំណុំរឿងនេះ គឺគ្មានអង្គហេតុ និងភស្តុតាងច្បាស់លាស់ឡើយ៖ «ជា គំនិតខ្ញុំ។ ខ្ញុំ យល់ថា, បើ តុលាការ រកមិនឃើញ ថា មានពិរុទ្ធទេ, តុលាការ គប្បី តម្កល់សំណុំរឿង ទុក, មិនចាត់ការ អ៊ីចឹង។ ដំណាក់កាល ព្រះរាជអាជ្ញា, គាត់ មានសិទ្ធិ ត្រឹមតែ តម្កល់រឿ, មិនចាត់ ការទេ ដោយសារ មិនមាន បទល្មើស អ៊ីចឹងណា៎។»
មន្ត្រីផ្នែកអង្កេតនៃសមាគមសិទ្ធិមនុស្សអាដហុក ប្រចាំខេត្តក្រចេះ លោក ហេង ភារៈ យល់ថា ប្រសិនបើការកោះហៅនេះអាចជាការបំបាក់ស្មារតីតំណាង ឬពលរដ្ឋដែលតវ៉ារឿងដីធ្លីនោះ គឺមិនអាចសម្រេចទេ។ ផ្ទុយទៅវិញ នឹងរឹតតែធ្វើឱ្យពលរដ្ឋពុះកញ្ជ្រោលឡើង ជាក់ស្តែងគ្រាន់តែនៅពេលតំណាងពួកគាត់បញ្ចប់ការសាកសួរនៅម៉ោង ៥ល្ងាច ដោយមិនមានអ្វីនោះ ក្រុមពលរដ្ឋទាំងអស់នាំគ្នាហ៊ោកញ្ជ្រៀវបញ្ជាក់ថា ពួកគាត់គ្មានការខ្លាចរអាចំពោះការកោះហៅនោះឡើយ៕
No comments:
Post a Comment