ស្រូវ ជិត១ពាន់ ហិកតារ ក្នុងខេត្ត ចំនួនពីរ ប្រឈម នឹងខូច ដោយសារ ទំនប់ក្រុមហ៊ុន ចិន
RFA / វិទ្យុ អាស៊ី សេរី | ២០ កញ្ញា ២០១៤
ប្រឡាយ និងទំនប់ ដែលទទួល យកទឹក ពីស្ទឹង ស្ពានស្រែង
ដើម្បី ស្រោច ស្រពកសិកម្ម នារដូវប្រាំង នៅក្នុងឃុំ ជ្រោយនាងងួន
ស្រុកស្រីស្នំ ខេត្ត សៀមរាប។ រូបថតថ្ងៃ ទី១៤ ខែកញ្ញា ឆ្នាំ២០១៤ (Photo provided)
ប្រឡាយ អភិវឌ្ឍន៍នេះ កំពុង អនុវត្ត គម្រោង ដោយក្រុមហ៊ុន ចិន ដើម្បី នាំទឹក សម្រាប់ ស្រោចស្រព វិស័យកសិកម្ម នារដូវប្រាំង។
អាជ្ញាធរ ស្រុក ស្រីស្នំ, ខេត្ត សៀមរាប និងមន្ត្រី ពាក់ព័ន្ធ ខ្លះទៀត កំពុង ជួបប្រជុំគ្នា ដើម្បី រិះរក មធ្យោបាយល្អ ក្នុងការបញ្ចៀស ទឹកជំនន់ ដែលចាល់ខ្លាំង ដោយសារ ទំនប់អភិវឌ្ឍន៍ កំពុងតែ គំរាមកំហែង ទៅលើស្រូវ របស់ ប្រជាកសិករ ជាច្រើនរយ ហិកតារ នៅក្នុងឃុំ ចំនួន៥។
ទឹកជំនន់ ដែលបណ្ដាល មកពីភ្លៀងខ្លាំង, ហើយ ហូរមកចាល់ នឹងទំនប់ ដែលក្រុមហ៊ុន ចិន ស្ថាបនានោះ កំពុងធ្វើ ឱ្យកសិករ ជាច្រើនគ្រួសារ ព្រួយបារម្ភ អំពី ការខូចខាត ស្រូវ របស់ ពួកគេ ប្រសិនបើ ទឹកនៅតែ បន្តលិច រយៈពេលយូរ។
សមាជិក ក្រុមប្រឹក្សា ស្រុកស្រីស្នំ ១រូប គឺ លោក ហូយ ឈិន មានប្រសាសន៍ ថា, កាលពីព្រឹក ថ្ងៃសុក្រ ទី១៩ ខែកញ្ញា អាជ្ញាធរ ស្រុក និងមន្ត្រី ពាក់ព័ន្ធ ជាច្រើន ផ្នែកទៀត បានជួបប្រជុំគ្នា ដើម្បី រិះរកវិធី ដោះស្រាយ ទៅលើបញ្ហា ទឹក ដែលចាល់ នឹងទំនប់, ហើយ ជន់លិចស្រូវ ជាច្រើនរយ ហិកតារនោះ។ មន្ត្រី ដដែល បញ្ជាក់ ថា, រយៈពេល ជិតមួយសប្ដាហ៍ មកហើយ ទឹកភ្លៀង ដែលហូរ ពីតំបន់ភ្នំ តាមស្ទឹង ស្ពានស្រែង បានមកចាល់ នឹងទំនប់ ធ្វើឱ្យ លិចលង់ ស្រូវ របស់ ប្រជាកសិករ ជាច្រើនឃុំ នៃស្រុក ស្រីស្នំ៖ «នេះ កំពុងប្រជុំ ដោះស្រាយ រឿងទឹកលិចស្រូវ ព្រោះ វា ជន់លើកមុន ក៏ទឹក វា លិចដែរ, ហើយ នៅពេល វា ទើបតែ ងើបបានបន្តិច ទឹកជន់ លើកក្រោយនេះ មកលិច មួយសាទៀត នៅមិនទាន់ ស្រកទេ។ ចាំមើល អភិបាល, គាត់ ថា ចុះទៅមើល ដើម្បី ឱ្យចិន កាយបង្ហូរចេញ។»
ប្រភពព័ត៌មាន ពីតាមបណ្ដា ភូមិខ្លះ នៃស្រុក ស្រីស្នំ ឱ្យដឹង ថា, អ្នកភូមិ រាប់សិប គ្រួសារ កំពុងរងការ ប៉ះពាល់ ដោយសារតែ ទឹកជំនន់ គំរាមកំហែង ស្រូវ របស់ ពួកគេ។
មេភូមិ ជ្រោយនាងងួន នៃឃុំ ជ្រោយនាងងួន លោក ឌី ប៊ុនស៊ាន ឱ្យដឹង ថា, ទឹកជំនន់ បានជន់លិចស្រែ នៅភូមិ របស់គាត់ កាលពី ៣ថ្ងៃមុន ធ្វើឱ្យ ប្រជាពលរដ្ឋ ប្រមាណ ១០គ្រួសារ ក្នុងចំណោម អ្នកភូមិ សរុប ៧០គ្រួសារ កំពុងរង ការប៉ះពាល់ ពីទឹកជំនន់នោះ៖ «ទឹកលិច បាន ៣ថ្ងៃ ទើបតែ ស្រក, ផុសឃើញ ចុងស្រូវ បន្តិចៗ, មានរលួយ ខ្លះៗ ទៅហើយ ជាប់ នឹងមាត់ ប្រឡាយ ប្រហែល ៥ហិកតារ វារលួយម្ដុំៗ មិនរលួយទាំងអស់ទេ នៅវាទើបតែផុសស្រូវ បន្តិចៗ។»
ចំណែក មេភូមិ ឫស្សីសាញ់ លោក អាន ពិសី ឱ្យដឹង ស្រដៀងគ្នា ថា, ស្រូវ ប្រជាពលរដ្ឋ ក្នុងភូមិ របស់លោក កំពុងលិច ទៅក្នុងទឹក ប្រហែល ជិត២០០ ហិកតារ, ក៏ប៉ុន្តែ លោក មិនអាច ប៉ាន់ស្មាន ថា, តើ វា អាចខូចខាត ឬក៏យ៉ាងណាទេ ពីព្រោះ លោក មិនទាន់ដឹង ថា, ទឹក វា នឹងស្រកផុត នៅពេលណា ពិតប្រាកដ៖ «វា កល់ នឹងប្រឡាយ ចិន ណា! ប៉ែកខាងលិច, លិច ប្រហែល ១៥០ហិកតារ, ហើយ នេះ កំពុងតែ បង្ហូរទឹកចេញ។ យើង មិនទាន់ដឹង ថា, ផលប៉ះពាល់ យ៉ាងម៉េចទេ។ បើ បង្ហូរ គឺ បង្ហូរហើយ, ប៉ុន្តែ ទឹក ចេះតែ មកពីលើ ថែមទៀត។ ឯ រឿងខូច ឬមិនខូច, យើង អត់ទាន់ដឹង ពីព្រោះ វា ទើបតែ លិចបាន ២-៣ថ្ងៃ។ ខ្ញុំ ព្រួយបារម្ភដែរ, បានទាក់ទង ទៅក្រុមហ៊ុន ចិន, ហើយ ក្រុមហ៊ុន, គេ ចុះមកជួយ កាប់ប្រឡាយ បង្ហូរទឹកចេញ។»
នៅស្រុក ស្រីស្នំ ដោយសារតែ ទំនប់ និងប្រឡាយ អភិវឌ្ឍន៍ ដែលស្ថាបនា ដោយក្រុមហ៊ុន ចិន ដើម្បី យកទឹក ពីស្ទឹង ស្ពានស្រែង សម្រាប់ ស្រោចស្រព វិស័យកសិកម្ម នៅរដូវប្រាំងនោះ គឺ កំពុងធ្វើ ឱ្យឃុំខ្លះ ទទួលរងទឹកជំនន់ លិចស្រូវ និងឃុំ ខ្លះទៀតខ្វះទឹក ដោយសារតែ ស្ទះ មិនអាច ចូលដល់។ អាជ្ញាធរ ស្រុក ស្រីស្នំ និងមន្ត្រី កសិកម្ម កំពុងតែ ស្វែងរក ការដោះស្រាយ ទៅលើបញ្ហា ទាំងពីរនេះ ឱ្យមាន ភាពប្រសើរ។
ប្រធានការិយាល័យកសិកម្មស្រុកស្រីស្នំ លោក ណាត ស៊ីនួម មានប្រសាសន៍ថា ទឹកភ្លៀងដែលហូរតាមស្ទឹងស្ពានស្រែង បានចូលតាមប្រឡាយអភិវឌ្ឍន៍ដែលស្ថាបនាដោយក្រុមហ៊ុនចិន កាលពីថ្ងៃទី១៣ ខែកញ្ញា កន្លងទៅ ហើយនៅថ្ងៃទី១៤ គឺទឹកដែលហូរតាមប្រឡាយ បានជន់ខ្លាំង និងបានបែកចូលទៅតាមស្រែ បណ្ដាលឱ្យជន់លិចស្រូវចំនួន ៩៣០ហិកតារ។ មន្ត្រីដដែលបញ្ជាក់ថា ក្នុងចំណោមស្រូវដែលទឹកលិចជិត ១ពាន់ហិកតារនោះ រហូតដល់ថ្ងៃទី១៩ ខែកញ្ញា គឺទើបតែស្រកបានចំនួន ៣៧០ហិកតារ នៅសល់ប្រមាណជាង ៥០០ហិកតារ នៅតំបន់ខាងក្រោម បន្តលិចនៅឡើយ៖ «វាស្រកទៅពីលើនេះ ទៅ វានៅខាងត្រាំសសរ វាមាន ៥ភូមិទៀត បើគិតជាផ្ទៃដីខ្ទង់ ៥០០ហិកតារជាងទៀតនោះ កំពុងតែលិច។ ដូច្នេះ បើការសន្និដ្ឋានរបស់ខ្ញុំ វាមិនទាន់អាចឱ្យដល់ទៅខូចទេ ពីព្រោះស្រូវទឹកជំនន់លិចត្រឹម ៧-១០ថ្ងៃអត់អីទេ។ មានតំបន់ខ្លះដែលស្ទះ និងប្រឡាយចិន វាអត់ វាអត់មានទឹក។ ដូច្នេះ បងប្អូនសំណូមពរមកលោកមេឃុំ លោកអភិបាលស្រុកស្រីស្នំ គេបានរៀបចំចាត់ចែងអស់ហើយ កាយបង្ហៀរពីកន្លែងណាដែលលិច ទៅដាក់នៅកន្លែងគ្មានទឹក។ ដូច្នេះ វាអាចមានទឹកគ្រប់ស្រែ។»
មន្ត្រីការិយាល័យកសិកម្មស្រុកស្រីស្នំ ឱ្យដឹងថា តំបន់ដែលមានទឹកជំនន់លិចស្រូវ ចាប់តាំងពីថ្ងៃទី១៤ ខែកញ្ញា រហូតមកដល់ថ្ងៃទី១៩ គឺនៅឃុំស្លែងស្ពាន សរុបផ្ទៃដីស្រែប្រមាណ ១០០ហិកតារ ឃុំជ្រោយនាងងួន ផ្ទៃដីស្រែដែលលិចទឹកប្រមាណ ៧០ហិកតារ។ ចំណែកឯឃុំប្រិយ និងឃុំក្លាំងហាយ សរុបផ្ទៃដី ១៥០ហិកតារ ក៏ប៉ុន្តែរហូតមកដល់ថ្ងៃទី១៩ ខែកញ្ញា ទឹកជំនន់បានស្រកជិតផុតពីតំបន់ទាំងនោះហើយ។
មន្ត្រីស្រុកស្រីស្នំ ឱ្យដឹងថា ប្រឡាយ និងទំនប់អភិវឌ្ឍន៍សម្រាប់នាំទឹកពីស្ទឹងស្ពានស្រែង ស្រោចស្រពវិស័យកសិកម្មនៅរដូវប្រាំង ដែលកំពុងធ្វើឱ្យមានទឹកជំនន់លិចស្រូវនៅតំបន់ខ្លះ ហើយតំបន់ខ្វះទៀត ស្ទះទឹកចូលមិនដល់នោះ គឺក្រុមហ៊ុនចិន បានអនុវត្តគម្រោងសាងសង់រយៈពេល ៣ឆ្នាំ ដោយរហូតមកដល់ពេលនេះ គម្រោងស្ថាបនាជិតរួចរាល់ហើយ៕
No comments:
Post a Comment