ថៃ រៀបចំ បទបញ្ជា ថ្មី សម្រាប់ ពលករ ប្រទេសជិតខាង ងាយចូលធ្វើការ
RFA / វិទ្យុ អាស៊ី សេរី | ១៥ កញ្ញា ២០១៤
សកម្មភាព ប្រជាពលរដ្ឋ ខ្មែរ ដែលអាជ្ញាធរ ថៃ
ចាប់បញ្ជូន មកដាក់ចំណុច រង្វង់មូល ខាងមុខច្រកទ្វារ អន្តរជាតិ
ប៉ោយប៉ែត ខេត្ត បន្ទាយមានជ័យ នៅថ្ងៃ ទី១២ ខែមិថុនា ឆ្នាំ២០១៤។ Photo: RFA
អាជ្ញាធរ ផ្នែកការងារ ថៃ កំពុងរៀបចំ សេចក្ដីព្រាង បទបញ្ជា ថ្មី ដើម្បី ឲ្យកម្មករ ប្រទេស ជិតខាង ងាយស្រួល ចូលធ្វើការ នៅតាម បណ្ដាខេត្ត ថៃ ជាប់ព្រំដែនបាន ដោយស្របច្បាប់ ដោយគ្រាន់តែ ចុះបញ្ជីបញ្ជាក់ ការឆ្លងដែន នៅច្រក ចេញចូល ជំនួសលិខិត ឆ្លងដែន។
កាសែត ថៃ បាងកក ប៉ុស្ដិ៍ (Bangkok Post) ផ្សាយថ្ងៃ ទី១៥ កញ្ញា បានស្រង់សម្ដី មន្ត្រី ផ្នែកការងារ ថៃ លោក ជីរ៉ាសាក់ សូឃន់ថាឆាត (Jirasak Sukhonthachat) ថា, សេចក្ដីព្រាង បទបញ្ជាថ្មីនេះ បានដាក់ជូន ក្រុមប្រឹក្សា ជាតិ, សន្តិភាព, និងសណ្ដាប់ធ្នាប់ ដើម្បី ពិនិត្យ ជាមុនសិន មុននឹងដាក់ជូន គណៈរដ្ឋមន្ត្រី អនុម័ត។ បន្ទាប់មក រដ្ឋាភិបាលថៃ នឹងចរចា ជាមួយ ប្រទេសជិតខាង ដែលមាន ពលករ ធ្វើការ នៅថៃ អំពី បទបញ្ជាថ្មីនេះ។
ក៏ប៉ុន្តែ ពាណិជ្ជករ ថៃ ខ្លះ បានជំទាស់ នឹងសេចក្ដីព្រាង នៃបទបញ្ជាថ្មីនេះ ដោយអះអាង ថា, បទបញ្ជាថ្មីនេះ មិនមាន ប្រសិទ្ធភាព ក្នុងការគ្រប់គ្រង ពលករ បរទេស ខុសច្បាប់ទេ។ ពាណិជ្ជករ ថៃ ទាំងនោះ បានផ្ដល់ គំនិត ថា, រដ្ឋាភិបាល ថៃ គួរ មានច្បាប់ ផ្សេងទៀត ដើម្បី គ្រប់គ្រង ពលករ បរទេស ឲ្យមានប្រសិទ្ធភាព, ដូចជា ច្បាប់គ្រប់គ្រង ពលករ នៅតាមរាជធានី ធំៗ និងគ្រប់គ្រង ពលករ នៅតាមតំបន់ ជាប់ព្រំដែន នៃប្រទេស ជិតខាង ដែលពលករ ទាំងនោះ ធ្វើការវិលល្ងាច។ បើ មិនដូច្នោះទេ ពាណិជ្ជករ ឬអ្នកជួលថៃ ដូចជាម្ចាស់ កសិដ្ឋាន នៅតាមតំបន់ ព្រំដែន នឹងនៅតែ ប្រឈម នឹងការខ្វះខាត ពលករ ដដែល ព្រោះ ថា, ពលករ ប្រទេសជិតខាង ភាគច្រើន ដែលធ្វើការ និងស្នាក់នៅ តាមតំបន់ ព្រំដែន តែងតែ នៅរយៈពេល ខ្លី, បន្ទាប់មក ឈប់ធ្វើការ រួចធ្វើដំណើរ ចូលជ្រៅ ក្នុងប្រទេស ថៃ ដើម្បី ស្វែងរក ការងារ នៅតាម ទីប្រជុំជន ធំៗ, ព្រោះ នៅទីនោះ ពួកគេ អាចរកការងារ ធ្វើបាន ល្អជាង និងបាន ប្រាក់ឈ្នួល ថ្លៃជាង។ បញ្ហានេះ ធ្វើឲ្យម្ចាស់ សហគ្រាស និងម្ចាស់ កសិដ្ឋាន ថៃ នៅតាមតំបន់ ជនបទ ជាពិសេស តំបន់ជាប់ប្រទេស ជិតខាង ប្រឈម ការខ្វះខាត ក្នុងការជួល ពលករ បរទេស ធ្វើការ ដដែល។
កាសែត ដដែល ឲ្យដឹង ថា, យ៉ាងហោចណាស់ មានពលករ បរទេស ប្រហែល ១លាននាក់ ធ្វើការ នៅថៃ ដែលភាគច្រើន មកពីប្រទេស ជិតខាង, ដូចជា កម្ពុជា, ឡាវ, និងភូមា៕
No comments:
Post a Comment