អ្នកវិភាគ៖ ការតែងតាំង មន្ត្រី គ.ជ.ប. ថ្មី បន្ថែម អាចជាឧបសគ្គ សម្រាប់ កំណែទម្រង់
RFA / វិទ្យុ អាស៊ី សេរី | ៨ តុលា ២០១៤
ក្រុមអង្គការ សង្គមស៊ីវិល ដែលធ្វើការ ពាក់ព័ន្ធ ការបោះឆ្នោត រិះគន់ ចំពោះ ការតែងតាំង មន្ត្រីជាន់ខ្ពស់ គណៈកម្មាធិការ ជាតិ រៀបចំ ការបោះឆ្នោត (គ.ជ.ប.) ថ្មី បន្ថែមទៀត នៅពេលនេះ ថា, ហាក់ដូច ជាប្រញាប់ពេក ណាស់។ ការតែងតាំងនេះ, វា ជាសញ្ញាបង្ហាញ ថា, គ.ជ.ប. បច្ចុប្បន្ន ហាក់នៅ រឹងមាំ និងអាច ជាឧបសគ្គ សម្រាប់ កំណែទម្រង់ លើច្បាប់ បោះឆ្នោត ថ្មី នេះ។
ក្រុមអង្គការ មិនមែន រដ្ឋាភិបាល ដែលឃ្លាំមើល ការបោះឆ្នោត នៅកម្ពុជា ចាត់ទុក ថា, ការដំឡើង តួនាទីមន្ត្រី នៃគ.ជ.ប. បន្ថែមទៀតនេះ ទំនង ជាប្រធាន គ.ជ.ប. ចង់ពង្រឹងសាច់ដុំ ឲ្យឃើញថា គ.ជ.ប. នៅតែ មានសមត្ថភាព ក្នុងកាតព្វកិច្ច និងការទទួល ខុសត្រូវ លើកិច្ចការ របស់ខ្លួន។
លោក ហង្ស ពុទ្ធា នាយក អង្គការ និកហ្វិច (Nicfec) យល់ឃើញ ថា. ការតែងតាំង មន្ត្រី គ.ជ.ប. បន្ថែម នៅពេលនេះ, វា ហាក់ស្ថិត ក្នុងមន្ទិលសង្ស័យ ច្រើនណាស់។ លោក បន្តថា, គ.ជ.ប. មិនគួរណា ផ្ដើមការផ្ដល់តួនាទី បន្ថែមទៀត នោះទេ ព្រោះ កាលៈទេសៈនេះ គណៈកម្មការ ចម្រុះ នៃគណបក្ស នយោបាយ ទាំងពីរ កំពុង ដំណើរការ លើនីតិវិធី មួយចំនួន, ដូចសេចក្ដីសម្រេច កាលពីខែកក្កដា កន្លងទៅ។
ការតែងតាំង មន្ត្រី គ.ជ.ប. បន្ថែម ពីរ រូបទៀត នៅពេលនេះ ធ្វើឡើង នៅចំពេល ដែលសេចក្តី ព្រាងច្បាប់ នៃ គ.ជ.ប. ថ្មី កំពុង ស្ថិតក្នុងការ ពិគ្រោះយោបល់ ឬអាច នឹងមាន ការរុះរើ ប្រសិនដូចអ្វី ដែលគណបក្ស នយោបាយ ទាំងពីរ កំពុងបន្ត កិច្ចការ របស់ខ្លួន ដូចដែលបាន ព្រមព្រៀង រួចមកហើយ កាលពីថ្ងៃ ទី២២ ខែកក្កដា ដែលចង់ ឲ្យមាន ការបោះឆ្នោត មួយ ដោយសេរី និងយុត្តិធម៌ នៅអាណត្តិ បន្តបន្ទាប់ទៀត។ ជាពិសេសនោះ គឺ ចង់លុបបំបាត់ វប្បធម៌ តវ៉ា ក្រោយការបោះឆ្នោត។
ចំណែក មន្ត្រីផ្នែកច្បាប់ និងព័ត៌មាន នៃអង្គការ ខុមហ្វ្រែល (Comfrel) លោក សួន យុធ្យា ចាត់ទុក ថា, ប្រសិនបើ ការតែងតាំង មន្ត្រី គ.ជ.ប. ថ្មីនេះ ធ្វើឡើង ដោយពុំមាន ការពិគ្រោះយោបល់ ឬអារកាត់ ដោយចិត្តឯងនោះ, វា គឺ ជារឿងផ្ទុយ នឹងច្បាប់។ លោក ឲ្យដឹងទៀត ថា, ផ្អែកលើគោលការណ៍ ច្បាប់បោះឆ្នោត ឬបទបញ្ជា ផ្ទៃក្នុង របស់ គ.ជ.ប., ស្ថាប័ននេះ ចង់ធ្វើអ្វីមួយ ត្រូវ ឆ្លងសេចក្ដីសម្រេច ពេញអង្គ ពីគណៈកម្មាធិការ ជាតិ រៀបចំ ការបោះឆ្នោត ជាមុន។
ឆ្លើយតប រឿងនេះ, អគ្គលេខាធិការ នៃគ.ជ.ប. លោក ទេព នីថា ឲ្យដឹងថា, ការពិតនេះ ពុំមែន ជាការតែងតាំង អ្វីឡើយ, ប៉ុន្តែ មន្ត្រី ទាំងពីររូបនេះ គឺ មន្ត្រី ដែលមាន សមត្ថភាព និងជំនាញ បច្ចេកទេស ក្នុងរឿង បោះឆ្នោត។ លោក ថ្លែងថា, អ្វី ដែលប្រធាន គ.ជ.ប. គឺ លោក អ៊ឹម សួស្តី រុះរើ តួនាទីនេះ គឺ ជាកន្លែងចាស់ របស់មន្ត្រី ទាំងពីររូបនេះ ប៉ុណ្ណោះ។
ប្រតិកម្ម របស់ សមាជិក គ.ជ.ប. ម្នាក់ នៅពេលនេះ ធ្វើឡើង ប្រមាណ ៣សប្ដាហ៍ ក្រោយលេចធ្លាយ ព័ត៌មាន នៃការតែងតាំង កាលពីថ្ងៃ ទី១២ ខែកញ្ញា របស់ លោក អ៊ឹម សួស្តី។
លិខិត ចុះថ្ងៃ ទី៦ ខែតុលា របស់ លោក ម៉ៅ សុភារិទ្ធ សមាជិក គ.ជ.ប. ឲ្យដឹង ថា, ការចេញលិខិត សម្រេចតែងតាំង មន្ត្រីជាន់ខ្ពស់ ពីររូប របស់ គ.ជ.ប. បន្ថែមទៀត គឺ ផ្ទុយពីច្បាប់ បោះឆ្នោត។
លិខិត ឲ្យដឹងទៀត ថា, ក្រៅពីលោក សំ សាវុធ ដែលត្រូវ តែងតាំង ជាមន្ត្រីជាន់ខ្ពស់ នៃនាយកដ្ឋាន សេវាកម្មច្បាប់ និងវិវាទកម្ម ទទួលបន្ទុក ស្រាវជ្រាវ និងដោះស្រាយ បណ្ដឹង, តួនាទីនេះ មានឋានៈ និងបុព្វសិទ្ធិ ស្មើប្រធាន នាយកដ្ឋាន បន្ថែមលើមុខងារ បច្ចុប្បន្ន ជានាយកដ្ឋាន ខុទ្ទកាល័យ គណៈកម្មាធិការ ជាតិ រៀបចំ ការបោះឆ្នោត។ ចំណែក លោក ថំ បណ្ដូល ត្រូវ តែងតាំង ជាមន្ត្រីជាន់ខ្ពស់ ទទួលបន្ទុក ការងារ ប្រតិបត្តិការ ដែលមានឋានៈ និងបុព្វសិទ្ធិ ស្មើប្រធាន នាយកដ្ឋាន បន្ថែមលើតួនាទី បច្ចុប្បន្ន ជាជំនួយការ ផ្ទាល់ របស់ ប្រធាន គ.ជ.ប. គឺលោក អ៊ឹម សួស្តី។
បន្ថែម លើលិខិតនេះ សមាជិក គ.ជ.ប. លោក ម៉ៅ សុភារិទ្ធ អះអាង ថា, នេះ ពុំមែន ជាការផ្លាស់ប្ដូរ កន្លែងធ្វើការទេ, ប៉ុន្តែ ជាការតែងតាំង។ លោក ចាត់ទុកថា, ក្នុងក្របខ័ណ្ឌ នៃ គ.ជ.ប. ការជ្រើសរើស បុគ្គលថ្មី ត្រូវ ឆ្លងយោបល់ ពីសមាជិក និងក្នុងករណី ចាំបាច់។
លិខិត បន្តថា, លើសពីនេះ នៅមានគម្រោង នៃការតែងតាំង មន្ត្រី ថ្នាក់នាយកដ្ឋាន និងថ្នាក់ការិយាល័យ ដើម្បី បំពេញកន្លែង ដែលទំនេរ បន្ថែមទៀត៕
No comments:
Post a Comment