លោក សម រង្ស៊ី មកដល់កម្ពុជា វិញស្ងាត់ៗ ពេលច្បាប់ គ.ជ.ប. រងចាំជំនួប កំពូល
RFI / វិទ្យុ បារាំង អន្តរជាតិ | ២៥ តុលា ២០១៤
លោក សម រង្ស៊ី ថ្លែងក្នុងពេល ជួបជាមួយ ប្រជាពលរដ្ឋ មានជម្លោះដីធ្លី នៅវត្ត សាមគ្គីរង្សី កាលពីពេល កន្លងមក។។
RFI/Siv Channa
ប្រធាន គណបក្ស សង្គ្រោះជាតិ និងភរិយា
បានត្រឡប់ មកពីអឺរ៉ុបវិញ
ស្ទើរតែស្ងាត់ ដូចអ្នកដំណើរ ធម្មតា នៅព្រឹកមិញ។
ពុំមាន អ្នកគាំទ្រ ឯណាផ្សេង នៅរងចាំទទួល និងហែហម លោក
សម រង្ស៊ី និងលោកស្រី ជូឡុង សូមួរ៉ា
ក្រៅតែ ពីអង្គរក្ស បួនដប់នាក់ នោះឡើយ។
ទោះបី ជាមាតុភូមិ និវត្តន៍ ជារឿងតូចតាចមែន,
ប៉ុន្តែ រឿងកែទម្រង់ច្បាប់ ទាក់ទង នឹងកំណែទម្រង់ ការបោះឆ្នោត ជារឿងធំមួយ ដែលកំពុង រងចាំ ជំនួបកំពូល របស់លោក
សម រង្ស៊ី ជាមួយ មេដឹកនាំ គណបក្ស ប្រជាជនកម្ពុជា។
មន្ត្រី គណបក្ស ប្រឆាំង ពន្យល់ ភាពស្ងៀមស្ងាត់ ព្រឹកមិញ
និងបង្ហើប កម្មវិធីការងារខ្លះ របស់លោក សម រង្ស៊ី។
មាតុភូមិនិវត្តន៍ របស់លោក សម រង្ស៊ី នៅពេលនេះ ត្រូវ បានលោកស្រី មួរ សុខហួរ បង្ហើប តាមសម្ដី ផ្ទាល់ទៀត ថា៖ «ការងារ មួយចំនួនធំ សំខាន់បំផុត គឺ រឿងបញ្ចប់ នូវការជម្រុញ ឱ្យអនុម័ត ឱ្យបានលឿនបំផុត នូវច្បាប់ កែទម្រង់ ច្បាប់បោះឆ្នោត និងរៀបចំ គ.ជ.ប.។» កាលបរិច្ឆេទ ពិតប្រាកដ នៃជំនួបកំពូល រវាង មេដឹកនាំ គណបក្ស សង្គ្រោះជាតិ និងមេដឹកនាំ គណបក្ស ប្រជាជនកម្ពុជា ដើម្បី សម្រេចចំណុច សេសសល់ ទាក់ទង នឹងកំណែទម្រង់ ការបោះឆ្នោត មិនទាន់ ត្រូវ បានបង្ហើប ប្រាប់ឱ្យច្បាស់លាស់ទេ។ លោកស្រី មួរ សុខហួរ អះអាង ថា, លោក សម រង្ស៊ី និងមន្ត្រី គណបក្ស ប្រឆាំង នឹង «ពិនិត្យមើល ស៊ីជម្រៅទៀត» នូវចំណុចណា ដែលលោក សម រង្ស៊ី ត្រូវ ជជែក ជាមួយ លោកនាយករដ្ឋមន្ត្រី ហ៊ុន សែន អនុប្រធាន គណបក្ស ប្រជាជនកម្ពុជា បន្ទាប់ ពីគណៈកម្មការ បច្ចេកទេស នៃគណបក្ស សង្គ្រោះជាតិ បានពិនិត្យ រួចហើយ។
នៅដើម សប្តាហ៍នេះ លោក ប៊ិន ឈិន ប្រធាន ក្រុមការងារ ចរចា កែទម្រង់ ការបោះឆ្នោត មកពីគណបក្ស ប្រជាជនកម្ពុជា បានអះអាង ថា, ចំណុច ខ្វែងគំនិតគ្នា រវាង គណបក្ស ទាំងពីរ នៅសល់តែ «១០ ភាគរយ» ប៉ុណ្ណោះ ដែលទាមទារ ឱ្យថ្នាក់ដឹកនាំ កំពូល ប្រជុំសម្រេច។ ក្នុងនោះ ក៏មាន លក្ខខណ្ឌ នៃការជ្រើសរើស អគ្គលេខាធិការ នៃគណៈកម្មាធិការ ជាតិ រៀបចំ ការបោះឆ្នោត ថ្មី ផងដែរ។
ប៉ុន្តែ លោក គល់ បញ្ញា នាយកប្រតិបត្តិ នៃអង្គការ ខុមហ្វ្រែល ជឿថា, «នៅមាន ចំណុច សំខាន់ៗ ជាច្រើនទៀត» ដែលគណបក្ស ប្រជាជន កម្ពុជា និងគណបក្ស សង្គ្រោះជាតិ នៅខ្វែង គំនិតគ្នា។ លោក គល់ បញ្ញា សោកស្តាយ ដែលគណបក្ស ទាំងពីរ មិនបានផ្តល់ ឱកាស ឱ្យអង្គការ មិនមែន រដ្ឋាភិបាល បានដឹង។
ក្រៅពីបញ្ហា កំណែទម្រង់ ការបោះឆ្នោត, បើ តាមលោកស្រី មួរ សុខហួរ, លោក សម រង្ស៊ី នឹងចុះមូលដ្ឋាន នៅខេត្ត បាត់ដំបង ផងដែរ ដើម្បី ចូលរួម ក្នុងវេទិការាស្ត្រ និងតំណាងរាស្ត្រ ដែលត្រូវ រៀបចំ ធ្វើនៅដើម សប្តាហ៍ក្រោយ៕
No comments:
Post a Comment