ក្រុមឃ្លាំមើល ព្រំដែន បារម្ភបាត់បង់ ទឹកដី ដោយសារ ការផ្តល់ដី សម្បទាន សេដ្ឋកិច្ច ឲ្យវៀតណាម
RFA / វិទ្យុ អាស៊ី សេរី | ១៧ តុលា ២០១៤
សកម្មភាពកាប់បំផ្លាញព្រៃឈើរបស់ក្រុមហ៊ុនវៀតណាម ឈ្មោះ ហ័ង អាញ យ៉ាឡាយ (Hoang Anh Gia Lai) នៅកម្ពុជា ក្នុងអំឡុងឆ្នាំ២០១៣។ Global Witness Photo
មេដឹកនាំ ជនជាតិដើម ភាគតិច និងក្រុម សកម្មជន ឃ្លាំមើល ព្រំដែន ដែលកំពុង រស់នៅ និរទេស បង្ហាញ ការព្រួយបារម្ភ ដល់កម្ពុជា ថា, កំពុងបរាជ័យ ក្នុងការគ្រប់គ្រង អធិបតេយ្យភាព និងបូរណភាព ទឹកដី របស់ខ្លួន នៅខណៈ រដ្ឋាភិបាល កម្ពុជា បានផ្តល់ ដីសម្បទាន សេដ្ឋកិច្ច ដែលមាន រយៈពេលយូរ ទៅឲ្យ ក្រុមហ៊ុន វៀតណាម ដើម្បី វិនិយោគ នៅតាមខេត្ត ជាប់ព្រំដែន។
ទោះបី ជាយ៉ាងណា ក៏ដោយ មន្ត្រី ខាងកិច្ចការ ព្រំដែន អះអាង ថា, កម្ពុជា កំពុង ខិតខំប្រឹងប្រែង ការពារ ទឹកដី របស់ខ្លួន តាមផ្លូវច្បាប់ ពីការបាត់បង់ ទៅប្រទេស ជិតខាង។
មេដឹកនាំ សហគមន៍ ពលរដ្ឋ ដេហ្កា (Dega) ឬហៅ ថា, ម៉ុងតាញ៉ាត (Montagnard) ក្នុងសហរដ្ឋ អាមេរិក បានចាត់ទុក ការធ្វើ វិនិយោគ របស់ ក្រុមហ៊ុន វៀតណាម លើដីសម្បទាន សេដ្ឋកិច្ច រយៈពេល យូរឆ្នាំ នៅតាមខេត្ត ជាប់ព្រំដែន កម្ពុជា-វៀតណាម គឺ ជារូបមន្ត ថ្មីមួយក្ នុងការឈ្លានពាន ព្រំដែន កម្ពុជា។
លោក កុក សរ ដែលជាប្រធាន មូលនិធិ ដេហ្កា ឬជាមេដឹកនាំ របស់ក្រុម ជនជាតិដើម ភាគតិច ម៉ុងតាញ៉ាត ដែលកំពុង រស់នៅ និរទេស អះអាង ថា, វៀតណាម មិនត្រឹមតែ បានទទួល ដីសម្បទាន ដ៏ច្រើន សម្បើម នោះទេ, ប៉ុន្តែ ពួកគេ នឹងដឹកជញ្ជូន ជនជាតិ វៀតណាម ជាច្រើនទៀត ដើម្បី មករស់នៅ លើដីសម្បទាន សេដ្ឋកិច្ច ក្នុងប្រទេស កម្ពុជា។ មិនយូរ មិនឆាប់ ពលរដ្ឋ វៀតណាម ទាំងនោះ នឹងស្វែងរក សិទ្ធិរស់នៅ ដោយស្របច្បាប់ នៅកម្ពុជា តែម្តង។
លោក កុក សរ៖ «យើង ចាត់ទុក ថា, កម្ពុជា បរាជ័យ បាត់ទៅហើយ ចំពោះ ការផ្តល់ សម្បទាន ទៅឲ្យ ក្រុមហ៊ុន វៀតណាម។ ការផ្តល់ ដីសម្បទាននោះ មិនត្រឹមតែ ធ្វើឲ្យពួកគេ ទទួលបានដី ដ៏សន្ធឹកសន្ធាប់ ប៉ុណ្ណោះទេ, តែ ពួកគេ នឹងនាំពលរដ្ឋ វៀតណាម ជាច្រើនទៀត មករស់នៅ ក្នុងដីនោះ ថែមទៀត។ ច្បាប់ នៅកម្ពុជា ស្រដៀង អាមេរិក ដែរ, ប្រសិន ពួកគេ រស់នៅ ក្នុងប្រទេស កម្ពុជា អស់រយៈពេល ប្រាំឆ្នាំ ឡើងទៅ, ពួកគេ អាចមានសិទ្ធិ ស្វែងរក សញ្ជាតិកម្ពុជា បាន។ នៅពេល ពួកគេ បានសញ្ជាតិហើយ, ពួកគេ អាចមានសិទ្ធិ បោះឆ្នោត។ ហើយ ប្រសិនបើ ពួកគេ ឈ្នះឆ្នោតទៀត, ពេលនោះនឹងលែងមាន អ្នកដឹកនាំ ជាពលរដ្ឋ ខ្មែរ ទៀតហើយ, គឺ មានតែ ជនជាតិ វៀតណាម ប៉ុណ្ណោះ។ ពេលនោះ ពលរដ្ឋវៀតណាម នឹងចូលមក ប្រទេសកម្ពុជា ដើម្បី ក្ដោបក្ដាប់ តែម្តង។»
ការថ្លែងរបស់ លោក កុក សរ ធ្វើឡើងនៅក្នុងសន្និសីទស្ដីពីក្តីបារម្ភអំពីឥទ្ធិពលវៀតណាម មកលើកម្ពុជា និងឡាវ ក្នុងសហរដ្ឋអាមេរិក កាលពីដើមខែតុលា កន្លងទៅនេះ។
បើទោះបីជាមានការអះអាងរបស់ លោក កុក ស បែបនេះក្តី តែច្បាប់អន្តោប្រវេសន៍របស់អាមេរិក អាចផ្តល់សញ្ជាតិឲ្យជនជាតិដទៃបាន លុះត្រាតែជននោះរស់នៅស្របច្បាប់ក្នុងសហរដ្ឋអាមេរិក ចាប់ពីប្រាំឆ្នាំឡើងទៅ ហើយបានទទួលប័ណ្ណស្នាក់នៅអចិន្ត្រៃយ៍ ឬហៅថាហ្គ្រីនខាត (Greencard)។ លក្ខខណ្ឌដែលអាចចូលជាសញ្ជាតិអាមេរិក បាន លុះត្រាជននោះជាមនុស្សស្អាតស្អំ ចេះនិយាយ ចេះសរសេរ និងចេះដឹងអំពីប្រវត្តិសាស្ត្ររបស់អាមេរិក។
ចំណែកច្បាប់សញ្ជាតិរបស់កម្ពុជា ត្រង់មាត្រា៨ ចែងថា ជនបរទេសអាចសុំសញ្ជាតិកម្ពុជា បាន លុះត្រាតែជននោះបានរស់នៅស្របច្បាប់ក្នុងប្រទេសកម្ពុជា ចាប់ពី ៧ឆ្នាំឡើងទៅ ហើយបានទទួលប័ណ្ណពលរដ្ឋ។ ជននោះត្រូវចេះសរសេរ ចេះនិយាយភាសាខ្មែរ ចេះដឹងប្រវត្តិសាស្ត្ររបស់ខ្មែរ និងមិនធ្លាប់ប្រព្រឹត្តបទឧក្រិដ្ឋកម្មផ្សេងៗ។
ក្រុមកុលសម្ព័ន្ធម៉ុងតាញ៉ាត ត្រូវបានបារាំង ដាក់ឲ្យរស់នៅជាស្វយ័តក្នុងភូមិភាគកណ្ដាលនៃប្រទេសវៀតណាម។ នៅឆ្នាំ១៩៥៥ ទឹកដីស្វយ័តនេះ ត្រូវបានបារាំង លុបចោលទាំងស្រុង ហើយកាត់ទៅឲ្យរដ្ឋាភិបាលវៀតណាមខាងត្បូង ដែលដឹកនាំដោយលោកប្រធានាធិបតី ងូវ ដីញយៀម (Ngo Dinh Diem)។ មួយឆ្នាំក្រោយមក រដ្ឋាភិបាលវៀតណាមខាងត្បូង បានប្ដូរមេដឹកនាំរបស់កុលសម្ព័ន្ធម៉ុងតាញ៉ាត ដាក់ជំនួសដោយជនជាតិវៀតណាម ធ្វើជាមេដឹកនាំវិញ។ វៀតណាម មិនត្រឹមតែគ្រប់គ្រងកងទ័ពទាំងមូលរបស់កុលសម្ព័ន្ធម៉ុងតាញ៉ាត ប៉ុណ្ណោះទេ តែថែមទាំងបានប្ដូរឈ្មោះរបស់ជនជាតិដើមភាគតិចមួយនេះ ឲ្យទៅជាឈ្មោះវៀតណាម ទាំងអស់។ ក្រោយមកទៀត រដ្ឋាភិបាលរបស់ លោក ងូវ ដីញយៀម (Ngo Dinh Diem) នៃរដ្ឋាភិបាលវៀតណាមខាងត្បូង បានបញ្ចូលជនភៀសខ្លួនវៀតណាមខាងជើង ១លាននាក់ ឲ្យទៅរស់នៅក្នុងទឹកដីភូមិភាគកណ្ដាលនៃក្រុមកុលសម្ព័ន្ធ ម៉ុងតាញ៉ាត ថែមទៀត។ ពេលនោះ សាសនា ប្រពៃណី ទំនៀមទម្លាប់ និងវប្បធម៌របស់ពួកគេ ត្រូវបានបំផ្លាញ និងសាបរលាប។
«យើងមើលទៅតំបន់ណាដែលយើងសម្បទានទៅ ឲ្យក្រុមហ៊ុនវៀតណាម តើប្រជាពលរដ្ឋសាមញ្ញយើងអាចចូលបានទេ? គឺអត់បានទេ ដូចជាប្រគល់ឲ្យគេដាច់អ៊ីចឹង។ អាហ្នឹងដែលយើងគួរបារម្ភទាំងអស់គ្នាហ្នឹង។ ខ្ញុំបារម្ភបំផុត គឺខេត្តរតនគិរី មណ្ឌលគិរី ក្រចេះ ស្ទឹងត្រែង ដែលនៅជាប់នឹងព្រំដែនហ្នឹង គឺបារម្ភមែនទែនពាក់ព័ន្ធនឹងការផ្តល់ដីសម្បទានហ្នឹង។ ងាកទៅកន្លែងណាក៏ក្រុមហ៊ុនវៀតណាមៗ ងាកទៅកន្លែងណាក៏ប្រជាពលរដ្ឋវៀតណាម សូម្បីតែព្រៃឈើក្នុងប្រទេសខ្មែរ ក៏វៀតណាម ចូលមកកាប់ទន្ទ្រានគ្រប់កន្លែងទាំងអស់។»លោក កុក សរ អះអាងថា វៀតណាម កំពុងប្រើរូបមន្តថ្មីតាមរយៈការបញ្ជូនពលរដ្ឋរបស់គេមកកម្ពុជា ឲ្យបានច្រើន ដើម្បីគ្រប់គ្រងកម្ពុជា តាមរយៈល្បែងប្រជាធិបតេយ្យដែលដូចគ្នាទៅនឹងស្ថានការណ៍នៅតំបន់ ស្វយ័តគ្រីមៀរ (Crimea) ក្នុងប្រទេសអ៊ុយក្រែន ដែលត្រូវរុស្ស៊ី រំលោភយកកាលពីពេលថ្មីៗនេះ។ លោកបន្តថា ល្បែងប្រជាធិបតេយ្យនៅពេលនេះ គឺជាការបង្កើនចំនួនពលរដ្ឋវៀតណាម ក្នុងប្រទេសកម្ពុជា ការខិតខំឲ្យបានដើម្បីធ្វើជាមេដឹកនាំរបស់ប្រជាជនកម្ពុជា ការធ្វើឲ្យរដ្ឋាភិបាល ឬមន្ត្រីជាន់ខ្ពស់របស់កម្ពុជា ជំពាក់គុណស្រាយមិនរួច ការធ្វើឲ្យកម្ពុជា រស់នៅដោយការពឹងផ្អែកលើវៀតណាម និងការយកឈ្នះលើការបោះឆ្នោតដោយសំឡេងភាគច្រើនជាជនជាតិវៀតណាម ជាដើម។
លោក កុក សរ៖ «បើទោះបីជាកម្ពុជា មានរដ្ឋាភិបាលរបស់ខ្លួនក៏ដោយ ក៏រដ្ឋាភិបាលមួយនេះគ្មានសិទ្ធិអំណាចអ្វីទាំងអស់ក្នុងការ គ្រប់គ្រងមនុស្សទាំងនេះ គឺមានតែជនជាតិវៀតណាម ប៉ុណ្ណោះ ដែលជាអ្នកបញ្ជាលើពួកគេឲ្យកាប់សម្លាប់ប្រជាជនខ្លួនឯង។ ពលរដ្ឋកម្ពុជា ត្រូវតែយល់ដឹងអំពីបញ្ហានេះ ដើម្បីការពារខ្លួនកុំរដ្ឋាភិបាលវៀតណាម គ្រប់គ្រងលើខ្លួនជ្រុលហួសហេតុពេក។ ដើម្បីធ្វើដូច្នេះបាន លោកអ្នកត្រូវតែខ្លាំងត្រូវតែឯករាជ្យ។»
លើសពីនេះទៅទៀត លោកថា ការផ្តល់ដីសម្បទានដែលមានរយៈពេលយូរទៅឲ្យក្រុមហ៊ុនឯកជនវៀតណាម តាមបណ្តោយព្រំដែន គឺជាគ្រោះកាចសម្រាប់បូរណភាពទឹកដីកម្ពុជា។
ទោះបីជាយ៉ាងណាក៏ដោយ លោក វ៉ា គឹមហុង ប្រធានគណៈកម្មការព្រំដែនរបស់រដ្ឋាភិបាលកម្ពុជា បានប្រាប់វិទ្យុអាស៊ីសេរី តាមទូរស័ព្ទថា ការផ្តល់ដីសម្បទានសេដ្ឋកិច្ចទៅឲ្យក្រុមហ៊ុនវៀតណាម គឺធ្វើឡើងក្នុងចម្ងាយមួយគីឡូម៉ែត្រពីខ្សែបន្ទាត់ព្រំដែននៃ ប្រទេសទាំងពីរ៖ «យើងមិនដែលឲ្យធ្វើជាប់ខ្សែព្រំដែនទេ គឺយើងតែងតែឲ្យមានគម្លាតឆ្ងាយ។ ប្រសិនជាឲ្យធ្វើទៀតសោត ទាល់តែកន្លែងហ្នឹងវាបានកំណត់រួចហើយ បើមិនទាន់រួចទេ អាហ្នឹងយើងឲ្យឃ្លាតមិនតិចជាងមួយគីឡូម៉ែត្រ ទៅពីរគីឡូម៉ែត្រពីខ្សែបន្ទាត់ព្រំដែន។»
ប៉ុន្តែ ក្រុមសកម្មជនឃ្លាំមើលព្រំដែនកម្ពុជាវៀតណាម និយាយថា ពលរដ្ឋវៀតណាម ប្រើរូបភាពជួលដីពលរដ្ឋខ្មែរតាមព្រំដែន ភ្ជាប់ជាមួយដីក្រុមហ៊ុនដែលទទួលបានដីសម្បទានសេដ្ឋកិច្ច ហើយរហូតមកទល់ពេលនេះ គ្មានពលរដ្ឋខ្មែរ ឬអាជ្ញាធរខ្មែរណាមួយអាចចេញចូលដីដែលក្រុមហ៊ុននោះកំពុងកាន់កាប់ នោះឡើយ។
ប្រធានអង្គការទ្រទ្រង់អរិយធម៌ខ្មែរ ដែលកំពុងរស់នៅនិរទេស លោក មឿង សុន មានប្រសាសន៍ក្នុងវេទិកាអ្នកស្តាប់វិទ្យុអាស៊ីសេរី ក្នុងរដ្ឋធានីវ៉ាស៊ីនតោន (Washington) ថា ក្រុមហ៊ុនវៀតណាម ដែលទទួលបានដីសម្បទានសេដ្ឋកិច្ចពីរដ្ឋាភិបាលកម្ពុជា មិនត្រឹមតែកាប់ព្រៃឈើធ្វើអាជីវកម្មប៉ុណ្ណោះទេ តែពួកគេអាចជីករ៉ែក្រោមដីដឹកជញ្ជូនជាសម្ងាត់ទៅកាន់ប្រទេស វៀតណាម ថែមទៀត៖ «យួន គេធ្វើដីក្រោមដីដល់ទៅរាប់រយគីឡូ មិនមែនពិបាកត្រឹមតែមួយគីឡូនោះទេ ហើយអាជាប់ហ្នឹង គេអាចជីកធ្វើជាផ្លូវលំហូជីមិញ ដឹកជញ្ជូនរ៉ែនៅក្រោមដីមានមាសមានអីណា ក៏យើងអត់អាចដឹងបានដែរ។ ហើយគេអាចបញ្ជូនសកម្មជនចារកម្មយួន មកគ្រប់បែបយ៉ាងក្នុងសង្គមនោះ គេបានធ្វើរួចទៅហើយ អាហ្នឹងប្រវត្តិសាស្ត្រដែលយើងត្រូវគិតផង កុំគិតថាត្រង់មួយគីឡូដីហ្នឹងបានសុវត្ថិភាពសម្រាប់ប្រទេសជាតិ។»
ស្ថិតិក្រុមហ៊ុនវិនិយោគដីសម្បទានដែលបានចុះកិច្ចសន្យាជាមួយ ក្រសួងកសិកម្ម រុក្ខាប្រមាញ់ និងនេសាទ កាលពីពាក់កណ្ដាលឆ្នាំ២០១២ បង្ហាញថា យ៉ាងហោចណាស់មានដីទំហំប្រហែល ១លានហិកតារ កំពុងគ្រប់គ្រងដោយក្រុមហ៊ុនវៀតណាម ជាង ១០០ នៅតាមខេត្តក្រចេះ ស្ទឹងត្រែង មណ្ឌលគិរី រតនគិរី និងព្រះវិហារ ដែលភាគច្រើនចុះកិច្ចសន្យា ៩៩ឆ្នាំជាមួយរដ្ឋាភិបាលកម្ពុជា។ ក្រុមហ៊ុនវៀតណាម ទាំងនោះរួមមាន ភូ រៀង ក្រចេះអភិវឌ្ឍន៍ ក្រុមហ៊ុន ដុង ណាយ ដុង ភូ ដាយដុងយឿង ដូវ ទៀង ប៊ិញហ្វឿក និងក្រុមហ៊ុនវៀតណាមជាច្រើនទៀត។ ក្រុមហ៊ុនទាំងនេះបានទទួលសម្បទានដីសេដ្ឋកិច្ចចាប់ពី ៥ពាន់ហិកតារ ១ម៉ឺនហិកតារ ហើយខ្លះរហូតដល់ទៅ ៧ម៉ឺនហិកតារ ក្នុងការវិនិយោគដាំដំណាំកសិឧស្សាហកម្ម រួមមាន កៅស៊ូ ដំឡូងមី និងដូងប្រេង ជាដើម។ ជាងនេះទៅទៀត នៅក្នុងកិច្ចការ ឬល្បិចសុំដីសម្បទានសេដ្ឋកិច្ចពីរដ្ឋាភិបាលកម្ពុជា ក្រុមហ៊ុនបរទេសខ្លះធ្វើឡើងដោយផ្ទាល់ជាមួយរដ្ឋាភិបាល ហើយខ្លះទៀតធ្វើឡើងតាមរយៈឈ្មួញកណ្ដាល។
វិទ្យុអាស៊ីសេរី បានទទួលឯកសារផ្ទេរដីសម្បទានសេដ្ឋកិច្ចដែលធ្វើឡើងកាលពីថ្ងៃទី ២៣ ខែមីនា ឆ្នាំ២០០៨ រវាងក្រុមហ៊ុន ភីស៊ីខូ ពាណិជ្ជ (P.C.Co Peanich Ltd) របស់ លោក ឆាយ វ៉ិត ជាជនជាតិខ្មែរ និងក្រុមហ៊ុនវៀតណាម ឈ្មោះ ប្រេសស្ទ៊ីច ហ្វាញណាន់ អ៊ែន អ៊ីនវេសមែន ភីធីវ៉ាយ (Prestige Finance & Investments Pty, Ltd) របស់ អ្នកស្រី ហេណា ង្វៀង (Hannah Nguyen) ហៅ តុង មីហាញ់ (Tong My Hanh) នៅទឹកប្រាក់ ៣២០ដុល្លារក្នុង១ហិកតារ ស្មើនឹង ១១២លានដុល្លារសហរដ្ឋអាមេរិក សម្រាប់ផ្ទៃដីសរុបទំហំ ៣សែន ៥ម៉ឺនហិកតារ ក្នុងស្រុកសេសាន ខេត្តស្ទឹងត្រែង ដែលកាងដោយលោកនាយករដ្ឋមន្ត្រី ហ៊ុន សែន។
ក្រុមអ្នកអភិរក្សបរិស្ថាននិយាយថា ក្រុមហ៊ុនវៀតណាម មួយនេះ អាចកាប់ព្រៃឈើប្រណីតរបស់ខ្មែរតែ ១០ហិកតារលក់ប៉ុណ្ណោះ អាចបង្គ្រប់ទូទាត់ទៅនឹងតម្លៃចំណាយ ១១២លានដុល្លារពីការទិញដីសម្បទាននេះបាត់ទៅហើយ។
៣០-តុលា-២០១៣៖
គំនរឈើរបស់ក្រុមហ៊ុន ខេ ភីស អ៊ិនវេសមែន (K Peace Investment)
នៅតំបន់អភិរក្សភ្នំណាំលា ក្នុងឃុំប៊ូស្រា ស្រុកពេជ្រាដា
ខេត្តមណ្ឌលគិរី។ Adhoc Photo
ប្រធានអង្គការការពារធនធានធម្មជាតិ លោក ឈឹម សាវុធ និយាយថា ការសុំដីសម្បទានដើម្បីដាំដំណាំកសិឧស្សាហកម្មរបស់ក្រុមហ៊ុនវៀតណាម ឬក្រុមហ៊ុនចិន ផ្សេងទៀត គ្រាន់តែជារូបភាពខាងក្រៅប៉ុណ្ណោះ តែការពិត ក្រុមហ៊ុនទាំងនោះបានដកយកព្រៃឈើ និងរ៉ែដ៏មានតម្លៃរបស់ខ្មែររាប់ពាន់លានដុល្លារ ធ្វើអាជីវកម្មយ៉ាងហិនហោចតែម្តង៖ «អ៊ីចឹងយើងអត់ដឹងថាសម្បទាន សេដ្ឋកិច្ចឲ្យតែវៀតណាម ដាំកៅស៊ូហ្នឹង ប៉ុន្តែអត់ដឹងថាក្នុងហ្នឹងគេរុករករ៉ែ គេប្រមូលធនធានរ៉ែ គេកាប់ឈើ និយាយទៅវាមានអាថ៌កំបាំងច្រើនដែលយើងគិតថារដ្ឋាភិបាលបានលាក់ កំបាំងច្រើនមែនទែន។ ហើយបើសិនជាយើងគិតថា គ្រាន់តែសុំដីសម្បទានសេដ្ឋកិច្ច ហើយធ្វើតាមគោលការណ៍ច្បាប់ត្រឹមត្រូវនោះ វាអត់អីទេ តែទំហំដីសម្បទានដែលឲ្យនេះវាច្រើនពេក។»
លោកបន្តថា ក្រៅពីក្រុមហ៊ុនវៀតណាម បានទទួលដីសម្បទានសេដ្ឋកិច្ចពីរដ្ឋាភិបាលកម្ពុជា រាប់សែនហិកតារ ដើម្បីកាប់ព្រៃឈើ និងជីករ៉ែធ្វើអាជីវកម្មទៅក្រៅប្រទេស ដែលចំណេញកប់ក្តោងរាប់ពាន់លានដុល្លារហើយនោះ ពួកក្រុមហ៊ុនទាំងនេះក៏បាននាំពលរដ្ឋរបស់ខ្លួន មកដាំកៅស៊ូក្នុងទឹកដីខ្មែររាប់ម៉ឺននាក់នៅតាមបណ្ដាខេត្តជាប់ ព្រំដែនកម្ពុជាវៀតណាម ថែមទៀត។ ជាងនេះទៅទៀត លោក ឈឹម សាវុធ បារម្ភថាខេត្តក្រចេះ ស្ទឹងត្រែង រតនគិរី និងមណ្ឌលគិរី អាចនឹងបាត់បង់ថ្ងៃអនាគត ប្រសិនរដ្ឋាភិបាលកម្ពុជា មិនប្រុងប្រយ័ត្នខ្ពស់នោះ។
លោក ឈឹម សាវុធ៖ «យើងមើលទៅតំបន់ណាដែលយើងសម្បទានទៅឲ្យ ក្រុមហ៊ុនវៀតណាម តើប្រជាពលរដ្ឋសាមញ្ញយើងអាចចូលបានទេ? គឺអត់បានទេ ដូចជាប្រគល់ឲ្យគេដាច់អ៊ីចឹង។ អាហ្នឹងដែលយើងគួរបារម្ភទាំងអស់គ្នាហ្នឹង។ ខ្ញុំបារម្ភបំផុត គឺខេត្តរតនគិរី មណ្ឌលគិរី ក្រចេះ ស្ទឹងត្រែង ដែលនៅជាប់នឹងព្រំដែនហ្នឹង គឺបារម្ភមែនទែនពាក់ព័ន្ធនឹងការផ្តល់ដីសម្បទានហ្នឹង។ ងាកទៅកន្លែងណាក៏ក្រុមហ៊ុនវៀតណាមៗ ងាកទៅកន្លែងណាក៏ប្រជាពលរដ្ឋវៀតណាម សូម្បីតែព្រៃឈើក្នុងប្រទេសខ្មែរ ក៏វៀតណាម ចូលមកកាប់ទន្ទ្រានគ្រប់កន្លែងទាំងអស់។»
ក្រុមអ្នកឃ្លាំមើលអំពីបញ្ហាព្រំដែននិយាយថា ទឹកដីកម្ពុជា អាចបាត់បង់ដូចតំបន់ស្វយ័តគ្រីមៀរ (Crimea) របស់ប្រទេសអ៊ុយក្រែន (Ukraine) ទៅប្រទេសរុស្ស៊ី ប្រសិនបើកម្ពុជា មិនបញ្ឈប់កុងត្រាដីសម្បទានសេដ្ឋកិច្ចរាប់សែនហិកតារទៅឲ្យប្រទេស វៀតណាម នោះ។
សហគមន៍ខ្មែរនៅឯនាយសមុទ្រ ទាមទារឲ្យវៀតណាម បញ្ឈប់មហិច្ឆតាយកទឹកដីកម្ពុជា បញ្ឈប់ការរំលោភសិទ្ធិមនុស្ស និងការរំលោភលើសិទ្ធិក្នុងជំនឿសាសនា។ ពួកគេទាមទារឲ្យបណ្ដាប្រទេសម្ចាស់ហត្ថលេខីនៃកិច្ចព្រមព្រៀង សន្តិភាពទីក្រុងប៉ារីស ទាំងអស់ បើកកិច្ចប្រជុំឡើងវិញ ដើម្បីផ្ទៀងផ្ទាត់លើអធិបតេយ្យភាព និងបូរណភាពទឹកដីរបស់កម្ពុជា ជាមួយប្រទេសជិតខាង៕
No comments:
Post a Comment