លោក ហ៊ុន សែន និងលោក សម រង្ស៊ី ឆ្លៀតជួបគ្នា ក្នុងថ្ងៃបើក បវេសនកាល សភា
RFI / វិទ្យុ បារាំង អន្តរជាតិ | ១ តុលា ២០១៤
លោក សម រង្ស៊ី នៅក្នុងឱកាស បើកបវេសនកាល រដ្ឋសភា នៅថ្ងៃ ទី១ តុលា ឆ្នាំ២០១៤ (RFI/ Siv Channa)
នៅថ្ងៃ ទី១ តុលានេះ
រដ្ឋសភាជាតិ កម្ពុជា ដែលមាន សមាសភាព ទាំងគណបក្ស ប្រជាជនកម្ពុជា
និងគណបក្ស សង្គ្រោះជាតិ
បានបើក បវេសនកាល នៃសម័យប្រជុំ រដ្ឋសភា លើកទី៣ នីតិកាល ទី៥។
ក្នុងថ្ងៃបើក បវេសនាកាល នេះ, លោក នាយករដ្ឋមន្ត្រី ហ៊ុន សែន និងលោក សម
រង្ស៊ី បានឆ្លៀតជួប ពិភាក្សាគ្នា ទ្វេភាគី។
លោក នាយករដ្ឋមន្ត្រី ហ៊ុន សែន និងលោក សម រង្ស៊ី បានឆ្លៀតជួប ពិភាក្សា ទល់មុខ ក្នុងចន្លោះ កិច្ចប្រជុំ សភា ពេញអង្គ នាថ្ងៃបើក បវេសនកាល ថ្ងៃ ទី១ តុលានេះ។ ពោល គឺ អ្នកនយោបាយ ទាំងពីរ បានចេញ ជួបគ្នា នៅម៉ោង ៩ព្រឹក, ហើយ ការជួប ទល់មុខនេះ បន្ត ដល់ម៉ោង ប្រមាណ ជា១០ព្រឹក។ លោក សម រង្ស៊ី បានប្រាប់ អ្នកសារព័ត៌មាន ដែលនៅ ស្ទាក់សួរ ក្រោយកិច្ចជំនួប នោះ ថា, លោក បានលើកឡើង ពីស្ថានការណ៍ នយោបាយ ទូទៅ ធ្វើយ៉ាងណា ឱ្យស្ថាប័ន រដ្ឋសភា ដំណើរការទៅ ដោយរលូន។
ចំណែក ឯការចាប់ខ្លួន យុវជន ម្នាក់ទៀត របស់ គណបក្ស សង្គ្រោះជាតិ កាលពីពេល ថ្មីនោះ ក៏បាន ពិភាក្សាគ្នាដែរ។ ក្រៅពីនោះ ប្រធានបទ ក្តីបារម្ភព្រួយ របស់ ពលរដ្ឋ រឿងបញ្ជូន ជនភៀសខ្លួន ពីអូស្ត្រាលី ក៏ត្រូវ បានលើកឡើង ផងដែរ។ នេះ ជាការបញ្ជាក់ ពីលោក សម រង្ស៊ី ប្រធាន គណបក្ស សង្គ្រោះជាតិ។ ដោយឡែក លោក នាយករដ្ឋមន្ត្រី ហ៊ុន សែន មិនបាន ឆ្លើយតប ចំពោះ សំណួរ របស់ អ្នកសារព័ត៌មាន នោះទេ។
នៅថ្ងៃ ទី១ តុលា នេះដែរ ព្រះមហាក្សត្រ កម្ពុជា ព្រះបរមនាថ នរោត្តម សីហមុនី បានផ្ញើ ព្រះរាជសារ ចូលរួម អបអរសាទរ នៃការបើក បវេសនកាល របស់ រដ្ឋសភា លើកទី៣ នីតិកាល ទី៥នេះ។ ព្រះមហាក្សត្រ ទ្រង់ បានព្រះរាជ ឱងកាស្នើ ឱ្យរដ្ឋសភា បន្តកិច្ចខិតខំ ប្រឹងប្រែង ដោះស្រាយ បញ្ហាប្រឈមនានា របស់ជាតិ ដើម្បី សម្រេចទិសដៅ និងធានាបាន នូវស្ថេរភាព នយោបាយ, សន្តិភាព, សន្តិសុខ, សណ្តាប់ធ្នាប់សង្គម, ការអភិវឌ្ឍ ប្រកប ដោយចិរភាព, សមធម៌, រួមទាំង ការរស់នៅ សុខដុមរមនា របស់ ប្រជានុរាស្ត្រ ជាដើម។
សូម បញ្ជាក់ថា, ការជួបប្រជុំគ្នា រវាង មេដឹកនាំ គណបក្ស ប្រជាជនកម្ពុជា និងគណបក្ស សង្គ្រោះជាតិនេះ គឺ ខណៈ ដែលសកម្មជន គណបក្ស សង្គ្រោះជាតិ ជាបន្តបន្ទាប់ ត្រូវ បានចាប់ខ្លួន ក្នុងសំណុំរឿង បាតុកម្មនានា ដែលមាន សមាជិក គណបក្ស សង្គ្រោះជាតិ បានចូលរួម។ លោក សម រង្ស៊ី ធ្លាប់បានបញ្ជាក់ កន្លងទៅ ថា, ល្គឹកណា នៅតែ មានការចាប់ខ្លួន សកម្មជន របស់ គណបក្ស សង្គ្រោះជាតិ ទៀតនោះ, ជម្លោះ នយោបាយ នៅកម្ពុជា នៅមិនទាន់បាន បិទបញ្ចប់ នោះទេ។
យ៉ាងណា ក៏ដោយ ក្នុងកិច្ចប្រជុំ ទល់មុខគ្នា រវាង លោក នាយករដ្ឋមន្ត្រី ហ៊ុន សែន និងលោក សម រង្ស៊ី ដែលបានចំណាយ អស់រយៈពេល មួយម៉ោងនេះ ត្រូវ បានគេ ជឿជាក់ ថា, មានបញ្ហា ជាច្រើន ត្រូវ បានពិភាក្សាគ្នា យ៉ាងលំអិត ព្រោះនេះ ជាការជួបគ្នា លើកទី១ ហើយ បន្ទាប់ ពីគណបក្ស សង្គ្រោះជាតិ បានព្រម ចូលប្រជុំ សភា កាលពីដើមខែ សីហា ក្រោយពហិការ អស់រយៈពេល មួយឆ្នាំ៕
No comments:
Post a Comment