មេធាវី អន្តរជាតិ ដាក់ញត្តិ ទៅធនាគារ ពិភពលោក សូម ឲ្យបន្តផ្អាក ប្រាក់កម្ចី ទៅកម្ពុជា
RFA / វិទ្យុ អាស៊ី សេរី | ១១ តុលា ២០១៤
មេធាវី តំណាង ឲ្យជនរងគ្រោះ និងអង្គការ សង្គមស៊ីវិល លោក មូរតុន ក្លា (Morton Sklar)។ RFA
មេធាវី អាមេរិកាំង តំណាង ឲ្យជនរងគ្រោះ នៃការរំលោភ ដីធ្លី នៅកម្ពុជា បានដាក់ញត្តិ ទៅធនាគារ ពិភពលោក (World Bank) ស្នើសុំ ឲ្យធនាគារនេះ បន្តផ្អាក ប្រាក់កម្ចី ទៅរដ្ឋាភិបាល កម្ពុជា ដោយសារ តែ វិបត្តិដីធ្លី និងការបង្ខំចេញ នៅកម្ពុជា កំពុងបន្ត កើត មានយ៉ាងធ្ងន់ធ្ងរ នៅឡើយ។
ធនាគារ ពិភពលោក បានផ្អាក ផ្តល់ប្រាក់កម្ចី ឲ្យកម្ពុជា កាលពីខែ សីហា ឆ្នាំ២០១១ ពីព្រោះ តែ គោលនយោបាយ បង្ខំបណ្ដេញ ពលរដ្ឋ ចេញ ពីផ្ទះសម្បែង និងដីធ្លី របស់ រដ្ឋាភិបាល លោក ហ៊ុន សែន។ ប៉ុន្តែ នៅពេល ថ្មីៗនេះ, ធនាគារ បានប្រកាស ចង់ផ្តល់ ប្រាក់កម្ចី ឲ្យកម្ពុជា ឡើងវិញ។
សកម្មជន ការពារ សិទ្ធិមនុស្ស និងជាមេធាវី អាមេរិក លោក មូរតុន ក្លា (Morton Sklar) ដាក់ញត្តិ ទៅប្រធាន ធនាគារ ពិភពលោក លោក ជីម យ៉ុងគីម (Jim Yong Kim) កាលពីចុង សប្ដាហ៍នេះ ឲ្យផ្អាក គម្រោង អភិវឌ្ឍន៍ នៅប្រទេស កម្ពុជា ដែលមាន ទឹកប្រាក់កម្ចី ប្រមាណ ២៥លាន ដុល្លារ។
លោក មូរតុន ក្លា៖ «ញត្តិនេះ ធ្វើឡើង ក្រោយពេល ធនាគារ ពិភពលោក កំពុងពិចារណា លើកលែង ការដាក់ទណ្ឌកម្ម ប្រឆាំង នឹងរដ្ឋាភិបាល កម្ពុជា ដែលត្រូវ បានដាក់ កាលពីឆ្នាំ ២០១១។ មូលហេតុ នៃការដាក់ ទណ្ឌកម្មនោះ ដោយសារ តែ ធនាគារ ព្រួយបារម្ភ យ៉ាងខ្លាំង គោលនយោបាយ បង្ខំបណ្ដេញ របស់ រដ្ឋាភិបាល កម្ពុជា។ ប៉ុន្តែ នៅពេលថ្មីនេះ, ធនាគារ ពិចារណា ចង់លើកលែង ទណ្ឌកម្ម នេះវិញ ទោះបី គ្មាន កែប្រែ ណាមួយ ជុំវិញ ការបង្ខំ បណ្ដេញចេញ។ ហើយ ថែមពីលើនេះ ទៅទៀត, កាលពីពេល ថ្មីៗនេះ បង្ហាញថា, ស្ថានភាព នៃការបង្ខំ បណ្ដេញចេញ ពីផ្ទះសម្បែង និងដីធ្លី កំពុង មានលក្ខណៈ ធ្ងន់ធ្ងរ ថែមទៀត។ គ្មាន មូលហេតុអ្វី ទាំងអស់ ដែលត្រូវ ឲ្យធនាគារ លើកលែង ទណ្ឌកម្ម នេះឡើយ។»
លោក បញ្ជាក់ បន្ថែមទៀត ថា, រដ្ឋាភិបាល កម្ពុជា នៅតែ បន្ត គោលនយោបាយ បង្ខំ បណ្ដេញចេញ ពីផ្ទះសម្បែង ជាលក្ខណៈ ទ្រង់ទ្រាយធំ ដើម្បី យកដីធ្លី ទាំងនោះ ទៅឲ្យក្រុមហ៊ុន អភិវឌ្ឍ និងមន្ត្រី មានអំណាច ក្នុងរដ្ឋាភិបាល។ រដ្ឋាភិបាល លោក ហ៊ុន សែន បន្តប ដិសេធ មិនផ្តល់សំណង ត្រឹមត្រូវ ជូនពលរដ្ឋ ជាជនរងគ្រោះ និងជំនួយ ក្នុងការសាងសង់ លំនៅឋានថ្មី។
ញត្តិ របស់ លោក មូរតុន ក្លា ធ្វើឡើង ចំថ្ងៃ ដែលមេធាវី អង់គ្លេស លោក រីឆាត រ៉ូជើ (Richard Rogers) បានដាក់ បណ្ដឹងមួយ ទៅកាន់ តុលាការ ព្រហ្មទណ្ឌ អន្តរជាតិ ស្នើសុំ ឲ្យស៊ើបអង្កេត មន្ត្រី រដ្ឋាភិបាល កម្ពុជា ពីបទល្មើស ប្រឆាំង នឹងមនុស្សជាតិ ពាក់ព័ន្ធ នឹងការបង្ខំ បណ្ដេញ ពលរដ្ឋចេញ ពីលំនៅឋាន ដោយបង្ខំ។ ពាក្យបណ្ដឹងនេះ មិនបានចោទ ចំឈ្មោះ មន្ត្រី រដ្ឋាភិបាលឡើយ ដោយស្នើ ឲ្យតុលាការ ស៊ើបអង្កេត ដោយឯករាជ្យ។
កាលពីខែ មីនា ឆ្នាំ២០១៣ លោក មូរតុន ក្លា ក៏បានដាក់ពាក្យបណ្ដឹងមួយប្រឆាំងនឹង លោក ហ៊ុន សែន ជាប់ពាក់ព័ន្ធនឹងការបាញ់សម្លាប់បាតុករ និងការបង្ខំបណ្ដេញ។ បច្ចុប្បន្ន តុលាការកំពុងពិនិត្យបណ្ដឹងនេះមុខនឹងស៊ើបអង្កេតជាផ្លូវការ។
លោក មូរតុន ក្លា បន្ថែមទៀតថា បញ្ហាបង្ខំបណ្ដេញនៅកម្ពុជា ត្រូវការចាប់អារម្មណ៍ជាច្រើនពីសំណាក់សហគមន៍អន្តរជាតិ មិនមែនត្រឹមតែតុលាការព្រហ្មទណ្ឌអន្តរជាតិឡើយ។
មន្ត្រីរដ្ឋាភិបាលកម្ពុជា និងមន្ត្រីធនាគារពិភពលោក មិនទាន់ឆ្លើយតបទៅនឹងញត្តិរបស់ លោក មូរតុន ក្លា នៅឡើយទេ។
ឯកសារសិក្សារបស់អង្គការក្រៅរដ្ឋាភិបាលជាតិ និងអន្តរជាតិបង្ហាញថា ពលរដ្ឋខ្មែរប្រមាណ ៧សែន ៧ម៉ឺននាក់ ត្រូវបានបង្ខំបណ្ដេញចេញពីផ្ទះសម្បែង និងដីធ្លីពីផ្ទៃដីប្រមាណ ៤៩លានហិកតារ ស្មើនឹងទំហំនឹងប្រទេសអេស្ប៉ាញ (Spain)។ ឯកសារបង្ហាញទៀតថា មន្ត្រីមានអំណាចរដ្ឋាភិបាលកម្ពុជា បានប្រើប្រាស់យុទ្ធនាការទ្រង់ទ្រាយធំរួមមាន ការធ្វើឃាត ការចាប់ឃុំខ្លួនដាក់ពន្ធនាគារ រំលោភផ្លូវភេទ និងគំរាមកំហែងប្រឆាំងទៅនឹងពលរដ្ឋណាដែលហ៊ានចេញមុខតវ៉ាពីការ បង្ខំបណ្ដេញចេញ៕
ធានាគារពិភពលោកដែលមានបុគ្គលិកមួយចំនួនចូលចិត្តឲរដ្ឋាភិបាលខ្មែរខ្ចីប្រាក់ណាស់ ទោះមាន
ReplyDeleteការជំទាស់ ការតវ៉ា និង ប្រឆាំងពីព្រភពណាក៍ដោយ ព្រោះវាមានផលប្រយោជន៍អ្វីមួយដល់ពួកគេ ។
ធ្លាប់ដឹងមក មន្រ្តីជាន់ខ្ពស់នៃរដ្ឋាភិបាលគ្រប់រូប សុទ្ធតែមានទំនាក់ទំនងពិសេសម្យ៉ាងជាមួយពួក
អ្នកធ្វើការគ្រប់ជាន់ថ្នាក់នៅក្នុងធានាគារអស់ទាំងហ្នឹង ។ ដូច្នេះហើយ ធានាគារអស់ទាំងហ្នឹងចូល
ចិត្តឲប្រាក់កំចីដល់ពួករដ្ឋាភិបាលហ្នឹងណាស់ ទោះរដ្ឋាភិបាលហ្នឹងប្រព្រឹត្តខុសធ្ងន់ធ្ងរប៉ុណ្ណាក៍ដោយ ក៍មិនចង់បង្កកប្រាក់កំចី ឬ ប្រាក់ជំនួយដែរ ។ សូមលោកមេធាវីអន្តរជាតិ និង អស់លោកដែលស្អាតស្អំ និង មានយុត្តិធម៌ពិតប្រាកដមេត្តាពិនិត្យរឿងហ្នឹងឲបានម៉ត់ចត់ផង ។