ក្រសួងរ៉ែ ចោទអ្នកប្រឆាំង នឹងគម្រោង សង់ទំនប់ វារីអគ្គិសនី អារ៉ែង ថា, ជាអ្នក រាំងស្ទះ ការអភិវឌ្ឍជាតិ
RFA / វិទ្យុ អាស៊ី សេរី | ៣០ កញ្ញា ២០១៤
រដ្ឋលេខាធិការ ក្រសួង រ៉ែ និងថាមពល លោក អ៊ិត ប្រាំង
បង្ហាញ របាយការណ៍ សិក្សាស្រាវជ្រាវ ពីផលប៉ះពាល់ នៃគម្រោង សាងសង់ ទំនប់
វារីអគ្គិសនី ស្ទឹងជាយ អារ៉ែង
ក្នុងសន្និសីទ កាសែត នាទីស្ដីការ ក្រសួង រ៉ែ និងថាមពល នៅថ្ងៃ ទី៣០
ខែកញ្ញា ឆ្នាំ២០១៤។ RFA/Vann Vichar
ក្រសួង រ៉ែ និងថាមពល ចោទថា, អ្នក ដែលប្រឆាំង នឹងគម្រោង សង់ទំនប់ វារីអគ្គិសនី ស្ទឹងជាយ អារ៉ែង ថា, ជាអ្នក រាំងស្ទះ ការអភិវឌ្ឍ ជាតិ។ ការថ្លែង បែបនេះ ធ្វើឡើង ក្នុងសន្និសីទ កាសែតមួយ នាព្រឹកថ្ងៃ ទី៣០ ខែកញ្ញា ដើម្បី បកស្រាយលម្អិត ពីគម្រោង សាងសង់ ទំនប់ វារីអគ្គិសនី ជាយ អារ៉ែង ស្ថិតនៅជួរ ភ្នំក្រវាញ ខេត្ត កោះកុង។
ក្រសួង រ៉ែ និងថាមពល ច្រានចោល របាយការណ៍ របស់ សង្គមស៊ីវិល និងសមាជិក សភា បក្សប្រឆាំង ស្ដីពី ផលប៉ះពាល់ នៃគម្រោង ការសាងសង់ ទំនប់ វារីអគ្គិសនី ស្ទឹងជាយ អារ៉ែង។
រដ្ឋលេខាធិការ និងជាប្រធាន គម្រោងសាងសង់ ទំនប់នេះ លោក អ៊ិត ប្រាំង ចាត់ទុក ថា, អ្នក ដែលនាំគ្នា ប្រឆាំង នឹងគម្រោងនេះ ជាអ្នក ដែលមិនយល់ច្បាស់ ពីគម្រោង និងមាន ចេតនា កេងយក ផលចំណេញផ្ទាល់។ លោក អ៊ិត ប្រាំង មានប្រសាសន៍ សំដៅប្រធាន អង្គការ មាតា ធម្មជាតិ គឺ លោក អាឡិកហ្សង់ដ្រូ ហ្គន់ហ្សាឡេស ដាវិតសឹន (Alejandro Gonzalez Davidson) ដែលចេញមុខ ការពារ ធម្មជាតិ នៅទីនោះ ថា, ធ្វើសកម្មភាព ដើម្បី បំពេញចិត្ត ម្ចាស់ជំនួយ។
លោក បន្តថា តំបន់ ជាយ អារ៉ែង ជាតំបន់ ដ៏សក្ដិសម បំផុត របស់ ប្រទេសកម្ពុជា ដែលអំណោយផល ដល់ការសាងសង់ ទំនប់ វារីអគ្គិសនី៖ «អង្គការ ហ្នឹង បើ មិនធ្វើ សកម្មភាពចឹង មិនយក ប្រជាជន នៅពីមុខ ធ្វើជាខែល ចឹងទេ, តើ បានលុយ ពីណាមក។ ខ្ញុំ អាណិត ប្រជាជនយើង ដែលចាញ់បោកគេ, ហើយ មកបំផ្លាញ ការអភិវឌ្ឍ របស់ជាតិ។»
ក្នុងសេចក្តី បំភ្លឺ របស់ ក្រសួង រ៉ែ និងថាមពល បង្ហាញថា, ទំនប់ វារីអគ្គិសនី ស្ទឹងជាយ អារ៉ែង នេះ ប៉ះពាល់ លើបញ្ហា មួយចំនួន ដូចជា ប៉ះពាល់ ព្រៃឈើ, សត្វព្រៃ, និងការរស់នៅ របស់ ប្រជាពលរដ្ឋ។ របាយការណ៍ សិក្សា ពីផលប៉ះពាល់ ជំហានដំបូង ឆ្នាំ២០០៦ បង្ហាញ ថា, ផ្ទៃដី ដែលត្រូវការ សម្រាប់ ធ្វើអាងទឹក គម្រោង មានប្រមាណ ជាង ៩ពាន់ ហិកតារ (៩.៤៧៤ហិកតារ) ដែលក្នុងនោះ មានព្រៃស្រោង ប្រមាណ ៨៧៤ហិកតារ និងព្រៃ ពាក់កណ្ដាល ស្រោងជិត ៤ពាន់ហិកតារ (៣.៧៩០ហិកតារ)។ ក្រៅពីនោះ គឺ ជាដីព្រៃ, ស្ទឹង, អូរ, ដីកសិកម្ម បោះបង់ចោល, វាលស្មៅ, ព្រៃដុះឡើងវិញ, និងដីចម្ការ ជាដើម។ ការសិក្សា ប៉ះពាល់ ជំហានដំបូង បានរកឃើញ ថា, នៅក្នុងតំបន់ នៃគម្រោង មានបក្សី ប្រមាណ ១១៣ប្រភេទ, ថនិកសត្វ ៥៣ប្រភេទ, ល្មូន ៣១ប្រភេទ, និងមច្ឆជាតិ ៤៣ប្រភេទ, ហើយ ថា ការសិក្សា ជំហានបន្ទាប់ នឹងពិនិត្យ អំពី លក្ខខណ្ឌ រស់នៅ របស់ សត្វទាំងនោះ ដើម្បី រកវិធី ធ្វើការអភិរក្ស និងកាត់បន្ថយ ផលប៉ះពាល់ ឲ្យនៅតិច បំផុត។
របាយការណ៍ ឆ្នាំ២០១៣ របស់ ក្រសួង រ៉ែ និងថាមពល បញ្ជាក់ទៀត ថា, គម្រោងនេះ ប៉ះពាល់ ដល់ប្រជាពលរដ្ឋ ចំនួន ៣៤៩គ្រួសារ, គិតជាមនុស្ស មានចំនួន ជាង ១ពាន់ នាក់ រស់នៅ ឃុំចំនួនបី ស្មើ នឹង៧ភូមិ និង៣៣១ផ្ទះ, ប៉ះពាល់ សាលារៀន ចំនួន ៦, វត្តអារាម ៣, ស្រះទឹក សហគមន៍ ៦, និងហេដ្ឋារចនាសម្ព័ន្ធ មួយចំនួនទៀត។
របាយការណ៍ របស់ ក្រសួង រ៉ែ និងថាមពល និងរបាយការណ៍ របស់ គណៈកម្មការ ទី៣ រដ្ឋសភា ខុសគ្នា នៅត្រង់ ផលប៉ះពាល់ នៃគម្រោង។ របាយការណ៍ គណៈកម្មការ ទី៣ រដ្ឋសភា ដែលផ្ញើទៅ លោក ហ៊ុន សែន ទាមទារ ឲ្យផ្អាក គម្រោងនេះ បង្ហាញ ថា, ព្រៃឈើ នឹងបាត់បង់ ប្រមាណ ២ម៉ឺន ហិកតារ, ធ្វើឲ្យសត្វ កម្រ ពីរ ប្រភេទ, រួមមាន ត្រីនាគ និងក្រពើភ្នំ, ផុតពូជ។ ម្យ៉ាងទៀត ក្រុមតំណាងរាស្ត្រ របស់ បក្សប្រឆាំង ថែមទាំង បញ្ជាក់ថា, ការសាងសង់ ទំនប់ វារីអគ្គិសនីនេះ ខាត ជាងអភិវឌ្ឍ តំបន់នេះ ទៅជាតំបន់ អេកូ ទេសចរណ៍។
ត្រង់ចំណុចនេះ លោក អ៊ិត ប្រាំង បញ្ជាក់ថា គម្រោងនេះនឹងបង្កលក្ខណៈងាយស្រួលដល់ការអភិវឌ្ឍអេកូទេសចរណ៍ ព្រមទាំងរក្សាលំនឹងធម្មជាតិទៀតផង។ ហើយរដ្ឋាភិបាលកម្ពុជា នឹងព្យាយាមកាត់បន្ថយផលប៉ះពាល់ឲ្យនៅកម្រិតតិចបំផុត៖ «សត្វមាន អីខ្លះ ត្រីមានអីខ្លះ ចឹងអ្នកបច្ចេកទេសហ្នឹងសឹងតែចុះទៅរាប់ថាត្រូវដាក់យ៉ាងម៉េច ដាក់ទឹកជ្រៅទៅវារស់បានអត់? ហើយបានសិក្សាពីលក្ខខណ្ឌនៃការរស់នៅរបស់សត្វទាំងនោះ។»
តាមការប៉ាន់ស្មានជំហានដំបូង គម្រោងសាងសង់ទំនប់វារីអគ្គិសនីនេះអាចនឹងចំណាយប្រាក់ ៤០០លានដុល្លារ។ ប៉ុន្តែ ក្រសួងរ៉ែ និងថាមពល មិនបានបកស្រាយឲ្យច្បាស់ថា ថវិកាបានមកពីគម្រោងនេះ នឹងដាក់ចូលថវិកាជាតិប៉ុន្មានទេ។ ក្រសួងរ៉ែ និងថាមពល ក៏មិនទាន់បានសិក្សាពីធនធានរ៉ែនៅតំបន់នោះនៅឡើយដែរ ខណៈដែលសង្គមស៊ីវិលធ្លាប់ចោទថា ក្រុមហ៊ុនចិន សំឡឹងឃើញរ៉ែជាជាងចង់ធ្វើទំនប់យកអគ្គិសនីលក់៕
No comments:
Post a Comment