នាយករដ្ឋមន្ត្រី ប្រកាស ឲ្យពលរដ្ឋ ស្វែងយល់ ពីសមាហរណកម្ម អាស៊ាន
RFA / វិទ្យុ អាស៊ី សេរី | ១២ តុលា ២០១៤
លោក នាយករដ្ឋមន្ត្រី ហ៊ុន សែន ថ្លែងក្នុងសន្និសីទ ពាណិជ្ជកម្ម នារាជធានី ភ្នំពេញ កាលពីព្រឹក ថ្ងៃ ទី៦ តុលា ២០១៤។ RFA/An Sithav
លោក នាយករដ្ឋមន្ត្រី ហ៊ុន សែន បានប្រកាស ឲ្យប្រជាពលរដ្ឋ កម្ពុជា ត្រូវ ស្វែងយល់ ពីកិច្ចការ អាស៊ាន(ASEAN) ស្របពេល ប្រទេស ទាំង១០ នឹងធ្វើ សមាហរណកម្ម បង្កើត ជាតំបន់ សេដ្ឋកិច្ច តែមួយ នៅចុងឆ្នាំ ២០១៥។
ប៉ុន្តែ អ្នកវិភាគ កិច្ចការសង្គម យល់ឃើញ ថា, សមាហរណកម្ម សេដ្ឋកិច្ច អាស៊ាន នៅឆ្នាំ ២០១៥ នឹងធ្វើ ឲ្យប្រទេស កម្ពុជា ជួបឧបសគ្គ ច្រើន ជាងផលចំណេញ ដោយសារតែ រដ្ឋាភិបាល កម្ពុជា បានចំណាយ ពេលវេលា និងធនធាន តិចតួច ក្នុងការ បណ្ដុះបណ្ដាល ប្រជាពលរដ្ឋ កម្ពុជា ឲ្យយល់ដឹង អំពី កិច្ចការ អាស៊ាន។
បច្ចុប្បន្ន ការបង្កើត តំបន់ សេដ្ឋកិច្ច អាស៊ាន នៅឆ្នាំ២០១៥ គឺ ជាប្រធានបទ ដែលមជ្ឈដ្ឋាននានា រួមទាំង វិស័យឯកជន និងប្រជាពលរដ្ឋ ទូទៅ យកមក ជជែកគ្នា មិនដាច់ ពីមាត់ ថា, តើ រួមបញ្ជូន សេដ្ឋកិច្ចគ្នា តែមួយ នឹងផ្ដល់ ប្រយោជន៍ ដល់កម្ពុជា ឬយ៉ាងណា?
ឯកសារគោល របស់ អាស៊ាន បានសរសេរ ថា, គោលបំណង នៃការបង្កើត សហគមន៍ សេដ្ឋកិច្ច អាស៊ាន និងបង្កើត ឲ្យទីផ្សារ រួមមួយ ដែលប្រកប ដោយភាព ប្រកួតប្រជែង ដើម្បី លើកកម្ពស់ ការអភិវឌ្ឍ សេដ្ឋកិច្ច ប្រកប ដោយស្មើ ភាពគ្នា រវាង ប្រទេស នៅក្នុងតំបន់ អាស៊ាននោះ, រួមទាំង ការធ្វើ សមាហរណកម្ម សេដ្ឋកិច្ច ទៅក្នុងពិភពលោក ផងដែរ។
គោលបំណងនេះ គឺ ផ្ទុយ ពីគោលបំណង ដំបូង របស់ សមាគម អាស៊ាន នៅឆ្នាំ១៩៦៧ ដែលប្រទេស ស្ថាបនិក, រួមមាន ថៃ (Thailand), ម៉ាឡេស៊ី (Malaysia), ឥណ្ឌូណេស៊ី (Indonesia), សិង្ហបុរី (Singapore), និងហ្វីលីពីន (the Philippine) បង្កើត សម្រាប់ ទប់ស្កាត់ ការរីក រាលដាល នៃសង្គ្រាម ត្រជាក់ ប៉ុណ្ណោះ ។
ប៉ុន្តែ បច្ចុប្បន្ន, ប្រទេស សមាជិក អាស៊ាន នីមួយៗ ចង់បាន នូវគោលបំណង សំខាន់បី ផ្សេងទៀត, រួមមាន៖ ទីមួយ, អភិវឌ្ឍ តំបន់ ឲ្យក្លាយ ជាមូលដ្ឋាន ផលិតកម្ម; ទីពីរ, ដើម្បី លើកកម្ពស់ ប្រសិទ្ធភាព ខាងផ្នែក ឧស្សាហកម្ម តាមរយៈ ការប្រមូលផ្ដុំ នូវធនធាន និងការចែក រំលែក ទីផ្សារ; ទីបី, ឲ្យក្លាយ ជាតំបន់ ដែលប្រកប ដោយសក្ដានុពល ទាក់ទាញ វិនិយោគ បរទេស និងជាតំបន់ ទេសចរណ៍។
បញ្ហានេះ ប្រមុខរដ្ឋាភិបាល កម្ពុជា បានប្រកាស ឲ្យប្រជាជន ខ្មែរត្រៀមខ្លួនចូលសមាហរណកម្មអាស៊ាន នៅថ្ងៃទី ៣១ ខែ ធ្នូ ឆ្នាំ ២០១៥ រវាងប្រទេសអាស៊ានទាំង ១០ ក្នុងការបង្កើតសហគមន៍សេដ្ឋកិច្ចអាស៊ាន។ លោកនាយករដ្ឋមន្ត្រី ហ៊ុន សែន មានប្រសាសន៍ថាផលប្រយោជន៍នៃការធ្វើសមាហរណកម្ម គឺមិនមែនសម្រាប់អ្នកមានអំណាចនៅក្នុងជួររដ្ឋាភិបាល មន្ត្រីរាជការ ឬសម្រាប់ថ្នាក់ដឹកនាំរដ្ឋាភិបាលនោះទេ ប៉ុន្តែប្រជាពលរដ្ឋវិញ ក៏ត្រូវយល់ដឹងថា អាស៊ាននឹងផ្ដល់ប្រយោជន៍ដល់ពួកគេ នៅពេលដែលសមាគមអាស៊ាន នឹងបង្កើតជាតំបន់សេដ្ឋកិច្ចតែមួយ នៅពេលដ៏ខ្លីខាងមុខ។
អ្នកវិភាគសេដ្ឋកិច្ច និងសង្គមមួយចំនួនយល់ឃើញថា ចាប់តាំងពីប្រទេសកម្ពុជាចូលជាសមាជិកអាស៊ាននៅឆ្នាំ១៩៩៩ កម្ពុជា បានចំណាយពេលវេលានិងធនធាន ដើម្បីផ្សព្វផ្សាយពីកិច្ចអាស៊ានដល់ប្រជាពលរដ្ឋកម្ពុជា បានតិចតួចប៉ុណ្ណោះ។ ម៉្យាងវិញទៀតការចូលជាសមាជិកកន្លងមក បានធ្វើឲ្យកម្ពុជាចំណេញច្រើន លើផ្នែកកិច្ចការបរទេស និងមានកេរ្តិ៍ឈ្មោះល្អនៅឆាកអន្តរជាតិ។ ប៉ុន្តែភាពជាសមាជិកអាស៊ាន មិនធ្វើឲ្យកម្ពុជាចំណេញលើផ្នែកសេដ្ឋកិច្ចឡើយ។ ឧបសគ្គនោះ គឺដោយសារ ប្រទេសកម្ពុជាធ្វើការអភិវឌ្ឍធនធានមនុស្ស មានកម្រិតទាប និងមូលដ្ឋានផលិតកម្មមិនមានភាពប្រកួតប្រជែង។ ទោះជាយ៉ាងណាក៏ដោយ ការចូលជាសមាជិកអាស៊ាន និងការធ្វើសមាហរណកម្មសេដ្ឋកិច្ចអាស៊ាននៅឆ្នាំ២០១៥នោះ អាចធ្វើឲ្យប្រជាពលរដ្ឋកម្ពុជា អាចរៀនសូត្រពីភាពជឿនលឿន ពីប្រទេសសមាជិកអាស៊ានមួយចំនួន។
ប្រធានកម្មវិធីអភិវឌ្ឍធនធានយុវជន លោក ជាង សុខា មានប្រសាសន៍ថា ផលចំណេញសម្រាប់ប្រទេសកម្ពុជាគឺការស្វែងយល់អំពីយន្តការអភិវឌ្ឍ សេដ្ឋកិច្ច របស់ប្រទេសសមាជិកអាស៊ាននីមួយៗ ដើម្បីផ្សារភ្ជាប់កម្លាំងពលកម្មកម្ពុជា ទៅនឹងទីផ្សារការងារអាស៊ាន នៅតំបន់សេដ្ឋកិច្ចបានបង្កើតឡើង។ ប៉ុន្តែផលប្រយោជន៍សម្រាប់យុវជន ទៅនឹងការបើកចំហសេដ្ឋកិច្ច ហាក់នៅមានកម្រិតទាបនៅឡើយ។
ការអភិវឌ្ឍធនធានមនុស្សរបស់កម្ពុជា គឺជាឧបសគ្គចម្បងមួយក្នុងចំណោមឧបសគ្គជាច្រើនទៀត ស្ថាប័នមិនមែនរដ្ឋាភិបាលកម្ពុជា បានរកឃើញថាត្រូវដោះស្រាយឲ្យបាន មុននឹងឈានជើងចូលរួមដល់ការធ្វើសមាហរណកម្មអាស៊ាន ប្រកបដោយភាពប្រកួតប្រជែងជាមួយប្រទេសសមាជិកអាស៊ានដទៃទៀត។
ធនាគារអភិវឌ្ឍអាស៊ី (ADB) ប្រចាំកម្ពុជាបានអះអាងថា បច្ចុប្បន្ន ប្រទេសកម្ពុជាកំពុងត្រៀមខ្លួនបានយ៉ាងប្រសើរ សម្រាប់ការបង្កើតសហគមន៍សេដ្ឋកិច្ចអាស៊ាន នៅបំណាច់ឆ្នាំ ២០១៥ ប៉ុន្តែប្រទេសកម្ពុជាចាំបាច់ត្រូវតែ ពន្លឿនកំណែទម្រង់របស់ខ្លួន ដើម្បីលើកកម្ពស់តម្លាភាព និងភាពអាចជឿជាក់បាននៃប្រព័ន្ធច្បាប់របស់ខ្លួន ដើម្បីលើកទឹកចិត្ត ដល់ការវិនិយោគ។
ធនាគារអភិវឌ្ឍអាស៊ីបានអះអាងទៀតថា ដើម្បីទាញប្រយោជន៍ពីកាលានុវត្តនភាពនានា ដែលផ្ដល់ដោយសហគមន៍សេដ្ឋកិច្ចអាស៊ាន ប្រទេសកម្ពុជាចាំ បាច់ត្រូវតែវិនិយោគបន្ថែមទៀត លើការអប់រំ និងសុខភាព។ ការកាត់បន្ថយវិសមភាពផ្នែកសង្គម និងវិសមភាពផ្នែកទ្រព្យធន ក៏ជាការចូលរួមយ៉ាងសកម្ម នៅក្នុងដំណើរការ ដើម្បីសម្រេចកំណើន និងក្នុងការសម្របខ្លួនទៅតាមការផ្លាស់ប្ដូរសំខាន់ៗ នានាដែលអាចកើតឡើង ដោយសារតែសហគមន៍សេដ្ឋកិច្ចអាស៊ាន។
ម៉្យាងវិញទៀតសេដ្ឋកិច្ចកម្ពុជា ត្រូវបន្ថយការពឹងអាស្រ័យលើវិស័យកាត់ដេរ ដោយបង្កើនទំនាក់ទំនងពាណិជ្ជកម្ម ជាមួយប្រទេសជាសមាជិកអាស៊ាន និងចាំបាច់ត្រូវតែធ្វើពិពិធកម្មមូលដ្ឋានទំនិញ សម្រាប់នាំចេញរបស់ខ្លួន។ កសិផល សេវា ទេសចរណ៍ និងសេវាទំនើបនានា សុទ្ធតែជាកាលានុវត្តនភាព ដែលផ្ដល់ដោយសហគមន៍សេដ្ឋកិច្ចអាស៊ាន៕
កុំយកកូនយួនមកជំនួសកូនខ្មែរ នៅពេលសហគមន៍អាស៊ាន ឲ្យមានសមាហរណកម្មនៅក្នុងតំបន់៕
ReplyDelete