វិភាគ ៖ តើ អ្វី ជាឧបសគ្គ ដល់ការធ្វើ បញ្ជីឈ្មោះ បោះឆ្នោត ថ្មី?
ស្តាប់សំឡេង៖ |
ចម្លងទុក |
បញ្ជីឈ្មោះ អ្នកបោះឆ្នោត ដែលបិទ នៅតាមសាលា ឃុំ/សង្កាត់ (រូបថត៖ ម៉េង)
មុនពេល គណបក្ស សង្គ្រោះជាតិ ចូលសភា, គណបក្ស ប្រជាជន កម្ពុជា បានព្រមព្រៀង ថា, ត្រូវ ធ្វើបញ្ជីឈ្មោះ បោះឆ្នោត ថ្មី។
ប៉ុន្តែ នៅដើមខែ វិច្ឆិកានេះ ក្នុងកម្មវិធី អ្នកស្ដាប់ វិទ្យុ អាស៊ី សេរី ដែលពិភាក្សា អំពី «ជំហរ របស់ បក្សប្រជាជន កម្ពុជា ក្នុងការ កែទម្រង់ ការបោះឆ្នោត», លោក ព្រំ សុខា ដែលជាមន្ត្រី ជាន់ខ្ពស់ម្នាក់ ក្នុងក្រុម កែទម្រង់ ការបោះឆ្នោត មកពីគណបក្ស ប្រជាជន កម្ពុជា មានប្រសាសន៍ ថា, បញ្ជីឈ្មោះ បោះឆ្នោត ថ្មី មិនមែន មានន័យ ថា, ត្រូវ ធ្វើបញ្ជី ចុះឈ្មោះ ជាថ្មី នោះទេ៖ «បញ្ជី ឈ្មោះ បោះឆ្នោត ឥឡូវហ្នឹង កិច្ចព្រមព្រៀង នយោបាយ បានព្រមព្រៀង គ្នាហើយ, ឯកភាព ថា, ត្រូវ ធ្វើបញ្ជីថ្មី។ បញ្ជីថ្មីហ្នឹង មិនមែន មានន័យ ថា, ត្រូវ ចុះឈ្មោះ សាជាថ្មីទេ។ អានេះ ជាជម្រើសមួយ, បាទ, ជាជម្រើសមួយ។ ហើយ និយាយ អ៊ីចឹង មិនមែន ថា, ហឺ ខ្ញុំ និយាយអ៊ីចឹង; គណបក្ស ប្រជាជន មិនចង់ ឲ្យចុះបញ្ជី ថ្មីទេ។ យើង ត្រូវ ធ្វើអី លើប្រាកដនិយម។ បើ មិនស្រួល គឺ យើង ធ្វើមិនបាន។ ហើយ វា មិនទាំង ដល់គោលដៅ; វា ខុសទៀត។ ទី២, បញ្ជីថ្មីនេះ អាចប្រើ ទិន្នន័យ ដែលមាន បច្ចុប្បន្ន, ហើយ យើង មើល ទាំងអស់គ្នា ទៅ! បើ ថា ,អ្ហេ វា ខុស ដោយសារ ស្ទួន, លុប អាស្ទួនចោល។ បើ ខ្វះអ្នក ដែលខ្វះ, បាត់អីហ្នឹង បំពេញ បន្ថែមមក។»
តាមខ្លឹមសារ ឃើញថា បញ្ជីឈ្មោះ បោះឆ្នោត ថ្មីនោះ គឺ ត្រូវ យកបញ្ជីចាស់ មកពិនិត្យ ពិភាក្សា និងកែ ឲ្យទៅ ជាថ្មី, ប៉ុន្តែ មិនមែន មានន័យ ថា ធ្វើឡើង ដោយថ្មី សន្លាងតែម្ដង នោះទេ។ ទោះយ៉ាងណា លោក ព្រំ សុខា បន្ថែមថា និយាយបែបនេះមិនមែនមានន័យថា គណបក្សប្រជាជនកម្ពុជា ឬក្រុមការងាររបស់គណបក្សប្រជាជនបដិសេធមិនឲ្យធ្វើបញ្ជីចុះឈ្មោះថ្មី នោះទេ។ លោកថា បើធ្វើទាន់ធ្វើ ប៉ុន្តែបើធ្វើមិនទាន់ប្រហែលជាត្រូវយកបញ្ជីចាស់។
អ្នកប្រវត្តិសាស្ត្រ និងវិទ្យាសាស្ត្រនយោបាយ លោក សុខ ទូច មានប្រសាសន៍ថា នៅសម័យនេះហើយ គ្រាន់តែការចុះបញ្ជីឈ្មោះបោះឆ្នោតថ្មី សម្រាប់ពលរដ្ឋខ្មែរដែលមានអ្នកបោះឆ្នោតប្រហែល១០លាននាក់នោះ គ្មានអ្វីជាការលំបាកនោះទេ។ លោកថា អ្វីដែលអ្នកនយោបាយថាលំបាកនោះ គ្រាន់តែជាលេសបិទបាំងការព្រួយបារម្ភរបស់ខ្លួនតែប៉ុណ្ណោះ។
លោក សុខ ទូច បន្ថែមថា តាមលោកដឹង មានប្រទេសបីព្រមទទួលការលំបាក ដែលអ្នកនយោបាយកំពុងលើកឡើងនោះ គឺប្រទេសជប៉ុន អូស្ត្រាលី និងសហគមន៍អឺរ៉ុប ប៉ុន្តែអ្វីដែលសំខាន់គឺអ្នកនយោបាយនៃបក្សឈ្នះឆ្នោតទាំងពីរ មានសុឆន្ទៈពិតប្រាកដ ស្មោះត្រង់ជាមួយប្រជាពលរដ្ឋ ហើយទទួលឲ្យប្រទេសទាំងនោះជួយក្នុងការកែទម្រង់នេះ វានឹងបានជោគជ័យ «លំបាក តែគណបក្សទាំងពីរហ្នឹងបារម្ភឆ្ពិនភ្នែកប្រជាជនមិនបានតែ ប៉ុណ្ណឹងទេ។ អាហ្នឹងដែលជាការលំបាក។ ដែលលំបាកគ្រាន់តែចុះឈ្មោះសាថ្មីប្រជាជន១៤លាននាក់ យ៉ាងច្រើនតែ១០លាន់នាក់ ខ្ញុំជឿជាក់ថា មិនលំបាកសម្រាប់បច្ចេកទេសទំនើបរបស់ប្រទេសជប៉ុន ដែលគេមានប្រជាជនដល់ទៅ១៥០លាននាក់ឯណោះ ខ្ញុំជឿជាក់ថាមិនជាលំបាកទេ។ សូមឲ្យអ្នកនយោបាយកុំប្រើប្រាស់ពាក្យពេចន៍លំបាកនៅក្នុងសតវត្សរ៍ ទី២១ បើលំបាកសូមចុះចេញ មានអ្នកមិនចង់លំបាកគេនឹងជំនួសវិញ។»
សមាជិកសម្ព័ន្ធកំណែទម្រង់ការបោះឆ្នោត លោក យង់ គិមអេង មានប្រសាសន៍ថា កិច្ចការងារបោះឆ្នោតដែលសំខាន់នោះគឺអាស្រ័យលើឆន្ទៈអ្នកនយោបាយ បើអ្នកនយោបាយព្រមព្រៀងគ្នាថាធ្វើយ៉ាងម៉េចហើយ អ្នកច្បាប់ អ្នកបច្ចេកទេសត្រូវតែតម្រូវទៅតាមអ្នកនយោបាយ។
លោក យង់ គិមអេង បន្តថាបញ្ហាបញ្ជីឈ្មោះបោះឆ្នោតនេះ មានការចម្រូងចម្រាសគ្នាយូរមកហើយ ដូច្នេះហើយគួរតែធ្វើបញ្ជីឈ្មោះបោះឆ្នោតថ្មី តាមឆន្ទៈអ្នកនយោបាយ។ លោកថា បញ្ហាធ្វើបញ្ជីឈ្មោះបោះឆ្នោតថ្មីនោះ វាគ្មានអ្វីលំបាកទេ ប៉ុន្តែសំខាន់បំផុតគឺមានភាគីណាមួយមិនចង់ធ្វើ «បើរឿងពិបាក វាមិនពិបាកទេ ប៉ុន្តែគ្រាន់ថាយើងធ្វើឲ្យវាល្អ ឲ្យវាសុក្រឹត វាអាចចំណាយពេលយូរបន្តិច។ តើយើងទុកអាហ្នឹងដើម្បីឈ្លោះគ្នា ឬក៏យើងចង់បញ្ចប់ អារឿងវិវាទ ឬក៏ការរិះគន់គ្នាទៅវិញទៅមក ដោយសារតែបញ្ហាបញ្ជីឈ្មោះហ្នឹង? បាទនេះជាបញ្ហា។ ហើយម្យ៉ាងវិញទៀត ស្រុកគេក្រជាងយើងទៅទៀត ស្រុកខ្លះក៏គេសុខចិត្តបញ្ជូនឲ្យអ្នកបច្ចេកទេស បរទេសអីគេទៅជួយធ្វើរឿងហ្នឹងដែរ គេសុខចិត្តប្ដេជ្ញាចិត្តធ្វើ។ ចុះកម្ពុជា ហេតុអីបានមិនធ្វើបាទ?»
ជារួម ទាំងអ្នកវិទ្យាសាស្ត្រនយោបាយ ទាំងអ្នកធ្វើការលើការបោះឆ្នោត យល់ឃើញដូចៗគ្នាថា អ្វីដែលជាឧបសគ្គក្នុងការធ្វើបញ្ជីឈ្មោះបោះឆ្នោតថ្មី មិនមែនការលំបាកដូចការលើកឡើងខាងលើនោះឡើយ ប៉ុន្តែគឺការគ្មានឆន្ទៈពិតប្រាកដ ក្នុងការធ្វើបញ្ជីឈ្មោះបោះឆ្នោតថ្មីទៅវិញទេ ទើបជាឧបសគ្គធំបំផុត៕
Talk like crazy.
ReplyDelete