គណបក្ស សង្គ្រោះជាតិ បង្កើតក្រុមការងារ ផ្ទៃក្នុង ដើម្បី អភិវឌ្ឍ កម្មវិធី គោលនយោបាយ
RFA / វិទ្យុ អាស៊ី សេរី | ២ វិច្ឆិកា ២០១៤
តំណាងរាស្ត្រ នៃគណបក្ស សង្គ្រោះជាតិ
ចេញពីកិច្ចប្រជុំវិ សាមញ្ញ បោះឆ្នោត ជ្រើសតាំង សមាសភាព គណៈកម្មការ
ជំនាញ រដ្ឋសភា នៅថ្ងៃ ទី២៧ ខែសីហា ឆ្នាំ២០១៤។ RFA/Vann Vichar
គណបក្ស សង្គ្រោះជាតិ នៅថ្ងៃ ទី២ វិច្ឆិកា បានប្រកាស សេចក្ដីព្រាង គោលនយោបាយ អភិវឌ្ឍ បស់ខ្លួន ដើម្បី ត្រៀមចូលរួម ប្រកួតប្រជែង នាការបោះឆ្នោត នាអាណត្តិក្រោយ។ គោលនយោបាយនេះ គឺ បង្កើតឡើង សម្រាប់ ដោះស្រាយ រាល់ជម្លោះ និងលើកកម្ពស់ យុត្តិធម៌សង្គម។ ប៉ុន្តែ តំណាងរាស្ត្រ មកពីគណបក្ស ប្រជាជន អះអាងថា, វា ជាត្រឹមត្រូវ ដើម្បី ចូលរួម ប្រកួតប្រជែង ជាមួយ គោលនយោបាយ របស់ គណបក្ស ប្រជាជនកម្ពុជា។
ដោយមើលឃើញ ថា, គណបក្ស នយោបាយ នៅក្នុងប្រទេស ជាច្រើន មិនសូវ យកចិត្តទុកដាក់ អំពី កម្មវិធីអ ភិវឌ្ឍ គោលនយោបាយរបស់ខ្លួន ការកើនឡើងក្រុមអ្នកងាយរងគ្រោះ និងអយុត្តិធម៌សង្គម ក្រុមការងារផ្ទៃក្នុងរបស់គណបក្សសង្គ្រោះជាតិ បានរៀបចំកិច្ចពិភាក្សា លើការបង្កើតគោលនយោបាយអភិវឌ្ឍរបស់ខ្លួនឡើងវិញ។ គោលនយោបាយនេះ គឺខុសប្លែកពីបក្សដទៃ ដែលមានសរសេរយ៉ាងច្បាស់ ពីកម្មវិធីកំណែទម្រង់សេដ្ឋកិច្ច ការដោះស្រាយជម្លោះ ដើម្បីឈានដល់ការកាត់បន្ថយគម្លាតអ្នកមាននិងអ្នកក្រ និងកម្មវិធីកំណែទម្រង់ដើម្បីយុត្តិធម៌សង្គម។
តំណាងរាស្ត្រនិងជាសមាជិកសភាមកពីគណបក្សសង្គ្រោះជាតិ លោក យឹម សុវណ្ណ មានប្រសាសន៍បន្ទាប់ពីកិច្ចប្រជុំនៅថ្ងៃទី ២វិច្ឆិកា ដែលមានគាំទ្រដោយមូលនិធិ ខុនរ៉ាដអាដិននៅអ៊ែរ (Conrad Adenauer) ថា ការកែទម្រង់គោលនយោបាយ គឺចាំបាច់បំផុតដែលបន្ថែមពីលើគោលនយោបាយចាស់ ដើម្បីយកទៅឃោសនាបោះឆ្នោត នាអាណត្តិទី៦ ទទួលបានជោគជ័យ។ ការបង្កើតគោលនយោបាយរបស់ខ្លួននោះ គឺត្រូវធានាឲ្យមាននូវសេចក្ដីថ្លៃថ្នូររបស់មនុស្ស សេរីភាពក្នុងការរស់នៅ និងការសាមគ្គីគ្នារវាងអ្នកមាននិងអ្នកក្រ។ ក្រៅពីកម្មវិធីកំណែទម្រង់គោលនយោបាយ គណបក្សសង្គ្រោះជាតិ ក៏បានរៀបចំចំណុចអាទិភាពជាច្រើន ទៅលើការកែទម្រង់ការដឹកនាំរបស់រដ្ឋាភិបាលកម្ពុជាបច្ចុប្បន្ន ដើម្បីកាត់បន្ថយអំណាច រវាងមេដឹកនាំគណបក្ស និងការដឹកនាំប្រទេស។
ឆ្លើយតបទៅនឹងបញ្ហានេះ តំណាងរាស្ត្រនិងជាសមាជិកសភាពមកពីគណបក្សប្រជាជនកម្ពុជា លោក ឈាន វុន ដែលទើបត្រឡប់មកពីកិច្ចប្រជុំនៅប្រទេសអាឡឺម៉ង់ ក្រោមជំនួយមូលនិធិនរ៉ាដអាដិននៅអ៊ែរ នោះដែរ មានប្រសាសន៍ថា ប្រទេសអាឡឺម៉ង់ចង់ជំរុញឲ្យគណបក្សនយោបាយ កុំប្រឈមមុខដាក់គ្នាក្នុងការឃោសនា រកសំឡេងឆ្នោតដោយសារការប្រឈមមុខដាក់គ្នា នឹងធ្វើឲ្យសង្គមបែកបាក់។ ប៉ុន្តែការបង្កើតគោលនយោបាយរបស់គណបក្សសង្គ្រោះជាតិនៅពេលនេះ គឺជារឿងត្រឹមត្រូវដើម្បីចូលរួមការប្រកួតប្រជែងជាមួយគណបក្ស ប្រជាជនកម្ពុជា នៅការបោះឆ្នោតនាពេលខាងមុខ។
ទោះជាយ៉ាងណាក៏ដោយ ឧត្ដមក្រុមប្រឹក្សាសេដ្ឋកិច្ចជាតិ ដែលជាស្ថាប័នរៀបចំគោលនយោបាយរបស់រដ្ឋាភិបាលកម្ពុជា បានវាយតម្លៃគោលនយោបាយ សម្រាប់ការអភិវឌ្ឍប្រទេសរបស់ប្រទេសរៀងរាល់ឆ្នាំ ក្នុងនោះរួមមានគោលនយោបាយយុទ្ធសាស្ត្រចតុកោណ គោលនយោបាយដីធ្លី និងគោលនយោបាយនាំចេញអង្កររបស់រដ្ឋាភិបាលជាដើម។
ទីប្រឹក្សាជាន់ខ្ពស់នៃឧត្ដមក្រុមប្រឹក្សាសេដ្ឋកិច្ចជាតិ លោកបណ្ឌិត ម៉ី កល្យាណ មានប្រសាសន៍ថា ការបង្កើតគោលនយោបាយ គឺសម្រាប់អនុវត្តន៍ ប៉ុន្តែបើការអនុវត្តន៍មិនមានប្រសិទ្ធភាព គឺធ្វើឲ្យគោលនយោបាយនោះគ្មានប្រយោជន៍។ បច្ចុប្បន្នលោកទទួលស្គាល់ថា បញ្ហានៅតែមានស្របពេលរដ្ឋាភិបាលកម្ពុជា កំពុងអនុវត្តន៍គោលនយោបាយរបស់ខ្លួន។
របាយការណ៍រួមគ្នារបស់ធនាគារពិភពលោក និងធនាគារអភិវឌ្ឍអាស៊ីបានរកឃើញថា គម្លាតអ្នកមានអ្នកក្រ មានតែធំ ចំនួនក្រុមអ្នកងាយរងគ្រោះ ដូចជាអ្នកក្រីក្រអ្នកមានជម្លោះដីធ្លី អ្នកគ្មានការងារធ្វើ បានកើនឡើងជាបន្តបន្ទាប់។ បញ្ហាទាំងអស់នេះបានក្លាយជាប្រធានបទ ចម្បងសម្រាប់ថ្នាក់ដឹកនាំគណបក្សនយោបាយទាំងអស់នៅកម្ពុជា កំពុងរៀបចំគោលនយោបាយរបស់ខ្លួនឡើងវិញ ដើម្បីទាក់ទាញរកសំឡេងឆ្នោត ពីក្រុមអ្នកងាយរងគ្រោះនេះ ដែលស្ថាប័នអភិវឌ្ឍនៅកម្ពុជា រកឃើញថាក្រុមអ្នកងាយរងគ្រោះទាំងនោះ មានចំនួនប្រមាណ៩លាននាក់៕
No comments:
Post a Comment