អង្គការ ឃ្លាំមើល ការបោះឆ្នោត មានវិធី ចុះឈ្មោះ មានតម្លាភាព
VOA / វីអូអេ | ២០ វិច្ឆិកា ២០១៤
ភ្នំពេញ— ក្រុមអង្គការ សង្គមស៊ីវិល ក្នុងស្រុក ដែលតាម ឃ្លាំមើល ដំណើរការ បោះឆ្នោត នៅក្នុងប្រទេស កម្ពុជា នៅថ្ងៃ ព្រហស្បតិ៍នេះ បានរកឃើញ នីតិវិធី ចុះឈ្មោះ និងពិនិត្យ បញ្ជីឈ្មោះ បោះឆ្នោត តាមបែប ទំនើប ដោយចំណាយ ទឹកប្រាក់ ប្រមាណ ១៧លាន ដុល្លារ សហរដ្ឋ អាមេរិក។ ប្រព័ន្ធថ្មីនេះ អាចធានាបាន នូវសុក្រិត្យភាព នៃបញ្ជីឈ្មោះ បោះឆ្នោត ប្រមាណ ៩៨%។
នៅក្នុងសិក្ខាសាលាមួយដែលរៀបចំឡើងដោយអង្គការសង្គមស៊ីវិល មានការចូលរួមពីមន្ត្រីគណបក្សសង្គ្រោះជាតិ និងមន្ត្រីនៃគណៈកម្មាធិការជាតិរៀបចំការបោះឆ្នោត បានបង្ហាញថា បញ្ជីឈ្មោះបោះឆ្នោតថ្មីគឺត្រូវបានបង្កើតឡើងតាមរយៈប្រព័ន្ធ ទំនើបសម្រាប់បម្រើការចុះឈ្មោះ និងការពិនិត្យបញ្ជីឈ្មោះបោះឆ្នោតដែលអាចមានលទ្ធភាពប្រើប្រាស់តាម មូលដ្ឋានជាមួយនឹងឧបករណ៍បច្ចេកទេសទំនើប និងអាចជឿទុកចិត្តបានកម្រិតខ្ពស់។
ចំណុចសំខាន់នៃប្រព័ន្ធចុះឈ្មោះថ្មីនេះគឺធានាថា គ្មានឈ្មោះស្ទួននិងគ្មានកំហុសនៃការបញ្ជូនទិន្នន័យរបស់អ្នកបោះ ឆ្នោតទេ។ ការចុះឈ្មោះត្រូវធ្វើឡើងតាមប្រព័ន្ធកុំព្យូទ័រដោយមានបញ្ចូល ស្នាមមេដៃ និងរូបថតរបស់អ្នកបោះឆ្នោត។ ផលិតប័ណ្ណបោះឆ្នោតជំនួសឲ្យការប្រើប្រាស់ឯកសារផ្សេងៗពិសេសលិខិត សម្គាល់សម្រាប់បោះឆ្នោត ដែលត្រូវយកមកប្រើដើម្បីបានចូលបោះឆ្នោត។ នេះបើតាមបទបង្ហាញនៅក្នុងសិក្ខាសាលា។
លោក គុល បញ្ញា នាយកប្រតិបត្តិនៃគណៈកម្មាធិការរៀបចំការបោះឆ្នោតដោយសេរី និងយុត្តិធម៌នៅកម្ពុជាដែលហៅកាត់ថាខុមហ្វ្រែល បានបញ្ជាក់ថា នីតិវិធីចុះឈ្មោះតាមបែបប្រព័ន្ធថ្មីនេះមិនមែនទៅកែលំអរបញ្ជី ឈ្មោះបច្ចុប្បន្ននេះទេគឺត្រូវធ្វើថ្មីតែម្តង តែយើងនៅប្រើប្រាស់បញ្ជីបច្ចុប្បន្នជាមូលដ្ឋានដែរ។
លោកមានប្រសាសន៍ថា បញ្ជីឈ្មោះបោះឆ្នោតថ្មីមិនមែនត្រឹមតែជួយឲ្យការបោះឆ្នោតបាន ត្រឹមត្រូវ និងយុត្តិធម៌ប៉ុណ្ណោះទេ។ តែវាថែមទាំងជួយដល់សិទ្ធិអ្នកបោះឆ្នោតថែមទៀត ពីព្រោះថា បញ្ជីឈ្មោះបោះឆ្នោតមិនត្រឹមត្រូវអាចធ្វើឲ្យបាត់បង់ដល់សិទ្ធិ អ្នកបោះឆ្នោត។
លោក និយាយថា៖ «ពីព្រោះប្រព័ន្ធ ចុះឈ្មោះ បោះឆ្នោត ថ្មីនេះ គឺ បច្ចេកវិជ្ជា សមត្ថភាព ឈរលើ នៅក្នុងមូលដ្ឋាន នៅក្នុងប្រទេសយើង, មិនទៅយក ពីក្រុមហ៊ុន ប្រទេស ខាងក្រៅណា យកមកដាក់ទេ។ ហើយ តម្លៃ ក៏យើង គិតថា, មិនជាថ្លៃទេ, ហើយ ដែលអាច គ.ជ.ប. ថ្មី។ ហើយ ធនធាន, យើង មាន រដ្ឋាភិបាល, យើង មាន អាចដំណើរការ គ្រប់គ្រង បញ្ហាប្រព័ន្ធ ចុះឈ្មោះ បោះឆ្នោតថ្មី បាន។»
បញ្ជីឈ្មោះបោះឆ្នោតបច្ចុប្បន្ននេះត្រូវបានក្រុមអង្គការសង្គម ស៊ីវិលរកឃើញថា មានឈ្មោះស្ទួនប្រមាណ៤០ម៉ឺននាក់ និងមានជាង១៧ភាគរយដែលមានឈ្មោះក្នុងបញ្ជីគឺឈ្មោះខុស ដែលមិនអាចបោះឆ្នោតបាន និងបានលុបឈ្មោះចេញពីបញ្ជីឈ្មោះបោះឆ្នោត ប្រមាណជាង១លាន២សែននាក់។
លោក គល់ បញ្ញា បញ្ជាក់បន្ថែម ថា៖ «ប្រព័ន្ធ បច្ចុប្បន្ននេះ មានបញ្ហា ដែលវា ធ្វើឲ្យប៉ះពាល់ ទៅលើសិទ្ធិ អ្នកបោះឆ្នោត ផង ទៅលើសុចរិតភាព នៃកិច្ចការងារ បោះឆ្នោត ផង។»
លោកហ៊ឺ រ៉ុង ប្រធាននាយកដ្ឋានប្រតិបត្តិការនៃគ.ជ.ប. ដែលបានចូលរួមសិក្ខាសាលា មានប្រសាសន៍ថា ការចូលរួមពីភាគីពាក់ព័ន្ធទាំងអស់ដើម្បីកែទម្រង់ការបោះឆ្នោតជា ការល្អមួយ។ ក៏ប៉ុន្តែគ.ជ.ប. នៅរង់ចាំមើល ថា គណៈកម្មការចម្រុះរបស់គណបក្សប្រជាជនកម្ពុជា និងគណបក្សសង្គ្រោះជាតិបានឯកភាពគ្នានឹងរៀបចំច្បាប់យ៉ាងណា? ហើយគ.ជ.ប.នឹងអនុវត្តទៅតាមច្បាប់ និងសិក្សាផ្នែកបច្ចេកទេសមើលថា យើងអាចអនុវត្តបានដល់កម្រិតណា។
លោក និយាយថា៖ «សំខាន់ថា ច្បាប់តម្រូវឲ្យគ.ជ.ប. ចុះឈ្មោះថ្មីឡើងវិញឬមួយក៏ត្រូវចុះឈ្មោះ ថ្មី ដោយធ្វើបច្ចុប្បន្នភាពទៅលើបញ្ជីចាស់។ បើសិនជាតម្រូវថា ឲ្យចុះឈ្មោះថ្មីឡើងវិញ យើងនឹងរៀបចំបច្ចេកទេសតាមការចុះឈ្មោះថ្មីឡើងវិញ តែប្រសិនបើឧបមាធ្វើបច្ចុប្បន្នភាពទៅលើបញ្ជីចាស់នោះ យើងរៀបចំទៅតាមហ្នឹង។»
លោកគួយ ប៊ុនរឿន មន្ត្រីរៀបចំកិច្ចការបោះឆ្នោតមកពីគណបក្សសង្គ្រោះជាតិ មានប្រសាសន៍ថា គណបក្សសង្គ្រោះជាតិគាំទ្រយ៉ាងពេញទំហឹងនូវប្រព័ន្ធចុះឈ្មោះទំនើប នេះ។
លោក បានបញ្ជាក់ ថា៖ «មូលហេតុ ដោយសារយើងបំបាត់ ទប់ស្កាត់នូវមនុស្សដែលមិនមានសិទ្ធិក្នុងការចុះឈ្មោះ បានមកចុះឈ្មោះ ទីពីរបង្កលក្ខណៈងាយស្រួលដល់ប្រជាពលរដ្ឋខ្មែរអាចចុះឈ្មោះបាន គ្រប់គ្នា។ហើយនេះអាចផ្តល់ឱកាសមួយ ដល់ថ្ងៃបោះឆ្នោត គាត់បានសិទ្ធិក្នុងការបោះឆ្នោតតែម្តង។»
គណៈកម្មាធិការជាតិរៀបចំការបោះឆ្នោត បើទោះបីជាគណបក្សប្រជាជនកម្ពុជា និងគណបក្សសង្គ្រោះជាតិកំពុងដំណើរការនីតិវិធីកំណែទម្រង់គ.ជ.ប. ថ្មីក៏ដោយ ក៏គ.ជ.ប.បានដំណើរការចុះឈ្មោះបោះឆ្នោតថ្មីបានជិត១៨ម៉ឺននាក់៕
No comments:
Post a Comment