អាជ្ញាធរ បដិសេធ មិនសហការ ស្វែងរក ក្រុមម៉ុងតាញ៉ា លាក់ខ្លួន នៅខេត្ត រតនគិរី
RFA / វិទ្យុ អាស៊ី សេរី | ១៦ ធ្នូ ២០១៤
ជនជាតិ ម៉ុងតាញ៉ា ២នាក់ ក្នុងចំណោម ១៣នាក់ ដែលកំពុង លាក់ខ្លួន ក្នុងព្រៃ ខេត្ត រតនគិរី រូបថត ថ្ងៃទី២៦ វិច្ឆិកា ២០១៤។ RFA/Ratha Visal
អាជ្ញាធរ ខេត្ត រតនគិរី យល់ព្រម ជួបប្រជុំ ជាមួយ ក្រុមការងារ ឧត្ដមស្នងការ អង្គការ សហប្រជាជាតិ (អ.ស.ប.) ទទួលបន្ទុក សិទ្ធិមនុស្ស (UNOHCHR) និងក្រុមការងារ ទទួលបន្ទុក ជនភៀសខ្លួន (UNHCR) ជុំវិញសំណើ សង្គ្រោះជនភៀសខ្លួន ម៉ុងតាញ៉ា-វៀតណាម ក្នុងព្រៃ។ ក៏ប៉ុន្តែ កិច្ចប្រជុំនោះ មិនបាន លទ្ធផលទេ។
ជំនួប រវាង អភិបាលខេត្តរតនគិរី លោក ថង សាវុន និងមន្ត្រីក្រុមការងារអង្គការសហប្រជាជាតិ ទាំងពីរក្រុមរយៈពេលជាង ១ម៉ោងនៅរសៀលថ្ងៃអង្គារ ទី១៦ ធ្នូ មិនមានលទ្ធផលវិជ្ជមានទាក់ទិនសំណើសហការចុះសង្គ្រោះជនភៀសខ្លួន ម៉ុងតាញ៉ា ពីកន្លែងលាក់ខ្លួនក្នុងព្រៃនោះទេ។
មន្ត្រីឃ្លាំមើលសិទ្ធិមនុស្សអាដហុក (Adhoc) ចាត់ទុកការមិនសហការនេះ ថាជាការរំលោភសិទ្ធិមនុស្ស និងរំលោភកតិកាសញ្ញាស្ដីពីជនភៀសខ្លួន។ ដោយឡែកមន្ត្រីសិទ្ធិមនុស្សក្នុងស្រុកនេះ អំពាវនាវសុំឲ្យស្ថាប័នអង្គការសហប្រជាជាតិ ទាំងពីរក្រុម បំពេញតួនាទីរបស់ខ្លួនប្រកបដោយការទទួលខុសត្រូវ ចំពោះជោគវាសនាជនភៀសខ្លួនវៀតណាម ទាំង ១៣នាក់។
ប្រធានផ្នែកអង្កេតសមាគមអាដហុក លោក នី ចរិយា ថ្លែងថា ទាំងរាជរដ្ឋាភិបាល និងអាជ្ញាធរខេត្តរតនគិរី ត្រូវតែបំពេញតួនាទីរបស់ខ្លួនក្នុងនាមជាប្រទេសជាសមាជិកប្រទេស ចុះហត្ថលេខាលើកតិកាសញ្ញាអន្តរជាតិស្ដីពីជនភៀសខ្លួន។ លោកកត់សម្គាល់ថា ប្រទេសកម្ពុជា ទទួលយកជនភៀសខ្លួនពីប្រទេសអូស្ត្រាលី ខុសច្បាប់ ប៉ុន្តែបែរជាគេចវេសមិនសហការជាមួយអង្គការសហប្រជាជាតិ ជួយជនភៀសខ្លួនវៀតណាម ដែលអះអាងថាកំពុងត្រូវការជំនួយសង្គ្រោះពីការរត់គេចខ្លួន ក្នុងហេតុផលផ្នែករងការគាបសង្កត់ និងធ្វើទុក្ខបុកម្នេញផ្នែកនយោបាយ៖ «ត្រង់នេះជាភស្តុតាងជាក់ស្តែង ហើយ ដែលថាអាជ្ញាធរជាសេនាធិការរបស់រាជរដ្ឋាភិបាលកម្ពុជា មិនអនុវត្តទៅតាមកតិកាសញ្ញាអន្តរជាតិស្ដីពីសិទ្ធិជនភៀសខ្លួន។ ខ្ញុំគិតថា អ្វីដែលអាជ្ញាធរកំពុងធ្វើ គឺបង្ហាញឆន្ទៈធ្វើទុក្ខបុកម្នេញជនភៀសខ្លួនម៉ុងតាញ៉ា ដែលគ្នារត់មករកការជ្រកកោនមួយ ដែលគេចពីការធ្វើទុក្ខពីប្រទេសវៀតណាម។»
វិទ្យុអាស៊ីសេរី មិនអាចទាក់ទងអភិបាលខេត្តរតនគិរី លោក ថង សាវុន សុំអធិប្បាយបញ្ហានេះបានទេ នៅរសៀលថ្ងៃទី១៦ ខែធ្នូ។ ក៏ប៉ុន្តែប្រភពព័ត៌មានមួយសុំមិនបញ្ចេញឈ្មោះ ប្រាប់វិទ្យុអាស៊ីសេរី ថា អភិបាលខេត្តទាមទារឲ្យមន្ត្រីការងារអង្គការសហប្រជាជាតិ រកលិខិតអនុញ្ញាតពីក្រសួងការបរទេស និងសហប្រតិបត្តិការអន្តរជាតិ ទើបអាជ្ញាធរខេត្តយល់ព្រមសហការ។
ក្រុមការងារអង្គការសហប្រជាជាតិ បានចុះទៅខេត្តរតនគិរី លើកទី២ កាលពីថ្ងៃសុក្រ សប្ដាហ៍មុន ដើម្បីស្វែងរកក្រុមម៉ុងតាញ៉ា ទាំង ១៣នាក់នោះ ហើយគ្រោងនាំយកទៅរាជធានីភ្នំពេញ ដើម្បីធ្វើកិច្ចសម្ភាសន៍ផ្តល់ឋានៈជាជនភៀសខ្លួន។ ក្រុមនេះបានពន្យារពេលចុះទៅជួបក្រុមម៉ុងតាញ៉ា ដោយសារមានសំណើពីអាជ្ញាធរខេត្តឱ្យរង់ចាំអភិបាលខេត្ត លោក ថង សាវុន ត្រឡប់ពីភ្នំពេញមកខេត្តជាមុនសិន។
រហូតមកទល់នឹងថ្ងៃទី១៦ ខែធ្នូ ប្រជាពលរដ្ឋជនជាតិចារ៉ាយខ្មែរ អ្នកជួយទំនុកបម្រុងជនភៀសខ្លួនវៀតណាម ទាំង ១៣នាក់អះអាងថា ពួកគេនៅមានសុវត្ថិភាពនៅឡើយ ខណៈកងកម្លាំងចម្រុះរបស់អាជ្ញាធរខេត្ត ត្រូវបានបញ្ជូនទៅកាន់កន្លែងដែលគេសង្ស័យថាមានជនភៀសខ្លួនតាំង ពីសប្ដាហ៍មុន ដើម្បីស្វែងរកកន្លែងលាក់ខ្លួនរបស់ក្រុមម៉ុងតាញ៉ា។ អ្នកភូមិសុំមិនឲ្យបញ្ចេញឈ្មោះ ដោយខ្លាចអាជ្ញាធរចោទប្រកាន់ថាលាក់បំពួនជនភៀសខ្លួន ថ្លែងថា ការយឺតយ៉ាវសង្គ្រោះជនភៀសខ្លួន នឹងនាំឲ្យកងកម្លាំងសមត្ថកិច្ចរកឃើញកន្លែងលាក់ខ្លួនពួកគេ និងអាចចាប់បញ្ជូនពួកគេទៅឲ្យអាជ្ញាធរវៀតណាម៖ «គេរកគ្រប់ ច្រកល្ហកក្នុងភូមិ ខ្ញុំក៏គេរកដែរតាំងពីថ្ងៃ១២ ដល់ឥឡូវហ្នឹង។ គេរកក្នុងព្រៃ ហើយគេយាមតាមផ្លូវ ទាំងប៉ូលិស ទាំងទាហាន ទាំងសន្តិសុខភូមិ។»
ទោះជាយ៉ាងនេះក្តី ប្រភពមន្ត្រីអាដហុក ខេត្តរតនគិរី លោក ឆាយ ធី ឲ្យដឹងថា មន្ត្រីក្រុមការងារអង្គការសហប្រជាជាតិ បានធ្វើរបាយការណ៍ពីការទាមទាររបស់អាជ្ញាធរខេត្ត ជូនអង្គការសហប្រជាជាតិ ការិយាល័យនៅទីក្រុងភ្នំពេញ អន្តរាគមន៍ករណីនេះ។
លោក ខៀវ សុភ័គ មន្ត្រីនាំពាក្យក្រសួងមហាផ្ទៃ ធ្លាប់បានអះអាងដែរថា ក្រសួងមហាផ្ទៃ នឹងសហការជាមួយក្រុមអង្គការសហប្រជាជាតិ ស្វែងរកក្រុមម៉ុងតាញ៉ា ប្រសិនបើពួកគេមានវត្តមានពិតប្រាកដនៅខេត្តរតនគិរី។ លោកបន្ថែមទៀតថា សមត្ថកិច្ចនៅមិនទាន់រកឃើញក្រុមម៉ុងតាញ៉ា ទាំង ១៣នាក់ ដែលកំពុងលាក់ខ្លួននៅក្នុងព្រៃនៅឡើយទេ។ លោកបញ្ជាក់ថា អាជ្ញាធរមានសមត្ថកិច្ចនឹងមិនចាប់បញ្ជូនជនភៀសខ្លួនម៉ុងតាញ៉ា ទៅប្រទេសវៀតណាម វិញទេ ប្រសិនបើអាជ្ញាធរមានសមត្ថកិច្ចរកឃើញពួកគេ៕
No comments:
Post a Comment