លោក ហ៊ុន សែន គំរាម ដកតំណែង អនុប្រធាន ទី១ រដ្ឋសភា ជាលើក ទី២
RFA / វិទ្យុ អាស៊ី សេរី | ៤ ធ្នូ ២០១៤
លោកនាយករដ្ឋមន្ត្រី ហ៊ុន សែន
ថ្លែងក្នុងថ្ងៃសម្ពោធបើកការដ្ឋានសាងសង់ស្ពានអាកាសស្តុបតិចណូ
រាជធានីភ្នំពេញ នៅថ្ងៃទី៩ ខែកញ្ញា ឆ្នាំ២០១៤។ RFA/Van Vichar
ប្រមុខ រដ្ឋាភិបាល កម្ពុជា គំរាម ដកតំណែង អនុប្រធាន ទី១ រដ្ឋសភា ជាលើក ទី២។ លោក ហ៊ុន សែន ថ្លែងបែបនេះ នៅថ្ងៃ ទី៤ ខែធ្នូ ក្នុងពិធី ចែកសញ្ញាប័ត្រ នៅវិទ្យាស្ថាន ជាតិ អប់រំ។
ការថ្លែង គំរាម របស់លោក ហ៊ុន សែន លើកនេះ ក៏ដូច ជាលើកមុន ដែលលោក ចាត់ទុកថា, នេះ ជាការបរិហារ ដល់រាជរដ្ឋាភិបាល ខណៈ មេដឹកនាំ កំពូល នៃគណបក្ស នយោបាយ ធំពីរ កំពុង ប្រើប្រាស់ វប្បធម៌សន្ទនា ដើម្បី ដោះស្រាយ បញ្ហានយោបាយ។
លោក ហ៊ុន សែន មានប្រសាសន៍ ថា, អនុប្រធាន ទី១ រដ្ឋសភា គួរ ប្រយ័ត្នខ្លួន ព្រោះ សមាជិក សភា ភាគច្រើន ជារបស់លោក ហ៊ុន សែន, ហើយ សភា អាចបុក ទម្លាក់លោក កឹម សុខា ពីតំណែង អនុប្រធាន សភា ទី១ បាន ដោយសំឡេង ភាគច្រើន។ លោក បន្តថា, គេ ឲ្យតំណែង អនុប្រធាន សភា ទី១ ដើម្បី សម្របសម្រួល កិច្ចការ ជាមួយ តំណាងរាស្ត្រ ក្នុងសភា, មិនមែន សម្រាប់ ដើរជេរគេ, ជេរឯង នោះទេ។
កាលពីថ្ងៃទី ៩ កញ្ញា កន្លងទៅ លោកហ៊ុន សែន ធ្លាប់គំរាមដកតំណែងអនុប្រធានសភាទី១ ពីលោក កឹម សុខា ម្ដងរួចទៅហើយ បន្ទាប់ពីលោក កឹម សុខា ថ្លែងទៅកាន់អ្នកគាំទ្រ ថា នឹងប្រើប្រាស់យន្តការសភា ដើម្បីដកហូតដំណែងរដ្ឋមន្ត្រីណាដែលប្រព្រឹត្តិពុករលួយ ក្នុងជួររដ្ឋាភិបាលរបស់លោក ហ៊ុន សែន៕
No comments:
Post a Comment