វិភាគ៖ តើ គ.ជ.ប. ថ្មី អាចបាត់ស្រមោល ទៅវិញ តាមសម្តី របស់លោក ហ៊ុន សែន ទេ?
VOD | ២១ មករា ២០១៥
|
លោក នាយករដ្ឋមន្ត្រី ហ៊ុន សែន នាពេលកន្លងមក
ក្រុមការងារ គណបក្ស ប្រជាជនកម្ពុជា និងគណបក្ស សង្គ្រោះជាតិ កំពុងចរចា លើសេចក្តីស្នើ សេចក្តីព្រាងច្បាប់ ស្តីពី ការរៀបចំ និងប្រព្រឹត្តទៅ នៃគ.ជ.ប., គឺ បានជិត ៣០មាត្រា ក្នុងចំណោម ៤៦មាត្រា។ ក្នុងអំឡុងពេល នៃការពិភាក្សានេះ, ក្រុមការងារ បច្ចេកទេស មានការ ខ្វែងគំនិតគ្នា មួយចំនួន; ចំណែក ថ្នាក់ដឹកនាំ គណបក្ស ទាំងពី ក៏កំពុង វាយប្រហារគ្នា ដោយពាក្យសម្តី ជាបន្តបន្ទាប់។
ថ្នាក់ដឹកនាំ គណបក្ស សង្គ្រោះជាតិ រួម មានលោក សម រង្ស៊ី និងលោក កឹម សុខា រិះគន់ ការដឹកនាំ របស់លោក នាយករដ្ឋមន្ត្រី ហ៊ុន សែន នៅតាមវេទិកា សាធារណៈ ជួបពលរដ្ឋ នៅតាម បណ្តាខេត្តនានា ជាបន្តបន្ទាប់។ ចំណែក លោក ហ៊ុន សែន វិញបានប្រើវេទិកា សាធារណៈ ក្នុងពិធីសម្ពោធ សមិទ្ធផល ឬការចែក សញ្ញាបត្រ ដើម្បី វាយប្រហារ ចំៗ លើថ្នាក់ដឹកនាំ គណបក្ស សង្គ្រោះជាតិវិញ។
ការវាយប្រហារ ដោយពាក្យសម្តី ដល់ចំណុច ក្តៅមួយ ដែលលោក ហ៊ុន សែន ប្រកាស ឈប់ខ្វល់ ពីវប្បធម៌ ជជែកគ្នា ដោយសន្តិភាព ជាមួយលោក សម រង្ស៊ី។ ខណៈបញ្ហាក្តៅ រវាង ថ្នាក់ដឹកនាំ បក្សទាំងពីរ កំពុងរោល ដាក់គ្នានេះ, លោក នាយករដ្ឋមន្ត្រី ហ៊ុន សែន ក៏ប្រកាស ឈប់ខ្វល់ ពីការចរចា លើច្បាប់ បោះឆ្នោតថ្មី ដែលច្បាប់នោះ កើតចេញ ពីការព្រមព្រៀង នយោបាយ របស់ គណបក្ស ទាំងពីរ កាលពីថ្ងៃ ទី២២ ខែកក្កដា ឆ្នាំ២០១៤។ លោក មានប្រសាសន៍ ថា, «ឥឡូវនេះ លេងគ្នា នៅក្នុងសភា។ សំឡេងយើង (គណបក្ស ប្រជាជនកម្ពុជា) ភាគច្រើន អត់មានអី ត្រូវ ញ៉ាក អាច្បាប់បោះឆ្នោត, មិនបោះឆ្នោត, ធ្វើទាន់ មិនទាន់ ក៏ហីទៅ, បើ លោកឯក ដើរចេញ ពីការស្រុះស្រួលហើយ ពេលវេលា នៅគរគោក នាំគ្នា ទៅណា បាត់អស់, ត្រឡប់ មកវិញ បង្ខំ។»
ក្រោយការប្រកាស របស់លោក នាយករដ្ឋមន្ត្រី ថា, ឈប់ខ្វល់ ពីការចរចា ពីច្បាប់បោះឆ្នោត កាលពីដើម សប្តាហ៍នេះ នាំឲ្យអ្នក ដែលធ្វើការ ពាក់ព័ន្ធ កិច្ចការ បោះឆ្នោត ប្រារម្ភ ថា, គ.ជ.ប. ថ្មី ប្រឈមបញ្ហា ច្រើន ដោយសារ ឥទ្ធិពលសម្តី របស់លោក នាយករដ្ឋមន្ត្រី ហ៊ុន សែន។
លោកនាយករដ្ឋមន្ត្រី ហ៊ុន សែន ដែលកាន់តំណែងជានាយករដ្ឋមន្ត្រីជាង៣០ឆ្នាំ ហើយគេឲ្យងារជាបុរសខ្លាំងនោះ សម្តីរបស់លោកពិតជាខ្លាំង។ ជាញឹកញាប់ លោក ហ៊ុន សែន រងការចោទថា សម្តីរបស់លោកមានឥទ្ធិពលដល់ស្ថាប័នតុលាការ និងស្ថាប័នឯករាជ្យផ្សេងៗទៀត។ ជាក់ស្តែងករណីសំណុំរឿងរបស់មន្ត្រី និងតំណាងរាស្ត្រគណបក្សសង្គ្រោះជាតិស្ថិតក្នុងដៃតុលាការ ក៏លោក ហ៊ុន សែន ហ៊ានព្រមានថាលោកមិនអត់អោនឲ្យ ឬមិនឲ្យរួចខ្លួនទេ។
ជាលទ្ធផលមន្ត្រីគណបក្សសង្គ្រោះជាតិ៥រូប កំពុងជាប់ពន្ធនាការព្រៃស ហើយលោកនាយករដ្ឋមន្ត្រីកំពុងសម្លឹងមើលតំណាងរាស្ត្រគណបក្សសង្គ្រោះ ជាតិ៧រូបថែមទៀត ដែលលោកថាក្រោយពីចាត់ការមន្ត្រីអ្នកទាំង៥រូបហើយ និងចាត់តំណាងរាស្ត្រ៧រូបទៀត។
បើមើលលើករណីឆ្លងជំងឺអេដស៍នៅខេត្តបាត់ដំបងវិញ ពេលដែលមន្ត្រីជំនាញបង្ហាញរបាយការណ៍ពីការឆ្លងជាបន្តបន្ទាប់នោះ លោកនាយករដ្ឋមន្ត្រីថ្លែងថា លោកមិនជឿថាមានការឆ្លងទេ ពេលនោះមន្ត្រីជំនាញដែលធ្វើការផ្ទាល់ឈប់ផ្តល់ព័ត៌មាននេះដល់ សាធារណជន។
សម្តីរបស់លោកនាយករដ្ឋមន្ត្រីពិតជាមានឥទ្ធិពលដាច់គេនៅកម្ពុជា ហេតុដូច្នេះបើលោកថា មិនខ្វល់ពីកិច្ចការរៀបចំកំណែទម្រង់ការបោះឆ្នោត ដែលមន្ត្រីជំនាញកំពុងពិភាក្សាលើច្បាប់បោះឆ្នោតនេះ តើមន្ត្រីរបស់លោកទាំងនោះ ហ៊ានទៅជួបជាមួយមន្ត្រីគណបក្សសង្គ្រោះជាតិ តាមការកំណត់ប្រចាំសប្តាហ៍ដែរឬទេ ហើយបើនៅតែទៅមានលទ្ធផលយ៉ាងណា?
ខ្លឹមសារដែលលោក ហ៊ុន សែន និងលោក សម រង្ស៊ី ជួបគ្នាកាលពីថ្ងៃទី២៨ ខែវិច្ឆិកា ឆ្នាំ២០១៤ អ្នកទាំងពីរប្តេជ្ញាថា ការធ្វើកំណែទម្រង់ការបោះឆ្នោតនឹងបញ្ចប់ឲ្យបានយ៉ាងយូរត្រឹមដំណាច់ ខែកុម្ភៈ ឆ្នាំ២០១៥នេះ។ ទោះយ៉ាងណា ពេលវេលាសល់តែជាង១ខែទៀត តែសញ្ញានៃការបញ្ចប់កិច្ចការកំណែទម្រង់ការបោះឆ្នោតនៅមិនទាន់ លេចចេញជារូបរាងទេ តែបែរជាលេចចេញបញ្ហាប្រឈមផ្ទួនៗទៅវិញ។
ក្រោយការថ្លែងរបស់លោកនាយករដ្ឋមន្ត្រី ហ៊ុន សែន នោះមន្ត្រីអង្គការសង្គមស៊ីវិលដែលធ្វើការពាក់ព័ន្ធកិច្ចការបោះឆ្នោត កាន់តែស្រម៉ៃមើលមិនឃើញពីរូបភាពនៃ គ.ជ.ប. ថ្មី។
នាយកប្រតិបត្តិគណៈកម្មាធិការអព្យាក្រឹត្យ និងយុត្តិធម៌ដើម្បីការបោះឆ្នោតដោយសេរី និងត្រឹមត្រូវនៅកម្ពុជា លោក ហង្ស ពុទ្ធា មានប្រសាសន៍ថាការវិវត្តន៍ចុងក្រោយនេះ ជាហានិភ័យក្នុងការបង្កើត គ.ជ.ប ថ្មី។
តាមកិច្ចព្រមព្រៀង២២កក្កដាឆ្នាំ២០១៤ គ.ជ.ប. ថ្មី មានសមាជិក៩រូប ក្នុងនោះ៤រូបគណបក្សប្រជាជនកម្ពុជាជាអ្នកជ្រើសរើស ៤រូបគណបក្សសង្គ្រោះជាតិជាអ្នកជ្រើសរើស និង១រូបទៀតជ្រើសរើសរួមគ្នា។
លោក ហង្ស ពុទ្ធា យល់ឃើញថា វាសនារបស់ គ.ជ.ប. ថ្មី យ៉ាងណានោះគឺគណបក្ស ប្រជាជនជាអ្នកសម្រេច ។ លោក ថា, «ការចរចាហ្នឹងតទៅមុខ ឬបរាជ័យគឹប្រហែលជាស្ថិតក្នុងដៃរបស់គណបក្សប្រជាជនហើយ មួយទៀតខ្ញុំគិតថា ព័ត៌មានទាំងឡាយនេះក៏ជាការពញ្ញាក់ស្មារតីដល់ដៃគូចរចា ហើយក៏ជាការពញ្ញាក់អារម្មណ៍ដល់ប្រជាពលរដ្ឋនៅទូទាំងប្រទេស ដើម្បីឲ្យតាមឃ្លាំមើលកាន់តែខ្លាំងក្លាបន្ថែមទៀត។»
ការទាមទារឲ្យធ្វើកំណែទម្រង់ គ.ជ.ប គឺធ្វើឡើងដោយគណបក្សសង្គ្រោះជាតិ ចំណែកអ្នកចង់ប្រើ គ.ជ.ប បច្ចុប្បន្នដដែលគឺជាការចង់បានរបស់គណបក្សប្រជាជនកម្ពុជា។ បច្ចុប្បន្នគណបក្សទាំងពីកំពុងតែទាញទៅរកចំណុចពាក់កណ្តាលម្នាក់ ដែលជាថ្នូរបញ្ចប់ភាពជាប់គាំងនយោបាយ។
កិច្ចព្រមព្រៀង២២កក្កដា បានចែងយ៉ាងច្បាស់ថា បើ គ.ជ.ប. ថ្មី មិនអាចកើតរួចនោះ គ.ជ.ប បច្ចុប្បន្ននៅតែបន្តការងាររបស់ខ្លួន ក្នុងការរៀបចំកិច្ចការបោះឆ្នោតដូចមានចែងក្នុងច្បាប់បោះឆ្នោតជាដើម ។ ចំណុចនេះបានន័យថា បើការរៀបចំ គ.ជ.ប ថ្មីបរាជ័យទាំងស្រុងនោះ វានឹងក្លាយទៅជាជោគជ័យរបស់គណបក្សប្រជាជនកម្ពុជាទាំងស្រុងទៅវិញ។
ទោះយ៉ាងលោក រស់ រ៉ាវុធ សាស្ត្រាចារ្យវិទ្យាសាស្ត្រនយោបាយនៅតែមានការជឿជាក់ថា គ.ជ.ប. ថ្មី នឹងបង្ហាញរូបរាងនៅចុងខែក្រោយតាមការគ្រោងទុក ។ លោកបញ្ជាក់មូលហេតុដែល គ.ជ.ប ថ្មី នឹងនៅតែបង្ហាញរូបរាងនោះ ដោយសារបច្ចុប្បន្នសហគមន៍អន្តរជាតិរួមទាំងអង្គការសហប្រជាជាតិ ប្រទេសម្ចាស់ជំនួយ និងប្រជាពលរដ្ឋខ្មែរកំពុងតាមដានលើកិច្ចការនេះ។
ក្រោយពេលប្រកាសលទ្ធផលនៃការបោះឆ្នោតអាណត្តិទី៥ កាលពីឆ្នាំ២០១៣ គណបក្សសង្គ្រោះជាតិបដិសេធមិនទទួលយកលទ្ធផល ហើយដឹកនាំអ្នកគាំទ្ររបស់ខ្លួនពីរាប់សែនទៅរាប់លាននាក់ធ្វើ បាតុកម្មនៅរាជធានីភ្នំពេញ ។ អំឡុងពេលនៃការជាប់គាំងនយោបាយ បាតុកម្មរបស់ប្រជាពលរដ្ឋដែលអះអាងថា រងភាពអយុត្តិធម៌កើតឡើងស្ទើររាល់ថ្ងៃ ។ ក្នុងអំឡុងពេលនោះ ពលរដ្ឋខ្មែរយ៉ាងតិច៧នាក់បានស្លាប់ ដោយសារការបាញ់បង្ក្រាបពេលបាតុកម្ម រាប់រយនាក់រងរបួស និងមួយចំនួនធ្លាក់ខ្លួនពិការដល់ពេលបច្ចុប្បន្ន ។ ក្រុមគ្រួសារអ្នកស្លាប់ អ្នករងរបួស និងអ្នកធ្លាក់ខ្លួនពិការទាំងនោះ មិនមានក្រុមណាមួយចេញមុខទទួលខុសត្រូវ ឬផ្តល់សំណងជួសជុលការខូចខាតនោះទេ។
បើ គ.ជ.ប ថ្មី មិនចេញជារូបរាងនោះ តើការបោះឆ្នោតនៅអាណត្តិទី៦អាចនឹងមានស្ថានភាពដូចអាណត្តិទី៥ទៀតដែរទេ?
No comments:
Post a Comment