ពលរដ្ឋ នៅបាត់ដំបង រិះគន់ អាជ្ញាធរ ថា, មិនដោះស្រាយ បញ្ហាប្រឡាយ ទឹកស្អុយ
RFA / វិទ្យុ អាស៊ី សេរី | ៩ មករា ២០១៥
ប្រឡាយទឹក ដែលប្រជាពលរដ្ឋ ត្អូញត្អែរ ថា, មានក្លិនស្អុយ
ប៉ះពាល់ សុខភាព នៅភូមិ ព្រែកក្រូច, ឃុំ ព្រែកនរិន្ទ, ស្រុក ឯកភ្នំ,
ខេត្ត បាត់ដំបង។ រូបថត ថ្ងៃទី៨ ខែមករា ឆ្នាំ២០១៥ (RFA/Hum Chamroeun)
ប្រឡាយបង្ហូរទឹកដែលប្រជាពលរដ្ឋអះអាងនោះមានក្លិនស្អុយ ធ្វើឲ្យដើមឈើក្បែរនោះមួយចំនួនងាប់បណ្ដើរៗ និងប៉ះពាល់ដល់សុខភាពរបស់ព្រះសង្ឃក្នុងវត្ត និងសិស្សសាលាបឋមសិក្សាវត្តព្រែកក្រូច ពិបាកដកដង្ហើម និងប៉ះពាល់ដល់ការសិក្សា។
ក្រុមប្រជាពលរដ្ឋរស់នៅតំបន់ប្រឡាយទឹកស្អុយនៅភូមិព្រែកក្រូច ឃុំព្រែកនរិន្ទ ស្រុកឯកភ្នំ ខេត្តបាត់ដំបង ថ្លែងនៅថ្ងៃទី៨ ខែមករា ថា មូលហេតុដែលធ្វើឲ្យប្រឡាយទឹកមានក្លិនស្អុយនោះ គឺផ្ដើមចេញពីកាកសំណល់របស់ម្ចាស់អាជីវកម្មត្រីស្រស់ក្បែរនោះ ម្នាក់ឈ្មោះ លោក ហោ ឆាយ ដោយកែច្នៃត្រី ហើយហូរចូលក្នុងទឹកប្រឡាយ ធ្វើឲ្យទឹកស្អុយរលួយខួបប្រាំងខួបវស្សា ប៉ះពាល់ដល់សុខភាពប្រជាពលរដ្ឋក្បែរខាងប្រមាណមួយឆ្នាំមកហើយ។ អ្នកភូមិបន្តទៀតថា ពួកគាត់បាននាំរឿងនេះទៅជម្រាបដល់មេឃុំព្រែកនរិន្ទ ដើម្បីមានវិធានការបង្ហូរទឹកស្អុយចេញពីប្រឡាយ ប៉ុន្តែពុំទទួលបានលទ្ធផលនោះទេ៖ «បាទ! យ៉ាប់វាស្អុយសឹងតែងើបមិនរួច សម្រាកមិនបានទេ។ វាស្អុយពេលខ្លះឈឺក្បាល តែឥឡូវនេះវាស៊ាំនឹងក្លិនស្អុយហ្នឹងខ្លះហើយ។ ឥឡូវនេះវាគ្រាន់បន្តិចហើយ ដល់ខែវស្សាវិញស្អុយផឹកអត់កើតទេ ស្រះវត្តលោកហ្នឹង។ អាជ្ញាធរគាត់មិនហ៊ានទៅថាឲ្យម្ចាស់អាជីវកម្មនោះទេ ព្រោះគេមានលុយច្រើន។»
វិទ្យុអាស៊ីសេរី ពុំអាចទាក់ទងម្ចាស់អាជីវកម្មកែច្នៃត្រីនៅភូមិព្រែកតាច្រែង គឺលោក ហោ ឆាយ ដើម្បីអត្ថាធិប្បាយជុំវិញបញ្ហានេះបានទេនៅថ្ងៃទី៨ មករា។
ទោះយ៉ាងនេះក្ដី មេឃុំព្រែកនរិន្ទ លោក សេង យី មានប្រសាសន៍បញ្ជាក់ថា បញ្ហានេះពុំមែនអាជ្ញាធរមិនគិតគូររំដោះទឹកស្អុយចេញពីប្រឡាយ ដូចការលើកឡើងរបស់អ្នកភូមិនោះទេ។ លោកថា ហេតុដែលយឺតយ៉ាវនេះ ដោយសារអាជ្ញាធរកំពុងសិក្សារកទីកន្លែងសមរម្យ ដើម្បីបង្ហូរទឹកចេញពីប្រឡាយនោះនៅឡើយ៖ «ខ្ញុំកំពុងសិក្សា ដើម្បីស្ដារទឹកប្រឡាយហ្នឹង ថារំដោះទឹកទៅខាងណាអីខាងណី ហើយថែមទាំងបានប្រជុំក្រុមប្រឹក្សាឃុំដោះស្រាយរួចហើយដែរ។»
ទោះជាយ៉ាងនេះក្ដី មន្ត្រីសម្របសម្រួលអង្គការអាដហុក (Adhoc) ខេត្តបាត់ដំបង លោក យិន ម៉េងលី មានប្រសាសន៍ថា អាជ្ញាធរពាក់ព័ន្ធគួរមានវិធានការរំដោះទឹកស្អុយពីប្រឡាយនោះចេញ ឲ្យបានឆាប់ ព្រោះក្លិនទឹកប្រឡាយធ្វើឲ្យប៉ះពាល់សុខភាពប្រជាពលរដ្ឋនៅតំបន់នោះ ជាច្រើនគ្រួសារ។ លោក យិន ម៉េងលី ចាត់ទុកការឆ្លើយបដិសេធរបស់មេឃុំនេះ គ្រាន់តែជាលេសមួយដើម្បីដោះបន្ទុកពីការទទួលខុសត្រូវរបស់ខ្លួន ប៉ុណ្ណោះ៖ «រឿងនេះបើសិនអាជ្ញាធរឃុំមិនដោះស្រាយទេ ប្រជាពលរដ្ឋលោកមានសិទ្ធិទាមទារទៅថ្នាក់លើ ឲ្យអាជ្ញាធរពាក់ព័ន្ធដោះស្រាយតាមផ្លូវច្បាប់បន្តទៀត។»
ប្រឡាយទឹកស្អុយដែលអ្នកភូមិត្អូញត្អែរនេះ ហូរកាត់ផ្ទះប្រជាពលរដ្ឋចំនួន ២ភូមិ ដែលមានប្រជាពលរដ្ឋរស់នៅប្រមាណ ២០០គ្រួសារ គឺភូមិព្រែកតាច្រែង និងភូមិព្រែកក្រូច ព្រមទាំងវត្ត និងសាលាបឋមសិក្សាមួយកន្លែងនៅឃុំព្រែកនរិន្ទ ស្រុកឯកភ្នំ ខេត្តបាត់ដំបង៕
No comments:
Post a Comment