តំណាងរាស្ត្រ បក្សប្រឆាំង ត្រូវ បានតុលាការ កោះហៅជាថ្មី
សំណុំរឿង ព្រហ្មទណ្ឌ ទាក់ទង នឹងអំពើហិង្សា នៅក្បែរ ទីលាន ប្រជាធិបតេយ្យ កាលពីថ្ងៃ ទី១៥ កក្កដាឆ្នាំ ២០១៤ នៅមិនទាន់ចប់ នៅឡើយទេ។ អ្នកតំណាងរាស្ត្រ គណបក្ស សង្គ្រោះជាតិ ដែលត្រូវ បានអាជ្ញាធរ ចាប់ខ្លួន, ហើយ ត្រូវ បានដោះលែងវិញ បន្ទាប់ ពីកិច្ចព្រមពៀង នយោបាយ ថ្ងៃទី២២ កក្កដា ឆ្នាំ២០១៤នោះ ត្រូវ បានតុលាការ កំពូល កោះហៅ ដើម្បី ទៅបំភ្លឺ លើសំណុំរឿង វត្ថុចាប់យក។
ប៉ុន្តែ តំណាងរាស្ត្រ ទាំងនោះ អះអាងថា, ទាល់តែ ដកអភ័យឯកសិទ្ធិ ទើប អាចចូលបំភ្លឺបាន។
តំណាងរាស្ត្រ គណបក្សសង្គ្រោះជាតិទាំង៩នាក់ដែលតុលាការបានរៀបរាប់ឈ្មោះក្នុង សំណុំរឿងព្រហ្មទណ្ឌនោះមាន លោក ហូ វ៉ាន់ លោក កែវ ភីរម្យ លោក រៀល ខេមរិន្ទ លោក នុត រំដួល លោក ឡុង រី លោកស្រី មួរ សុខហួរ លោក ម៉ែន សុថាវរិន្ទ្រ លោក អឿន ណារិត និងលោក ឃិន ជំរឿន។
អ្នកទាំងនោះ ត្រូវបានអគ្គព្រះរាជអាជ្ញារងតុលាការកំពូល លោក ឈួន ចាន់ថា បញ្ជាក់ថាជាប់ចោទពីបទដឹកនាំបាតុកម្ម ញុះញង់ឲ្យប្រព្រឹត្តបទឧក្រិដ្ឋជាអាទិ៍ ផ្តើមគំនិតឲ្យមានអំពើហិង្សាដោយចេតនា មានស្ថានទម្ងន់ទោសនៅក្បែរទីលានប្រជាធិបតេយ្យកាលពីថ្ងៃទី ១៥ កក្កដា ឆ្នាំ ២០១។
ដីកាដែលផ្ញើទៅកាន់លោក កែវ ភីរម្យ បានបង្គាប់ឲ្យតំណាងរាស្ត្ររូបនេះចូលខ្លួនទៅតុលាការនៅថ្ងៃទី ១៩ មករា ដើម្បីចូលរួមសវនាការសំណុំរឿងនេះ។ ប៉ុន្តែ គេមិនដឹងថា តំណាងរាស្ត្រផ្សេងទៀតនឹងត្រូវកោះហៅទាំងអស់គ្នា ឬក៏នៅថ្ងៃណានៅឡើយទេ។ លោក ស្រី មួរ សុខ ហួរ បានប្រាប់វិទ្យុបារាំងអន្តរជាតិថា លោកស្រីមិនបានទទួលដីកាកោះពីតុលាការនៅឡើយទេ។
បើតាមលោក សំ សុគង់ មេធាវីការពារក្តីឲ្យលោក ឡុង រី លោកនុត រំដួល និងលោកម៉ែន សុថាវរិន្ទ្រ ថាតំណាងរាស្ត្រគណបក្សសង្គ្រោះជាតិដែលត្រូវបានតុលាការកំពូលកោះហៅ នោះ នឹងត្រូវចូលទៅឆ្លើយបំភ្លឺមុនអង្គសេចក្តីទៅលើសំណុំរឿងសុំយកវត្ថុ ចាប់យក ដែលរួមមានទូរស័ព្ទដៃ និង iPad ជាដើមនោះ យកមកប្រើប្រាស់វិញតែប៉ុណ្ណោះ ។
ចំណែកលោក យ៉ែម ប៉ុញ្ញឫទ្ធិ អ្នកនាំពាក្យគណបក្សសង្គ្រោះជាតិក៏បានបញ្ជាក់ថា លោក បានទទួលដំណឹងពីការកោះនេះពីតំណាងរាស្ត្រពីររូប តែអ្នកផ្សេងនៅមិនទាន់បានដឹងនៅឡើយទេ។ យ៉ាងណាក៏ដោយ លោកស្រីមួរ សុខហួរ អះអាងថា ដើម្បីអនុវត្តតាមនីតិវិធីច្បាប់ តុលាការត្រូវផ្ញើលិខិតកោះនេះទៅក្រសួងយុត្តិធម៌ រួចហើយក្រសួងយុត្តិធម៌ត្រូវបញ្ជូនទៅប្រធានរដ្ឋសភាដើម្បីពិនិត្យនិង សម្រេច។
អ្នកតំណាងរាស្ត្រគណបក្សសង្គ្រោះជាតិរូបនេះបញ្ជាក់ទៀតថា ប្រសិនបើមានការកោះមែន លោកស្រីនឹងមិនទៅបំភ្លឺទេដរាបណានីតិវិធីមិនត្រូវបានអនុវត្តឲ្យបាន ត្រឹមត្រូវទេនោះជាពិសេសអ្នកតំណាងរាស្ត្រមានអភ័យឯកសិទ្ធិ។ ដូច្នេះ ការចូលទៅបំភ្លឺក្នុងតុលាការបានទាល់តែតំណាងរាស្ត្ររូបនោះត្រូវបានដក អភ័យឯកសិទ្ធិជាមុន។ ទាក់ទទងនឹងសំណុំរឿងនេះដែរ លោក មាជ សុវណ្ណារ៉ា មន្ត្រីទទួលបន្ទុកព័ត៌មានរបស់គណបក្សសង្គ្រោះជាតិកំពុងស្ថិតនៅក្នុង ពន្ធនាគារនៅឡើយ។
លោកស្រីមួរ សុខហួរ អះអាងថា គណបក្សសង្គ្រោះជាតិទាមទារឲ្យបញ្ចប់និទណ្ឌភាព ដែលលោកស្រីមើលឃើញថាមានប្រភពមកពីកង្វះខាតនៃការអនុវត្តច្បាប់។ ប៉ុន្តែ ម្តងហើយម្តងទៀត គណបក្សប្រជាជនកម្ពុជាដែលកំពុងដឹកនាំរដ្ឋាភិបាលអះអាងថា នេះជាការអនុវត្តច្បាប់ដែលមិនពាក់ព័ន្ធនឹងរឿងនយោបាយទេ។
No comments:
Post a Comment