លោក ហ៊ុន សែន ព្រមាន អ្នកប្រឆាំង ថ្ងៃ៧ មករា ថា, ជាប់ពាក់ព័ន្ធ ជាមួយ ខ្មែរក្រហម
RFA / វិទ្យុ អាស៊ី សេរី | ៥ មករា ២០១៥
លោកនាយករដ្ឋមន្ត្រី ហ៊ុន សែន
ថ្លែងក្នុងថ្ងៃសម្ពោធ បើកការដ្ឋាន សាងសង់ ស្ពានអាកាស ស្តុប ទួលគោក
រាជធានីភ្នំពេញ នៅថ្ងៃ ទី០៩ ខែកញ្ញា ឆ្នាំ ២០១៤។ RFA/Vann Vichar
ថ្ងៃ៧ មករា គឺជាថ្ងៃ ប្រវត្តិសាស្ត្រ សម្រាប់កម្ពុជា ដែលថ្ងៃនេះ អ្នកមាន និន្នាការ នយោបាយ ផ្សេងគ្នា, ពិសេស គណបក្ស កាន់អំណាច និងគណបក្ស ប្រឆាំង, ឲ្យនិយមន័យ ខុសគ្នា។ លោក នាយករដ្ឋមន្ត្រី ហ៊ុន សែន អះអាងថា, ថ្ងៃ៧ មករា ជាថ្ងៃ រំដោះ ប្រជាពលរដ្ឋ ខ្មែរ ទាំងមូល ឲ្យរួចជីវិត ពីរបបខ្មែរ ក្រហម ដែលប្រជាពលរដ្ឋ ខ្មែរ ត្រូវតែ ទទួលស្គាល់ ថ្ងៃនេះ, ហើយ លោក ព្រមានថា, អ្នក ដែលប្រឆាំង ថ្ងៃ៧ មករា នោះ គឺ ជាអ្នក មានសម្ពន្ធភាព ជាមួយ ខ្មែរក្រហម។
យ៉ាងនេះក្ដី អ្នកច្បាប់ លើកឡើង ថា, ពលរដ្ឋខ្មែរមិនអាចបំភ្លេចថ្ងៃ៧ មករា នេះបានទេ ព្រោះថា ថ្ងៃ៧ មករា ជាថ្ងៃកងទ័ពវៀតណាម ឈ្លានពានទឹកដីកម្ពុជា។
លោកនាយករដ្ឋមន្ត្រី ហ៊ុន សែន ចាត់ទុកថ្ងៃ៧ មករា ជាថ្ងៃប្រវត្តិសាស្ត្រសម្រាប់ប្រជាពលរដ្ឋខ្មែរទូទៅ ដោយលោកព្រមានអ្នកដែលប្រឆាំងថ្ងៃ៧ មករា គឺអ្នកនោះមានសម្ពន្ធភាពនឹងរបបប្រល័យពូជសាសន៍ខ្មែរក្រហម។
លោក ហ៊ុន សែន ថ្លែងដូច្នេះនៅក្នុងពិធីសម្ពោធសាងសង់អគាររដ្ឋបាល និងហេដ្ឋារចនាសម្ព័ន្ធខែត្រថ្មី គឺខែត្រត្បូងឃ្មុំ នៅព្រឹកថ្ងៃទី៥ មករា ថា ថ្ងៃ៧ មករា មិនមែនជារបស់គណបក្សប្រជាជនកម្ពុជា ផ្ដាច់មុខនោះទេ ថ្ងៃ៧ មករា ជារបស់ប្រជាពលរដ្ឋខ្មែរទាំងអស់។ លោក ហ៊ុន សែន បញ្ជាក់ថា នយោបាយឈ្នះៗរបស់គណបក្សប្រជាជនកម្ពុជា ជាឧទាហរណ៍មួយគ្រាន់តែចង់រំលាយចោលអង្គការចាត់តាំងនយោបាយ និងយោធារបស់ ប៉ុល ពត ប៉ុណ្ណោះ តែមិនចងគំនុំជាមួយអតីតយោធាខ្មែរក្រហមនោះឡើយ។ លោកបន្ថែមថា មានអតីតយោធាខ្មែរក្រហមមួយចំនួនបានធ្វើជាអភិបាលខែត្រ ដូចជាករណី លោក អ៊ី ឈាន ជាដើម។
ទោះបីជាលោកនាយករដ្ឋមន្ត្រី ហ៊ុន សែន បានព្រមានចំពោះអ្នកប្រឆាំងថ្ងៃ៧ មករា ក្ដី។ ប៉ុន្តែថ្ងៃ៧ មករា នេះ អ្នកវិភាគ អ្នកច្បាប់មួយចំនួន ព្រមទាំងគណបក្សប្រឆាំងផង ចាត់ទុកថ្ងៃ៧ មករា នេះ ជាថ្ងៃដែលកងទ័ពវៀតណាម ឈ្លានទឹកដីខ្មែរទៅវិញទេ។
ប្រធានគណៈកម្មាធិការពង្រឹងវិស័យច្បាប់ ដើម្បីការពារសិទ្ធិមនុស្សនៅកម្ពុជា លោកបណ្ឌិត ហ៊ាង ឬទ្ធី ចាត់ទុកការលើកឡើងរបស់លោកនាយករដ្ឋមន្ត្រី ហ៊ុន សែន ជារឿងមិនត្រឹមត្រូវ។ លោកបញ្ជាក់ថា សារនយោបាយបែបនេះជាសារដើម្បីចង់កេងចំណេញនយោបាយទៅវិញទេ ព្រោះថ្ងៃ៧ មករា មិនមែនជាថ្ងៃដែលតម្រូវឲ្យប្រជាពលរដ្ឋខ្មែរដឹងគុណវៀតណាម នោះទេ។
អ្នកវិភាគលើកឡើងថា នៅក្នុងដំណាក់កាលនេះ អ្នកនយោបាយត្រូវតែបញ្ចប់អំពីការប្រកាសឲ្យពលរដ្ឋខ្មែរដឹងគុណ វៀតណាមនេះ ព្រោះថា ថ្ងៃ៧ មករា នេះ មានរឿងអាថ៌កំបាំងនៅពីក្រោយខ្នងរឿងនេះ ព្រោះថា នៅពេលនោះ បើវៀតណាម មិនវ៉ៃខ្មែរក្រហមទេ ខ្មែរក្រហមក៏មិនឲ្យវៀតណាម បានសុខដែរ ធ្វើសង្គ្រាមទៅក្នុងប្រទេសវៀតណាម ហើយសង្គ្រាមនឹងត្រូវកើតឡើងនៅតាមបណ្ដោយព្រំដែន និងមិនអាចឲ្យវៀតណាម អភិវឌ្ឍន៍អ្វីបានទេ។ ក្រៅពីនេះទៀត វៀតណាម វ៉ៃខ្មែរក្រហមក្នុងគោលបំណងចង់ធ្វើជាបងធំនៅឥណ្ឌូចិន ព្រោះវៀតណាម មានសហភាពសូវៀត នៅពីក្រោយ។
អ្នកវិភាគបញ្ជាក់ថា អ្នកនយោបាយខ្មែរមិនត្រូវបិទបាំងប្រវត្តិសាស្ត្ររបស់ខ្លួននោះឡើយ។ ការបើកឲ្យពលរដ្ឋខ្មែររៀនពីប្រវត្តិសាស្ត្រពិតរបស់ខ្មែរគឺជារឿង សំខាន់បំផុតដើម្បីឲ្យប្រជាពលរដ្ឋខ្មែរដឹងពីប្រវត្តិសាស្ត្ររបស់ ខ្លួនកាន់តែច្បាស់ ចៀសវាងបញ្ហាអតីតកាលកើតឡើងសម្រាប់អ្នកជំនាន់ក្រោយទៀត ហើយត្រូវបញ្ចប់ការបកស្រាយផ្ទុយគ្នាដែលនាំឲ្យខ្មែរបែកបាក់ គ្នា៕
No comments:
Post a Comment