លោក សម រង្ស៊ី៖ វត្តមាន សម្ដេចក្រុមព្រះ មិនប៉ះពាល់ ប្រជាប្រិយភាព បក្សសង្គ្រោះជាតិ
RFA / វិទ្យុ អាស៊ី សេរី | ១១ មករា ២០១៥
ប្រធាន គណបក្ស សង្គ្រោះជាតិ លោក សម រង្ស៊ី
ផ្ដល់បទសម្ភាសន៍ ដល់អ្នកកាសែត នាអាកាសយានដ្ឋាន អន្តរជាតិ ភ្នំពេញ
កាលពីព្រឹក ថ្ងៃទី១១ មករា ២០១៤។ RFA/Morm Moniroth
ប្រធាន គណបក្ស ប្រឆាំង ដ៏ធំ នៅកម្ពុជា បញ្ជាក់ជំហរ ថា, វត្តមាន នៃសម្ដេចក្រុមព្រះ នរោត្តម រណឫទ្ធិ ក្នុងឆាក នយោបាយ នៅកម្ពុជា នឹងមិនធ្វើ ឲ្យប៉ះពាល់ ចំពោះ ប្រជាប្រិយភាព របស់ គណបក្ស សង្គ្រោះជាតិ ទេ។ ជាពិសេស នោះ លោក យល់ឃើញ ថា, ចរន្ត នៃការផ្លាស់ប្ដូរ នៅកម្ពុជា គឺ គណបក្ស សង្គ្រោះជាតិ នៅតែ នាំសំណាង សម្រាប់ ប្រជាពលរដ្ឋ កម្ពុជា ដដែល។
ការថ្លែងសារ នយោបាយ ដូចនេះ របស់លោក សម រង្ស៊ី បន្ទាប់ ពីលោក វិលត្រឡប់ ពីបំពេញ ទស្សនកិច្ច ឯកជន នៅទ្វីប អឺរ៉ុបវិញ ក្នុងរយៈពេល ប៉ុន្មានសប្ដាហ៍ កន្លងទៅនេះ។
លោក សម រង្ស៊ី អះអាង កាលពីព្រឹក ថ្ងៃទី១១ មករា នៅឯ អាកាសយានដ្ឋាន អន្តរជាតិ ភ្នំពេញ ថា, លោក មិនភិតភ័យ ចំពោះ ការវិលចូល ឆាកនយោបាយ ឡើងវិញ របស់ សម្ដេចក្រុមព្រះ នរោត្តម រណឫទ្ធិ នៅពេលនេះ ឡើយ។ លោក ចាត់ទុក ថា, នោះ គឺជាសិទ្ធិ របស់ ព្រះអង្គ។ ម្យ៉ាងទៀត, នេះ គឺ ជាចរន្ត នយោបាយ ដែលតែង មានការ ឡើង និងចុះ ជាធម្មតា។
ឆ្លើយ នឹងសំណួរ របស់ អ្នកកាសែត ដែលលើកឡើង ថា, មានការបែកបាក់ ផ្ទៃបាក់បក្ស, លោក សម រង្ស៊ី និយាយថា, អ្នកគាំទ្រ គណបក្ស សង្គ្រោះជាតិ ទាំងនៅកម្ពុជា និងខាងក្រៅប្រទេស ពុំមាន ការប្រែប្រួល ឡើយ។ ផ្ទុយទៅវិញ លោក មានសុឆន្ទៈ ថា, គណបក្ស សង្គ្រោះជាតិ គឺ ជាក្ដីសង្ឃឹម តែមួយគត់ នៅកម្ពុជា ដែលនាំមក នូវការផ្លាស់ប្ដូរ។
លោក សម រង្ស៊ី ពុំបាននិយាយអ្វីច្រើនឡើយជុំវិញវិវាទអ្នកស្រី ឡាក់ សុភាព និងកិច្ចអន្តរាគមន៍សកម្មជនដែលកំពុងជាប់ឃុំនៅក្នុងពន្ធនាគារ សម្រាប់ការវិលត្រឡប់មកវិញ លើកនេះ។
ដោយឡែកសម្ដេចក្រុមព្រះ នរោត្ដម រណឫទ្ធិ ដែលពេលនេះព្រះអង្គយាងមកដឹកនាំគណបក្សហ្វ៊ុនស៊ិនប៉ិច ឡើងវិញ ព្រះអង្គមានបន្ទូលកាលពីថ្ងៃទី៥ មករា ថា វត្តមានរបស់ព្រះអង្គនៅពេលនេះ គឺពុំមែនចូលមកដើម្បីជ្រៀតជ្រែក ឬបំបែកសំឡេងបក្សនយោបាយណាមួយឡើយ។
ព្រះអង្គមានបន្តថា អ្វីដែលធ្វើឲ្យព្រះអង្គវិលចូលឆាកនយោបាយវិញនេះ គឺចង់ស្ដារមុខមាត់សំឡេងរាជានិយមឡើងវិញតែប៉ុណ្ណោះ បន្ទាប់ពីបាក់ស្រុតងើបមុខលែងរួចក្នុងរយៈពេលប៉ុន្មានឆ្នាំចុង ក្រោយនេះ។
បណ្ឌិតវិទ្យាសាស្ត្រនយោបាយ លោក រស់ រ៉ាវុធ យល់ឃើញថា គណបក្សសង្គ្រោះជាតិ គឺនៅតែដើរជួរមុខនៃការគាំទ្រ និងជាចរន្តនៃក្នុងការផ្លាស់ប្ដូរសម្រាប់អាណត្តិបន្ទាប់នេះទៀតនៅ ឡើយ។ លោកថ្លែងបន្តថា មូលហេតុដែលសំឡេងគាំទ្រដែលមិនស្រកស្រុតនេះ គឺដោយសារសម្ពន្ធភាពផ្ទៃក្នុងបក្សនៅរឹងមាំ។ ហេតុនេះ បើទោះជាមានរលកនយោបាយថ្មីៗផុសឡើង ឬភាពរកាំរកូសផ្ទៃក្នុងបក្សក៏គណបក្សប្រឆាំងនេះនៅតែអាចការពារ ឬគ្រប់គ្រងខ្សែក្រវាត់បានដូចមុន។
បើទោះជាបែបនេះក៏ដោយចុះ ក៏សង្កេតឃើញថា វត្តមានរបស់លោក សម រង្ស៊ី កាលពីព្រឹកថ្ងៃទី១១ មករា នៅព្រលានយន្តហោះ គឺពុំមានអ្នកហែហមអមដំណើរច្រើនដូចលើកមុនៗទៀតឡើយ គឺគេឃើញមានតែសមាជិកក្នុងបក្សមួយចំនួនប៉ុណ្ណោះ មកចាំទទួលការវិលត្រឡប់មកវិញរបស់លោក សម រង្ស៊ី៕
No comments:
Post a Comment