សង្គមស៊ីវិល ថ្កោលទោស ការបញ្ចូល មន្ត្រីតុលាការ និងកងប្រដាប់អាវុធ ចូលក្នុងបក្ស នយោបាយ
RFA / វិទ្យុ អាស៊ី សេរី | ២៦ កុម្ភៈ ២០១៥
លោក គល់ បញ្ញា ប្រធាន អង្គការ ខុមហ្វ្រែល (Comfrel)
ថ្លែងទៅកាន់ អ្នកកាសែត នៅសណ្ឋាគារ អ៊ីមភើរៀល រាជធានីភ្នំពេញ
នៅថ្ងៃ ទី២០ មករា ២០១៥។ RFA/Morm Moniroth
ក្រុមសម្ព័ន្ធ កំណែទម្រង់ ការបោះឆ្នោត (អឺរ៉ា, ERA) និងក្រុមអង្គការ សង្គមស៊ីវិល ចេញសេចក្ដី ថ្លែងការណ៍ នៅថ្ងៃ ទី២៦ កុម្ភៈ ថ្កោលទោស គណបក្សនយោបាយ ដែលសំដៅ លើគណបក្ស កាន់អំណាច ដែលបានបញ្ចូល មន្ត្រីតុលាការ និងមន្ត្រី កងរាជអាវុធហត្ថ ទៅក្នុងជួរ ថ្នាក់ដឹកនាំ គណបក្ស របស់ខ្លួន និងចូលរួម សកម្មភាព ប្រឆាំង បក្សផ្សេង។
ការបញ្ចូលនេះ គឺ រំលោភរដ្ឋធម្មនុញ្ញ, នីតិរដ្ឋ, គោលការណ៍ ប្រជាធិបតេយ្យ, ពិសេស ការបោះឆ្នោត ដោយសេរី និងយុត្តិធម៌។
ការចេញ សេចក្ដីថ្លែងការណ៍ ថ្កោលទោសនេះ នៅបន្ទាប់ ពីគណបក្ស ប្រជាជន កម្ពុជា បានធ្វើ សមាជវិសាមញ្ញ របស់ខ្លួន កាលពីថ្ងៃ ទី១ ខែកុម្ភៈ ឆ្នាំ២០១៥ ធ្វើកំណែទម្រង់ គណបក្ស ដែលបាន ដាក់បញ្ចូល ក្រុមយុវជន ក្នុងនោះ មានទាំងកូន ថ្នាក់ដឹកនាំ ជាន់ខ្ពស់ ដូចជាកូន របស់លោក ហ៊ុន សែន អនុប្រធាន គណបក្ស ប្រជាជនកម្ពុជា, កូន របស់លោក ស ខេង កូន របស់លោក សុខ អាន, និងកូន របស់លោក សាយ ឈុំ ជាដើម ទៅក្នុងគណៈកម្មាធិការ កណ្ដាល គណបក្ស ប្រជាជនកម្ពុជា។
ក្រៅពីនេះទៀត គណបក្សប្រជាជនកម្ពុជា បានបញ្ចូលមន្ត្រីជាន់ខ្ពស់កងរាជអាវុធហត្ថ ដូចជា លោក រ័ត្ន ស៊្រាង ជាមេបញ្ជាការកងរាជអាវុធហត្ថរាជធានីភ្នំពេញ និងស្នងការ ស្នងការរងរាជធានីភ្នំពេញ និងមន្ត្រីតុលាការទៀតផង។ នៅក្នុងការផ្លាស់ប្ដូរ និងធ្វើកំណែទម្រង់បញ្ចូលមន្ត្រីតុលាការ មន្ត្រីនគរបាល យោធា និងកងរាជអាវុធហត្ថនេះមានប្រមាណ ៨០រូប ដែលពួកគេទាំងនោះមានសិទ្ធិសម្រេចគោលនយោបាយសំខាន់ៗក្នុងប្រទេស និងក្រៅប្រទេសរបស់គណបក្ស ការចាត់តាំងការងារមន្ត្រី ការងារគ្រប់គ្រងហិរញ្ញវត្ថុ ថវិការបស់គណបក្ស។ នេះមានន័យថា មន្ត្រីតុលាការ យោធា នគរបាលក្លាយជាអ្នកនយោបាយ ឬមន្ត្រីនយោបាយរបស់គណបក្សប្រជាជនកម្ពុជា។
សេចក្ដីថ្លែងការណ៍របស់ក្រុមសម្ព័ន្ធកំណែទម្រង់ការបោះឆ្នោត អឺរ៉ា និងក្រុមអង្គការសង្គមស៊ីវិលលើកឡើងថា ការបញ្ចូលមន្ត្រីតុលាការ និងកម្លាំងប្រដាប់អាវុធនេះ គឺរំលោភរដ្ឋធម្មនុញ្ញមាត្រា១២៨ ដែលចែងថា តុលាការជាអំណាចឯករាជ្យ និងស្មារតីរដ្ឋធម្មនុញ្ញ អំពីការពង្រឹង និងការការពារឯកភាពជាតិ គោលការណ៍ប្រជាធិបតេយ្យសេរីពហុបក្ស ចែងក្នុងមាត្រា៥១ថ្មី និងច្បាប់ដទៃជាច្រើនទៀត។
ទន្ទឹមនឹងនេះ ក្រុមការងារវិសោធនកម្មច្បាប់បោះឆ្នោត ដែលកំពុងពិភាក្សាច្បាប់បោះឆ្នោតនេះ ក៏កំពុងមានភាពចម្រូងចម្រាសនៅត្រង់ចំណុចនេះដែរ គឺគណបក្សប្រជាជនកម្ពុជា បានដាក់បញ្ចូលមន្ត្រីតុលាការ អាជ្ញាធរដែនដីគ្រប់លំដាប់ថ្នាក់ កងយោធពលខេមរភូមិន្ទ នគរបាលជាតិ និងមន្ត្រីតុលាការ អាចចូលរួមក្នុងយុទ្ធនាការឃោសនាបោះឆ្នោត បន្ទាប់ពីបញ្ចប់ម៉ោងធ្វើការ ឬឋិតនៅក្រៅម៉ោងធ្វើការ ឬមិនឋិតក្នុងពេលបំពេញការងារក្នុងសមត្ថភាពផ្លូវការ។
ប្រធានក្រុមការងារគណបក្សប្រជាជនកម្ពុជា បានពន្យល់ថា មូលហេតុដែលគណបក្សប្រជាជនកម្ពុជា ចង់ឲ្យមន្ត្រីតុលាការ យោធា និងនគរបាលជាតិ ចូលរួមឃោសនាគាំទ្រគណបក្សនយោបាយនៅពេលឃោសនាបោះឆ្នោតនោះ គឺយោងតាមកតិកាសញ្ញាអន្តរជាតិស្ដីពីសិទ្ធិពលរដ្ឋ និងនយោបាយ និងស្របតាមរដ្ឋធម្មនុញ្ញកម្ពុជា។
តែខាងគណបក្សសង្គ្រោះជាតិ មិនឯកភាពចំណុចនេះទេ ព្រោះផ្ទុយពីមាត្រា១៥ នៃច្បាប់ស្ដីពីគណបក្សនយោបាយ។ ក៏ប៉ុន្តែការខ្វែងគំនិតនេះ ក្រុមការងារគណបក្សទាំងពីរ បានបញ្ជូនឲ្យថ្នាក់ដឹកនាំជាអ្នកសម្រេច។
នៅត្រង់ចំណុចនេះ ក្រុមសម្ព័ន្ធកំណែទម្រង់ការបោះឆ្នោតអឺរ៉ា និងក្រុមអង្គការសង្គមស៊ីវិល បានផ្ដល់អនុសាសន៍ថា ទោះជានៅក្នុងម៉ោងបំពេញការងារ ឬក្រៅម៉ោងបំពេញការងារក្ដី មន្ត្រីកងរាជអាវុធហត្ថ នគរបាលជាតិ និងមន្ត្រីតុលាការ មិនត្រូវធ្វើសកម្មភាពគាំទ្រ ឬប្រឆាំងគណបក្សណាមួយឡើយ ព្រោះថា កងយោធពលខេមរភូមិន្ទ នគរបាល មានតួនាទីសំខាន់រក្សាសន្តិសុខក្នុងការដំណើរការបោះឆ្នោត ហើយមន្ត្រីតុលាការ ក៏នឹងចូលរួមផ្ទាល់ក្នុងការងារបណ្ដឹងទាក់ទងការបោះឆ្នោត៕
No comments:
Post a Comment