បក្សប្រឆាំង នឹងប្រារព្ធ ពិធីរំឭក វិញ្ញាណក្ខន្ធ អ្នកស្លាប់ ដោយការ គប់គ្រាប់បែក ឆ្នាំ១៩៩៧
RFA / វិទ្យុ អាស៊ី សេរី | ២៨ មិនា ២០១៥
សាច់ញាតិ ជនរងគ្រោះ ក្នុងព្រឹត្តិការណ៍ គប់គ្រាប់បែក ដៃ នៅមុខអតីត មន្ទីរ រដ្ឋសភា កាលពីថ្ងៃ ៣០ មីនា ឆ្នាំ១៩៩៧
អុជធូប គោរព វិញ្ញាណក្ខន្ធ នៅខាងមុខ ចេតិយ នៅព្រឹកថ្ងៃ ទី៣០ កញ្ញា
ឆ្នាំ២០១៣។ RFA/Den Ayuthyea
អាជ្ញាធរ រាជធានី ភ្នំពេញ អនុញ្ញាត ឲ្យគណបក្ស សង្គ្រោះជាតិ ជួបជុំ ធ្វើពិធី រំឭកវិញ្ញាណក្ខន្ធ អ្នកស្លាប់ ដោយការគប់ គ្រាប់បែក នៅក្បែរ សួនច្បារ មុខវត្ត បទុមវតី នៅព្រឹកថ្ងៃ ទី៣០ ខែមីនា។ យ៉ាងណា ក៏ដោយ អាជ្ញាធរ មិនអនុញ្ញាត ឲ្យគណបក្ស ប្រឆាំងយកពិធីនោះ ធ្វើជាវេទិកា វាយប្រហារ រដ្ឋាភិបាលឡើយ។
ថ្ងៃទី៣០ ខែមីនា ឆ្នាំ២០១៥ គឺជាខួបគម្រប់ ១៨ឆ្នាំនៃព្រឹត្តិការណ៍វាយប្រហារគ្រាប់បែកដៃទៅលើហ្វូងបាតុករ ដឹកនាំដោយ លោក សម រង្ស៊ី នៅមុខមន្ទីររដ្ឋសភាចាស់ក្បែរព្រះបរមរាជវាំង។ ចាប់តាំងពីពេលនោះមក មន្ត្រីគណបក្សប្រឆាំងតែងនាំគ្នាទៅជួបជុំធ្វើពិធីរំឭក វិញ្ញាណក្ខន្ឋជនរងគ្រោះនៅទីនោះ។
អ្នកនាំពាក្យសាលារាជធានីភ្នំពេញ លោក ឡុង ឌីម៉ង់ ថ្លែងឲ្យដឹងនៅថ្ងៃទី២៨ មីនា ថា អាជ្ញាធររាជធានីភ្នំពេញបានទទួលការជូនដំណឹងរបស់គណបក្សសង្គ្រោះ ជាតិ រួចហើយអំពីការជួបជុំនោះ ហើយអាជ្ញាធរក៏បានអនុញ្ញាតរួចហើយដែរ។
គណបក្សសង្គ្រោះជាតិ ប្រកាសឲ្យដឹងថា ពិធីជួបជុំរំឭកវិញ្ញាណក្ខន្ធនឹងចាប់ផ្តើមពីម៉ោង ៧ ដល់ម៉ោង ១១ថ្ងៃត្រង់ ដោយមានការចូលរួមពីអនុប្រធានគណបក្សសង្គ្រោះជាតិ លោក កឹម សុខា។ ក្នុងពិធីនោះ ព្រះសង្ឃចំនួន ៥០អង្គ នឹងត្រូវគេនិមន្តចូលរួមរាប់បាត្រ ដើម្បីឧទ្ទិសកុសលដល់វិញ្ញាណក្ខន្ធបាតុករដែលបានបាត់បង់ជីវិត។ គណបក្សសង្គ្រោះជាតិ ក៏បានអំពាវនាវសាធារណជនទូទៅ ចូលរួមក្នុងពិធីនោះឲ្យបានច្រើនកុះករផងដែរ។
យ៉ាងណាក៏ដោយ លោក ឡុង ឌីម៉ង់ បញ្ជាក់ថា ក្នុងពិធីជួបជុំនោះ អាជ្ញាធរមិនអនុញ្ញាតឲ្យមានអ្នកចូលរួមលើសពី ២០០នាក់ឡើយ ហើយក៏មិនអនុញ្ញាតឲ្យមានការដង្ហែក្បួននោះដែរ។ លើសពីនេះ លោកថា អាជ្ញាធរក៏មិនអនុញ្ញាតឲ្យមេដឹកនាំបក្សប្រឆាំង យកពិធីជួបជុំនោះដើម្បីធ្វើជាវេទិកាវាយប្រហាររដ្ឋាភិបាលនោះទេ៖ «មិន ឲ្យលើសពីម៉ោង ១១ មិនឲ្យឈានទៅដល់មានការហែក្បួនការបំពងសំឡេង កុំឲ្យប្រាសចាកប្រធានបទ ដើម្បីយកធ្វើជាវេទិកាវាយប្រហារទៅលើឥស្សរជននយោបាយ ឬប្រទេសជិតខាង កុំឲ្យមានលក្ខណៈញុះញង់។»
ពិធីជួបជុំរំឭកវិញ្ញាណក្ខន្ធរបស់គណបក្សប្រឆាំងឆ្នាំនេះ នឹងមិនមានវត្តមានរបស់ លោក សម រង្ស៊ី ប្រធានគណបក្សសង្គ្រោះជាតិ ចូលរួមឡើយ ដោយលោកជាប់រវល់បំពេញទស្សនកិច្ចការងារនៅក្រៅប្រទេស។
អ្នកនាំពាក្យគណបក្សសង្គ្រោះជាតិ លោក យ៉ែម បុញ្ញឫទ្ធិ មានប្រសាសន៍ថា ក្រៅពីសកម្មជន និងអ្នកគាំទ្រគណបក្សសង្គ្រោះជាតិ ជនរងគ្រោះ និងសាច់ញាតិរបស់ពួកគេ ក៏ត្រូវបានអញ្ជើញឲ្យចូលរួមដែរ។ លោក យ៉ែម បុញ្ញឫទ្ធិ បញ្ជាក់ថា លោកមិនទាន់ដឹងតើ លោក កឹម សុខា នឹងថ្លែងសារនយោបាយអ្វីខ្លះនៅឡើយទេនៅពេលនោះ? ទាក់ទងនឹងការស្វែងរកយុត្តិធម៌សម្រាប់ជនរងគ្រោះវិញ លោក យ៉ែម បុញ្ញឫទ្ធិ ឲ្យដឹងថា គណបក្សសង្គ្រោះជាតិ នៅតែបន្តទទូចឲ្យរដ្ឋាភិបាលស្វែងរកមុខជននៅពីក្រោយការវាយប្រហារ នោះ មកផ្ដន្ទាទោសតាមច្បាប់៖ «យើងសង្កេតឃើញនិទ្ទណ្ឌភាពនៅប្រទេស យើងនៅមានច្រើនករណីណាស់ ហើយនៅតែជំរុញឲ្យបន្តការស៊ើបអង្កេតដើម្បីរកជនដៃដល់មកកាត់ទោស មុននឹងយើងហ៊ាននិយាយថា ប្រទេសយើងមាននីតិរដ្ឋនោះ។»
ការវាយប្រហារគ្រាប់បែកដៃនៅថ្ងៃទី៣០ ខែមីនា ឆ្នាំ១៩៩៧ ទៅលើបាតុកម្មរបស់បក្សប្រឆាំង បានបណ្ដាលឲ្យមនុស្សយ៉ាងហោចណាស់ ១៦នាក់បាត់បង់ជីវិត និងមនុស្សជាង ១៥០នាក់ផ្សេងទៀតរងរបួស។ ប៉ុន្តែរហូតមកទល់ពេលនេះ ជនប្រព្រឹត្តិមិនត្រូវបានគេចាប់ខ្លួនមកផ្ដន្ទាទោសឡើយ។
អង្គការឃ្លាំមើលសិទ្ធិមនុស្សអន្តរជាតិ យូមែន រ៉ៃត៍ វ៉ច្ឆ (Human Rights Watch) ចាត់ទុកការវាយប្រហារនោះ ថាជាចេតនារបស់រដ្ឋាភិបាលក្នុងការកម្ទេចអ្នកនយោបាយបក្សប្រឆាំងនៅ កម្ពុជា។ យូមែន រ៉ៃត៍ វ៉ច្ឆ លើកឡើងដែរថា ការវាយប្រហារនេះ អាចពាក់ព័ន្ធនឹងកងអង្គរក្សរបស់លោកនាយករដ្ឋមន្ត្រី ហ៊ុន សែន៕
No comments:
Post a Comment